14/04/2023
معانا منو ..!!
اسمي شمائل أحمد محمد نور عثمان
اللقب (شَمْو )
ولاية النيل الأبيض -محلية الجبلين -مسقط الرأس مدينة كنانة
وحاليا السكن مدينة رَبَكْ
-المراحل التعليمية..🔔
الحميراء الأساسية بنات -كنانة
مدرسة كنانة الجديدة الثانوية بنات
ثم جامعة الخرطوم/كلية علوم الجغرافيا والبيئة
الشغف والهوايات🌟
شغوفة بحب المبادرات وغيرها والكتابة وخصوصاً كتابة الشعر
هدفك في الحياة ...🌟
إني أكون إنسانة ناجحه ومقبولة بين الجميع وما اظلم زول في الدنيا دي
واحقق حلم أمي وأبوي وارد الجميل لكل من دعم شمائل
التقديم للكلية هل كان عن رغبة ..!؟
التقديم للكلية عن طريق ولد جيرانا اصلا هو كان بيقدم للطلاب كلمني عن الكلية وصراحه كانت غريبة بالنسبة لي لانو اول مرة اسمع بيها فقلت ليهو بحزن كده تم بيها الرغبات بس ، 😅
-تاريخ دخول الجامعة الدفعة كم -المستوي -القسم-تحديات القسم ..🌏
تاريخ دخولي 2017-شهر10
دفعة 017 الناس الظابطين ربنا يديهم العافية ❤️🔥
المستوى الخامس بإذن الله -قسم نظم المعلومات الجغرافية بكل حب(GIS)
تحديات القسم ⭕⭕دي كانت اصعب حاجه والله وتقريبا ماف زول ماعرف جرستي في البدايات 😂 كنت متوترة وخايفة وبكاية وكلو تقريبا قربت أحول لكن رغبتي و حبي للقسم طغى على خوفي وخلاني انتصر في التحدي ❤️
نصيحتك لاي طالب. ح يقدم في قسمك...⭐⭐
نصيحتي لأي طالب بيقدم في قسمي ما تسمع كلام انو والله القسم ده صعب وانو القسم ده لو ماعندك إمكانيات ما ح تدخله ، القسم محتاج منك إصرار وانك تكون بالجد حابي تتعلم وتنجز ، لانه حبك للقسم
الح تختاره ح يخليك تبدع فيه ، وكمان نصيحه مهمة كونك انت قدمت في قسم النظم لازم تكون ملم بباقي الاقسام التانية عشان هي جزء من شغل قسمنا ❤️
-كيف بتنصحي الطلاب في اختيار التخصصات ..!✅
اختيار التخصص من أصعب المراحل اللي بتواجه الطلاب ، ويكونوا مترددين شديد لكن انت اكيد لم تجي الكلية وتعرف من الدكاترة والأساتذة وزملائك الطلاب السناير الرؤية ح تتضح ليك وح تعرف انت عاوز اي تخصص وانو انت شايف نفسك وين ، نصيحه :-ماتقول انا بختار التخصص عشان اصحابي فيهو أو عشان بعدين اشتغل بسرعه صدقني اي تخصص تتقن فيه بإخلاص ح يرجع ليك بنتيجه مشرفة
تجربتك في الكلية النشاطات الاجتماعية واللاصفية...
تجربتي في الكلية كانت من احلى التجارب والله ومن اكتر التجارب اللي خلتني اعرف حاجات كتيرة ❤️
كيف كنت مع دفعتك وكيف اسرة جغرافيا ككل
في بادئ الأمر ما كان في ترابط مع دفعتي لكن طبعا كليتنا وبيتنا زي مابنحب نقول
بخليك تعرف وترتبط بدفعتك والدفع الوراك والقدامك كمان 😅❤️
المناصب الاتقلدتيها ..
_نائب رئيس جمعية جميلتي للمراه
_امين الإعلام والعلاقات العامة بجمعية عدنان الخيرية
_امين العلاقات الخارجية بنادي نظم المعلومات الجغرافية
-النقاب والجامعة ..🔰
انا ما كنت منتقبة ، اتنقبت السمستر التاني في السنة الأولى ، البدايات واثناء الدراسة ما كانت تجربة ساهلة لكن الحمد لله ،اما بالنسبة للجامعه والكلية والله دعموني وشجعوني شديد وتعاملهم معاي كان حلو شديد ،النقاب ما كان عائق بالنسبة لي بالعكس كنت مواصلة عادي والحمد لله على نعمته ❤️إيجابيات النقاب في مجتمع الجامعة كتيرة ، يعني بتكوني مرتاحه نفسيا وبتحسي باطمئنان وما بقيدك وبتقدري تنجزي عادي جدا ✨
-مجال علوم الجغرافيا بصورة عامة
من أجمل المجالات وأكثرها تطورا ❤️
-تحديات الجامعة عامة ‼️
والله ماف تحديات غير الجوطة و التقفيلات الكتيرة الحصلت 😅
-مميزات جامعة الخرطوم وكلية علوم الجغرافيا‼️
الجميلة المستحيلة من أقدم وأعظم واقوى الجامعات من كل النواحي جامعة بتأسس طلابها❤️
كلية علوم الجغرافيا أو بيتنا زي ما بنقول مميزاتها كتيرة شديد اكاديميا واجتماعيا الترابط اللي بين الطلاب من مختلف الدفع وبين الطلاب والأساتذة ❤️
9-مقولة بتؤمن بيها,
لم تخلق الاحلام لتكون مستحيلة "❤️
❤️
-نصيحة للطلاب الحاليين والمقبلين للتقديم‼️
بنصح اي طالب انو يتريس في مسألة التقديم وما تستعجل ، خت أسألة دايما قبل التقديم أو قبل اختيار التخصص انك انت عاوز تقدم شنو وليه؟ وتحت تحت كده بنصحكم تقدموا كلية علوم الجغرافيا والبيئة والله نحن ناس ظابطين شديد وأسرة في بعضينا 😂❤️🔥
وشكرا من القلب لقروب شخصيات من جغرافيا وبالتوفيق ليكم ❤️
