02/11/2025
الأغلبية نتاعكم سمعو بلي إيطاليا 🇮🇹 مدت بزاف فيزا دراسية العام لي فات و راهي حاليا تسحق مهاجرين, اليوم راح نحكو على كيفاه تقرى ليسانس و لا ماستر نتاعك في إيطاليا و المتطلبات.
أول حاجة : علاه بزاف جزائريين راهم يخيرو في إيطاليا؟
أهم سبب هو التكاليف الرخيصة و أنو مكانش كونت بلوكي كيما ألمانيا, إيطاليا عندها نظام خاص يخلي الطالب بدفع مستحقات الجامعة حسب دخل والديه تكون شبه مجانية أو مجانية (حسب الجامعة) إذا كان دخل الوالدين أقل من 2200 ألف أورو.
إسم النظام The Italian ISEE (Equivalent Economic Situation Indicator)
و تقدر تزيد تسجل في منحة سوا نتاع الحكومة و لا الجامعة و لا المقاطعة باش تنحي عليك التكاليف لوخرى نتاع الكرا.
و زيد ديبلوم معترف به في سوق العمل الأوروبي كامل, تسما مام لكان ملقيتش خدمة في إيطاليا تقدر تروح بيه لفرنسا وألمانيا سيرتو لقريت بالإنجليزية.
باش تقرى ليسانس و لا laurea triennale لازم يكون عندك باك مترجم (حسب البرنامج لي حاب تدخلو) و من الأحسن موثق , و تقدر تسجل بباك قديم مام لقريت بيه ليسانس و ماستر.
بالنسبة للماستر لازم يكون عندك ليسانس متوافق مع التخصص و تقدر تسجل دير ماستر دوزيام نورمال.
البرامج الدراسية تلقاوهم في السيت نتاع كل جامعة, إقراو المتطلبات نتاع البروغرام و و هيو الوثائق لي تسحقوهم كامل. و كاين تخصصات في الطب في الهندسة يديرو فيهم إختبار كتابي باش يقبلوك في هذي الحالة من الأحسن تسجل في برنامج خلاف ميسحقش تاست بالتوازي.
أسكو شهادة اللغة مطلوبة:
شهادة اللغة سوا الإنجليزية و لا الإيطالية مطلوبة في أغلب البرامج أقل شيئ A2 و كاين لي يديرولهم تاست أونلاين في الزووم برك, بصح مام و تدي القبول راح تلقى السفاراة طالبة شهادة لغة رسمية سيرتو مؤخرا ولاو مشددين عليها بزاف.
شهادة اللغة الإيطالية تعقب الإختبار في المعهد الإيطالي الثقافي بالعاصمة https://iicalgeri.esteri.it/fr/ و الشهادات نتاعو فقط لي مقبولة في اللغة الإيطالية, تسما الشهادات هاذوك نتاع البريفي و المركز المكثف للغات مش معتارفين بيهم و تدي الرفض في جرتهم.
