27/04/2026
ایگریکلچر کانفرنس 2026: علامہ اقبال اوپن یونیورسٹی ریجنل کیمپس مظفرآباد کی مؤثر شرکت
مظفرآباد (نمائندہ خصوصی):
مظفرآباد ایئرپورٹ میں منعقدہ ایگریکلچر کانفرنس 2026 میں علامہ اقبال اوپن یونیورسٹی، اسلام آباد (ریجنل کیمپس مظفرآباد) نے بھرپور اور مؤثر شرکت کی۔ کانفرنس میں زرعی ماہرین، کاشتکاروں، ماہرینِ تعلیم اور مختلف اداروں کے نمائندگان نے بڑی تعداد میں شرکت کی۔
تقریب کے مہمانِ خصوصی وزیراعظم آزاد جموں و کشمیر فیصل ممتاز راٹھور تھے۔ انہوں نے اپنے خطاب میں زرعی شعبے کی اہمیت کو اجاگر کرتے ہوئے کہا کہ زراعت ملکی معیشت کی مضبوطی میں بنیادی کردار ادا کرتی ہے۔ انہوں نے جدید زرعی ٹیکنالوجی کے فروغ، تحقیق کے استحکام اور کسانوں کی فلاح و بہبود کے لیے حکومتی اقدامات کو مزید مؤثر بنانے کی ضرورت پر زور دیا۔
اس موقع پر علامہ اقبال اوپن یونیورسٹی، اسلام آباد (ریجنل کیمپس مظفرآباد) کی ریجنل ڈائریکٹر شازیہ صدیق نے تعلیم کی اہمیت پر روشنی ڈالتے ہوئے کہا کہ علامہ اقبال اوپن یونیورسٹی ملک بھر خصوصاً دور دراز اور پسماندہ علاقوں میں معیاری تعلیم کی فراہمی میں نمایاں کردار ادا کر رہی ہے۔
انہوں نے مزید کہا کہ یونیورسٹی "ڈور اسٹیپ ایجوکیشن" کے تحت طلبہ کو ان کی دہلیز پر تعلیمی سہولیات فراہم کر رہی ہے، جس سے تعلیمی مواقع عام ہو رہے ہیں اور شرحِ خواندگی میں اضافہ ممکن ہو رہا ہے۔ انہوں نے طلبہ کے لیے فراہم کردہ اسٹوڈنٹ کاؤنسلنگ سروسز کی اہمیت کو بھی اجاگر کیا۔
ریجنل کیمپس کی جانب سے کانفرنس میں زرعی تعلیم کے بی ایس، ایم فل اور پی ایچ ڈی پروگرامز کو بھی متعارف کروایا گیا، جن کا مقصد نوجوانوں کو جدید زرعی علوم سے روشناس کروانا اور تحقیق کے میدان میں آگے بڑھنے کے مواقع فراہم کرنا ہے۔
کانفرنس کا بنیادی مقصد زرعی پیداوار میں اضافہ، جدید تحقیق کے فروغ اور کاشتکاروں کو جدید زرعی طریقہ کار سے آگاہ کرنا تھا، تاکہ اس شعبے کو درپیش چیلنجز کا مؤثر حل تلاش کیا جا سکے۔
