თავისუფალი უნივერსიტეტის მართვისა და საზოგადოებრივ მეცნიერებათა სკოლა

19/12/2025

ელენე გოგიაშვილი
2026 წლის გამოშვება

2026 წელს ელენე სწავლას პარიზში, SKEMA Business School-ში გააგრძელებს.

"სკოლიდანვე თითქოს მშურდა იმ ადამიანების, რომლებმაც ადრეული წლებიდანვე იცოდნენ, რომ ცხოვრებაში ძალიან კონკრეტული სფერო მოსწონდათ და ამ სფეროში საკუთარ თავს გარდაუვლად იპოვნიდნენ. მაშინ როცა ერთადერთი, რაც მე ზუსტად ვიცოდი, იყო ის, რომ ადამიანები უზომოდ მაინტერესებდა და ყველაფერი, რაც ადამიანზე რამეს ყვებოდა, ისიც. ამიტომ, წერა, ლიტერატურა, ფილოსოფია, პოლიტიკა, მალევე იქცა ჩემი ინტერესების მთავარ საგნებად. ანუ, როგორც Gen Z ხშირად ვამბობთ, “ინტროვერტული” სფეროები მიზიდავდა, რომლებთანაც ჩემი სოციალურად აქტიური ბუნება ერთი შეხედვით დისონანსში მოდიოდა. ამ შფოთვის იდეალურ გამოსავლად იქცა 2022 წელს ჩემი ცხოვრების ერთ-ერთი ყველაზე საუკეთესო გადაწყვეტილება - მართვა და საზოგადოებრივი მეცნიერებების ფაკულტეტზე ჩაბარება თავისუფალ უნივერსიტეტში.

ეს გზა, როგორც ყველასთვის, ჩემთვისაც იმ ზოგადი საგნებით დაიწყო, რომლებზეც აბიტურიენტები ხშირად კამათობენ ხოლმე, საჭიროა თუ არა. თუმცა, სწორედ იმ პირველი კურსის სავალდებულო და მართვის კურიკულუმის საგნების სინთეზით ვისწავლე ისეთი დეტალების შემჩნევა, რომლებიც ერთი შეხედვით შეიძლება ზედაპირზე ყოველთვის არ ჩანდეს. “Think Outside The Box” აზროვნებამ მომცა თავდაჯერებულობა, რომ ჩემი მსჯელობა არასდროს იქნება შაბლონური, გარე დოგმებით გაჯერებული და რომ ნებისმიერი მორალური კრიზისას ვიქნები ადამიანი, რომელიც მარტივად არ მოტყუვდება.

მეორე კურსზე, როცა პირველად მუშაობა დავიწყე, მეშინოდა, რომ 21-ე საუკუნის ტექნოლოგიური სამყარო ისეთ ტექნიკურ ცოდნას ითხოვდა, რომელსაც სოციალური მეცნიერებების ბაკალავრი ვერ მომცემდა. თუმცა, როცა პირველი სამსახურის სტაჟირების კონკურსი წარმატებით გავიარე, მივხვდი, რომ უნარები, რომლებსაც მართვის ფაკულტეტი მაძლევდა, არ ჰქონდა მნიშნელობა, რა პროფესიას ავირჩევდი, მიქმნიდა იმ ზოგად ჩარჩოს, რომელიც თანმიმდევრული შრომით ყველა მოთხოვნას მოერგებოდა. მესამე კურსზე მონაწილეობა მივიღე თიბისის სტაჟირების პროგრამაში, სადაც ასევე კონკურსის პრინციპით მარკეტინგის დეპარტამენტში, “სტრატეგიული კომუნიკაციების” გუნდში, მოვხვდი და მომეცა შესაძლებლობა, ჩემი შემოქმედებითი წერის შესაძლებლობები უკვე მასშტაბური ბრენდის მიზნებისთვის გამომეყენებინა. დღეს აქსის თაუერს ველნეს ცენტრში ვმუშაობ, სადაც კიდევ უფრო აქტიურად ვცდილობ საკუთარი თავის მრავალმხრივ აღმოჩენას, რაც, ჩემი აზრით, განსაკუთრებით, მართვის კურსდამთავრებულების, უწყვეტი პროცესია.

ამ პერიოდში ბიზნესის კურიკულუმიდან სხვადასხვა მარკეტინგული საგანი გავიარე, რამაც საბოლოოდ საშუალება მომცა სოციალური მეცნიერებების ბაკალავრიდან შეძენილი “ინსაითები” ბიზნეს გარემოში გამომეყენებინა.

და, საბოლოოდ, საზღვარგარეთ სწავლის დიდხნიანი ოცნებით და ძალისხმევით, ევროპის ერთ-ერთ მაღალ რეიტინგულ ბიზნეს სკოლაში, “Skema Business School”-ის “International Marketing & Business Development” მაგისტრატურის პროგრამაზე შიდა დაფინანსებით ჩავაბარე და გავხდი ეიფელის სტიპენდიის კანდიდატი.

ეს წარმატება არ იქნებოდა, რომ არა ჩემი ახლო ადამიანების უწყვეტი მხარდაჭერა და იმ ადამიანებთან ურთიერთობის შესაძლებლობა, რომლებიც თავისუფალი უნივერსიტეტიდან ყოველთვის დაიკავებენ ჩემს გულში შეუცვლელ ადგილს. მართვა და საზოგადოებრივ მეცნიერებებზე მიღებული ლიბერალური განათლება კი ყველა გარემოში იქნება ჩემი მთავარი პროფესიული და ეთიკური ორიენტირი."

19/12/2025

თავისუფალი უნივერსიტეტის მართვისა და საზოგადოებრივ მეცნიერებათა სკოლაში სწავლით დაინტერესებული აბიტურიენტებისთვის ჩატარდა ორდღიანი ბანაკი - „მომავლის მართვა: სწავლიდან წარმატებამდე“. ბანაკი გაიმართა ბაზალეთის სასწავლო ცენტრში, ხოლო მონაწილეთა კვებაზე საქართველოს კულინარიის აკადემიამ იზრუნა.

ბანაკში მონაწილეობა სრულად დაფინანსდა კახა ბენდუქიძის ცოდნის ფონდის მიერ.

ორი დღის განმავლობაში ბანაკში მონაწილე 40-მდე აბიტურიენტი გაეცნო მართვისა და საზოგადოებრივ მეცნიერებათა სკოლაში სწავლის სპეციფიკას, შეხვდა დეკანს, ლექტორებსა და კურსდამთავრებულებს და მოისმინა მათი გამოცდილება და რჩევები.

მართვის სკოლის ბანაკი იყო საინტერესო, მრავალფეროვანი და აბიტურიენტებისთვის პრაქტიკულად გამოსადეგი. მონაწილეები გაეცნენ სკოლის დეკანს, ნიკოლოზ ალექსიძეს, რომელმაც საზოგადოებრივ მეცნიერებებზე ისაუბრა, ასევე ლექტორებს, ნუცა ბათიაშვილსა და ლექსო დორეულს, რომლებმაც ანთროპოლოგიის, კოგნიტური მეცნიერებებისა და ლიტერატურის საკითხებზე ისაუბრეს.

აბიტურიენტებს საინტერესო და ინტერაქციული სემინარები შესთავაზეს მართვის სკოლის კურსდამთავრებულებმა:
•⁠ ელენე ფილფანმა ისაუბრა “გაურკვევლობაში მოქმედების წესზე”. ელენემ მართვის სკოლის საბაკალავრო პროგრამის დასრულების შემდეგ დაამთავრა Lund University-ის მეწარმეობისა და ინოვაციის სამაგისტრო პროგრამა. ამჟამად იგი მართვის სკოლის ლექტორია და ასწავლის პროექტების მართვასა და სამეწარმეო აზროვნების წესს
•⁠ ნიკა ბულისკერიამ და მარიამ ნარიმანიძემ აბიტურიენტებთან წარმართეს დისკუსია თემაზე: „AI თუ მართვის სტუდენტი: ვინ აგრძელებს ფიქრს იქ, სადაც ალგორითმი ჩერდება?“
•⁠ ⁠ვეკო შარაბიძემ წარადგინა თემა: „სოკრატე და AI აგენტები ერთი გონების გარშემო“. ვეკო საქართველოს ბანკის ოპერაციული პროექტების მენეჯერია
•⁠ ანა რურუამ ისაუბრა თემაზე: „უნივერსიტეტის არჩევა 2025 წელს: რა სჭირდება დასაქმების ბაზარს?“ ანამ მართვის სკოლის საბაკალავრო პროგრამის დასრულების შემდეგ დაამთავრა Central European University-ის საჯარო მმართველობის სამაგისტრო პროგრამა.

18/12/2025

ქეთო ჯანიაშვილი
2026 წლის გამოშვება

2026 წელს ქეთო სწავლას პარიზში, SKEMA Business School-ში გააგრძელებს.

„თბილისის თავისუფალი უნივერსიტეტის მართვისა და საზოგადოებრივ მეცნიერებათა სკოლის სტუდენტი. უნივერსტეტში 2022 წელს ჩავაბარე, ამ პერიოდში ბოლომდე გადაწყვეტილი არ მქონდა, თუ კონკრეტულად რომელ პროფერსიას ავარჩევდი ან სად ვხედავდი ჩემს თავს. თავიდან ბიზნეს სკოლა მეწერა, მაგრამ შემდეგ მივხვდი, რომ მართვის სკოლა გაცილებით უფრო ეხმიანებოდა ჩემს ინეტერსებს, როგორც ტექნიკური, ისე ჰუმანიტარული მიმართულებებისადმი. სწავლის დასაწყისში არ ვიცოდი, თუ რა პროფესიის არჩევა მინდოდა, რეალურად მხოლოდ მეორე კურსის მიწურულს მივხვდი, რომ მარკეტინგი მაინტერესებდა. თავისუფალი კრედიტებით არჩეული საგნებით და სამუშაო გამოცდილებით ჩემი პროფესიული მიზნები კიდევ უფრო განვსაზღვრე.

მუშაობა მესამე კურსზე დავიწყე. მონაწილეობა მივიღე ლიდერატორის პროგრამაში, სამი მიმართულებით- მომხმარებლის გამოცდილებისა და კმაყოფილების, ერთგულების და პრემიალური გაყიდვების- SOLO Lifestyle დეპარტმანეტებში. ამავე პერიოდში ვმუშაობდი ჩემს ჯუნიორ პროექტზე, რომელიც დავუკავშირე ჩემს ორ ინტერესის სფეროს- მარკეტინგსა და ფსიქოლოგიას, შევეცადე მათი გაერთიანება და განვიხილე ბრენდისადმი ერთგულების მიღმა არსებული ფსიქოლოგიური ფაქტორები, თავისუფალი უნივერსიტეტის ლექტორის, ელენე ფილფანის, ხელმძღვანელობით. აგრეთვე, უნივერსიტეტში სწავლისას ჩემი უცხოური ენების სწავლისადმი ინტერესი გაიზარდა, გავაგრძელე სკოლის პერიოდში დაწყებული ფრანგული ენის სწავლა და პირველად ვცადე ესპანური ენის ათვისებაც.

სწავლის გაგრძელება საზღვარგარეთ მრავალი წელი მსურდა. ბევრი ფიქრის და უნივერსიტეტების ძიების ხანგრძლივი პროცესის შემდეგ გადავწყვიტე ჩამებარებინა პარიზში, საფრანგეთში, ევროპის ერთ-ერთ წამყვან ბიზნესსკოლაში- „SKEMA Business School“ საერთაშორისო მარკეტინგისა და ბიზნეს განვითარების ერთწლიან სამაგისტრო პროგრამაზე. ამავდროულად, წამატებული აკადემიური მოსწრების საფუძველზე მივიღე აღნიშნული უნივერსიტეტის შიდა დაფინანსება და ამჟამად ვარ ეიფელის სტიპენდიის კანდიდატი.
მართვის სკოლაში ჩაბარებამ საშუალება მომცა ჩემი შესაძლებლობები აღმომეჩინა და გამომეცადა თავი მრავალი კუთხით. თავისუფალი უნივერსიტეტის სტუდენტობა მუდმივად მმატებს თავდაჯერებულობას, რადგანაც ვიცი, რომ ნებისმიერ გარემოში, ნებისმიერ საკითხზე შემეძლება არგუმენიტირებულად საუბარი, დიალოგში ჩართვა და აზრის დაფიქსირება ანალიტიკური მსჯელობის შედეგად. საბოლოოდ, შემიძლია ვთქვა, რომ მივიღე უმაღლესი განათლება სხვადასხვა საკითხთან მიმართებით და კონკრეტულ სფეროში საკუთარი თავი ვიპოვე.“

26/09/2024

მარიამ ბოლქვაძე
2021 წლის გამოშვება

მარიამი წელს ნიდერლანდებში, ტილბურგის უნივერსიტეტის ფსიქოლოგიის კვლევით მაგისტრატურაზე გააგრძელებს სწავლას.
ის ასევე მიიღეს ხრონინგენის უნივერსიტეტის სოციალური და ქცევითი მეცნიერებების კვლევით პროგრამაზე, თუმცა საბოლოოდ მარიამმა არჩევანი ტილბურგის უნივერსიტეტზე გააკეთა.

"თავისუფალ უნივერსიტეტში სწავლისას ჩემი ძირითადი ინტერესი ყოველთვის ადამიანი, მისი ქცევა, ფიქრები, ემოციები და მათზე ზემოქმედი ფაქტორები იყო. მართვის სკოლა სწორედ ამ საკითხებს აერთიანებს. ბევრ სხვადასხვა დისციპლინასთან შეხებამ კარგი საფუძველი მომცა, რომ ჩემ გარშემო მიმდინარე მოვლენები სხვადასხვა პერსპექტივიდან დამენახა, თუმცა ყოველთვის მქონდა სურვილი, რომ შემდგომ საფეხურზე ცოდნა უფრო კონკრეტული მიმართულებით გამეღრმავებინა. დროთა განმავლობაში კი მივხვდი, რომ პროგრამის ფარგლებში განხილულ ფაქტორებს შორის ჩემთვის ყველაზე საინტერესო ფსიქოლოგიური ასპექტი იყო და პიროვნების ფსიქოლოგიის მიმართულებით გადავწყვიტე სწავლის გაგრძელება.
საზღვარგარეთ წასვლამდე, ილიას სახელმწიფო უნივერსიტეტის სოციალური ფსიქოლოგიის სამაგისტრო პროგრამაზე ვისწავლე. აქვე დავიწყე ხანდაზმულ ასაკში ფსიქოლოგიური კეთილდღეობის კვლევა.

გარდა თეორიული და პრაქტიკული ცოდნისა, რომელიც ორივე უნივერსიტეტში სწავლის პერიოდში მივიღე, ვფიქრობ, დიდი მნიშვნელობა ჰქონდათ იმ ადამიანებს, რომლებიც ამ წლების განმავლობაში გავიცანი. ამ ფაქტორის მნიშვნელობა საკმაოდ გვიან გავაცნობიერე, ახლა კი მგონია, რომ სასწავლო პროცესის ერთ-ერთი ყველაზე ღირებული ნაწილი სწორედ ესაა, რადგან სხვადასხვა ლექტორთან და სტუდენტთან ურთიერთობა, ან უბრალოდ იმის დანახვა, თუ რას აკეთებენ, რა საკითხებით ინტერესდებიან და როგორია მათი პროფესიული ცხოვრება, შეიძლება პირადი შთაგონების წყაროდაც იქცეს და როგორც ამჟამინდელი, ასევე სამომავლო ინტერესებიც განსაზღვროს.

სწავლასთან ერთად, ამ პერიოდში ვცდილობდი სამუშაო გამოცდილებაც მიმეღო, მათ შორის ჩემთვის ყველაზე მნიშვნელოვანი კი სკოლაში მასწავლებლად მუშაობა იყო, რამაც, ერთი მხრივ, ჩემი ინტერესი პიროვნების ფსიქოლოგიისა და მასზე ზემოქმედი ფაქტორებისადმი კიდევ უფრო გაზარდა, მეორე მხრივ კი, სულ სხვა კუთხიდან დამანახა სასწავლო პროცესი, რაც ასევე კარგი გამოცდილება იყო.

წელს სწავლას ნიდერლანდებში, ტილბურგის უნივერსიტეტში გავაგრძელებ ფსიქოლოგიის ორწლიან კვლევით სამაგისტრო პროგრამაზე სახელად “ინდივიდუალური განსხვავებები და შეფასება”, რაც ადამიანებს შორის არსებულ განსხვავებებს სხვადასხვა პერსპექტივიდან შეისწავლის, ერთი მხრივ, ბიოლოგიურ და ნეიროფიზიოლოგიურ დონეზე, მეორე მხრივ კი, ცხოვრებისეული განვითარების კუთხით. თეორიულ ნაწილთან ერთად, ბევრ კვლევით კურსსაც გავივლი, რაც საშუალებას მომცემს, ჩემთვის საინტერესო და მნიშვნელოვანი შეკითხვების კვლევით შეკითხვებად ფორმულირება და მათზე სანდო პასუხების მიღება შევძლო. მთლიანობაში კი ეს პროგრამაც, თავისუფალისა და ილიას სახელმწიფო უნივერსიტეტის პროგრამების მსგავსად, სხვადასხვა დისციპლინას აერთიანებს, რაც სრული სურათის უკეთ დანახვის შესაძლებლობას იძლევა."

24/10/2023

⭐️ ჩვენს არაჩვეულებრივ კურსდამთავრებულს და ჩვენსავე ლექტორს, თეა მიქაძეს უკვე ფორმალურადაც ვულოცავთ კემბრიჯის უნივერსიტეტის მაგისტრობას ⭐️

17/10/2023

2023 წლის ოქტომბრის განახლება:

ანა წელს ნიდერლანდებში, დელფტის ტექნოლოგიურ უნივერსიტეტში, ტექნოლოგიების, პოლიტიკისა და მენეჯმენტის ფაკულტეტის სადოქტორო პროგრამაზე გააგრძელებს სწავლას.

ანა გაგუა
2017 წლის გამოშვება

* 2023 წლის ოქტომბრის განახლება:

ანა წელს ნიდერლანდებში, დელფტის ტექნოლოგიურ უნივერსიტეტში, ტექნოლოგიების, პოლიტიკისა და მენეჯმენტის ფაკულტეტის სადოქტორო პროგრამაზე გააგრძელებს სწავლას. მისი საკვლევი თემაა საჯარო უწყებებში ხელოვნური ინტელექტის აპლიკაციების დანერგვა. ნიდერლანდების რამდენიმე საჯარო უწყებასთან ერთად ანა იმუშავებს რისკის შეფასებისა და გადაწყვეტილების მიღების პროცესში ხელოვნური ინტელექტის ინტეგრაციის საკითხებზე (Human-AI Collaboration in decision Making process). ანას კვლევის ერთ-ერთი მთავარი ფოკუსი ამ პროცესში ეთიკური საკითხებისა და Responsible AI პრაქტიკების მნიშვნელობა იქნება.

***

ანამ წელს ერასმუს მუნდუსის ერთიანი სამაგისტრო სტიპენდია მოიპოვა და ციფრული კომუნიკაციების, პოლიტიკისა და ინოვაციების ორწლიან პროგრამაზე ისწავლის.

ანა პირველ სემესტრს ავსტრიაში, ზალცბურგის უნივერსიტეტში გაატარებს, შემდეგ წელს კი სწავლას ბელგიაში, ბრიუსელის თავისუფალ უნივერსიტეტში (Vrije Universiteit Brussel) გააგრძელებს.

სამაგისტრო პროგრამას მრავალფეროვანი კავშირები აქვს სხვადასხვა კვლევით ორგანიზაციასთან, მათ შორისაა: კალიფორნიის უნივერსიტეტი (UCLA), ავსტრალიის ქვინსლენდის ტექნოლოგიური უნივერსიტეტი (QUT), სეულის სახელმწიფო უნივერსიტეტი, კოპენჰაგენის ოლბორგის უნივერსიტეტი (AAU). სტუდენტებს შესაძლებლობა აქვთ სამაგისტრო ნაშრომის თემიდან გამომდინარე შეარჩიონ რომელ პარტნიორ უნივერსიტეტში გაატარებენ ბოლო სემესტრს.

სამაგისტრო პროგრამა ციფრული კომუნიკაციების სფეროს ინტერდისციპლინური მიდგომით შეისწავლის და 20 სხვადასხვა ეროვნების 25 სტუდენტს აერთიანებს.
თავისუფალ უნივერსიტეტში სწავლისას ანას ძირითადი ინტერესები იყო პოლიტიკის მეცნიერებები, დემოკრატიზაციის პროცესები, საბჭოთა კვლევები და საჯარო პოლიტიკა. ანამ, ნუცა ბათიაშვილის ხელმძღვანელობით დაიცვა საბაკალავრო ნაშრომი, „დემოკრატიული ტრანზიციები საბჭოთა მემკვიდრეობის ჩრდილში - დაკარგული პრე-კომუნისტური გამოცდილება“.
პარალელურად, ანა მუშაობდა ინფორმაციის თავისუფლების განვითარების ინსტიტუტში ანალიტიკოსის პოზიციაზე, სადაც ელექტრონული მმართველობით და საჯარო პოლიტიკაში თანამედროვე საინფორმაციო ტექნოლოგიების როლით დაინტერესდა. ასევე, ანა მუშაობდა საჯარო სამსახურის ბიუროს ანალიტიკურ დეპარტამენტში უფროსი სპეციალისტის პოზიცაზე. ილიას სახელმწიფო უნივერსიტეტში საჯარო პოლიტიკის სამაგისტრო პროგრამაზე სწავლისას ანამ, თამთა ხალვაშის ხელმძღვანელობით დაიცვა სამაგისტრო ნაშრომი - "ტექნოლოგიები, მოქალაქეები და სახელმწიფო", სადაც საქართველოს ბინათმესაკუთრეთა ამხანაგობების მაგალითზე სახელმწიფოსა და ინდივიდს შორის ურთიერთობის პროცესში ტექნოლოგიების როლს მიმოიხილავს ისტორიული, სოციალური და კულტურული კონტექსტის გათვალისწინებით.

ამ ეტაპისთვის, ანას ინტერესები მიმართულია ციფრული ტრანსფორმაციების და პოლიტიკის საკითხების შესწავლასა და თანამედროვე საინფორმაციო ტექნოლოგიების როლის კრიტიკული ანალიზზე.

02/10/2023

ელენე ფილფანი
2022 წლის გამოშვება

ელენე წელს სწავლას შვედეთში, ლუნდის უნივერსიტეტში აგრძელებს მეწარმეობისა და ინოვაციის ერთწლიან სამაგისტრო პროგრამაზე Lund University Global Scholarship programme-ის დაფინანსებით.

"2018 წელს მართვისა და საზოგადოებრივი მეცნიერებების სკოლაში ჩაბარება უბრალო მიზეზით გადავწყვიტე - რამდენადაც ვიცოდი ყველაზე მრავალფეროვანი პროგრამა იყო და, იმედი მქონდა, ჩემს ბევრ ინტერესში ცოდნის გაღრმავებით, ფოკუსის დავიწროებაში დამეხმარებოდა. თუმცა, უნივერსიტეტი დავასრულე იმაზე მეტი გატაცებით, ვიდრე დავიწყე და რადგან პრიორიტეტების დალაგების უნარი არ აღმომაჩნდა, ბოლო კურსებზე ჩემს ძირითად პრობლემად დღეში მხოლოდ 24 საათის არსებობა იქცა - რანაირად მომესწრო ყველა ინტერესისთვის თავი მიმეძღვნა?

გამოსავალი (იმედი მაქვს რეალური და არა მოჩვენებითი) ჩემს კურსელებთან ურთიერთობამ მაპოვნინა - მათთან საუბარი ხშირად იმაზე მრავლისმომცემი და შთამაგონებელი იყო, ვიდრე წიგნის მარტო ფურცვლა. და, რაც მთავარია, ბევრად უფრო სწრაფიც! გამიმართლა, რომ საუნივერსიტეტო წლები ასეთ გონიერ და მრავალმხრივ ნიჭიერ ადამიანთან გავატარე და მივხვდი, რომ არ იყო საჭირო ყველაფერს მარტო შევჭიდებოდი - სწავლა სხვების მოსმენითა და საკუთარი ცოდნის გაზიარებით, თურმე, (სისწრაფე იქით იყოს და) ბევრად ნაყოფიერი, საამო და სახალისოა. ამ სენტიმენტმა მეოთხე კურსის დასაწყისში, თან შემთხვევით, თან გამიზნულად და დანამდვილებით ჩემს კურსელ, ანი კახიძესთან გაუჩერებელი მსჯელობის საფუძველზე, მასთან ერთად საგანმანათლებლო ორგანიზაციის დაფუძნებაში პოვა პრაქტიკული გამოხატულება. რა-რა და მართვაზე ჩაბარებისას ნამდვილად ვერ ვიფიქრებდი, თუ მართლა რამის მართვას მოვკიდებდი ხელს. სიმართლე ითქვას, ეს ჩემი ბუნებრივი მოწოდება არცაა. თუმცა ამჟამად ზემოთ აღწერილ დილემასთან გასამკლავებლად ერთადერთ რეალურ გზად ჩვენი ორგანიზაცია მესახება. ამ აზრს მიმყარებს პროექტზე მუშაობის უკვე თითქმის 2 წლიანი გამოცდილებაც. ვერც წარმოვიდგენდი, რომ ანის და ჩემი იდეა ამდენ ნიჭიერი ადამიანს აიყოლიებდა. დასაწყისშივე არაერთი თანამოაზრე შემოგვიერთდა და უამრავი ადამიანი გვერდში დაგვიდგა. ამისთვის თითოეული მოხალისის, მრჩევლის, მსმენელისა თუ მოსწავლის უზომოდ მადლიერი ვარ.

ახლა, ჩვენი მასშტაბების ნელ-ნელა ზრდასთან ერთად, გადავწყვიტე ჩემი ბაკალავრის “საზოგადოებრივი მეცნიერებების” ნაწილი ცოტა ხნით გვერდზე გადავდო და “მართვისას” უფრო სერიოზულად მივუდგე. ამიტომ, ამ წელს ლუნდის უნივერსიტეტში “მეწარმეობისა და ინოვაციების” სამაგისტრო პროგრამაზე სწავლაში გავატარებ. იმედი მაქვს, ადამიანური, ინტელექტუალური და ფინანსური რესურსების თავმოყრა-ორგანიზების პრაქტიკულ ცოდნას შევიძენ და, ჩვენს გუნდთან ერთად, ორგანიზაციისთვის მყარი სტრუქტურის შექმნას მოვახერხებ, რათა სამომავლოდ, მეც და სხვებიც 24-საათიანი დღით აღარ შევწუხდეთ."

19/09/2023

ანი კახიძე
2022 წლის გამოშვება

ანი წელს სწავლას შვედეთში, ლუნდის უნივერსიტეტში გააგრძელებს მედიისა და კომუნიკაციების სამაგისტრო პროგრამაზე. ანის სწავლას სრულად აფინანსებს შვედეთის მთავრობა.

"მეთორმეტე კლასში, მაშინ, როცა ძალიან დაბნეული ვიყავი და საკუთარ თავზე ვბრაზობდი, რადგან არც ერთი ჩემთვის ცნობილი პროფესია არ მხიბლავდა, გადავწყვიტე, 4 წელი რას ვისწავლიდი მომავალი ლექტორების კვლევითი თემებისა და საუნივერსიტეტო საგნების მიხედვით შემერჩია. ძებნისას მართვის სკოლა შემხვდა და განსხვავებული დისციპლინების სწავლის შესაძლებლობის გამო გადავწყვიტე აქ ჩაბარება.

მეორე კურსზე ქართული აზრის ისტორიის სწავლა დავიწყეთ, სადაც ჩემთვის მთავარი მიგნება თაობათა მჭიდრო კავშირი იყო - როგორ გროვდებოდა ინტელექტუალური მემკვიდრეობა და როგორ ეცადა ჩვენი პოლიტიკური ელიტა მეოცე საუკუნის დასაწყისში მოდერნული სახელმწიფოს შექმნას. სწავლისას გაჩნდა კითხვა - რა არის ჩემი, როგორც მოქალაქის - ამ დიდი ჯაჭვის ნაწილის, პასუხისმგებლობა და როგორ უნდა აღვადგინო კავშირი იმ თაობასთან, რომელიც საბჭოთა მემკვიდრეობამ გაანადგურა. ეს კითხვა თავის თავში კიდევ უფრო ფართო კითხვას იტევს - რა არის მოქალაქე და რა მიმართება გვაქვს თანამოქალაქეებთან. ამ უკანასკნელზე პასუხის ძიება კი ჩემი საბაკალავრო ნაშრომის (“ლიბერალიზმის კრიზისი და სამოქალაქო მეგობრობა”) ფარგლებში დავიწყე.

დამამთავრებელ კურსზე ფედერალისტების წერილების სწავლისას ელენე ფილფანმა და მე გადავწყვიტეთ პოდკასტის საშუალებით პირველი რესპუბლიკის, საქართველოს სახელმწიფოს დაფუძნების შესახებ მოგვეყოლა მსმენელისთვის. “დე რე პუბლიკასთვის” 10-ზე მეტი ეპიზოდი უკვე ჩავწერეთ. ახალი სეზონის დაწყებას შვედეთიდან მალევე ვგეგმავთ.

გზად გავაცნობიერეთ, რომ მხოლოდ პოდკასტი საკმარისი არაა - გვსურს ის ცოდნა, რასაც საუნივერსიტეტო სივრცეში ვიღებდით, აკადემიის მიღმა გამოვიტანოთ. ამ მიზნით დავაარსეთ ორგანიზაცია - სტუდია გეორგიკა. ორგანიზაციის თანადამაარსებელს, მის წევრებს, მოხალისეებსა და მთავარ მრჩეველს, რომელიც, ასევე, ჩემი საბაკალავრო თემის ხელმძღვანელი იყო, ამ სკოლაში შევხდი, რისთვისაც ყოველთვის მადლიერი ვიქნები.

ბოლო კურსზე პოდკასტებს ვქმნიდით, პარალელურად ონლაინ მედიისთვის ვწერდი გრძლად საკითხავებს ლიბერალიზმის კრიზისზე და სულ მაფიქრებდა აუდიტორიასა და პროდუქტის შემქმნელს შორის უხილავი კავშირი. ისევ სილაბუსებისა და ლექტორთა კვლევითი გამოცდილების ძიებით აღმოვაჩინე მედია და კომუნიკაციების პროგრამა ლუნდის უნივერსიტეტში, რაც სოციალურ და ჰუმანიტარულ მეცნიერებებს აერთიანებს - ვსწავლობ მედიის დახმარებით როგორ იქმნება და იცვლება წარმოსახვითი სოციალური სივრცეები.

სამომავლოდ ჩემს კვლევით საქმიანობას, დიდი ალბათობით, პოლიტიკის მეცნიერებებს ან პოლიტიკის ფილოსოფიას დავუკავშირებ. რა გზაც არ უნდა ავირჩიო, ზუსტად ვიცი რომ თან გამყვება სტუდია გეორგიკა - ჩვენი სტუდენტუტი წამოწყება, რომელიც მართვის სკოლაში დაიბადა."

17/09/2023

ელენე შაფათავა
2022 წლის გამოშვება

ელენე წელს საუნივერსიტეტო დაფინანსებით გააგრძელებს სწავლას ვენაში, ცენტრალური ევროპის უნივერსიტეტის სოციოლოგიისა და სოციალური ანთროპოლოგიის სამაგისტრო პროგრამაზე.

"სოციალური და სამედიცინო ანთროპოლოგიით მართვისა და საზოგადოებრივი მეცნიერებების სკოლაში სწავლის დაწყებიდან მალევე დავინტერესდი. ბაკალავრიატზე სწავლისას ნუცა ბათიაშვილის ხელმძღვანელობით დავწერე ჯუნიორ პროექტი „სუვერენობის ანთროპოლოგია“ და შემდეგ საბაკალავრო ნაშრომი - „სხეული და ჰიგიენის პროპაგანდა საბჭოთა კავშირში“.

სწავლის პარალელურად სტაჟირებას გავდიოდი „საბჭოთა წარსულის კვლევის ლაბორატორიაში“, რომლის ფარგლებშიც გამოქვეყნდა ჩემ მიერ საარქივო კვლევაზე დაყრდნობით მომზადებული ნაშრომი „ჰიგიენის პროპაგანდა საბჭოთა კავშირში“.

უნივერსიტეტის დასრულების შემდეგ თავისუფალი უნივერსიტეტის „სოციალური და კულტურული ანთროპოლოგიის“ კურსში ვიმუშავე ლექტორის ასისტენტად.
ამ გამოცდილებამ კიდევ უფრო გამოკვეთა ჩემი სამომავლო კვლევითი ინტერესები. ანთროპოლოგიის სამაგისტრო პროგრამაზე მიმიღო სტოკჰოლმის უნივერსიტეტმაც, თუმცა საბოლოოდ არჩევანი ცენტრალური ევროპის უნივერსიტეტის ინტერდისციპლინურ და ძლიერი კვლევითი ფოკუსის მქონე პროგრამაზე შევაჩერე, რაც ზუსტად შეესაბამება ჩემს სამომავლო აკადემიურ და კარიერულ მიზნებს."

15/09/2023

ნია აფციაური
2021 წლის გამოშვება

ნია სწავლას საფრანგეთში, Université Paris Sciences & Lettres (PSL-ში), კოგნიტური მეცნიერების ინგლისურენოვან სამაგისტრო პროგრამაზე აგრძელებს.

ნიამ მოიპოვა Campus France-ისა და განათლების საერთაშორისო ცენტრის ერთობლივი სტიპენდია - France Excellence 2023/24, რაც მისი სწავლისა და პარიზში ცხოვრების ხარჯებს სრულად დაფარავს.

ის ასევე მიიღეს იტალიაში University of Trento-ს კოგნიტური ნეირომეცნიერების ფაკულტეტზე სწავლის 80%-იანი დაფინანსებით და Erasmus Mundus-ის ენისა და კომუნიკაციების ტექნოლოგიების სამაგისტრო პროგრამაზეც (LCT), თუმცა საბოლოოდ ნიამ PSL-ში CogMaster-ზე არჩია სწავლა.

“მართვის სკოლაში დაბნეულ სტუდენტად მივედი. ახლა, 6 წლის შემდეგაც დაბნეული სტუდენტი ვარ, ამჯერად კოგნიტური მეცნიერების სამაგისტრო პროგრამაზე. თუმცა ფუნდამენტური განსხვავება ისაა, რომ ამჯერად ამგვარ ბუნდოვანებებს მეტი აღტაცებით ვუყურებ. ჩემი ეს ახლებური მიმართება კი სწორედ მართვის სკოლაში მიღებული გამოცდილების შედეგია.

ჩემი განათლების გზა რომ სწორხაზოვანი არ იქნებოდა მართვის კურიკულუმის ნახვისთანავე ვიცოდი. ასეც მოხდა - უამრავი ახალ ინტერესი და აღტაცების საგანი აღმოვაჩინე და უფრო მეტადაც დავიბენი. თან დასაწყისში ჯერ კიდევ მჯეროდა, რომ ამ გზას მომავლის შესახებ ერთ, აბსოლუტურ სიცხადემდე უნდა მივეყვანე - აბა, სად გაგონილა, ფილოსოფიაც მოგწონდეს, ლიტერატურაც, ანთროპოლოგიაც, ფრანგული ენაც და ლაბორატორიული კვლევებისკენაც გეჭიროს თვალი?!

კოგნიტურ მეცნიერებასაც თვითგამორკვევაზე შფოთვით, დამოუკიდებელი წიაღსვლებით და უნივერსიტეტში კულტურული და კოგნიტური ფსიქოლოგიის საგნის გავლით მივაგენი. ასე გავიგე, რომ არსებობს სფერო, სადაც სხვადასხვა დისციპლინის პრიზმიდან იკვლევენ ადამიანის გონებას, მენტალურ ფუნქციებს და ცნობიერ გამოცდილებებს. ამ კვლევა-ძიებაში განსაკუთრებით ლინგვისტიკამ მიმიზიდა - იმან, თუ როგორ მონაწილეობს ენა თავისი სოციო-კულტურული ველით სამყაროს აღქმის ფორმირებაში. მესამე კურსზე Junior პროექტი “დრო, როგორც ნეიროლინგვისტური კონსტრუქცია” ნუცა ბათიაშვილის ხელმძღვანელობით დროის მეტაფორების შესახებ დავწერე. მოგვიანებით კი მულტიდისციპლინურ საბაკალავრო ნაშრომში 2008 წლის ომის მოგონებებში ტრავმის მეტაფორები, ასევე ნუცას დახმარებით, თავად ვიკვლიე.

როცა მაგისტრატურაზე სწავლის გაგრძელება კოგნიტური მეცნიერების მიმართულებით გადავწყვიტე, არ მინდოდა თავი მხოლოდ ლინგვისტიკისადმი ინტერესით შემეზღუდა. CogMaster კი ლინგვისტიკასთან ერთად მეცნიერების ყველა ძირითადი მიმართულების თეორიული კურსებითა და ინტენსიური კვლევითი კომპონენტით ჩემთვის განსაკუთრებით კომფორტული და მრავალფეროვანი პროგრამა აღმოჩნდა.

ჩემი გადაწყვეტილება იმანაც გაამყარა, რომ Université PSL მსოფლიო უნივერსიტეტების სხვადასხვა რეიტინგის მიხედვით 50 საუკეთესოში შედის და საფრანგეთსა და სხვა ქვეყნებში კოგნიტური და ტვინის კვლევის უამრავ ლაბორატორიასთან თანამშრომლობს.

ისე გამოვიდა, რომ მაგისტრატურის ფაკულტეტსაც ზოგადი და მასშტაბური სახელი ჰქვია, არც მომავლისკენ მზერაში შესულა სიცხადე, მაგრამ ახლა გამოცდილებით ვიცი - რაც მეტ ახალ მიმართულებას მოვსინჯავ, მეტად დავიბნევი და მეტი რამ აღმაფრთოვანებს, შანსებიც მეტი მაქვს, რომ ჩემი აკადემიური და პროფესიული ცხოვრება მრავალფეროვანი და სასიამოვნო იქნება.”

11/09/2023

ნინუცა ზაკალაშვილი
2019 წლის გამოშვება

ნინუცა წელს სწავლას ერასმუს მუნდუსის დაფინანსებით გააგრძელებს გლაზგოს უნივერსიტეტის ერთობლივ სამაგისტრო პროგრამაზე Managing Art and Cultural Heritage in Global Markets. ნინუცა ასევე მიიღეს ცენტრალური ევროპის უნივერსიტეტის გენდერის კვლევების სამაგისტრო პროგრამაზე სრული დაფინანსებით (Master’s Distinction Scholarship), თუმცა სწავლის გაგრძელება გლაზგოში გადაწყვიტა.

"ჩემი ინტერესები მართვის სკოლის მულტიდისციპლინურმა სასწავლო
გარემომ განაპირობა. ბოლო კურსზე განსაკუთრებით დავინტერესდი
ლიტერატურის როლით ტოტალიტარულ კონტექსტებში. ქართული აზრის
ისტორიისა და საბჭოთა კულტურისა და ხელოვნების კურსების გავლა ჩემი
საბაკალავრო თეზისის ჩამოყალიბებაში დამეხმარა. ჩემი საკვლევი თემა
შეეხებოდა 1940-იან წლებში, მსოფლიო ომის შემდეგ გამოქვეყნებულ
საბჭოთა ქართულ მოთხრობებსა და ამ პერიოდის სოცრეალისტურ ტროპებს.

საბაკალავრო პროგრამის დასრულების შემდეგ სწავლა გავაგრძელე
თანამედროვე საქართველოს ისტორიის სამაგისტრო პროგრამაზე, სადაც
გადაწყვეტილი მქონდა 20-იანი წლების საქართველოს კულტურული
კონტექსტის კვლევა, გასაბჭოების პერიოდის ცვლილებები, წინააღმდეგობის
ფორმები და მისი განვითარება.

ახლა კი შესაძლებლობა მაქვს, კვლევა უფრო გლობალური კონტექსტით
გავაგრძელო, რადგან მოვიპოვე ერასმუს მუნდუსის სტიპენდია და სწავლას
გავაგრძელებ გლაზგოს უნივერსიტეტის ერთობლივ პროგრამაზე - Managing
Art and Cultural Heritage in Global Markets. პროგრამის მიმდინარეობისას
ვისწავლი შემდეგ უნივერსიტეტებში: the University of Glasgow (UofG), Institut d'études supérieures des arts (IESA), University Institute of Lisbon (ISCTE),
Erasmus University Rotterdam (EUR). ამ ორი წლის განმავლობაში ვაპირებ ჩემი
კვლევითი ინტერესები დავუკავშირო მუზეუმებისა და კვლევითი ცენტრების
პოლიტიკას, დამახსოვრებისა და დავიწყების მექანიზმებს სახელმწიფო
კულტურის პოლიტიკაში."

28/08/2023

გოჩა ვანაძე
2020 წლის გამოშვება

გოჩა წელს სწავლას სრული დაფინანსებით გააგრძელებს ვენაში, ცენტრალური ევროპის უნივერსიტეტის პოლიტიკური მეცნიერებების სამაგისტრო პროგრამაზე

"საბაკალავრო პროგრამის განმავლობაში, მართვის სკოლის მულტიდისციპლინური პალიტრიდან ორი ძირითადი ინტერესი ჩამომიყალიბდა. ჯერ ქართული აზრის ისტორიის კურსის შთაგონებით, პირველმა რესპუბლიკამ და ქართული დემოკრატიის საწყისებმა დამაინტერესა, შემდეგ - საბაკალავრო თეზისის ფარგლებში არაძალადობრივ სოციალურ მოძრაობზე ვიმუშავე. ამიტომაც ბაკალავრიატი დავასრულე თუ არა, ილიას უნივერსიტეტის თანამედროვე საქართველოს ისტორიის სამაგისტრო პროგრამაზე ჩავაბარე. აქ საშუალება მომეცა დარგის სპეციალისტების All Star-ის ლექციები მომესმინა და მემუშავა სამაგისტრო თეზისზე საქართველოს პირველი რესპუბლიკის შესაძლო კონსტიტუციური წესრიგის შესახებ, დამფუძნებული კრების არჩევნების მაგალითზე.

ახლა ვგეგმავ მეორე ინტერესსაც მივუბრუნდე, რადგან გამიმართლა და ევროპის ცენტრალური უნივერსიტეტის პოლიტიკური მეცნიერებების სკოლაში, სწავლის სრული დაფინანსებით მიმიღეს. ვენაში ვაპირებ უფრო დეტალურად გამოვიკვლიო არაძალადობრივი წინააღმდეგობის თავისებურებები და ამ ფორმის პროტესტის წარმატება-წარუმატებლობის მიზეზები სხვადასხვა კონტექსტში."