29/09/2026
بنوں میڈیکل کالج میں بلڈ ڈونیشن کیمپ کا انعقاد، طلبہ اور طبی برادری کی بھرپور شرکت
بنوں میڈیکل کالج میں ضرورت مند مریضوں کے لیے خون کے عطیات جمع کرنے اور طلبہ سمیت طبی برادری میں خون عطیہ کرنے کے حوالے سے شعور اجاگر کرنے کے لیے بلڈ ڈونیشن کیمپ کا انعقاد کیا گیا۔ کیمپ میں بنوں میڈیکل کالج کے طلبہ، ڈاکٹرز اور دیگر متعلقہ افراد نے بھرپور شرکت کرتے ہوئے خون کے عطیات دیے۔
بلڈ ڈونیشن کیمپ کا باقاعدہ افتتاح ڈین بنوں میڈیکل کالج پروفیسر ڈاکٹر محمد ندیم خان نے کیا۔ اس موقع پر انہوں نے خود بھی خون کا عطیہ دیا اور طلبہ و دیگر شرکاء کی حوصلہ افزائی کرتے ہوئے انہیں اس انسانی خدمت میں بڑھ چڑھ کر حصہ لینے کی ترغیب دی۔
اس موقع پر گفتگو کرتے ہوئے ڈین بنوں میڈیکل کالج پروفیسر ڈاکٹر محمد ندیم خان نے کہا کہ خون کا عطیہ ایک اہم انسانی خدمت ہے، کیونکہ ایک عطیہ کسی ضرورت مند مریض کے لیے زندگی کی امید بن سکتا ہے۔ انہوں نے کہا کہ بالخصوص طبی شعبے سے وابستہ طلبہ اور افراد معاشرے میں خون عطیہ کرنے کی اہمیت اور اس کے مثبت اثرات کے حوالے سے آگاہی پیدا کرنے میں اہم کردار ادا کر سکتے ہیں۔
انہوں نے بلڈ ڈونیشن کیمپ کے انعقاد کو سراہتے ہوئے کہا کہ بنوں میڈیکل کالج میں تعلیمی اور طبی سرگرمیوں کے ساتھ ساتھ طلبہ میں خدمتِ خلق، انسانی ہمدردی اور معاشرتی ذمہ داری کے جذبے کو فروغ دینے کے لیے ایسی سرگرمیاں بھی اہم ہیں۔ اس طرح کے اقدامات طلبہ کو عملی زندگی میں اپنے پیشہ ورانہ کردار کے ساتھ ساتھ معاشرے کی خدمت کی ذمہ داری کا احساس بھی دلاتے ہیں۔
کیمپ کے دوران خون عطیہ کرنے والے طلبہ اور دیگر شرکاء کی حوصلہ افزائی کی گئی، جبکہ تقریب کے اختتام پر خون کے عطیات دینے والے شرکاء اور کیمپ کے منتظمین میں اعزازی سرٹیفکیٹس بھی تقسیم کیے گئے۔
بلڈ ڈونیشن کیمپ میں ڈاکٹرز، طلبہ، طبی عملے اور دیگر متعلقہ افراد کی شرکت اس امر کی عکاسی کرتی ہے کہ خون کا عطیہ ایک اجتماعی انسانی ذمہ داری ہے اور بروقت خون کی دستیابی ضرورت مند مریضوں کے علاج میں اہم کردار ادا کرتی ہے۔
