12/10/2026
ஹைறாத் மகளிர் இஸ்லாமிய கலாபீடத்தின் வரலாற்றில் ஒரு பொன்னான அத்தியாயம்
ஏறாவூர் | 10.10.2026 | சனிக்கிழமை
மட்டக்களப்பு மாவட்டம், ஏறாவூரில் அமைந்துள்ள ஹைறாத் மகளிர் இஸ்லாமிய கலாபீடத்தின் ஏற்பாட்டில், பல்கலைக்கழகங்களுக்குத் தெரிவு செய்யப்பட்ட மாணவிகளையும் அவர்களை வழிநடத்திய ஆசிரியர்களையும் கௌரவிக்கும் சிறப்புவிழா, 2026 ஒக்டோபர் 10ஆம் திகதி சனிக்கிழமை மாலை 4.00 மணிக்கு, ஏறாவூர்–சவுக்கடி வீதியில் அமைந்துள்ள EASCCA Reception மண்டபத்தில் சிறப்பாக நடைபெற்றது.
கலாபீடத்தில் முழுநேரமாகக் கல்வி பயின்று, பல்கலைக்கழக அனுமதியைப் பெற்ற ஆறு தொகுதிகளைச் சேர்ந்த 63 மாணவிகள் இந்நிகழ்வில் நினைவுச் சின்னங்கள் வழங்கிக் கௌரவிக்கப்பட்டனர். மாணவிகளின் இச்சாதனைக்குப் பின்னால் அர்ப்பணிப்புடன் பணியாற்றிய ஆசிரியர்களும் மேடையில் கௌரவிக்கப்பட்டமை இந்நிகழ்வின் மற்றுமொரு சிறப்பம்சமாகும்.
இவ்விழாவின் பிரதம அதிதியாக பரகஹதெனிய அன்சாருஸ் ஸுன்னதில் முஹம்மதிய்யா அமைப்பின் தலைவர் அஷ்ஷெய்க் அபூபக்கர் சித்தீக் மதனி அவர்கள் கலந்து சிறப்பித்தார்கள். பிரதம பேச்சாளராக தென்கிழக்குப் பல்கலைக்கழகத்தின் இஸ்லாமிய கற்கைகள் மற்றும் அரபு மொழிப் பீடத்தின் பீடாதிபதி கலாநிதி MIM. ஜெஸீல் sir அவர்களும், கௌரவ அதிதியாக முஸ்லிம் சமய பண்பாட்டலுவல்கள் திணைக்களத்தின் முன்னாள் பிரதிப் பணிப்பாளர் அல் ஹாஜ் AL. அன்வர் அலி sir அவர்கள் கலந்து சிறப்பித்தனர்.
கலாபீடத்தின் நிர்வாகத்தினர், ஆசிரியர்கள், மாணவிகள், பல்கலைக்கழகங்களுக்குத் தெரிவு செய்யப்பட்ட மாணவிகளின் பெற்றோர்கள் மற்றும் பல்வேறு துறைகளைச் சேர்ந்த பிரமுகர்கள் எனப் பலரும் இவ்விழாவில் கலந்துகொண்டு மேலும் நிகழ்வைச் சிறப்பாக்கினர்.
இவ்விழாவின் மிக நெகிழ்ச்சியானதும் முக்கியத்துவம் வாய்ந்ததுமான நிகழ்வாக, ஏறாவூர் மண்ணின் முதலாவது பேராசிரியரும், கிழக்குப் பல்கலைக்கழகத்தின் இஸ்லாமிய கற்கைகள் துறைத் தலைவருமான பேராசிரியர் எம்.பி.எம். பௌசுல் ஸலஃபி PhD அவர்களின் கல்விசார் சாதனைகள் மற்றும் பங்களிப்புகளை நினைவுகூரும் வகையில் சிறப்பு பதிவு ஒன்று இடம்பெற்றதுடன், பேராசிரியர் அவர்களும் அவரது பெற்றோரும் மேடைக்கு அழைக்கப்பட்டு பிரதம அதிதி அவர்களால் கௌரவிக்கப்பட்டனர்.
எமது மண்ணின் அறிவுப் பெருமையைப் பறைசாற்றும் ஒருவரையும், அவரை உருவாக்கிய பெற்றோரையும் ஒரே மேடையில் கௌரவித்தமை நெகிழ்ச்சியான ஒரு தருணமாகவே அமைந்திருந்தது.
ஷரீஆ மற்றும் கல்விப் பொதுத்தராதர உயர்தர கல்வியை மையமாகக் கொண்டு ஆரம்பிக்கப்பட்ட ஹைறாத் மகளிர் இஸ்லாமிய கலாபீடம், தனது பத்தாண்டுகாலப் பயணத்தில் மாணவிகளின் கல்வி வளர்ச்சிக்கும், உயர்கல்வி அடைவுகளுக்கும் ஆற்றிவரும் பங்களிப்பை நினைவு கூறும் விதமாக கலாபீடத்தினால் ஆவணப்படம் ஒன்றும் வெளியிடப்பட்டது.
மாணவிகளின் சாதனைகளைக் கொண்டாடுவதுடன், அவர்களை உருவாக்கிய ஆசிரியர்களின் அர்ப்பணிப்பையும் பாராட்டி, ஏறாவூர் மண்ணின் கல்விப் பெருமையைப் போற்றிய இவ்விழா, கலாபீடத்தின் வரலாற்றில் மறக்க முடியாத ஓர் அத்தியாயமாகப் பதிவானது.
எதிர்காலத்தில் இன்னும் பல மாணவிகள் உயர்கல்வியை அடைந்து, மார்க்க அறிவிலும் பொதுக்கல்வியிலும் சிறந்து விளங்கி, சமூகத்திற்கும் நாட்டிற்கும் பயனுள்ளவர்களாக உருவாக இந்நிகழ்வு சிறந்த ஊக்கமாக அமையும் என்பதில் ஐயமில்லை.
இவ்விழாவை வெற்றிகரமாக நடத்துவதற்குப் பங்களித்த பிரதம அதிதி, பிரதம பேச்சாளர், கௌரவ அதிதி, நிர்வாகத்தினர், ஆசிரியர்கள், பெற்றோர்கள், மாணவிகள் மற்றும் அனைத்து நலன்விரும்பிகளுக்கும் கலாபீடத்தின் சார்பில் மனமார்ந்த நன்றிகள்.
அல்லாஹ் எமது கலாபீடத்தின் கல்விப் பணிகளை ஏற்றுக்கொண்டு, மேலும் பல சாதனைகளைப் படைக்க அருள்புரிவானாக!
*ஹைறாத் மகளிர் இஸ்லாமிய கலாபீடம் - ஏறாவூர்*
