General Wingate Poly Technic college / ጀነራል ዊንጌት ፖሊ ቴክኒክ ኮሌጅ

25/09/2026

አርብ፡- መስከረም 15 ቀን 2019 ዓ.ም

ኮሌጁ ከፑራቶስ ጋር በመተባበር ያሰለጠናቸውን የመጀመሪያ ዙር የቤከሪ ሰልጣኞች አስመረቀ!!

ጀነራል ዊንጌት ፖሊ ቴክኒክ ኮሌጅ ከፑራቶስ (Puratos Bakery School Charity Organisation) ጋር በመተባበር ያሰለጠናቸውን 24 የመጀመሪያ ዙር የቤከሪ ሙያ ሰልጣኞች ዛሬ መስከረም 15 ቀን 2019 ዓ.ም. በደማቅ ሁኔታ አስመረቀ።

በኬክ፣ ዳቦ እና ቸኮሌት አሰራር የሰለጠኑት እነዚህ ተመራቂዎች የብቃት ማረጋገጫ (COC) ምዘናን ሙሉ በሙሉ ያለፉ ሲሆን የትምህርት ወጪያቸውም ሙሉ በሙሉ በፑራቶስ ተቋም የተሸፈነ ነው።

በምረቃ ስነ-ስርዓቱ ላይ የአዲስ አበባ ከተማ አስተዳደር የስራና ክህሎት ቢሮ ከፍተኛ የስራ ሃላፊዎች፣ በኢትዮጵያ የቤልጂየም አምባሳደር አኔሊስ ቨርስቲሼል (Annelies Verstichel)፣ የፑራቶስ ድርጅት መስራችና ሃላፊ ኤዲ ቫን ጆል ስግርስ (Jole segeres)፣ የተለያዩ ድርጅቶች ኃላፊዎች፣ የኮሌጆች አመራሮች እንዲሁም የተመራቂ ቤተሰቦች ታዳሚ ሆነዋል።

የኮሌጁ ዲን አቶ መለሰ ይግዛው በስነ-ስርዓቱ ላይ እንደገለጹት ይህ ስልጠና የመንግሥትና የግል ተቋማትን (PPP) አጋርነት በማጠናከር የክህሎት ክፍተቶችን ለማስቀረት ታስቦ የተዘጋጀ የክህሎትና የቴክኖሎጂ ማሸጋገር ፕሮግራም ነው ብለዋል፡፡

ዋና ዲኑ አክለውም ሰልጣኞቹ ስልጠናቸውን አጠናቀው ከመመረቃቸው በፊት ሙሉ በሙሉ በካርፉር (Carrefour) ኩባንያ የሥራ ዕድል ማግኘታቸው የትብብሩን ስኬታማነት እንደሚያሳይ አብራርተዋል።

በሌላ በኩል በመድረኩ ላይ የተገኙት በቢሮ ኃላፊ ደረጃ የአዲስ አበባ ከተማ አስተዳደር ስራና ክህሎት ቢሮ የኢንተርፕራይዝና ቴክኖሎጂ ልማት ዘርፍ ም/ቢሮ ኃላፊ የሆኑት አቶ ሚዴክሳ ከበደ ከግሉ አልሚ ጋር ቅንጀት ፈጥሮ የዜጎችን ክህሎት ማሳደግ፣ የስራ ዕድልን ማስፋት እና ተዓምራዊ ዕድገትን ማስመዝገብ የሚቻለው በትብብር መሆኑን ይህ መርሐግብር ማሳያ ነው ብለዋል፡፡

ኃላፊው አክለውም ፑራቶስና ጀነራል ዊንጌት አብረው መስራታቸው ከሙያዊ ክህሎትና ከኢኮኖሚ ዕድገት ባሻገር በሁለቱ ሀገሮች መካከል ያለውን የሁለትዮሽ ግንኙነት የበለጠ እንደሚያጠናክረው አጽንኦት ሰጥተዋል፡፡

ኮሌጁ በቀጣይም ጥራቱን የጠበቀ ስልጠና በመስጠትና የሰልጣኞችን ቁጥር በማሳደግ የገበያውን ፍላጎት መሰረት ያደረጉ ሙያተኞችን ለማፍራት እየሰራ ይገኛል፡፡
‹‹በላቀ አገልግሎት የመረጃ ተደራሽነት››

22/09/2026

ማክሰኞ:- መስከረም 12 ቀን 2019 ዓ.ም

ኮሌጁ ከባለድርሻ አካላት የውይይት መድረክ አካሄደ!!

ጀነራል ዊንጌት ፖሊ ቴክኒክ ኮሌጅ በአዲስ ከተማ፣ በኮልፌ ቀራንዮ እና በጉለሌ ክፍለ ከተሞች ስር ከሚገኙ ከ20 በላይ የመንግስት ሁለተኛ ደረጃ ትምህርት ቤቶች ርዕሳነ መምህራን ጋር በዛሬው ዕለት ስኬታማ የምክክር መድረክ አካሄደ፡፡

ይህ የባለድርሻ አካላት መድረክ አዳዲስ ሰልጣኞችን ለመቀበል በሚደረገው ዝግጅት ዙሪያ፣ በቀጣይ ለሁለተኛ ደረጃ ተማሪዎች በጋራ ለሚሰጡ የሙያ ስልጠናዎች አተገባበር ሂደት እንዲሁም የቴክኒክና ሙያ ስልጠናን በአጠቃላይ ትምህርት ዘርፍ ውስጥ ያለውን ትግበራ ይበልጥ ለማጠናከርና ግንዛቤን ለማሳደግ ታስቦ የተዘጋጀ ነው፡፡

በመድረኩ ላይ የእንኳን ደህና መጣችሁ መልዕክት ያስተላለፉትና የውይይቱን ዋና ዓላማ ያብራሩት የኮሌጁ የስልጠናና አካዳሚክ ጉዳዮች ምክትል ዲን የሆኑት አቶ ጀቤሳ ሙላቱ ሲሆኑ የመድረኩ አካል በሆነው መርሃ ግብርም የኮሌጁን የስኬት ጉዞ እና አሁን ያለውን አጠቃላይ የስራ እንቅስቃሴ የሚያስገነዝብ ሰፊ ገለጻ ቀርቧል፡፡

በሌላ በኩል በ2018 ዓ.ም በነበሩ ቅንጅታዊ አሰራሮች የተመዘገቡ ስኬቶችን፣ የመጡ ለውጦችን፣ እንዲሁም የታዩ ጥንካሬዎችንና ድክመቶችን በዝርዝር በሰነድ ያቀረቡት ደግሞ የኮሌጁ የምክር እና ስራ ትስስር ዘርፍ አስተባባሪ የሆኑት አቶ አዲሱ አዝመራው ናቸው፡፡ አቶ አዲሱ አያይዘውም በ2019 ዓ.ም የትምህርት ዘመን በትብብር ለማከናወን የታቀዱ የትኩረት አቅጣጫዎችን በማመላከት የጋራ መግባባት ላይ ተደርሷል፡፡

ተሳታፊ ርዕሳነ መምህራኑም ከኮሌጁ ጋር በቅርበት በመቀናጀት ዘመኑን የዋጀና ብቁ ሀገር ተረካቢ ኃይል ለማፍራት፣ የጋራ ቁሳዊና ሰብዓዊ ግብዓቶችን እንዴት አቀናጅተን መጠቀም እንችላለን በሚለው ጉዳይ ላይ ሰፊ ምክክር አድርገዋል፡፡ በተለይም በተማሪዎች ዘንድ የሙያ ስልጠናን በተመለከተ ግንዛቤ በመፍጠር የጎላ የአመለካከት ለውጥ ለማምጣት በሚያስችሉ ስትራቴጂካዊ ጉዳዮች ላይ ገንቢ ሀሳቦች ተንሸራሽረዋል፡፡

በላቀ አገልግሎት የመረጃ ተደራሽነት"

15/09/2026

ማክሰኞ:- መስከረም 5 ቀን 2019 ዓ∙ም

የመስቀል ደመራና የኢሬቻ በዓላት በሰላም እንዲከበሩ ጥሪ ቀረበ!!

የመስቀል ደመራ እና የኢሬቻ በዓላት ባህላዊና መንፈሳዊ እሴቶቻቸው ጠብቀው በሰላም እንዲከበሩ የሁሉም ወገን ንቁ ተሳትፎ እንደሚያስፈልግ በጀነራል ዊንጌት ፖሊ ቴክኒክ ኮሌጅ በተካሄደ የውይይት መድረክ ላይ ተገለጸ።

በውይይቱ ወቅት እንደተገለፀው በመስከረም ወር የሚከበሩት እነዚህ ታላላቅ ህዝባዊና ሃይማኖታዊ በዓላት የሕዝቦች የጋራ አብሮነትና ወንድማማችነት ማጠናከሪያ ናቸው ተብሏል።

በዓላቱ በሰላም እንዲጠናቀቁ መንግሥት የጸጥታና የግንዛቤ ፈጠራ ሥራዎችን የመስራት ኃላፊነት ያለበት ሲሆን ዜጎች ደግሞ ከስጋትና ከከፋፋይ አስተሳሰቦች የጸዳ አቀባበል በማድረግ የበኩላቸውን ሚና ሊወጡ ይገባልም ተብሏል።

በበዓላቱ የሚገለጹት የእርቅ፣ የይቅርታና የአብሮነት እሴቶች ለሀገራዊ መግባባት ከፍተኛ አስተዋጽኦ እንዳላቸው ተጠቁሟል።

በመጨረሻም የመስቀል ደመራና የኢሬቻ በዓላት ሃይማኖታዊና ባህላዊ ትውፊታቸውን ጠብቀው በሰላም እንዲከበሩ እያንዳንዱ ዜጋና ባለድርሻ አካላት የድርሻቸውን ሊወጡ እንደሚገባ ጥሪ ተላልፏል።

በላቀ አገልግሎት የመረጃ ተደራሽነት

06/09/2026

እሁድ:- ጵጉሜ 1 ቀን 2018 ዓ∙ም

የኮሌጁ ዲራፍቲንግ ሰልጣኞች በጃይካ (JICA) አገር አቀፍ የአርክቴክቸራል ዲዛይን ውድድር የዓመቱ ምርጥ አሸናፊ ሆኑ!!

በጃፓን ዓለም አቀፍ የትብብር ኤጀንሲ (JICA) አስተባባሪነት በተካሄደው የ2026 ዓመታዊ የአርክቴክቸራል ዲዛይን ውድድር (Architectural Design Competition) የጀነራል ዊንጌት ፖሊ ቴክኒክ ኮሌጅ ሰልጣኞች በሁለቱም የውድድር ዘርፎችና በልዩ የዓመቱ ምርጥ ዲዛይን ዘርፍ የ1ኛ ደረጃ አንጸባራቂ ድልን በመቀዳጀት የዋንጫና የልዩ የልዩ እውቅና ባለቤት ሆኑ።

በአዲስ አበባ ከተማ አስተዳደር ሥር በሚገኙና የድራፍቲንግ የስልጠና ዘርፍ ባላቸው ሦስት የፖሊ ቴክኒክ ኮሌጆች (ጀነራል ዊንጌት፣ ተግባረ-እድ እና አቃቂ) መካከል በደረጃ 4 በተካሄደው በዚህ ውድድር የጀነራል ዊንጌት ፖሊ ቴክኒክ ኮሌጅ ተወዳዳሪዎች የላቀ ብቃታቸውን በማስመስከር ከፍተኛ ውጤቶችን አስመዝግበዋል፡፡

ሰልጣኞቹ በቅልቅል አገልግሎት ህንፃ ዲዛይን (Mixed-Use Design) ከ1ኛ እስከ 3ኛ ደረጃ ያለውን እንዲሁም በሕዝባዊ አገልግሎት ቦታዎች ዲዛይን (Public Area Design) ደግሞ 1ኛ ደረጃን ይዞ በማጠናቀቅ አሸናፊ ሆነዋል፡፡

የዓመቱ ልዩ የዲዛይን እውቅና (Best Perspectives Award 2026) ላይ ደግሞ የኮሌጁ ሰልጣኝ የሆነቺው ሜሮን ደገፉ የዓመቱ ምርጥ የዲዛይን አሸናፊ በመሆን የኮሌጁን ስም በደማቅ ቀለም አፅፋለች፡፡

በዛሬዋ ልዩ የእምርታ ቀን በሆነቺው ዕለት በ'ክሬቲቭ ሀብ ሴንተር' (Creative Hub Center) በተካሄደው የእውቅናና የሽልማት መርሃ-ግብር መድረክ ላይ የቴክኒክና ሙያ ሰልጣኞች፣ የዲፓርትመንት ኃላፊዎች፣ የጃይካ (JICA) አመራሮችና ጥሪ የተደረገላቸው እንግዶች ተገኝተዋል።

ውድድሩ የቴክኒክና ሙያ ሰልጣኞችን የእውቀት ሽግግር ማፋጠን፣ የፈጠራ ክህሎታቸውን ማሳደግ እና የሥራ ፈጠራ እድሎችን ማጠናከር (Knowledge Sharing and Entrepreneurship Pathways for TVET Students) ዓላማ ያደረገ መሆኑ ተገልጿል።

በዕለቱ በተካሄደው የሽልማት ሥነ-ሥርዓት ላይ የዓመቱ ምርጥ የዲዛይን አሸናፊ ለሆነችው ሰልጣኝ ሜሮን ደገፉ የዋንጫ፣ የታብሌት፣ የእውቅና ሰርተፊኬትና የገንዘብ ሽልማት የተበረከተላት ሲሆን ከ1ኛ እስከ 3ኛ ደረጃ በመያዝ ላጠናቀቁ የኮሌጁ ሰልጣኞችም የዋንጫ፣ የገንዘብና የተለያዩ የስልጠና ቁሳቁስ ማበረታቻ ተሸላሚ ሆነዋል።

ይህ አንጸባራቂ ድል የተመዘገበው ኮሌጃችን ጥራት ያለውና በገበያው ዘንድ ተወዳዳሪ የሆነ የሰው ኃይል ለማፍራት የሚያደርገውን ጥረትና ለሙያ ስልጠና የሰጠውን ከፍተኛ ትኩረት የሚያሳይ ነው ተብሏል።

"በላቀ አገልግሎት የመረጃ ተደራሽነት"

27/08/2026

ሐሙስ:- ነሐሴ 21 ቀን 2018 ዓ∙ም

በፋዌ (FAWE) እና ማስተርካርድ ፋውንዴሽን ዓመታዊ ጉባኤ ላይ የኮሌጁ አሰልጣኝና ሰልጣኝ እውቅና ተበረከተላቸው፡፡

ኮሌጃችን በአዲስ ኢንተርናሽናል ኮንቬንሽን ማዕከል (AICC) በተካሄደው የፋዌ (FAWE) እና ማስተር ካርድ ፋውንዴሽን 2ኛ ምዕራፍ የ2026 ዓመታዊ የሰልጣኞች ጉባኤ ላይ በዛሬው ዕለት ተሳትፏል።

የአፍሪካ ሴት የትምህርት ባለሙያዎች ፎረም (FAWE) ከማስተር ካርድ ፋውንዴሽን ጋር በመተባበር የሚተገብረው ይህ የትምህርትና ስልጠና ድጋፍ ፕሮግራም በአዲስ አበባ ከተማ አስተዳደር ከተተገበረባቸው ሁለት ተቋማት አንዱ ጀነራል ዊንጌት ፖሊ ቴክኒክ ኮሌጅ ሲሆን በአሁኑ ወቅት 59 የኮሌጁ ሰልጣኞች የዚህ ፕሮግራም ተጠቃሚ ናቸው።

በጉባኤው ላይ "የቴክኒክና ሙያ ሰልጣኞችን የተቅጣሪነት እና የስራ ፈጠራ እድሎች ማጠናከር" (Strengthening Employability and Entrepreneurship Pathways for TVET Students) በሚል ርዕስ የፓናል ውይይት የተካሄ ሲሆን በውይይቱ ከስራና ክህሎት ሚኒስቴር፣ ከማስተርካርድ ፋውንዴሽን፣ ከፋዌ፣ ከኢንዱስትሪው ዘርፍ እና ከቴክኒክና ሙያ ኮሌጆች የተውጣጡ አመራሮች ተሳትፈዋል።

ውይይቱ ሰልጣኞችን ከገበያው ፍላጎት ጋር የሚጣጣም ክህሎት በማስጨበጥ፣ የኢንዱስትሪ ትስስርን በማስፋት እና ለግል ስራ ፈጠራ ምቹ ሁኔታዎችን በመፍጠር ዙሪያ ያተኮረ ነበር።

ከዕለቱ መርሃ-ግብር ክንዋኔዎች መካከል አንዱ የእውቅና እና ሽልማት ስነ-ስርዓት ሲሆን በዚህም በጀነራል ዊንጌት ፖሊ ቴክኒክ ኮሌጅ በላቀ ስራ ሰልጣኞችን በማብቃትና በመደገፍ ከፍተኛ አስተዋፅኦ ላበረከቱት የኮሌጁ የፊዚኮ-ኬሚካል አሰልጣኝ ወ/ሮ ጸሐይ አህመድ የታብሌት ሽልማት ሲበረከትላቸው በተመሳሳይ ከተቋማችን ከፍተኛ ውጤት ላስመዘገበቺው ሰልጣኝ ሀና ቢራራ የስማርት ፎን ማበረታቻ ተሰጥቷታል፡፡

ፋዌ (FAWE) ከማስተርካርድ ፋውንዴሽን በሚያገኘው የገንዘብ ድጋፍ በአዲስ አበባ ከተማ አስተዳደር፣ በአማራ፣ በኦሮሚያና ሲዳማ ክልሎች በሚገኙ 6 ፖሊ ቴክኒኮች ላይ እየሰራ ያለ ድርጅት ነው፡፡

"በላቀ አገልግሎት የመረጃ ተደራሽነት"

22/08/2026

ቅዳሜ:- ነሐሴ 16 ቀን 2018 ዓ∙ም

የ12ኛ ክፍል ብሔራዊ ፈተና ውጤት ይፋ ሆነ!!

የዘንድሮው የ12ኛ ክፍል ብሔራዊ ፈተና ውጤት ይፋ መደረጉን የትምህርት ሚኒስቴር አስታወቀ።

በትምህርት ዘመኑ ፈተናውን ለመውሰድ ከተመዘገቡ 563 ሺህ 960 ተማሪዎች መካከል 550 ሺህ 210 ተማሪዎች ፈተናውን የወሰዱ ሲሆን ከነዚህም ውስጥ 12.8 በመቶ (70 ሺህ 544 ተማሪዎች) 50 በመቶ እና ከዚያ በላይ በማምጣት ማለፍ ችለዋል።

50ከመቶ እና ከዚያ በላይ ካመጡ ተማሪዎች መካከል በተፈጥሮ ሳይንስ 16.5 በመቶ እንዲሁም በማህበራዊ ሳይንስ ደግሞ 8.33 በመቶ ናቸው።

የተመዘገቡ ከፍተኛ ውጤቶችን በተመለከተ ተፈጥሮ ሳይንስ በወንድ 591.6 ከ 600 እና በሴት 583 ከ 600 ሲሆን በማህበራዊ ሳይንስ ደግሞ በወንድ 576.2 እና በሴት 569.1 ነው።

የትምህርት ሚኒስትሩ ፕሮፌሰር ብርሃኑ ነጋ እንደገለጹት የዘንድሮው ውጤት ከባለፉት ዓመታት ጋር ሲነጻጸር የተሻለ በመሆኑ የሚቀበሉት የሬሚዲያል ተማሪዎች ቁጥር የሚቀንስ ሲሆን የመቁረጫ ነጥቡ ወደፊት የሚገለጽ ይሆናል።

ተማሪዎች ውጤታቸውን ከሰኞ ጠዋት ወይም ማክሰኞ ከሰዓት ጀምሮ መመልከት የሚችሉ ሲሆን ቅሬታ ያላቸው ተማሪዎችም ለ5 እና 6 ቀናት ቅሬታ ማቅረብ ይችላሉም ተብሏል።

የብሔራዊ ፈተና ውጤት መለቀቁን ተከትሎ ጀነራል ዊንጌት ፖሊ ቴክኒክ ኮሌጅም የስራና ክህሎት ሚኒስቴር በሚቆርጠው የመግቢያ ነጥብ መሠረት የ2019 ዓ.ም አዲስ ሰልጣኞችን ለመቀበል ሙሉ ቅድመ ዝግጅቱን አጠናቋል።

ኮሌጁ በ11 ዲፓርትመንቶች እና 30 በሚደርሱ የሙያ መስኮች በቀን፣ በማታ እና በቅዳሜና እሁድ መርሃ ግብሮች ለማሰልጠን ሰብዓዊና ቁሳዊ ግብዓቶችን በማሟላት አዲስ ሰልጣኞችን ለመቀበል ዝግጁ ነው።

"በላቀ አገልግሎት የመረጃ ተደራሽነት"

06/08/2026

ሐሙስ:- ሐምሌ 30 ቀን 2018 ዓ∙ም

የጀነራል ዊንጌት ፖሊቴክኒክ ኮሌጅን ድህረ-EASTRIP ፕሮጀክት ዘላቂነት የሚያረጋግጥ የምክክር መድረክ ተካሄደ!!

የEASTRIP ፕሮጀክት መጠናቀቅን ተከትሎ የጀነራል ዊንጌት ፖሊቴክኒክ ኮሌጅን ሁለንተናዊ የለውጥ ጉዞ ለማስቀጠል የሚያስችል የዘላቂነት ማስተር ፕላን ላይ ያተኮረ የምክክር መድረክ በአዳማ ከተማ ተካሄደ።

በዚህ መድረክ የአዲስ አበባ ከተማ አስተዳደር ሥራና ክህሎት ቢሮ ከፍተኛ የሥራ ኃላፊዎች፣ በከተማ አስተዳደሩ ስር የሚገኙ የቴክኒክና ሙያ ኮሌጆች ዲኖች፣ የኢንዱስትሪ ተወካዮች ተሳትፈዋል።

የምክክር መድረኩ ዋና ዓላማ ፕሮጀክቱ ሲጠናቀቅ ተቋማት ከፕሮጀክት ጥገኝነት በመውጣት ራሳቸውን ችለው መቀጠል እንዲችሉና ከፕሮጀክት ድጋፍ ወደ መንግሥትና የግል ዘርፍ አጋርነት (PPP) የሚሸጋገርበትን ስልታዊ አቅጣጫ ማስቀመጥ እንደሆነ ተገልጿል።

በግምገማው ወቅት ፕሮጀክቱ ሲጠናቀቅ ኮሌጁ ራሱን ችሎ መቀጠል እንዲችል የውስጥ የገቢ አቅሙን የሚያሳድግበት ስልታዊ አቅጣጫዎች የተቀመጡ ሲሆን ሌሎች ኮሌጆችም የጀነራል ዊንጌት ፖሊቴክኒክ ኮሌጅን መልካም ተሞክሮ በመውሰድ ለውጥ ለማምጣት ትልቅ መነቃቃት ሊፈጥሩ እንደሚገባ ተመላክቷል።

በአሁኑ ወቅት በአጋርነት ከጀነራል ዊንጌት ጋር አብሮ ለመሥራት ፍላጎት አሳይተው ወደ ሥራ የገቡ በርካታ አካላት መኖራቸውንና በቀጣይም አብረው ለመሥራት አቅደው በዝግጅት ላይ ያሉ በርካቶች መሆናቸው ተገልጿል።

ከጋራ ውይይቱ በተጨማሪ በተካሄዱ ተናጠል ስብሰባዎች የቢሮው ከፍተኛ የሥራ ኃላፊዎች እና የኮሌጅ ዲኖች በግልና መንግሥት አጋርነት (PPP) አተገባበር ዙሪያ ትኩረት አድርገው የመከሩ ሲሆን በተመሳሳይ መልኩ የአድቫይዘሪ ቦርድ አባላት በበኩላቸው የነበራቸውን የሥራ እንቅስቃሴና አፈፃፀም ገምግመው በቀጣይ አቅጣጫዎች ላይ ውይይት አድርገዋል።

የመድረኩ ተሳታፊዎች ፕሮጀክቱ ለሀገሪቱ ብቁና የሰለጠነ የሰው ኃይል ለማፍራት ያለውን ከፍተኛ ፋይዳ በማድነቅ በቀሪው የፕሮጀክት የሥራ ጊዜ የሚከናወኑ ተግባራት በግልጽ ዕቅድና መሪ አቅጣጫ እንዲመሩ በጋራ ስምምነት ላይ ደርሰዋል። በተለይም በኮሌጆችና በኢንዱስትሪዎች መካከል ያለው ቅንጅትና ትስስር ይበልጥ ተጠናክሮ እንዲቀጥል ጥሪ የቀረበ ሲሆን ውይይቱ የኮሌጆችን ዘላቂ እድገት ለማረጋገጥ ትልቅ መሠረት የጣለ እንደነበር ተጠቁሟል።

"በላቀ አገልግሎት የመረጃ ተደራሽነት"

06/08/2026

04/08/2026

ማክሰኞ:- ሐምሌ 28 ቀን 2018 ዓ.ም

የኮንስትራክሽን ዲፓርትመንት በድምቀት የተጠናቀቀው የጀነራል ዊንጌት የክረምት እግር ኳስ ውድድር ሻምፒዮን ሆነ!

በጀነራል ዊንጌት ፖሊ ቴክኒክ ኮሌጅ ሲካሄድ የቆየው የአሰልጣኞች የክረምት ስፖርታዊ የእግር ኳስ ውድድር እጅግ ማራኪ እና ፉክክር በታከለበት የፍፃሜ ጨዋታ በዛሬው ዕለት በድምቀት ተጠናቋል። በጉጉት ሲጠበቅ በነበረው የዋንጫ ጨዋታ የኮንስትራክሽን ዲፓርትመንትን ድንቅ ብቃት በማሳየት የዘንድሮው የዋንጫ አሸናፊ መሆን ችሏል።

ለፍፃሜው ደርሰው ዋንጫውን ለማንሳት የተፋለሙት አይሲቲ ዲፓርትመንት (Wingate Best) እና ኮንስትራክሽን ዲፓርትመንት ያደረጉት ጨዋታ በእግር ኳስ አፍቃሪዎች ዘንድ ከፍተኛ አድናቆትን ያተረፈ ነበር። ከጨዋታው በፊት ለዋንጫው ሰፊ ቅድመ ግምት ተሰጥቷቸው የነበሩት የአይሲቲ ዲፓርትመንት ተጫዋቾች የጨዋታ የበላይነት በመውሰድ የመጀመሪያውን ግብ ከመረብ ጋር ማዋሃድ ቢችሉም ኮንስትራክሽኖች በአጭር ጊዜ ውስጥ አቻ የሚያደርጋቸውን ግብ አግኝተዋል።

ከእረፍት መልስም ሁለቱም ቡድኖች በማጥቃት ላይ የተመሰረተ ጨዋታ በማሳየት ተጨማሪ ሁለት ሁለት ግቦችን አስቆጥረው መደበኛው የጨዋታ ክፍለ ጊዜ 3 ለ 3 በሆነ አቻ ውጤት ተጠናቋል። አይሲቲዎች በኳስ ቁጥጥሩ ብልጫ ወስደው ወደ ግብ ክልል በተደጋጋሚ በመድረስ ሙከራዎችን ቢያደርጉም የኮንስትራክሽኑን ግብ ጠባቂ ማለፍ እና ኳስ ከመረብ ማገናኘት አልተቻላቸውም።

አሸናፊውን ለመለየት በተሰጠው የፍፁም ቅጣት ምት የኮንስትራክሽን ዲፓርትመንት ግብ ጠባቂ የሆነው ዘካሪያስ ገብሬ የዕለቱ ኮከብ በመሆን አድምቋል! ዘካሪያስ ሁለት የአይሲቲ ቅጣት ምቶችን ድንቅ በሆነ ብቃት አምክኖ ቡድኑን ታድጓል። አይሲቲዎች በበኩላቸው የተሰጣቸውን ኳሶች መከላከል ባለመቻላቸው ኮንስትራክሽን ዲፓርትመንት በ2 የግብ ልዩነት በማሸነፍ የዋንጫው ባለቤት ሆኗል።

ከዋንጫው ጨዋታ አስቀድሞ የደረጃ ፍልሚያ የተካሄደ ሲሆን ጀነራል መካኒክስ /GM/ (Iron Man) ከአግሮ ቢዝነስ ጋር ባደረጉት ጨዋታ ጀነራል መካኒክስ ተጋጣሚውን 6 ለ 2 በሆነ ሰፊ ውጤት በማሸነፍ የ3ኛ ደረጃን ይዞ አጠናቋል።

በውድድሩ መዝጊያ ስነ-ስርዓት ላይ ከ1ኛ እስከ 3ኛ ደረጃ ይዘው ላጠናቀቁት ዲፓርትመንቶች ደማቅ የሽልማት አሰጣጥ ስነ-ስርዓት ተካሂዶ የዘንድሮው የክረምት እግር ኳስ ውድድር በስኬት ተጠናቋል።

"በላቀ አገልግሎት የመረጃ ተደራሽነት"

04/05/2026