10/07/2026
බලධරයිනි,
සිසු ජීවිත බිල්ලට නොදෙනු!
විශ්වවිද්‍යාලය තුළ සෞඛ්‍යාරක්ෂිත වටපිටාවක් තහවුරු කරනු!
මේ වන විට රුහුණ විශ්වවිද්‍යාලය සහ ඒ අවට ප්‍රදේශ තුළ ඩෙංගු, පැපොල සහ වෛරස් උණ රෝග ඉතා ශීඝ්‍රයෙන් පැතිර යමින් පවතින අතර අපගේ සහෝදර විද්‍යාර්ථයින් විශාල පිරිසක් මේ වන විටත් රෝගාතුර වී දැඩි පීඩාවකට පත්ව සිටී.
එමෙන්ම රෝගී වන විද්‍යාර්ථයින් හට කඩිනම් ප්‍රතිකාර ලබාගැනීම සඳහා විශ්වවිද්‍යාලය තුළ හෝ ඒ අවට ප්‍රමාණවත් පහසුකම් සහිත වෛද්‍ය මධ්‍යස්ථානයක් නොමැති අතර දිස්ත්‍රික් මහා රෝහල ඇතුළු රාජ්‍ය රෝහල් වල ධාරිතාවය ඉක්මවා ගොස් ඇති බැවින් හදිසි රෝගී තත්ත්වයකදී නිසි වෛද්‍ය උපදෙස් හෝ ප්‍රතිකාර ලබාගැනීමට නොහැකි වීමෙන් සිසුහු දැඩි අසරණභාවයකට පත්ව සිටී.
මෙවැනි බරපතළ සෞඛ්‍ය අවදානමක් පවතින පසුබිමක වුවද, විශ්වවිද්‍යාල පරිපාලනය ඒ පිළිබඳව කිසිදු අවධානයක් යොමු නොකර තවමත් දේශන සඳහා 80% ක පැමිණීම අනිවාර්ය කරමින් සිටීම අතිශය කනගාටුවට කරුණකි.රෝගී වූ සිසුන් පවා, පැමිණීම සම්පූර්ණ නොවීම හේතුවෙන් විභාග අහිමි වේයැයි යන බිය නිසා දේශනවලට සහභාගී වීමට පෙළඹී ඇත. මේ හරහා නිරෝගී සිසුන්ටද පැපොල සහ වෛරස් උණ වැනි බෝවන රෝග සම්ප්‍රේෂණය වීමේ දැඩි අවදානමක් නිර්මාණය වී ඇත.
එබැවින්, මෙවැනි ව්‍යසනයක් හමුවේ මෙම රෝග ව්‍යාප්තිය පාලනය වන තුරු රෝගී වන සිසුන් සඳහා කඩිනම් වෛද්‍ය පහසුකම් සැපයීමට කටයුතු කිරීමත්, ඩෙංගු හා අනෙකුත් රෝග පැතිරීම කළමනාකරණය කිරීම සඳහා අදාළ අංශ සමඟ එක්ව කඩිනම් වැඩපිළිවෙළක් දියත් කිරීමත්,
දේශන සඳහා අනිවාර්යය පැමිණීමේ නීතිය වහාම ලිහිල් කිරීමත්, විද්‍යාර්ථයින්ගේ ජීවිත හා සෞඛ්‍යය සම්බන්ධයෙන් මීට වඩා වගකීමෙන් යුතුව කටයුතු කරන ලෙසත් සහ මෙම අවදානම් සහගත තත්ත්වය සමනය කිරීම සඳහා වහාම මැදිහත් වන ලෙසත් අපි අදාළ බලධාරීන් හට තරයේ අවධාරණය කර සිටිමු.
2026 - 07 - 08
මහා ශිෂ්‍ය සංගමය - රුහුණ විශ්වවිද්‍යාලය
