24/08/2026
ጉባኤ "ጸጋ ዝተመላእኺ"
(መቐለ፥ ነሓሰ 17/2018 ዓ. ም፥ ቅዱስ ፍሬምናጦስ አባ ሰላማ ከሣቴ ብርሃን ነገረ መለኮት ኮሌጅ)
ቅዱስ ፍሬምናጦስ አባ ሰላማ ከሣቴ ብርሃን ነገረ መለኮት ኮሌጅ ጉባኤ "ጸጋ ዝተመላእኺ" ኣካይዱ።
እቲ ጉባኤ ብፁዕ አቡነ ዮሐንስ ሣልሳይ ሊቀ ጳጳስ ዘቅ/ፍ/አ/ሰ/ከ/ብርሃን ነገረመለኮት ኮሌጅ ወዘደ/ሰ/ቅ/ሚካኤል ካቴድራል ብጸሎት ምስተኸፈተ ብዕዱማትን ደቀ መዛሙርትን ዝማሬን ቅኔን ቐሪቡ እዩ።
መጋቤ ብሉይ መንክር ገ/ሔር ተኸታታሊ ትምህርቲ መልእኽቲ ሮሜ 7፥1-12 ቅዱስ ጳውሎስ ኣብ መልእኽቱ ሰብ ምስ ክርስቶስ ብምሕባሩ ካብ ሕጊ ምፍትሑ ንምግላፅ ምሳሌ ሞት በዓል ሓዳር ሰብኣይ ከምዝተጠቐመ፥ ብተወሳኺ ድማ ወዲ ሰብ ምስ ኣዳም ዝነበሮ ሕብረት ንምግላፅ ኣዳም ነቲ ሕጊ ካብ ዝነበሮ ዘይምእዛዝ ከምዝጅምር፣ ቅድስና ዝርከብ ብሕጊ ከይኾነስ ብጸጋ ምዃኑ፣ ሓደ ግዜ ንሕጊ ከምዝሞትና፣ ኣብ ትሕቲ ሕጊ ብምዃን ንእግዚአብሔር ምሕጓስ ከምዘይከኣል፣ ሕጊ ልክዕ ከም ምስትያት ከምዝኾነ እዚ ድማ ኣብ ሰብነትና ዘሎ ርስሓት ከይወሰኸን ከይቐነሰን ዘርኢ እምበር ናይ ምፅራይ ጉልበት ከምዘይብሉ፣ ሕጊ ኣብ ደብረ ሲና ዝተውሃበሉ ምኽንያት ድማ ወዲ ሰብ ብዘይምእዛዙ ክንደየናይ ከምዝረኸሰ እግዚአብሔር ድማ ክንደየናይ ጻድቕ ከምዝኾነን ከም ዝምስክር ኣምሂሮም።
ቀሲስ ዶ/ር ፍጹም ገ/ሔር ድማ "ምልእተ ጸጋ" ሉቃ 1፥28 ብዝብል ርእሲ አብ ዝሃብዎ ስብከት እዚ ጸጋ ካብ እግዚአብሔር ከምዝወሃብ ካብቶም ኣዴና ቅድስት ድንግል ማርያም ዘለዉዋ ጸጋታት ቅድስና፣ ንፅህና፣ ርህራሄ ብምጥቓስ፤ ኣብ መላእ ሕይወታ ንእግዚአብሔር ኣማኒት ከምዝኾነት፣ ብትሕትና ከም ዝነበረት፣ ቅድስት ድንግል ማርያም ከም ቀዳሚት ሄዋን ሞት ዘምፅእ ቃል ዝሰምዐት ከይኾነስ ሕይወት ዘምፅእ ቃል ከምዝሰምዐት፣ እቲ ካብኣ ዝተወለደ እግዚአብሔር ቃል ድማ ንሞት ስዒሩ ሕይወት ንመላእ ሰብ ከምዝሃበ ምስክርነት ቅዱሳት መጻሕፍትን ሊቃውንትን ብምምፃእ ኣምሂሮም።
ኣብ መወዳእታ ብፁዕነቶም ""ከመ ንጽደቅ በጸጋሁ ወንረስ ተስፋ ሕይወት ዘለዓለም።" ቲቶ 3፥7 ብዝብል ርእሲ ኣብ ዝሃብዎ ቡራኬን ምዕዳንን ኣዴና ቅድስት ድንግል ማርያም ዝተውሃበቶ ጸጋ፥ ካብቲ ክሳብ እቲ ኢልና ዘይንገልፆ ሙሉእ ንዘለኣለም ዝኾነ ጸጋ ከም ዝተውሃባ፤ እቲ ብኢየሱስ ክርስቶስ ዝተውሃብናዮ ጸጋ ዝተትረፍረፈን ዘለኣለማውን ስለዝኾነ ነቲ ዝተውሃበና ተስፋ ሕይወት ክንሕዞ፤ እዚ ተስፋና ድማ መሊእና ንጎድለሉ፥ ኣቲና ንወፀሉ ዘይኾነስ ዘለዓለማዊ ምዃኑ ተረዲእና ክንነብሮ፤ ብበረከት ክንነብር ኣብቲ ጉንዲ ዝኾነ ኢየሱስ ክርስቶስ ክንጣበቕ፤ ካብቲ ዘይውዳእ ጸጋ ናብ ዝውዳእ ነገር ከይንወድቕን፣ ናብዚ ቃል እግዚአብሔር ዝንገረሉ ጉባኤ እንትንመላለስ ድማ ውሽጥና ፍረ ይፈሪ ዶ ኣሎ ኢልና ክንሓትትን እቲ መሰረታዊ ኣስተምህሮ ቤተ ክርስቲያን ፈሊና ክንርዳእ ይግባእ ኢሎም።
ብምቕፃል እቲ ዕምበባ ዝኾነ ፍረ ዝጀመረ፥ ሕይወት ረኺቡን ተንቀሳቒሱን ንዓዱ ክኸውን ዝኽእል መንእሰይ እንትጨናነቕ ርኢና ከም ኣቦ ዋላኳ እንተተሰምዐና እቲ ንኣደ ዘፅናዕንዕ፣ ንኣቦ ሞራል ዝህብ ሕይወት ድማ ዝኾነ ጎይታ ኢየሱስ ክርስቶስ ስለዘለና ሕዚ እውን ተስፋ ኣይንቖርፅን ዝበሉ እንትኾኑ ኣብ ቐረባ መዓልቲ ኣብ ገዝኦም እናሃለዉ ሓደጋ ዘጋጠሞምን ኣብ ሕክምና ክትትል ዘለዉን ኣዴታትን ህፃናትን ካብቲ ቊስልን መከራን ንክወፁ እግዚአብሔር ፈውሱ ክልእኸሎምን እቲ ሰማይ ድማ ደመና እምበር ካልእ ነገር ዘይንርእየሉ ክኸውን ፍቓድ ኣምላኽ ፀዊዖም።
ካብቲ ይካየድ ዘሎ ጉባኤ ድማ ናይ ሕቶን መልስን ጉባኤ ስለዝካየድ ሕቶታቶም ንመተሓባበርቲ ንክህቡ፣ ካብዚ ናይ ሰንበት ጉባኤ ብተወሳኺ ድማ እቶም ተምሃሮ ኣብ ዝጥዕሞም ሰዓት መሰረታዊ ናይ ቤተ ክርስቲያን ትምህርቲ ስልጠና ድማ ካብ ቐፃሊ ቀዳም 23/12/2018 ዓ.ም ሰዓት 3:00 ጀሚሩ ከምዝወሃብ ሓቢሮም።
