14/10/2026
⛔ وجع الناس أهم من أي صراع وخلاف ⛔
قبل ما تدخل أي نقاش أو جدال وانت مستخبي ورا شاشة أو حتي قدام الناس اسأل نفسك بجد :
هل كلامك هيخفف وجع حد ولا هيزود عليه ؟
تخيل معايا يا صديقي واحد مش لاقي ياكل وإنت بتحاول تقنعه بفكرك وتوجهاتك ومبادئك 🤔
تفتكر كلامك هيفرق معاه إيه وهو جعان؟!
تخيل كمان واحد موجوع ومكسور وإنت داخل معاه في مناظرة عن مين الصح ومين الغلط !! 🤔
الحقيقة الناس حوالينا متلخبطة ، موجوعة، وقلقانة، ومرعوبة، ومصدومة، وبتحاول تلاقي حاجة تسندها وتديها أمل حتي لو كان مجرد إيفنت يروح يحضره مرة في السنة . . .
علشان كدا خلي بالك
📌 الناس حرفياً عطشانه ومحتاجة لحب عملي مش مناظرات عن مين بيعرف يتكلم عن الحب أكتر
📌 محتاجة شفا وعلاج مش جدال عن مين أحسن دكتور
📌 محتاجة حد يسمعها مش حد يستغل وجعها عشان يثبت وجهة نظره وعبقريته
فانا احب جدا أسال نفسي وكلنا نسأل نفسنا بصدق :
هل اللي بنقوله بيخفف وجع حد؟
هل اللي بنؤمن بيه بيخلينا أرحم بالناس؟
هل خلافاتنا بتبني حياة ولا بتخلينا ننسى الحياة نفسها ؟
مش كل قضية لازم نكسب فيها نقاش ومش كل اختلاف لازم نحسمه قبل ما نمد إيدينا لبعض 🤝
في الاول وفى الآخر . . عظيم إننا نتمسك بما نؤمن بيه من معتقدات ومبادئ حتي وإن كنا كمان أحياناً محتاجين نمتحنه ونفحصه لكن السوال الأهم إيماننا دا بيخلينا نعمل إيه في حياة الناس ؟؟؟؟؟
متشاف ـ ملموس ولا مجرد مناظرات قوية بتعمل دوشة وبس
فبصراحة قبل ما تحاول تقنع حد إنك صح . . حاول تكون سبب إن حياته تبقى أحسن وأفضل
