ደሴ መምህራን ትምህርት ኮሌጅ /Dessie College Of Teachers Education

09/10/2026

Thanks for being a top engager and making it on to my weekly engagement list! 🎉 Tilaye Dinku, አይረሣኝም ያች ቀን, ፈድሉ ፈድሉ, Mesgana Offical, Daniel Melesse

03/10/2026

የደሴ መምህራን ትምህርት ኮሌጅ በክልል ደረጃ 4ኛ በመውጣት የእውቅና ሽልማት ተረከበ

​በአማራ ክልል በሚገኙ የመምህራን ትምህርት ኮሌጆች የ2018 የትምህርት ዘመን የእቅድ አፈጻጸም ግምገማ እና የ2019 እቅድ ትውውቅ መርሀ ግብር ላይ የደሴ መምህራን ትምህርት ኮሌጅ ከዚህ በፊት የ6 ወር እቅድ አፈፃፀም ከነበረበት 8ኛ ደረጃ ከፍተኛ ለውጥ በማምጣት 4ኛ ደረጃን ይዞ አጠናቋል።

​በማጠቃለያ መርሀ ግብሩ ላይ የተገኙት የአማራ ክልል ትምህርት ቢሮ ኃላፊ አቶ ጥላሁን ወርቅነህ የተሻለ አፈጻጸም ላሳዩ ኮሌጆች እውቅና እና ሽልማት ያበረከቱ ሲሆን፣ ኮሌጆቹ በሙሉ አቅማቸው የትምህርት ጥራትን ለማረጋገጥ የሚያደርጉትን ጥረት ቢሮው አጠናክሮ እንደሚደግፍ ገልጸዋል። በዚሁ መርሀ ግብር ላይ ኮሌጁ በ2019 የትምህርት ዘመን በሚተገበሩ ቁልፍ ውጤት አመልካቾች ላይ ከአማራ ክልል ትምህርት ቢሮ ጋር የቃል ኪዳን ስምምነት ተፈራርሟል።

​እንኳን ደስ አላችሁ!
​ይህ የተመዘገበው ውጤት የኮሌጁ መምህራን እና ሰራተኞች ቀን ከሌሊት ያሳያችሁት የላቀ ትጋት፣ ቁርጠኝነት እና የጋራ ጥረት ፍሬ በመሆኑ እንኳን ደስ አላችሁ ለማለት እንወዳለን።
​ይህ እውቅና የተደረሰበትን የስኬት ደረጃ የሚያሳይ ብቻ ሳይሆን በቀጣዩ የትምህርት ዘመን የበለጠ በመትጋት የትምህርት ጥራትን ወደ ላቀ ደረጃ ለማድረስ ትልቅ መንፈሳዊ ብርታት እና ማነቃቂያ ይሆናል።

30/09/2026

የደሴ መምህራን ትምህርት ኮሌጅ የ2019 በጀት ዓመት ዕቅድ ትውውቅ አደረገ

መስከረም 20 ቀን 2019 ዓ.ም

የደሴ መምህራን ትምህርት ኮሌጅ ለ2019 በጀት ዓመት የተዘጋጀውን አጠቃላይ ዕቅድ ለኮሌጁ ማህበረሰብ አስተዋወቀ።

የዕቅድ ትውውቁ በኮሌጁ ፕላንና ፕሮግራም ኦፊሰር በዶ/ር ዳንኤል መለሠ የቀረበ ሲሆን፤ ዕቅዱ ከትምህርት ቢሮ መነሻዎችንና ከተለያዩ የሥራ ክፍሎች የተወሰዱ ግብአቶችን መሠረት ያደረገ ነው።

በውይይት መድረኩም ከመምህራንና ሠራተኞች ለተነሱ ጥያቄዎች ሦስቱም ዲኖች ማብራሪያ የሰጡ ሲሆን፤ ሀሳቦቹን እንደ ግብአት በመውሰድ ዕቅዱን ይበልጥ ለማጠናከር ተችሏል።

ለአዲሱ በጀት ዓመት ትኩረት የተሰጣቸው ዋና ዋና ግቦች የሚከተሉት ናቸው፡-

የስልጠና ጥራትና ተደራሽነት፡ በመምህራን ስልጠናዎች ላይ ጥራትንና ፍትሃዊ ተደራሽነትን ማሻሻል።

ጥናትና ምርምር፡ የትምህርትና ስልጠና ሥርዓቱን በምርምርና በዳሰሳ ጥናቶች መደገፍና ማዘመን።

የማህበረሰብ አገልግሎት፡ በኮሌጁ የሚሰጡ የማህበረሰብ አገልግሎት ሥራዎችን አጠናክሮ መቀጠል።

ተቋማ የማስፈፀም አቅም ሀብት አጠቃቀምና አገልግሎት አሰጣጥ አሰራርን ማጎልበት፡፡

ኮሌጁ የክልሉን ትምህርት ቢሮ ዕቅድ መነሻ በማድረግ ያዘጋጀው ይህ ዕቅድ፤ በማኔጅመንትና በአካዳሚክ ኮሚሽን እንዲሁም ከመምህራንና ሠራተኞች በተሰጡ ገንቢ ሀሳቦች የበለጸገ ሆኖ በመፅደቁ ወደ ተግባር ገብቷል።

13/08/2026

የደሴ መምህራን ትምህርት ኮሌጅ ሰፊ የችግኝ ተከላ መርሃ ግብር አካሄደ

ደሴ (ነሐሴ 07 ቀን 2018 ዓ.ም) — የደሴ መምህራን ትምህርት ኮሌጅ የአካባቢ ጥበቃ እንቅስቃሴው አካል የሆነ ሰፊ የችግኝ ተከላ መርሃ ግብር በዛሬው ዕለት አካሂዷል።

በዚሁ የመርሃ ግብር ሂደት የኮሌጁ መምህራን፣ የአስተዳደር ሰራተኞች እና የክርመት መርሃ ግብር ሰልጣኞች በንቃት በተሳተፉበት የጋራ ጥረት ከ 1,800 በላይ አገር በቀል ችግኞች ተተክለዋል።

የተካሄደውን የችግኝ ተከላ መርሃ ግብር በበላይነት ያቀናጁት የኮሌጁ ዲን ዶክተር ሀሰን ወርቁ፣ የኮሌጁ አካዳሚክ ጉዳዮች ምትክ ዲን ወይዘሮ መንበረ ላቀው እንዲሁም የምክትል አስተዳደርና ልማት ዲን አቶ ደምሰው አሰፋ ናቸው።

በቀጣይም እንደ ቡና፣ የሐበሻ ጥድ፣ ፓይነስ እና ቦትል ብሩሽ (የአበባ ዛፍ) ያሉ ልዩ ልዩ የችግኝ ዓይነቶች የሚተከሉ ሲሆን፣ እነዚህ አገር በቀልና ጠቃሚ እፅዋት የአካባቢውን የተፈጥሮ ሚዛን ለመጠበቅ፣ የአፈር መሸርሸርን ለመከላከል፣ የከርሰ ምድር ውሃን በማጎልበት የካርቦን ልቀትን ለመቀነስ እንዲሁም ለኮሌጁ ግቢ የተፈጥሮ ውበትን ለመስጠት ከፍተኛ አስተዋፅኦ ይኖራቸዋል።

ኮሌጁ የተተከሉትና በቀጣይም የሚተከሉት ችግኞች ፀድቀው ለውጤት እንዲበቁ አስፈላጊውን እንክብካቤና ክትትል የሚያደርግ ሲሆን፣ መሰል የአረንጓዴ ልማት ስራዎች ለወደፊቱም በተማሪዎችና በኮሌጁ ማህበረሰብ አማካኝነት በተጠናከረ መልኩ ተሳትፎ ተደርጎባቸው እንደሚካሄዱ ተገልጿል።

08/08/2026

በደሴ መምህራን ትምህርት ኮሌጅ እየተሰጠ ያለው የመካከለኛ ደረጃ የመምህራን አቅም ማሻሻያ ስልጠና በላቀ ስኬት እየተከናወነ ነው

በደሴ መምህራን ትምህርት ኮሌጅ እየተሰጠ የሚገኘው የመካከለኛ ደረጃ መምህራን የአቅም ማሻሻያ ስልጠና በበቂ ዝግጅትና በላቀ ቅንጅት እየተካሄደ ነው፡፡

የስልጠናውን ሂደትና አጠቃላይ እንቅስቃሴ በተመለከተ በትላንትናው ዕለት (ነሐሴ 01 ቀን 2018 ዓ.ም) የአማራ ክልል ትምህርት ቢሮ ምልከታ ያደረጉ ሲሆን፣ በአካል በመገኘት የስልጠና አቀባበሉን፣ አሰጣጡንና የተግባር ልምምዱን ለመታዘብ ተችሏል።
በክፍል ውስጥ ምልከታውና በስልጠና ማዕከላት ክትትሉ የአማራ ክልል ትምህርት ቢሮ ምክትል ኃላፊ አቶ ደምስ እንድሪስ፣ የደቡብ ወሎ ዞን ትምህርት መምሪያ ኃላፊ አቶ አለምነው አበራ፣ የክልል የስልጠና አስተባባሪ አቶ ሠጠ ፀጋዬ፣ የኮሌጁ ዲን ዶ/ር ሀሰን ወርቁ እንዲሁም ሌሎች አስተባባሪዎች ተገኝተዋል።

በምልከታው ወቅት አስተያየታቸውን የሰጡ ሰልጣኝ መምህራን እንደገለጹት፤ ስልጠናው አሳታፊ፣ በልምድ ልውውጥ የተደገፈና የላብራቶሪ ሙከራዎችን በተግባር ያካተተ በመሆኑ ከፍተኛ እርካታ እንደፈጠረላቸው ተናግረዋል።

አክለውም ስልጠናው ከአዲሱ ሥርዓተ ትምህርትና ማስተማሪያ መጻሕፍት ጋር እንዲተዋወቁ ትልቅ ዕድል የፈጠረ መሆኑን በመጠቆም፣ ለክልሉ ትምህርት ቢሮ ምስጋና አቅርበዋል። በተጨማሪም የቀረበው የማሰልጠኛ ሞጁል በጣም አስፈላጊ በመሆኑ ለወደፊት ማጣቀሻነት እንዲሰጣቸውና መሰል አቅም የፈጠሩ ስልጠናዎች ተጠናክረው እንዲቀጥሉ ጠይቀዋል።

የአማራ ክልል ትምህርት ቢሮ ምክትል ኃላፊ አቶ ደምስ እንድሪስ በበኩላቸው፤ ሰልጣኞች በስልጠናው ሂደት በዚህ ደረጃ በመርካታቸው የተሰማቸውን ደስታ ገልጸዋል።

አቶ ደምስ አክለውም "ይህ ውጤት ሊመጣ የቻለው በበቂ ዝግጅትና ቅንጅት ስልጠናውን መስጠት በመቻላችን ነው" ብለዋል።

የክልሉ መንግስት በዚህ አስቸጋሪ ወቅት ከፍተኛ በጀት በመመደብ በሌሎች ክልሎች ያልተጀመረውን የመካከለኛ ደረጃ መምህራን የአቅም ማሻሻያ ስልጠና ማመቻቸቱ፣ ለመጪው ትውልድ ግንባታ ያለውን ቁርጠኝነት የሚያሳይ መሆኑን አቶ ደምስ አስገንዝበዋል። ሰልጣኝ መምህራንም ወደየትምህርት ቤቶቻቸው ሲመለሱ አመርቂ ሥራ በመሥራት የተማሪዎችን ውጤት እንዲያሻሽሉ አደራ ብለዋል።

ምክትል ቢሮ ኃላፊው ከሰልጣኞች የተነሱ አስተዳደራዊ ጥያቄዎችን በየደረጃው ምላሽ የሰጡ ሲሆን፣ ስልጠናው በተያዘለት መርሃ-ግብር መሠረት ተጠናክሮ እንደሚቀጥል ታውቋል።

15/07/2026

10/07/2026

የደሴ መምህራን ትምህርት ኮሌጅ ለመኖር አስቸጋሪ የነበረን የአቅመ ደካማ እናት ቤት በአዲስ መልክ ገንብቶ አስረከበ

(ደሴ፤ ሀምሌ 2018 ዓ.ም)

የደሴ መምህራን ትምህርት ኮሌጅ የዘንድሮውን ዓመታዊ ዕቅድ የላቀ ውጤት ጋር በተሳካ ሁኔታ በመተግበር ላይ ይገኛል። ኮሌጁ በዕቅዱ ካካተታቸው ዋና ዋና ተግባራት መካከል የአቅመ ደካማ ወገኖችን ማህበራዊ ኑሮ ማሻሻል አንዱ ሲሆን፤ በዚሁ መሠረት ለመኖር እጅግ አዳጋች በሆነ ሁኔታ ውስጥ ለነበሩት ነዋሪ ለወይዘሮ ጥሩየ ይመር መኖሪያ ቤታቸውን በጥሩ ሁኔታ በአዲስ መልክ አድሶና ሰርቶ አስረክቧል።

ኮሌጁ ከመናፈሻ ክፍለ ከተማ አመራሮች ጋር በመነጋገር፣ የወይዘሮ ጥሩየን አሮጌ ደሳሳ ጎጆ ሙሉ በሙሉ በማፍረስ ጸንቶ በሚቆም የተሻለ አወቃቀር በድጋሚ ለመገንባት በቅቷል። ወይዘሮ ጥሩየ ከ16 ዓመት ልጃቸውና ከ4 ዓመት የልጅ ልጃቸው ጋር በስቃይ ይኖሩ የነበረ ሲሆን፣ ቀደም ሲል ቤቱ ጣሪያው የሚያፈስ፣ መሬቱ ውሃ የሚያፈልቅና ወደ ቤት ሲገቡና ሲወጡም አጎንብሰው የሚንገላቱበት በመሆኑ ሕይወታቸውን ለዓመታት ፈታኝ አድርጎት የቆየ ቢሆንም፤ አሁን ግን ቤቱ በጥሩ ሁኔታ ተገንብቶ የተረከበላቸው እናት ፍጹም ደስተኛ መሆናቸውን ገልጸዋል።

ይህን ማህበራዊ ስብራት ለመጠገን ጠቅላላው የኮሌጁ ማህበረሰብ—ከአመራሮች (ዲኖች) እስከ መምህራን፣ ሰራተኞችና ተማሪዎች—በተቀናጀ ርብርብና በልበ-ቀናነት በመንቀሳቀስ የናትየውንና የሕፃናቱን የዓመታት ስቃይ በዘላቂነት ሊቀይሩት ችለዋል።
ኮሌጁ ለቤት ግንባታው የሚያስፈልጉ መሰረታዊ ቁሳቁሶችን (እንጨት፣ ቆርቆሮ፣ ሲሚንቶ፣ አሸዋ፣ ቀለምና ኮምፒስታቶ) ሙሉ በሙሉ ከራሱ በጀት የሸፈነ ሲሆን፤ አጠቃላይ ለፕሮጀክቱ የዋለው የገንዘብ ዝርዝር እንደሚከተለው ቀርቧል፡-

🧱 የቁሳቁስ ወጪ፦ 129,891 ብር
🛠 የጉልበት ሥራ ወጪ፦ 51,700 ብር
💵 በጥሬ ገንዘብ የተወሰኑ ግብአቶችን ለማሟላት የወጣ፦ 86,000 ብር
💰 አጠቃላይ የፕሮጀክቱ ወጪ፦ 267,591 ብር
ኮሌጁ ቤቱን ሰርቶ ባስረከበበት ወቅት በደመቀ የቡና ሥነ-ሥርዓት (ሴሬሞኒ) የታጀበ የርክክብ መርሃ ግብር የተከናወነ ሲሆን፤ በዕለቱም የአካባቢው ነዋሪዎች፣ የክፍለ ከተማው ኃላፊዎች፣ የኮሌጁ ዲኖች፣ መምህራን፣ ሠራተኞችና ተማሪዎች በጋራ ተገኝተው የደስታው ተካፋይ ሆነዋል።

የኮሌጁ ማህበረሰብ እንዲህ ዓይነቱን ታላቅ የዕቅዱን አካል ማሳካት የወገንን እንባ ከማበስ ባለፈ፣ ወጣቱ ተማሪ ትውልድ ከተግባራዊ የበጎ ፈቃድ አገልግሎት ትልቅ የህይወት ልምድ የሚቀስምበት ሕያው የትምህርት መድረክ መሆኑን ገልጿል። የደሴ መምህራን ትምህርት ኮሌጅ ከዚህ ቀደምም የአቅመ ደካማ ቤቶችን በመገንባትና በማደስ የሚታወቅ ሲሆን፣ አሁንም ለደሴና ለአካባቢዋ ነዋሪዎች "ቀድሞ ደራሽ" አጋርነቱን በተግባር ያስመሰከረበት ደማቅ ተግባር ሆኖ ተመዝግቧል።

"የደሴ መምህራን ትምህርት ኮሌጅ - የዕውቀት ማዕከል፣ የሕዝብ አለኝታ!"

07/07/2026

የደሴ መምህራን ትምህርት ኮሌጅ 15ኛውን ዓመታዊ የጥናትና ምርምር ሲምፖዚየም አካሄደ**

**ሰኔ 30/2018**
**ደሴ**

የደሴ መምህራን ትምህርት ኮሌጅ “Research-Informed Teaching for Equity, Inclusion & Excellence” በሚል መሪ ቃል ለሁለት ቀናት (ከሰኔ 29-30/2018 ዓ.ም) ሲያካሂድ የነበረውን 15ኛውን ዓመታዊ የጥናትና ምርምር ሲምፖዚየም አጠናቋል።

የኮሌጁ ዲን ዶክተር ሀሰን ወርቁ መርሃ ግብሩን በንግግር የከፈቱ ሲሆን፣ በዘንድሮው መድረክ የቀረቡት የምርምር ስራዎች ቁጥር ካለፈው ዓመት ከነበረበት 16 ወደ 26 በማደግ የ**62.5%** ከፍተኛ ተሳትፎ ማሳየቱን በኩራት ገልጸዋል። ዲኑ አክለውም የምርምር ስራዎች ቁጥር መጨመር አዎንታዊ ቢሆንም፣ በዋናነት በጥራት ላይ በማተኮር የመማር-ማስተማር ክፍተቶችን በሳይንሳዊ መንገድ የሚፈቱ መሆን እንዳለባቸው በአፅንዖት አሳስበዋል።

ለቀረቡት ጥናቶች ሙያዊ ዳኝነት በመስጠትና የኮሌጁን የምርምር አቅም በማሳደግ ረገድ ለሚያደርጉት የዘወትር ትብብር ለወሎ ዩኒቨርሲቲ ተመራማሪዎችና ምሁራን የላቀ ምስጋና የቀረበ ሲሆን፣ በትምህርት ጥራትና ማሻሻያ ዙሪያ ሰፊ ውይይት የተደረገበት ይሄው ሲምፖዚየም ለጥናት አቅራቢዎችና ለዳኞች የዕውቅና የምስክር ወረቀትና ማበረታቻ በመስጠት በስኬት ተጠናቋል።

07/07/2026

የደሴ መምህራን ትምህርት ኮሌጅ በተለያዩ ኃላፊነቶች ላይ ላገለገሉ ተማሪዎች ዕውቅና ሰጠ

ሰኔ 30/2015 ደሴ

የደሴ መምህራን ትምህርት ኮሌጅ በኮሌጁ ቆይታቸው በተለያዩ የተልዕኮ ዘርፎች ላይ ንቁ ተሳትፎ ለነበራቸው ተመራቂ ተማሪዎች በዛሬው ዕለት የዕውቅና የምስክር ወረቀት ሰጥቷል።

ተመራቂ ተማሪዎቹ በቆይታቸው ወቅት በዋናነት ካከናወኗቸው አበይት ተግባራት መካከል፦
በተማሪዎች መማክርት አባልነትና አመራርነት፦ የተማሪዎችን መብትና ጥቅም በማስከበር ረገድ በግንባር ቀደምትነት መምራታቸው፣
በሚኒ ሚዲያና ባህላዊ ውዝዋዜ ክበባት፦ በኮሌጁ የሚኒ ሚዲያ ዘርፍ ላይ በንቁ አሰልጣኝነት ስልጠና ከመስጠት ባለፈ፣ የሀገርን ባህልና እሴት የሚያንፀባርቁ የባህላዊ ውዝዋዜ ስራዎችን በክበቡ አማካኝነት በላቀ ሁኔታ ማቅረባቸው፣
በበጎ ፈቃድ አገልግሎት፦ በማህበረሰብ ተጠቃሚነት ስራዎች ላይ በስፋት በመሳተፍ፤ በተለይም በደሴ መቄዶንያ የአረጋውያንና የአዕምሮ ህሙማን መርጃ ማዕከል በመገኘት የአቅመ ደካሞችንና የሽማግሌዎችን ልብስ በማጠብ፣ ገላቸውን በማጠብና በማገዝ እንዲሁም እንክብካቤ በማድረግ የላቀ ሰብአዊ አገልግሎት ማበርከታቸው ተገልጿል።

ይህንን ለላቀ አገልግሎታቸው የተበረከተላቸውን የዕውቅና የምስክር ወረቀት ከተቋሙ አካዳሚክ ምክትል ዲን ከወ/ሮ መነበረ ላቀው እጅ ተቀብለዋል።

04/07/2026

የደሴ መምህራን ትምህርት ኮሌጅ በታሪኩ ለመጀመሪያ ጊዜ በዲግሪ ያሰለጠናቸውን መምህራን አስመረቀ

ደሴ (ሰኔ 27/2018 ዓ.ም)

የዕውቀት ማዕከልና የቁምነገር መፍለቂያ የሆነው አንጋፋው የደሴ መምህራን ትምህርት ኮሌጅ፣ በተለያዩ የትምህርት ክፍሎች በመምህርነት ሙያ ያሰለጠናቸውን ተማሪዎች ዛሬ ሰኔ 27 ቀን 2018 ዓ.ም በደማቅ ሁኔታ አስመርቋል።

የዘንድሮውን የምረቃ ሥነ-ሥርዓት ልዩና በኮሌጁ ታሪክ አዲስ ምዕራፍ የሚያደርገው ለአራት ተከታታይ ዓመታት በመደበኛው መርሃ-ግብር ሲያስተምራቸው የቆያቸውን የመጀመሪያ ዙር የዲግሪ ተማሪዎች ለምረቃ ማብቃቱ ነው።

በዛሬው የምረቃው መርሃ-ግብር ላይ የዕለቱ የክብር እንግዳ የደቡብ ወሎ ዞን ትምህርት መምሪያ ኃላፊ አቶ አለምነው አበራ፣ የኮሌጁ የአካዳሚክ ኮሚሽን አባላት፣ የኮሌጁ ሰራተኞች፣ ተመራቂዎችና የተመራቂ ቤተሰቦች በታላቅ ድምቀት ታድመዋል።

የኮሌጁ ዲን ዶክተር ሀሰን ወርቁ ፕሮግራሙን በይፋ ሲያስጀምሩ ባስተላለፉት መልዕክት፤ ተመራቂዎች በትምህርት ቆይታቸው ያጋጠሟቸውን በርካታ ውጣ ውረዶች በጽናትና በትጋት አልፈው ለዚህ ታላቅ የድል ቀን በመብቃታቸው የተሰማቸውን አክብሮትና ጥልቅ ደስታ ገልጸዋል። ዲኑ አክለውም ይህ ስኬት የተማሪዎቹ የዕውቀት ጥማትና የኮሌጁ ማህበረሰብ ጥምር ውጤት መሆኑን ጠቅሰው፣ ተመራቂዎች ያገኙትን ዕውቀት ወደ ተግባር በመቀየር የለውጥ ኃይል መሆን እንዳለባቸው አሳስበዋል።

የዕለቱን የመዝጊያ ንግግርና የሥራ መመሪያ የሰጡት የደቡብ ወሎ ዞን ትምህርት መምሪያ ኃላፊ አቶ አለምነው አበራ በበኩላቸው፤ መምህርነት የአገር ግንባታና የትውልድ ቅርፀ መሠረት መሆኑን አጽንኦት ሰጥተዋል። ተመራቂዎች ወደ ሥራው ዓለም ሲሰማሩ የተጣለባቸውን ወርቃማ አደራ በታማኝነት፣ በፈጠራ የታገዘ እውቀትና በከፍተኛ ቁርጠኝነት ሊወጡ እንደሚገባም አሳስበዋል።