20/09/2026
ጉባኤ "ነቲ ሓድሽ ሰብ ልበስዎ"
(መቐለ፥ መስከረም 10/2019 ዓ. ም፥ ቅዱስ ፍሬምናጦስ አባ ሰላማ ከሣቴ ብርሃን ነገረ መለኮት ኮሌጅ)
ቅዱስ ፍሬምናጦስ አባ ሰላማ ከሣቴ ብርሃን ነገረ መለኮት ኮሌጅ ጉባኤ "ነቲ ሓድሽ ሰብ ልበስዎ" ኣካይዱ።
ብፁዕ አቡነ ዮሐንስ ሣልሳይ ሊቀ ጳጳስ ዘቅ/ፍ/አ/ሰ/ከ/ብርሃን ነገረመለኮት ኮሌጅ ወዘደ/ሰ/ቅ/ሚካኤል ካቴድራል ነቲ ጉባኤ ብጸሎት ምስኸፈትዎ ብዕዱማት ጽሑፍን ዝማሬን ቐሪቡ እዩ።
ብምቕፃል መጋቤ ብሉይ መንክር ገ/ሔር ኣብቲ እናተውሃበ ዝፀንሐ ተኸታታሊ ትምህርቲ ሮሜ 8፥1-17 መንፈስ ቅዱስን በረከታት ሐዲስ ኪዳንን፣ አሕዛብ ብክርስቶስ ብምእማኖም ናይ መንፈስ ቅዱስ ሙሉእ ናይ ሐዲስ ኪዳን በረከታት ከምዝተውሃብዎም ፣ እቲ ናይ ኣዳም ወዲ ሰብ ኣብ ዘመን ብሉይ ኪዳን ኣብ ሙሉእ ርኽሰት ከምዝነበረ እግዚአብሔር ድማ ፍፁም ቅዱስ ከምዝነበረ፣ ናትና ዋጋ ወርቅን ጨርቅን ከይኾነስ ባዕሉ ክርስቶስ ምዃኑ፣ ኹሉ ሰብ ወዲ ሰብ ድሕሪ ልደት ጎይታና ኣብ ቅዱስ ምምልላስ ከምዘሎ እዚ ድማ ኣብ ማእኸል ምውዳቕ ከምዝህልው ነገር ግን በቲ ዝተውሃበና ጸጋ መሰረት ሙሉእ ናይ ምትሳእ ሓይሊ ከምዘለና ኣምሂሮም።
ብምቕፃል መ/ር ፅሩይ መዝገበ (ምክትል ስራሕ መካየዲ ሃገረ ስብከት ዞባ ደቡብ ምብራቕ) "ወልበስዎ ለሐዲስ ብእሲ ዘሐደሶ እግዚአብሔር በጽድቅ ወበርትዕ ወበንጽሕ።" ኤፌ 4፥24 ብዝብል ርእሲ አዳም ብምኽንያት ዝሰርሖ ሓጢኣት ከምዝኣረገን ብእኡ ምኽንያት ድማ ኹሎም ፍጥረታት እርጋንን ብልየትን ከምዝወረሱ፣ ንሕና ድማ ብጎይታና ኢየሱስ ክርስቶስ ዝረኸብናዮ ሰብነትና ከምዝተሓደሰ፣ ቤተ ክርስቲያን እውን ነዚ ብዓይነ ሥጋ ዘይረአ ጸጋ እግዚአብሔር ብዝረአ ሥርዓተ አምልኾ ከምእትገልፆ፤ ንሕና እዚ ዝተሓደሰ ሰብነት ዝለበሰና ሰባት ንድሕሪት ከይንምለስ ኣብ ሥርዓተ አምልኾ ሱታፌ ብምግባር ኣብ ኸምዚ ዝዓይነቶም ጉባኤያት ተረኺብካ ቃል እግዚአብሔር ምምሃር ከም ዝግብአና ኣምሂሮም።
ብፁዕነቶም "በብዙኅ ነገር ወበብዙኅ መክፈልት አይድዐ እግዚአብሔር ለአበዊነ በነቢያቱሁ እምትካት። ወበደኃሪሰ መዋዕል ነገረነ በወልዱ ዘረሰዮ ወራሴ ለኵሉ ወቦቱ ፈጠሮ ለኵሉ።" ዕብ 1፥1-2 ብዝብል ርእሲ ኣብ ዝሃብዎ ቡራኬን ምዕዳንን እግዚአብሔር ኣቐዲሙ ብነቢያት ኣቢሉ ብርሃን ክበርሃልኩም እዩ፥ ብእርጋንኹም ኣይትነብሩን፣ መወዳእታኹም ሕማቕ ኣይኸውንን እናበለ ነቲ ህዝቢ እዚ ቃል ድሕነት ከም ዘብፅሑ ኣብ ዘመነ ሐዲስ ድማ ወልደ እግዚአብሔር ኢየሱስ ክርስቶስ እቲ ኣረጊት መንነት ካባኹም ተቐንጢጡ ሓድሽ መንነት ለቢስኹም ኢኹም ስለዚ ናብ እርጋን ከይትምለሱ ዝብል መልእኽቲ ቅዱሳት መጻሕፍቲ ኣስተውዒልና ክንነብሮ ይግበአና ኢሎም። ኣብ መወዳእታ ብዛዕባ ኣብዚ ሰሙን ኣብ ማሕበራዊ ሚድያ ይዘዋወር ዘሎ ጉዳይ ኣመልኪቶም ኣብ ዘመሓላለፍዎ መልእኽቲ ንዓና ፅላልናን ዓምድናን እቲ ክህነቱ ዘለዓለማዊ ዝኾነ ጎይታና መድሓኒትና ኢየሱስ ክርስቶስ እምበር እምነትናን ትውክልትናን ኣባና ኣብ ንወድቕን ንሰንፍን ሰባት ስለዘይኾነ ንሕና ሰባት ብዝኾንናዮ ከይትሰናኸሉን ከይትጭነቑን እቲ ፍርዲ ድማ ንእግዚአብሔር፣ ንሥርዓትን ቀኖናን ቤተ ክርስቲያንን ንቅዱስ ሲኖዶስን ክትህቡ፣ ብዝረአኽምዎን ብዝሰማዕኹምዎን ክትጭነቑ የብልኹምን እኳ ደኣስ ናብ ኣምላኽ ክትጽልዩ ኣለኩም ኢሎም።
