24/08/2026
அதிபராகப் பொறுப்பேற்று, இன்றுடன் பத்தாண்டுகள்
-------------------------------------------
தெல்லிப்பளை யூனியன் கல்லூரியின் அதிபராகப் பொறுப்பேற்று, இன்றுடன் (24.08.2026) தனது பத்தாண்டு கால சேவையை திரு. தில்லையம்பலம் வரதன் அவர்கள் வெற்றிகரமாக நிறைவு செய்கிறார்.
ஒரு தசாப்த கால வளர்ச்சிப் பயணம்
-------------------------------------
கடந்த ஒரு தசாப்த காலமாக யூனியன் கல்லூரியின் வளர்ச்சியையும் முன்னேற்றத்தையும் நோக்காகக் கொண்டு, பல்வேறு சவால்கள், நெருக்கடிகள் மற்றும் விமர்சனங்களுக்கு மத்தியில் திறம்படப் பணியாற்றி கல்லூரியை உயரிய நிலைக்கு வழிநடத்தியுள்ளார்.
இவரது தலைமைத்துவத்தின் கீழ் கல்வி, விளையாட்டு, இணைப்பாடவிதான செயற்பாடுகள், உட்கட்டமைப்பு மற்றும் பௌதிக வளங்கள் உள்ளிட்ட அனைத்துத் துறைகளிலும் பாரிய மாற்றங்களும் குறிப்பிடத்தக்க அபிவிருத்திகளும் முன்னெடுக்கப்பட்டுள்ளன.
மாணவர் நலனுக்கான அடித்தளம் கல்லூரியின் எதிர்கால முன்னேற்றத்தை இலக்காகக் கொண்டு, மாணவர்களின் கல்வி மற்றும் நலன்புரிச் செயற்பாடுகளுக்காகப் பல்வேறு அறக்கட்டளை நிதியங்களும் பரிசில் வழங்கும் நிதியங்களும் உருவாக்கப்பட்டுள்ளன. இந்நிதியங்கள் எதிர்வரும் காலங்களிலும் கல்லூரியின் நிலைபேறான வளர்ச்சிக்கு உறுதியான அடித்தளமாக அமையும்.
சாதனைகள் சாட்சியாய்...
* உயர்கல்வி பிரவேசம்: கடந்த பத்தாண்டுகளில் கல்லூரியில் உயர்தரக் கல்வியை நிறைவு செய்த 250-க்கும் மேற்பட்ட மாணவர்கள் மருத்துவ, பொறியியல், சட்ட, வணிக மற்றும் கலைத்துறைகளுக்கான பல்கலைக்கழகங்களுக்கும், தேசிய கல்வியியல் கல்லூரிகள் மற்றும் பிற உயர்கல்வி நிறுவனங்களுக்கும் தெரிவாகித் தமது கல்விப் பயணத்தைத் தொடர்ந்துள்ளனர்.
* பரீட்சைப் பெறுபேறுகள்: 2025 க.பொ.த (சா/த) பரீட்சையில் SBA உள்ளடங்கலாகக் கல்லூரி 78% சித்தி வீதத்தைப் பதிவு செய்து சாதனை படைத்துள்ளது.
* மொழி & கலைப் போட்டிகள்: தமிழ், ஆங்கிலம், சிங்கள மொழித்தினப் போட்டிகள் மற்றும் அழகியல், நாடகப் போட்டிகளில் தேசிய மட்டம் வரை சென்று மாணவர்கள் வெற்றிகளை ஈட்டியுள்ளனர்.
விளையாட்டுத் துறை சாதனைகள்
* கல்லூரியின் வரலாற்றில் முதன்முறையாக பெண்கள் உதைபந்தாட்ட அணி உருவாக்கப்பட்டு, அது தேசிய மட்டத்தில் வெற்றி பெற்றமை இவரது பதவிக்காலத்தின் முக்கிய மைல்கல்லாகும்.
* உதைபந்தாட்டம், துடுப்பாட்டம், எறிபந்து உள்ளிட்ட பல்வேறு விளையாட்டுப் பிரிவுகளிலும் மாணவர்கள் மாகாண மற்றும் தேசிய மட்டங்களில் வெற்றிகளைப் பதிவு செய்துள்ளனர்.
கௌரவங்களும் விருதுகளும்
----------------------------------
* இவ்வாண்டு ஐந்து மாணவர்கள் தேசிய ரீதியிலான சுற்றாடல் துறை ஜனாதிபதி விருதைப் பெறவுள்ளனர்.
* கல்லூரி சிறந்த நிதிக்கணக்கறிக்கைக்கான AAT விருது, தேசிய நூலக ஆவணவாக்கல் சபையின் சிறந்த நூலக விருது மற்றும் தேசிய ரீதியிலான உற்பத்தித்திறன் விருது ஆகிய பல கௌரவங்களைப் பெற்றுள்ளது.
* மாணவர்களை ஊக்குவிக்கும் நோக்கில் கடந்த பத்து ஆண்டுகளாக UNION'S STAR மற்றும் கலைச்சுடர் விருதுகள் வழங்கப்பட்டு வருவதுடன், மாணவர்களின் ஆக்கத்திறனை வெளிக்கொணர 'UNION'S LEADER', 'யூனிய தீபம்' ஆகிய இரு சஞ்சிகைகளும் தொடர்ச்சியாக வெளியிடப்பட்டு வருகின்றன.
பங்களிப்புகளுக்கான நன்றிகள்
இச்சாதனைகள் அனைத்திற்கும் அதிபரின் வழிகாட்டலுடன் கல்லூரியின் ஆசிரியர்கள், கல்விசாரா பணியாளர்கள், ஓய்வுபெற்ற மற்றும் பகுதிநேர ஆசிரியர்கள், விளையாட்டுப் பயிற்றுநர்கள், பழைய மாணவர்கள், பழைய மாணவர் சங்கங்கள் மற்றும் நலன்விரும்பிகள் வழங்கிய அர்ப்பணிப்புமிக்க பங்களிப்பும் ஒத்துழைப்பும் நன்றியுடன் நினைவுகூரத்தக்கவை.
வாழ்த்துகள்
பத்தாண்டு கால அதிபர் சேவையை வெற்றிகரமாக நிறைவு செய்யும் திரு. தில்லையம்பலம் வரதன் அவர்களுக்குக் கல்லூரிச் சமூகம், பழைய மாணவர்கள், பெற்றோர்கள் மற்றும் நலன்விரும்பிகள் சார்பில் மனமார்ந்த பாராட்டுகளையும் வாழ்த்துகளையும் தெரிவித்துக்கொள்கிறோம். தொடர்ந்து யூனியன் கல்லூரியின் வளர்ச்சிக்காகப் பணியாற்றி, மேலும் பல வரலாற்றுச் சாதனைகளைப் படைக்க வாழ்த்துகிறோம்.
