Faculty of Nursing Science - Shendi University

Faculty of Nursing Science - Shendi University Contact information, map and directions, contact form, opening hours, services, ratings, photos, videos and announcements from Faculty of Nursing Science - Shendi University, College & University, University of Shendi, Shendi.

نحن سِراج… نورٌ يُضيء دروب العناية، ورحمةٌ تمشي على الأرض.
سُمِّيت دفعتنا سِراج لأننا نؤمن أن التمريض ليس مهنة فحسب، بل رسالة إنسانية سامية.
نحن ذلك الضوء الذي يبدد ظلمة الألم، ويزرع الطمأنينة في قلوب المرضى، ويبعث الأمل في أصعب اللحظات.

يسرّنا أن نتقدّم بخالص التهاني والتبريكات لدفعة سِراج بمناسبة النجاح والتفوّق، سائلين الله أن يكلّل جهودهم بمزيد من التق...
26/03/2026

يسرّنا أن نتقدّم بخالص التهاني والتبريكات لدفعة سِراج بمناسبة النجاح والتفوّق، سائلين الله أن يكلّل جهودهم بمزيد من التقدّم والإنجاز.
كما نهنئ دفعتَي 22 و23 على هذا النجاح المستحق، متمنّين لهم دوام التوفيق والسداد في مسيرتهم القادمة.
نسأل الله أن يجعل هذا النجاح بدايةً لمراحل مليئة بالعطاء والتميّز.
ألف مبارك للجميع💛

#الأمانة الإعلامية
#دفعة سِراج
#الدفعة "28"
#كلية علوم التمريض
#الأمين الإعلامي_ لينة الوسيلة

كل عام وأنتم بخير ❤️✨تتقدم دفعة سراج بأحر التهاني والتبريكات بمناسبة عيد الفطر المبارك 🌙سائلين الله أن يعيده علينا وعليك...
24/03/2026

كل عام وأنتم بخير ❤️✨
تتقدم دفعة سراج بأحر التهاني والتبريكات بمناسبة عيد الفطر المبارك 🌙
سائلين الله أن يعيده علينا وعليكم بالصحة والعافية، وأن يجعل أيامكم أفراح وسعادة لا تنقطع 🤲💫
عيدكم مبارك، ودايمًا منورين زي اسمكم ❤️✨

19/03/2026

نومو ساي بعد دا نتلاقى بعد العيد بنفس الفيلم البايت😆

نتلاقى بكرة بنفس الفقرات 🤣 إن شاء الله نعيد بمزاج وما يرقعونا يوم العيد😆
18/03/2026

نتلاقى بكرة بنفس الفقرات 🤣 إن شاء الله نعيد بمزاج وما يرقعونا يوم العيد😆

18/03/2026

ويبقى السؤال هل سنركب التونسية ونتظوط أم أننا سنولد بالسلامة🤣

18/03/2026

دفععة ٢١نحن قدام في المرمطة دي
و٢٢قدام نسبيًا لكن جرس
و٢٣🤣 أخواننا الجداد كيف الحال والأحوال؟
كيفكم تمام كلكم؟

💉في لقاء مع سرنجة…ما بس بنجمع إجابات، بنحدد هوية وبنصنع مسار،بنطلّع الضجيج اللي جواك، نرتّبو، ونخليه قصة مفهومة… صدى حي...
18/03/2026

💉
في لقاء مع سرنجة…
ما بس بنجمع إجابات، بنحدد هوية وبنصنع مسار،
بنطلّع الضجيج اللي جواك، نرتّبو، ونخليه قصة مفهومة… صدى حيعيش لسنين.
أفتحوا أذهانكم وغوصوا في تجربة تلامسكم 💛
محطتنا الأولى | البدايات والتكوين
1/ عرفنا عنك
أنا أمل عامر، طالبة تمريض باقي لي ٣ سمسترات وأتخرج.
التمريض ما كان من رغباتي أصلًا، والنسبة هي الخلتني أدخلو.
في البداية ما كنت مقتنعة بيهو، وبعد ما دخلت بقيت أفكر فيو من ناحية المستقبل وفرصة السفر وتطوير حياتي.
أنا زول بحس ويفكر كتير، وده بخليني أراجع نفسي دايمًا وأسأل إذا بقدر أواصل أو لا.
لكن لحدي الآن أنا مكملة… وبحاول أفهم إذا الطريق ده حيكون نهايتي ولا مجرد مرحلة في حياتي.
2/ دور البيئة في حياتك
البيئة كان عندها دور كبير… مرات كانت ضاغطة ومربكة، ومرات كانت سبب في قوتي.
ما بقدر أقول هدامة تمامًا ولا بنّاءة بالكامل، لكن أكيد شكّلتني.
وبرأيي البيئة أساس… لكن الزول الواعي بقدر يسخّرها لمصلحتو، حتى لو اتأخر شوية.
محطتنا التانية | قرار التمريض والتحولات
3/ ليه اخترت التمريض؟
التمريض ما كان حلم طفولة، وما كان من رغباتي أصلًا.
دخلتو لأنو النسبة هي الجبرتني.
بعد ما دخلت بقيت أفكر فيو من ناحية المستقبل وفرصة السفر،
لكن بصراحة… لحدي الآن ما حاسة إني لقيت نفسي فيهو تمامًا.
4/ كيف كانت البداية؟ وهل ندمت؟
أول يوم دخلت فيه تمريض كنت خايفة ومتوترة وحاسة إني غريبة.
هسي وأنا باقي لي ٣ سمسترات، بقيت أتعامل معو بوعي أكتر، لكن الانتماء لسه ما كامل.
هل ندمت؟ أيوه، ندمت مرات خاصة وقت التعب والضغط.
لكن رغم الندم… أنا ثابتة، وبكمّل الطريق خطوة خطوة عشان أشوف النهاية بنفسي.
محطتنا الثالثة | التحديات والاختبارات
5/ لو زول سأل: شغلكم شنو؟
لو زول قال لي: “إنتو شغلكم شنو أصلًا؟”
أقول ليهو:
شغلنا ما بس أدوية… نحن بنمسك يد زول خايف،
بنكون أول صوت يسمعو بعد ما يفوق،
وآخر وجه يشوفو قبل العملية.
يمكن ما ظاهر دايمًا، لكن أثرنا عميق.
6/ كيف كانت فترات التوقف والضغط؟
الإجازات والإضرابات والظروف… كانت فترات صعبة.
من ناحية الشعور، كنت قلقة جدًا من إنو مستقبلي ممكن يضيع، وكأن كل التعب ما له معنى.
وفي النهاية، التجارب دي علمتني الصبر وكيف أتعامل مع الضغط.
محطتنا الرابعة | الأثر واليقين
7/ أول موقف أثر فيك
ما عندي خبرة كبيرة مع المرضى لحدي الآن، لأني لسة ما نزلت تدريب عملي كتير.
لكن أتذكر يوم مشينا المستشفى، ودعاء المرضى لينا إنو ربنا يوفقنا أثر فيني جدًا… خلاني أحس بقيمة المجال حتى من بعيد.
8/ كيف فهمتي معنى التمريض؟
حتى لو ما اتعاملت مع المرضى كتير، لحظة دعاء المرضى لينا يوم مشينا المستشفى أثرت فيني جدًا.
خلتني أحس إنو التمريض مش بس إجراءات، لكن حضور وإنسانية، ولو بكلمة صغيرة، بتحسسك إنك في الطريق الصح.
محطتنا الخامسة | الرؤية ورسالة الأثر
9/ كيف شايفة نفسك قدام؟
بعد سنين… عايزة مرضاي يشوفوني كممرضة واثقة ورحيمة، ما بس شاطرة، لكن حاضرة.
بعد ٥ سنين… شايفة نفسي أقوى وأقل خوف، وفخورة إني ما استسلمت في الطريق.
10/ رسالة لنفسك
لو كتبت رسالة لنفسي:
“شكراً لأنك كمّلتي رغم التعب وما خليتِ الاستسلام خيار.
محطتنا السادسة | القيم والبوصلة
11/ شنو البخليك تواصلي؟
في لحظة الضغط… الحاجة البتخليني ما أستسلم هي وعد داخلي لنفسي بأن أكون أحسن نسخة مني، وأكون مستقبل أفضل لنفسي ولأهلي.
وبرضو في خوف من إنو أندم لو وقفت هنا.
12/ أهم قيمة في التمريض
القيمة الخط الأحمر في التمريض هي الرحمة.
لو اختفت الرحمة… التمريض يبقى مجرد إجراءات، وروحو بتضيع.
كلمة للدفعة
الرحلة دي ما سهلة… لكن ما عادية.
حتتعبوا، حتشكّوا، حتسألوا نفسكم كتير “ليه اخترنا دا؟”
لكن في يوم حتدخلوا غرفة مريض، وتعرفوا إنو وجودكم كان فرق.
واللحظة دي حتخلي كل التعب مفهوم.
الطريق دا ما بس شهادة…
دا تشكيل روح.

17/03/2026

أحكي لينا عن المفاهيم الغلط عن التمريض اللي اتقالت ليك واستفزتك🤣

اجواء عيد وبهجة والكثير والكثير من الغبار والنضافة كتاحتكم واااصلة🤣🙄آها المهم… نخش في الموضوع على طول:كلكم بتعرفوا فلورن...
17/03/2026

اجواء عيد وبهجة والكثير والكثير من الغبار والنضافة كتاحتكم واااصلة🤣🙄

آها المهم… نخش في الموضوع على طول:
كلكم بتعرفوا فلورنس كان، والأمور طيبة… بس الليلة نحن ح نتعرف على شخصية جديدة، اسمها منو يالينة أسمها منو؟!
اسمها فيرجينيا هيندرسون (أي أي على وزن جورجينا أحفظوها بيهو🤣).
آها أختنا فيرجينيا دي مالها؟
يلا أديكم ليها اختصار بلخص مسيرتها:
فيرجينيا دي ممكن نلخصها في كلمة واحدة: "الإنسانية".
حنينة كدا وطيبة، ونظريتها كلها حنية😔💛
من تلقى حنية وعطف واهتمام، اعرف دي فيرجي.
لقبها فلورنس القرن العشرين، ودا لعظمة تدخلاتها في التمريض (ولأنو ح تلاحظ من كلامنا بعد شوية أنها هي وفلورنس بدوروا في نقطة البيئة بصورة عامة).
وهي واحدة من العظماء اللي ساهموا بقوة في وضع منهج معتمد ومنقح للتمريض —ممكن تبحث عن إنجازاتها وتنبهر— المهم يا عزيزي الممرض:
نظريتها كانت بتتكلم عن شنو؟
عن أربعتاشر احتياج اللي مفروض نتأكد إنها متوفرة للمريض، عشان ما يتعافى… ياهو يتنفس، يأكل، يشرب، يلبس… إلخ.
تعريفها للتمريض:
قالت إنو التمريض هو مساعدة مؤقتة لمن هو ليس قادر على تلبية احتياجاته الأربعة عشر بنفسه.
يعني:
لو هو قادر يعمل… ح يعمل براهو، ولو لا… أنت ح تقوم بيها.
ومن مقولاتها المشهورة في الناحية دي:
إنها بتقول:
"التمريض هو أن تكون رجل من لا يملك رجل، وصوت من لا يملك صوت…"
وحاليًا بعد ما اتعرفت على أختنا فيرجينيا الحنينة…
شايف نفسك وين بعد ٥ سنين؟
ح تكون حنين وتحافظ على تراثها؟
ولا المستشفيات والمرمطة ح تنجح إنها تقتل إنسانيتك؟

قومو إلي نظافتكم يرحمكم الله🤣

16/03/2026

في رحلتك مع العنابر أسهل سحب العينات ولا ركيب الفراشة وأحكي لينا عن أول محاولة في عيان حقيقي ليك كانت كيف🤣🤣

🚫 تحذير طبي خطير: الرنق والسيفترياكسون💧 شنو هو الرنق؟محلول مالح شفاف بيدخل في الوريد، فيه أملاح زي الكالسيوم والصوديوم. ...
15/03/2026

🚫 تحذير طبي خطير: الرنق والسيفترياكسون

💧 شنو هو الرنق؟

محلول مالح شفاف بيدخل في الوريد، فيه أملاح زي الكالسيوم والصوديوم. بيستعمل في:

· الحروق الشديدة 🔥
· الجفاف 💦
· النزيف 🩸
· هبوط الضغط المفاجئ 📉

---

⚠️ الخطر القاتل!

ممنوع خلط الرنق مع مضاد (سيفترياكسون) في نفس الوريد!

🔴 ليه؟

عندما يلتقي الكالسيوم الموجود في الرنق مع السيفترياكسون:
❌ تتكون رواسب دقيقة (زي الرمل الناعم)
❌ الرواسب تسد شرايين الرئة والقلب والمخ والكلى

💔 النتيجة:

ضيق تنفس ➡️ هبوط ضغط ➡️ زرقة ➡️ غيبوبة ➡️ وفاة محتملة

---

🏥 مشكلتنا في السودان:

· المضاد منتشر جداً
· الكوادر الطبية أحياناً مش واعية للخطر
· الزحمة بتسبب أخطاء

---

🛑 كيف تحمي نفسك وأهلك؟

👈 إذا شفت قريبك عنده قربة رنق معلقة، اسأل الطبيب أو الصيدلي:
"هل أخذ سيفترياكسون؟"

سؤال بسيط ينقذ حياة!

---

🗣️ تعالوا نتناقش:

· هل سبق أحد من أهلكم أخذ رنق في المستشفى؟
· سألوكم عن الأدوية قبل لا يدوكم المحلول؟
· يا زملاء المجال الطبي، صادفتكم حالة زي دي؟

---

🔄 شارك البوست... يمكن تنقذ روح


تاقو الدفعة 29😆🔥منشورات "على خُطى فلورنس" من اللي فات وإنتو ماشين ح تهمكم شديييد، لأنو ح نعرفكم على نظريات التمريض بصورة...
15/03/2026

تاقو الدفعة 29😆🔥

منشورات "على خُطى فلورنس" من اللي فات وإنتو ماشين ح تهمكم شديييد، لأنو ح نعرفكم على نظريات التمريض بصورة تخليكم تحبوها قبل حتى ما تاخدوها رسمي🤩
الحاضر يكلّم الغايب😆
وبرضو لأخوانا الجداد شديد برالمة 24🤩 ما ناسينكم💛
تحبو نضيف ليكم فقرة خاصة بيكم؟
ولا نكمّل محتوى محدد وبعدين نجيكم في الفقرات الثابتة؟
تاقو… تاقو… كتروا التاقات
سنايركم قلبهم أبيض😆🔥🔥🔥

Address

University Of Shendi
Shendi

Website

Alerts

Be the first to know and let us send you an email when Faculty of Nursing Science - Shendi University posts news and promotions. Your email address will not be used for any other purpose, and you can unsubscribe at any time.

Shortcuts

Share

Category