25/05/2026
⚽️მატჩი, რომელიც 149:0 დასრულდა
გჯერათ, რომ საფეხბურთო მატჩი შეიძლება 149:0 დასრულდეს?
ეს ანგარიში არც კომპიუტერული თამაშიდან არის და არც ხუმრობა - ეს რეალური ფაქტია, რომელიც მადაგასკარის ჩემპიონატში დაფიქსირდა და დღემდე მსოფლიო ფეხბურთის ერთ-ერთ ყველაზე აბსურდულ და დაუჯერებელ რეკორდად ითვლება.
ეს შემთხვევა 2002 წლის 31 ოქტომბერს, მადაგასკარის ჩემპიონატში მოხდა. ერთმანეთს ქვეყნის ორი ძლიერი გუნდი - მოქმედი ჩემპიონი „ას ადემა“ და მისი მთავარი მეტოქე „სო ემირნი“ (SOE) ხვდებოდნენ.
მიზეზი, რომელმაც მოედანზე ნამდვილი ქაოსი გამოიწვია, ჩემპიონატის წინა ტურში მიღებული მსაჯის გადაწყვეტილება გახდა. „სო ემირნის“ წინააღმდეგ დანიშნულმა საეჭვო პენალტმა გუნდს საჩემპიონო შანსები ფაქტობრივად დაუკარგა.
ბოლო მატჩზე გუნდმა პროტესტის უკიდურეს ფორმას მიმართა: შეხვედრის დაწყებისთანავე „სო ემირნის“ ფეხბურთელებმა ბურთი საკუთარი კარისკენ წაიღეს და ავტოგოლი გაიტანეს. ეს პროცესი მთელი 90 წუთის განმავლობაში გაგრძელდა — დაახლოებით ყოველ 36 წამში მათ საკუთარ კარში თითო ბურთი გაჰქონდათ.
წარმოიდგინეთ სურათი: „ას ადემას“ ფეხბურთელები მოედნის ცენტრში გაოგნებულები იდგნენ და უბრალოდ უყურებდნენ, როგორ შეჰქონდათ მეტოქეებს საკუთარ კარში გოლი გოლზე. თამაშის განმავლობაში მათ ბურთისთვის ფეხიც კი არ დაუკარებიათ, თუმცა საბოლოო ანგარიში 149:0 სწორედ მათ სასარგებლოდ დაფიქსირდა.
ეს მატჩი ოფიციალურად შევიდა ფეხბურთის ისტორიაში და გინესის რეკორდების წიგნშიც მოხვდა, როგორც ყველაზე დიდი ანგარიშით დასრულებული ოფიციალური შეხვედრა ფეხბურთის ისტორიაში.
ინციდენტის შემდეგ მადაგასკარის ფეხბურთის ფედერაციამ გუნდის მწვრთნელი და რამდენიმე ფეხბურთელი მკაცრად დასაჯა. „სო ემირნის“ მთავარ მწვრთნელს სამწლიანი დისკვალიფიკაცია მიუსაჯეს, რადგან მიიჩნიეს, რომ პროტესტის იდეა სწორედ მას ეკუთვნოდა.
გარდა ამისა, ოთხ წამყვან ფეხბურთელს, მათ შორის მადაგასკარის ეროვნული ნაკრების კაპიტანს, სეზონის ბოლომდე თამაში აეკრძალა.
არის ეს პროტესტის გამართლებული ფორმა თუ სპორტისადმი უპატივცემულობა? თქვენი აზრი კომენტარებში გაგვიზიარეთ!
სტატიის ავტორი: პროფესორი, ჯემალ ძაგანია
