27/02/2026
स्वामी विवेकानंद प्रतिष्ठान संचलित, स्वामी विवेकानंद इन्स्टिट्यूट ऑफ टेक्नॉलॉजी (SVIT), सोलापूर येथे 'विद्यार्थी शिस्त आणि गैरवर्तनाचे परिणाम' या विषयावर विशेष मार्गदर्शनाचे आयोजन करण्यात आले होते. सोलापूर निर्भया पथकाच्या प्रमुख आणि महिला सहाय्यक पोलीस निरीक्षक मा. अंजना फाळके यांनी विद्यार्थ्यांना कायद्याची जाण करून देत जीवनात यशस्वी होण्यासाठी शिस्तीचे महत्त्व पटवून दिले.
कार्यक्रमाच्या सुरुवातीला कॅम्पस इन-चार्ज मा. कीर्ती भोसले मॅडम यांच्या हस्ते प्रमुख पाहुण्या मा. अंजना फाळके मॅडम, सावंत साहेब आणि गुंठे साहेब यांचा यथोचित सत्कार करण्यात आला. याप्रसंगी प्राचार्य डॉ. यु. एस. सुतार यांची देखील कार्यक्रमाचे कौतुक केले.
मार्गदर्शन करताना फाळके मॅडम यांनी स्वतःचा ग्रामीण भागातून सुरू झालेला प्रवास मांडला. इंग्रजी भाषेची भीती असूनही केवळ जिद्द आणि कष्टाच्या जोरावर त्यांनी स्पर्धा परीक्षेत यश मिळवले. विद्यार्थ्यांनी मोबाईल आणि सोशल मीडियाच्या मोहात न पडता करिअरवर लक्ष केंद्रित करावे, असा सल्ला त्यांनी दिला. तसेच डॉ. ए.पी.जे. अब्दुल कलाम यांच्या 'अग्निपंख' या पुस्तकाचे वाचन करून स्वतःचे व्यक्तिमत्व घडवावे, असे आवाहन त्यांनी केले.
शिस्त ही केवळ शाळेपुरती मर्यादित न ठेवता ती स्वभावाचा भाग असावी. इंटरव्यूला जाताना वाटेत विनाकारण सुरू असलेला नळ किंवा फॅन बंद करणे ही खरी शिस्त आहे, असे त्यांनी सांगितले. शिवीगाळ (कलम ५०६), मारहाण (कलम ३२३) आणि पोक्सो (POCSO) कायद्यातील तरतुदींची माहिती देताना त्या म्हणाल्या की, "पोलीस तुमच्याकडे येत नाहीत, तर तुमच्या गैरवर्तनामुळे तुम्ही पोलिसांपर्यंत पोहोचता आणि करिअर धोक्यात येते.".
हा कार्यक्रम संस्थेचे अध्यक्ष डॉ. बी. पी. रोंगे सर, सेक्रेटरी आदरणीय अशोक भोसले साहेब, व्हाईस प्रेसिडेंट आदरणीय एच. एम. बागल साहेब, खजिनदार आदरणीय बी. डी. रोंगे साहेब आणि इतर सर्व विश्वस्तांच्या मार्गदर्शनाखाली यशस्वीरित्या संपन्न झाला.
या कार्यक्रमाचे सूत्रसंचालन आणि आभार प्रदर्शन अत्यंत उत्साहपूर्ण वातावरणात पार पडले. संस्थेचे सर्व शिक्षक, शिक्षकेतर कर्मचारी आणि मोठ्या संख्येने विद्यार्थी या सत्राला उपस्थित होते.
