24/02/2026
Вольны Беларускі Ўніверсітэт прыняў удзел у сустрэчы са Святланай Ціханоўскай у Варшаве.
23 лютага адбылася сустрэча з прадстаўнікамі беларускіх адукацыйных і навуковых ініцыятываў. Размова была шчырай і прадметнай — пра тое, як сёння захоўваць і развіваць незалежную беларускую адукацыю ва ўмовах эміграцыі.
Падчас размовы абмяркоўваліся ключавыя выклікі, з якімі сёння сутыкаецца незалежная беларуская адукацыя ў эміграцыі:
— фінансавая падтрымка адукацыі і навукі;
— пацвярджэнне прафесійных статусаў выкладчыкаў і даследчыкаў у Польшчы;
— інтэграцыя ў еўрапейскую адукацыйную прастору;
— адукацыйная адаптацыя дзяцей і патрэба ў беларускіх падручніках.
«Захаванне беларускай мовы, школаў, гісторыі і навуковай працы — гэта прынцыпова важна для будучыні краіны», — адзначыла Святлана Ціханоўская.
Для нас гэта не проста дыскусія.
Гэта працяг штодзённай працы дзеля беларускай адукацыі — жывой, сучаснай і незалежнай.
«Захаванне беларускай незалежнай адукацыі — гэта прынцыпова важная рэч для будучыні краіны»
23 лютага Святлана Ціханоўская сустрэлася з прадстаўнікамі беларускіх адукацыйных і навуковых ініцыятываў у Варшаве. У сустрэчы ўдзел бралі прадстаўнікі Аб’яднанага Пераходнага Кабінета Павел Баркоўскі і Юрый Губарэвіч.
Сярод удзельнікаў — прадстаўнікі Вольнага Беларускага Ўніверсітэта, Беларускай школы ў Варшаве, Інстытута публічнай гісторыі, ініцыятывы «Кадравы рэзерв», а таксама прадстаўнікі шэрагу іншых адукацыйных структураў. Сустрэча прайшла на пляцоўцы Цэнтра Беларускай Салідарнасці.
Асноўныя тэмы размовы:
– магчымасці фінансавай падтрымкі незалежнай беларускай адукацыі і навукі;
– пытанні пацвярджэння прафесійных статусаў навукоўцаў і настаўнікаў у Польшчы, афіліяцыі даследчыкаў для ўдзелу ў міжнародных праектах;
– рэгістрацыйныя і акрэдытацыйныя працэдуры, інтэграцыя ў фармальную адукацыйную прастору Польшчы;
– візавая падтрымка для беларускіх даследчыкаў;
– адукацыйная адаптацыя дзяцей ва ўмовах эміграцыі;
– патрэба ў беларускіх падручніках.
Святлана Ціханоўская:
«Нам вельмі важна зразумець, як сёння працуе асяроддзе беларускіх адукацыйных ініцыятываў, каб мы маглі эфектыўна адвакатаваць вашыя патрэбы перад міжнароднымі партнёрамі. Захаванне беларускай мовы, школаў, гісторыі, навуковай працы — гэта прынцыпова важныя рэчы для будучыні краіны. І я хачу выказаць вам словы падтрымкі і ўдзячнасці: у такіх складаных умовах вы знаходзіце сілы і моц працаваць у гэтым напрамку».
