27/06/2025
आज SEE को नतिजा सार्वजनिक हुँदैछ। यस समयमा म सबै विद्यार्थी र अभिभावकलाई एउटा कुरा याद दिलाउन चाहन्छु – जीवनको वास्तविक मूल्य कुनै नतिजाले निर्धारण गर्न सक्दैन।
धेरैजसो विद्यार्थीहरूले यस्तो महसुस गर्न सक्छन्:
“अब के होला?” भन्ने चिन्ता र डर
“म असफल भएँ” भन्ने निराशा
“सबैलाई मेरो नतिजा देखाउन लाज लाग्छ” भन्ने भावना
खाना नखानु, राम्ररी नसुत्नु, एक्लै बसेर रुनु
केहीलाई त जिउने इच्छा नै हराउनेसम्मको अवस्था आउन सक्छ
यस्तो बेला के गर्ने?
विद्यार्थी साथीहरूका लागि:
- याद गर, यो कुनै अन्तिम परीक्षा होइन, तिम्रो जीवनको यात्रामा एउटा मात्र पाइलो हो।
- जे महसुस भइरहेको छ, त्यो मनमा दबाएर नराख। आमाबाबु, दाजुभाइ, साथी वा कुनै विश्वासिलो व्यक्तिसँग कुरा गर।
- आफूलाई अरूको अंकसँग तुलना नगर। सबैको गन्तव्य फरक हुन्छ।
- हिड्न निस्क, मन पर्ने गीत सुन, हल्का किताब पढ, वा शान्त मन बनाउन प्रार्थना गर।
- यदि दुःख, निराशा वा निस्थाको भावना दुई हप्ता भन्दा बढी रहिरह्यो, वा आफूलाई नोक्सान पुर्याउने जस्तो सोच आयो भने, ढिलो नगरी मानसिक स्वास्थ्यको विशेषज्ञसँग भेट गर।
आमाबाबु र अभिभावकहरूका लागि:
- अहिले तपाईंका छोराछोरीलाई अंकभन्दा बढी तपाईंको माया र साथ चाहिएको छ।
- खराब नतिजाका लागि कठोर शब्द प्रयोग नगर्नुहोस्, यो समय उनीहरूलाई सम्हाल्ने हो।
- उनीहरूलाई नडराई कुरा गर्न हौसला दिनुहोस्। सुनिरहनुहोस्, निर्णय नगरी।
- भविष्यमा के गर्न सकिन्छ भन्ने कुरा शान्त भएर छलफल गर्नुहोस्।
डा. आभाष योगी (टाउको, नसा तथा मनोरोग विशेषज्ञ)