Lizeoa

15/10/2026

💚 Lizeoa komunitate handi baten proiektu sendoa da.

Langileak, familiak eta herritarrak gara Lizeoa osatzen dugun hiru hankak. Eta komunitate osoaren ordezkaritza kudeaketan egotea funtsezkoa da proiektua sendotzeko eta etorkizunera begira elkarrekin urratsak egiteko.

Edurne Baztarrikak argi dauka:

💬 «Komunitate handi baten proiektu sendo bat da Lizeoa eta kudeaketan komunitate osoaren ordezkaritza egotea garrantzitsua dela pentsatzen dut, proiektua sendotzeko eta euskara, euskalgintza eta herrigintza aurrera eramateko».

Horregatik, bazkide laguntzaile izatea Lizeoaren parte izatea ere bada: herritarren ahotsa gehitzea, erabaki guneetan parte hartzea eta euskararen zein herrigintzaren aldeko proiektu kolektibo hau indartzea.

💚 Lizeoa guztiona da. Elkarrekin eraikitzen dugu.

Eta zu, bazkide laguntzaile izan nahi duzu?

🔗 BIO-an duzu bazkide egiteko lotura zuzena, edo idatzi zure nabigatzailean: www.labur.eus/lizeolagun

?

14/10/2026

🍂 Udazkena esku artean, kolorez kolore! 🎨

Nola sentitzen da udazkena hatz-puntetan? Eta zer gertatzen da kolore bat bestearekin nahasten dugunean? 🟠🟡🟤

Bi urtekoen geletan udazkena margotzen eta esperimentatzen ari gara! 🍁 Tenperak hartu, ukitu, zabaldu eta koloreak nahastu ditugu, udazkeneko koloreekin mural eder bat osatu arte.

🎨 Tenperekin koloreak nahasten ikasten dugu. Tenperak erraz nahasten direnez, kolore berriak sortzen direla ikusten dugu. Horrela, esperimentatuz eta probatuz, koloreen mundua deskubritzen dugu.

🖐️ Eskuak ere ikasteko tresna dira: tenperaren testura sentitu, ukitu, zabaldu eta materialarekin esperimentatzen dugu. Material desberdinak manipulatzea funtsezkoa da gure txikien ikaskuntza-prozesuan.

🍂 Kolorez betetako esperientzia, sormena askatu eta udazkena beste modu batean bizitzeko!

🎶 Eta bideoan entzuten den abestia? Gure webguneko «Gure berri» atalean, «Lilitegiko abestiak» bilduman aurkituko duzue «Udazkena» kanta, beste askoren artean. Entzun eta gozatu gure txikiekin batera!

13/10/2026

💚 Lizeoa publikoa da, herritarrena delako.

Lizeoa Pasaiako eta Lezoko hezkuntza-proiektua da, eta kooperatiba integrala ere bada: langileak, familiak eta herritarrak gara osatzen dugun hiru hankak.

Baina zer esan nahi du herritarrentzat Lizeoaren parte izateak?

Gaurko bideoan, Agustin Migeltorenak, gure bazkide laguntzaileetako batek bere ikuspegia partekatu du: "Azkenaldian publikoa bakarrik lotzen da administrazioaren pean dauden eskolekin. Nik aldarrikatu nahi dut Lizeoa publikoa dela, publikoa da herritarrena delako, besteak beste bazkide laguntzaileena ere badelako."

Herritarrek Lizeoko bazkide laguntzaile izateko aukera duzue, hezkuntza-proiektuaren parte izan eta erabaki guneetan parte hartzeko.

💚 Lizeoa guztiona da. Elkarrekin eraikitzen dugu, egunero.

Eta zuk, bazkide laguntzaile izan nahi duzu?

🔗 BIO-an duzu bazkide egiteko lotura zuzena, edo idatzi zure nabigatzailean: www.labur.eus/lizeolagun

?

09/10/2026

💚 BIDEAN BAT GARA… ZIZUR NAGUSIRA! 💚

🎉 Kilometroak atzean utzita, badator udazkeneko hurrengo hitzordua: NAFARROA OINEZ!

📍 Urriaren 18an, Zizur Nagusian elkartuko gara, Erentzun eta San Fermin ikastolek antolatutako jaian, Bidean bat gara lelopean.

Ikastolen jaiak ospakizun hutsa baino gehiago dira: auzolana, euskara eta gure hezkuntza-proiektua indartzeko topaguneak dira. Horregatik, Lizeoko komunitatea ere parte hartzera animatu nahi dugu! 💚

🚌 Zizur Nagusira joateko autobusa jarriko dugu familientzat!

🗓️ Urriak 18, igandea
🕘 Irteera: 9:00ak aldera
💶 Prezioak:

Gurasoak: 11 €
Ikasleak: 6 €
Lizeokoa ez den pertsonak: 14 €

✍️ Autobusean izena emateko, bete galdetegia [www.labur.eus/zizurnagusia] –BIO-an lotura– urriaren 15a baino lehen, eta egin diru-sarrera kontu honetan:

🏦 Kutxabank: ES16 2095 5003 14 1061799465
👤 Onuraduna: Gaztelutxo Guraso Elkartea

🌿 Bidean bat gara. Euskararen alde, ikastolen alde, elkarrekin!

Animatu eta zatoz Zizur Nagusira! 💚

08/10/2026

💚 Lizeoa guztiona da, egin bazkide laguntzaile!

Pasaiako eta Lezoko hezkuntza-proiektua gara. Eta kooperatiba integrala ere bagara: langileak, familiak eta herritarrak gara Lizeoa osatzen dugun hiru hankak.

Gure komunitatean herritarrek baduzue zuen lekua. Lizeoko bazkide laguntzaile izanda, proiektuaren parte izan eta erabaki guneetan parte hartzeko aukera izango duzue.

Baina, zergatik egin Lizeoko bazkide laguntzaile?

Datozen egunetan, gaur egun bazkide diren bost herritarren ahotsak ekarriko ditugu. Bakoitzak bere arrazoia du, bere begirada eta bere esperientzia.

Bost pertsona. Bost ahots. Eta ideia bera: Lizeoa elkarrekin eraikitzen dugula.

🔗 Bazkide laguntzaile egin nahi izanez gero: www.labur.eus/lizeolagun

Laster zuekin, gure bost lagunak 💚

07/10/2026

📚✨ Egileen saioak Lizeoan

Hasi ditugu Egileen saioak, Euskal Herriko Idazleen Elkartearen laguntzarekin eta Pasaiako Udalaren babesarekin.

Ekimen honen bidez, idazleak, ipuin-kontalariak eta ilustratzaileak Juanba Berasategira hurbiltzen dira, gure ikasleei literatura gertutik ezagutaraztera eta sormena piztera.

Oraingoan, Maite Franko idazle eta ipuin-kontalaria izan dugu Lehen Hezkuntzako lehen zikloko ikasleekin 📖

Ipuin harrigarri eta hezitzaileak bata bestearen atzetik kontatzen aritu zaigu Maite, eta ikasleak arreta handiz eta pozarren egon dira istorio bakoitzaren atzean zer zetorren jakin nahian. Begiak zabal-zabalik, belarriak erne eta irudimena martxan! ✨ 💚

Eskerrik asko, Maite, gurekin partekatutako istorio eta une zoragarriengatik!



Euskal Idazleen Elkartea-EIE Bokale

05/10/2026

Zor diegu!

'Badiako ikastola txiki kementsu haiek' dokumentalaren aurkezpen jendetsua egin zen ostiralean Donibaneko Juanba Berasategi aretoan.

05/10/2026

Zor dizuegu 💚 Badiako ikastola txiki kementsu haiek

Pasa den ostiralean estreinatu zen “Badiako ikastola txiki kementsu haiek” dokumentala, Lezoko eta Pasaiako Udalek antolatuta. Guretzat ez zen dokumental baten estreinaldi hutsa izan, gure historiarekin bat egiteko une zoragarria baizik.

Egun Pasaia-Lezo Lizeoa dena ez zen ezerezetik sortu. Pasaiako lau barrutietan eta Lezon, frankismo betean, ikastola txikiak sortu zituzten andereñoek, gurasoek eta herritarrek jarri zituzten elkarrekin egiten ari garen bide honen lehen harriak. Euskaraz ikasi eta hezi nahi zuten, eta horretarako debekuei, isunei eta errepresioari aurre egin behar izan zieten. Kemenarekin, ausardiarekin eta elkarlanarekin.

🌻 Bide horren emaitza gara gu.

Horregatik, ahotsak.eus ekimenak ekoiztu duen dokumentalaren estreinaldia haiei egindako omenaldia izan da, haien ahotsa, oroitzapenak eta bizipenak pantailara ekarriz.

Ekitaldia borobiltzeko Lizeoko abesbatzak eta Jurgi Ekizak “Zor diegu” kantua interpretatu zuten. Izenburuak dioen bezala, zor diegu eta.

💚 Zor diegu euskaraz ikasteko eta bizitzeko bidea ireki zutelako
💚 Zor diegu amore eman ez zutelako
💚 Zor diegu gaur garena posible egin zutelako

Hau ez da hemen bukatu, “Badiako ikastola txiki kementsu haiek” dokumentalaren pase berriak prestatzen ari gara eta urrian zehar han-hemenka ikusteko aukera izango duzue. Laster esango ditugu datak eta lekuak.

Gure historia ezagutzea ere etorkizunari begiratzeko modu bat delako.

Badiako ikastola txiki kementsu haiek, orain gu gara 💚


eus

05/10/2026

💚 KILOMETROAK 2026: ERRONKA Lazkaon!

Atzo Lazkaon primerako ordezkariak izan genituen KILOMETROAK jaian. Aurten ere, DBHko bigarren zikloko ikasle talde batek ERRONKAn parte hartu zuen.

Goiz osoan zehar, gune batetik bestera ibili ziren, proba eta erronka desberdinei aurre eginez eta jarrera bikaina erakutsiz.

🧑‍🩰 Ikastola bakoitzak bere aurkezpena egin zuen dantza baten bidez, aurtengo abestiaren doinuarekin

🧠 G*i desberdinetako ezagutzak ere neurtu zituzten galdera-joko batean

🍢 Sukaldaritza ere izan zen tartean, ikasleek prestatutako pintxoekin

🎤 Eta, noski, bertsolaritzak ere izan zuen bere lekua

🏃 Ginkanak proba desberdinak gainditzeko aukera eman zien, eta eguna borobiltzeko, ikastola guztiak elkartu ziren pentatloian parte hartzeko

Ondoren, paella goxo batekin indarrak berreskuratu eta arratsaldeko kontzertuez gozatzeko aukera izan zuten gure ikasleek 🎶

Euskaraz, elkarrekin, erronkei aurre eginez. Beste behin ere, Kilometroak esperientziaz, elkarlanaz eta ondo pasatzeko unez betetako eguna izan da 💚

Mila esker, LAZKAO!!!



Kilometroak

30/09/2026

💬🌱 Plazarik gabe nola irtengo gara euskaraz?

Lezoko Udalak antolatutako Lezo Euskaragarri Ahalduntze Eskolaren barruan, galdera horri buruz hausnartuko dute urriaren 7ko hitzaldian, GUKA Bilboko euskaltzaleon plaza askearen esperientziatik abiatuta.

🎙️ Maialen Gago, GUKAko kidea, izango da hizlaria, Bilboko esperientzia eta haren inguruko gogoetak partekatzen.

🗓️ Urriak 7, asteazkena
🕡 18:30
📍 Lezoko Kultura Aretoa

💚 Lizeoko komunitatea ere hitzaldian parte hartzera animatu nahi dugu! Euskaraz bizitzeko bidean, elkartzea, entzutea eta elkarrekin hausnartzea aurrerapausoak dira euskararentzako.