16/07/2026
आदरणीय रुक्मागत भण्डारीज्यू,
सादर नमस्कार !
आज हामी सबैका लागि यो क्षण एकै साथ गर्व, सम्मान र भावनाले भरिएको क्षण रह्यो। विक्रम संवत् २०४४ सालमा प्राथमिक तहको शिक्षकको रुपमा विद्यालयमा प्रवेश गरी आफ्नो जीवनका सर्वाधिक उर्जाशील ३९ वर्ष विद्यालयलाई समर्पित गर्दै हजारौँ विद्यार्थीको भविष्य निर्माणमा अतुलनीय योगदान पुर्याएर औपचारिक सेवाबाट आजदेखि विश्रामतर्फ उन्मुख हुँदै हुनुहुन्छ।
झण्डै २ दशक लामो शिक्षण यात्रामा आवस्यकता अनुसार सबै विषयहरुको शिक्षण गरेर, वि.सं. २०४६ देखि २०४९ सम्म प्रिन्सिपलको रुपमा विद्यालयलाई कुशल नेतृत्व प्रदान गरेर अनि विगत २७ वर्षदेखि अविच्छिन्न जुनियर तथा युवा रेडक्रस सर्कलको शिक्षक नायक रहेर यहाँले यस विद्यालयलाई पुर्याउनु भएको योगदान प्रति विद्यालय परिवार उच्च सम्मान र कृतज्ञता प्रकट गर्दछ।
युवावस्थादेखि अनुभवले परिपक्व बनेको आजसम्मको सम्पूर्ण समय, ज्ञान, श्रम, अनुशासन र ममता यही विद्यालयलाई अर्पण गर्नु भयो। यहाँले दिक्षित गर्नु भएका हजारौं विद्यार्थीहरु आज समाजका विभिन्न क्षेत्रमा सफल भएर राष्ट्र निर्माणमा योगदान दिइरहेका छन्। यही नै शिक्षक जीवनको सबैभन्दा ठूलो उपलब्धि हो भन्ने ठान्नु भएको छ भन्ने विश्वास लिएका छौँ।
आजको यस विशेष अवसरमा विद्यालयका जन्मदाताहरु विद्यालय व्यवस्थापन समितिका सदस्यहरू तथा विद्यालयमा कार्यरत शिक्षक–कर्मचारीहरुलाई साक्षी राखेर शैक्षिक क्षेत्रमा विशिष्ट पहिचान गराउन सफल विद्यालको वरिष्ठ शिक्षकको रुपमा अवकाश लिनुलाई सुखद र गौरवमय क्षणको रुपमा आफ्नो जिन्दगीको पानामा सुरक्षीत गर्नु होला । यो केवल विदाइ समारोह होइन, यो समर्पण, इमानदारी, अनुशासन र सेवाभावप्रति हाम्रो उच्च सम्मानको अभिव्यक्ति हो।
सेवानिवृत्ति भनेको जिम्मेवारीबाट विश्राम लिनु हो, तर शिक्षक कहिल्यै निवृत्त हुँदैनन्। यहाँले सिकाएको ज्ञान, संस्कार र प्रेरणाहरू पुस्तौँपुस्तासम्म जीवित रहिरहनेछन्। विद्यालयका हरेक सफलता र उपलब्धिमा यहाँको असाधारण योगदान सदैव स्मरणीय रहनेछ।
प्रिय सहकर्मी , तपाईं विद्यालयबाट औपचारिक रूपमा बिदा हुँदै हुनुहुन्छ, तर हाम्रो मनबाट कहिल्यै टाढा हुनुहुने छैन। तपाईंको प्रेरणादायी इमानदारीता अनुशासन र समर्पण सधैँ हाम्रो मार्गदर्शन बनिरहनेछन्। यहाँको उर्जा, सिकाइ प्रतिको रुचि र समसामयिक विषयहरु बारेको ज्ञान हाम्रालागि सदा अनुकरणीय रहनेछन् ।
यसै भावपूर्ण क्षणमा, विद्यालयसंग सम्बन्धित सबैको तर्फबाट सम्मान र कृतज्ञता प्रकट गर्दै यहाँको स्वस्थ, सुखमय तथा दीर्घ जीवनको लागि हार्दिक शुभकामना व्यक्त गर्दछौँ। यहाँको निवृत्त जीवन सदा सक्रिय र सुखद रहोस् ! लाखौंलाख शुभकामना !
चिराग आवासीय मा.वि. परिवार
गल्याङ नगरपालिका-३, स्याङ्जा
