03/05/2026
!
Maaliif shamarran keenya gaa'ela ijaarratanii, mana ofii erga galanii booda jireenyi itti dukkanaa'a? Maaliif manni jireenyaa inni nagaa fi gammachuu itti eegan, mana hidhaa fi qormaataa itti ta’a?
Guyyaa cidhaa gammachuu fi ilillee qabu sana booda, dhugaan bultii yeroo baay'ee haguugamee hafa. Uffanni cidhaa inni adii fi bareedaan sun darbee, jireenyi haaraa yeroo eegalu, abdii fi mul'anni dubartoota baay'ee dukkana keessa seena. Gammachuun mana haaraa ijaarrachuu gara gadda dhokataatti jijjiirama.
Shamarran hedduun erga gaa'elatti galanii booda jireenya qormaataa, lolaa akkasumas roorroo daangaa hin qabneen guutame jiraachuu eegalu. Mana ofii isa nagaa itti argatanii boqochuu qaban keessatti doorsifamu, ni miidhamu. Garuu, dhiphina kana hunda dhoksanii, imimmaan isaanii dhuunfaatti dhangalaasaa, fuula namatti ammoo kolfuu filatu. Jireenya bultii isaanii keessatti miidhaan qaamaa fi sammuu yoo irra ga'es, iccitii isaanii eeggachaa gidiraa baatu.
Maaliif sagalee isaanii dhageessisuu sodaatu? Sababiin inni guddaan dhiibbaa hawaasaati. Aadaan keenya "Dubartiin ni obsiti, bultiin akkasuma bu'aa ba'ii qaba, mana ofii diiguun qaaniidha" jedhee barsiisa. "Gaafas isatu siif caalee heerumte" ykn "Maatii kee hin qaanessin" jedhamuun sodaa isaan keessatti uuma. Kanaafuu, miidhaa qaamaa fi sammuu isaanii dhoksanii, aaduu fi of nyaachuu filatu. Sagaleen isaanii akka ukkaamamu ta'a.
Dhiphinni fi roorroon kun yeroo itti baay'atu, abdii kutannaan hammaata. Kaan isaanii roorroo kana dandamachuu dadhabanii, abdi-kutannaa daangaa hin qabne keessa galu. Jireenyi waan asumatti dhaabatu itti fakkaata. Dhuma irrattis, dukkana kana keessaa bahuuf filannoon isaanitti mul'atu tokko qofa ta'a: lubbuu ofii galaafachuu. Kun dhugaa hadhaa'aa, gaddisiisaa fi qalbii nama cabsu, kan hawaasa keenya keessa jiru dha.
Obboleettii koo ishee amma barreeffama kana dubbisaa jirtu, yoo haala akkasiin dhiphachaa fi booyaa jirta ta’e, siif haa galu: Gatii fi kabajni kee bultii keessatti miidhamuu hin qabu. Jireenya gaddaaf roorroo caalaa, filannoon biraa ni jira. Lubbuu ofii galaafachuun furmaata miti; inumaayyuu mo'amuudha. Ati jabduudha, haala ammaa kana keessaa bahuu ni dandeessa!
Gaddi fi rakkoon dhuma jireenyaa miti. Bultiin siif hin milkoofne taanaan, jireenyi kee asirratti goolabame jechuu miti. Inni kun boqonnaa jireenya kee tokko qofa dha. Boqonnaan biraa kan ifaafi gammachuun guutame fuuldura kee jira. Jireenya kee isa boruuf jettee, ofii keetiif dursa kenni. Rakkoo sammuu ykn abdi-kutannaan yoo sitti dhaga'ame, fira, hiriyaa, ykn namuma itti dhihaattu tokko mariisisuu hin sodaatin. Sagalee kee dhageessisi! Wanti darbuuf jiruuf jettee lubbuu kee ishee gati-jabeettii hin dhabin. Ati uumama addaati, kanaa gaditti hin uumamne.
Akkasumas nuti akka hawaasaatti, ilaalcha keenya sirreessuu qabna. "Obsi, bultiin akkasuma, diigamuu hin qabu" jechuun shamarran keenya gara boollaatti akka of darban gochuu haa dhaabnu. Dubartii miidhaa qaamaa fi sammuu hamaan irra gahaa jiru tokkoof obsi jechuun, murtii du'aa itti murteessuudha. Bultii ijaaruun kabaja dhala namaa eeguuf malee, bakka itti ukkaamamanii dhuman ta'uu hin qabu. Ceephoo fi qeeqaa caalaa, dhaggeeffattoota fi gargaartota haa taanuuf. Jireenyi dhala namaa wanta hundumaa caala!
Obboleettii too, jireenyi kee qaaliidha! Ati kennaa addunyaa kanaati.
Tarii barreeffamni kun lubbuu obboleettii keenya tokkoo abdi-kutannaa keessa jirtuu baraaruu danda'a waan ta'eef, waliif qoodaa!
Naaf jiraadhaa shamarraniif kabaja haa laannu eenyumaa gad tahuu dhiisuu isaanii of haa amansiifnu barfata haagodhannu!
baraa!
