Amir Ali Sher Navoyi University

27/09/2026

24/09/2026

نیټه: ۳۱/۶/۱۴۰۵
د اقتصاد پوهنځي د مالي او تجارت څانګې له لوري د يادې څانګې محصلينو ته د ظرفيت لوړونې په موخه د « د نشه‌ یي توکو سره د مبارزې لارې چارې» تر عنوان لاندې يو علمي سمينار وړاندې شو.
د مالي او تجارت ديپارتمنت له لوري د محصلینو او ګډونوالو د پوهاوي د لوړولو په موخه د ( د نشه‌ یي توکو سره د مبارزې لارې چارې) تر سرلیک لاندې یو علمي سمینار جوړ شو. د سمینار موخه دا وه چې ګډونوالو ته د نشه‌ یي توکو د ناوړه اغېزو، د دې پدیدې د رامنځته کېدو د عواملو، د فرد، کورنۍ او ټولنې پر وړاندې د زیانونو، او همدارنګه د نشه‌ یي توکو د مخنیوي او له منځه وړلو په لارو چارو کې لازم معلومات وړاندې شي.
د سمینار پروګرام د قرآن کریم د مبارکو آیتونو په تلاوت سره پیل شو. د تلاوت وروسته د مالي او تجارت ديپارتمنت آمر نامزد پوهنیار توریالی یوسفزي د غونډې د پیل وینا وړاندې کړه. نوموړي په خپلو خبرو کې د نشه ‌یي توکو ستونزه د فردي او ټولنیز ژوند لپاره یوه جدي ننګونه وبلله او د دې ستونزې د مخنیوي لپاره یې د کورنۍ، ښوونیزو او تحصیلي بنسټونو، ټولنې او اړوندو ادارو ګډو هڅو ته اشاره وکړه. همدارنګه یې پر دې ټینګار وکړ چې د نشه‌ یي توکو د زیانونو په اړه د ځوانانو او محصلینو پوهاوی لوړول د مخنیوي په برخه کې مهم رول لري.
وروسته د سمینار وړاندې کوونکي استاد ارشاد شینواري له لوري د ( د نشه‌ یي توکو سره د مبارزې لارې چارې) تر عنوان لاندې تفصیلي علمي پریزنټېشن وړاندې شو. په سمینار کې د نشه‌ یي توکو مفهوم، ډولونه، د استعمال لاملونه، پر انسان د نشه‌ یي توکو ناوړه اغېزې، د کورنۍ او ټولنې پر وړاندې یې زیانونه او د ځوانانو پر راتلونکي یې منفي اغېزې تشریح شوې. همدارنګه د نشه‌یي توکو د مخنیوي په برخه کې د عامه پوهاوي، سالمې کورنۍ روزنې، زده‌کړو، مثبتو ټولنیزو فعالیتونو، د ځوانانو د سالمې بوختیا، د اړوندو ادارو د همکارۍ او د قانون پلي کېدو پر اهمیت بحث وشو.
په سمینار کې ګډونوالو ته څرګنده شوه چې د نشه‌ یي توکو پر وړاندې مبارزه یوازې د یوې ادارې یا یوه فرد مسؤلیت نه دی، بلکې کورنۍ، ښوونیز او تحصیلي بنسټونه، ټولنه، رسنۍ او اړوندې دولتي ادارې باید په ګډه د مخنیوي او پوهاوي په برخه کې هڅې وکړي. په ځانګړې توګه د ځوانانو د سالمې روزنې او هغوی ته د زده‌ کړو او مثبتو ټولنیزو فعالیتونو د فرصتونو برابرول د دې ستونزې په مخنیوي کې مهم رول لري.
د سمینار په پای کې د ګډونوالو له لوري د موضوع اړوند پوښتنې او نظریات مطرح شول او د وړاندې کوونکي له خوا ورته لازم وضاحتونه ورکړل شول. غونډه د دعا په ویلو سره پای ته ورسېده.

23/09/2026

د چاپېریال ککړتیا او د مخنیوي لارو چارو تر عنوان لاندې د سیمینار راپور
د امیرعلي شیر نوایي پوهنتون د اقتصاد پوهنځي او کارموندنې او مشوره ورکوونې مرکز په ګډه همکارۍ، محصلینو ته د «چاپېریال ککړتیا او د مخنیوي لارې چارې» تر عنوان لاندې یو علمي او پوهاوییز سیمینار وړاندې شو.
یاد سیمینار د قرآن کریم د مبارکو آیتونو په تلاوت سره پیل شو. د سیمینار د پیل وینا د اقتصاد پوهنځي رئیس نامزد پوهنیار سهیم الله قلم دوست وکړه او د سیمینار پر اهمیت او د موضوع پر ارزښت یې خبرې وکړې.
وروسته د اقتصاد پوهنځي استاد شبیر احمد امین له خوا د «چاپېریال ککړتیا او د مخنیوي لارې چارې» تر عنوان لاندې سیمینار وړاندې شو. په سیمینار کې د چاپېریال ککړتیا مفهوم، ډولونه، لاملونه او پر انسانانو، حیواناتو او نباتاتو یې ناوړه اغېزې په تفصیل سره تشریح شوې.
همدارنګه د چاپېریال ککړتیا د مخنیوي په موخه د کثافاتو د سم مدیریت، د ونو او بوټو د کرلو او ساتنې، د اوبو او هوا د ککړتیا د مخنیوي، د پلاستیکي توکو د بې‌ځایه استعمال د کمولو او د چاپېریال ساتنې په برخه کې د عامه پوهاوي د زیاتولو په اړه مهمې سپارښتنې وړاندې شوې.
د سیمینار موخه محصلینو ته د پاک او سالم چاپېریال د ارزښت په اړه د پوهاوي ورکول او د چاپېریال ساتنې په برخه کې د هغوی د مسؤلیتونو روښانه کول وو.
په پای کې، سیمینار د دعا په ویلو سره پای ته ورسېد.

22/09/2026

د امیر علي شیر نوایي پوهنتون د سنبلې میاشتې علمي شورا ترسره شوه!

۳۱/۰۶/۱۴۰۵

د امیر علي شیر نوایي پوهنتون د سنبلې میاشتې علمي شورا غونډه د پوهنتون د رئیس، دوکتور عبدالواحد میاخېل** په مشرۍ او د شورا د غړو په ګډون ترسره شوه.

غونډه د قرآن کریم د مبارکو آیتونو په تلاوت سره پیل شوه. ورپسې د پوهنتون رئیس د علمي او تدریسي چارو د لا پیاوړتیا، د تدریس د کیفیت لوړولو او د پوهنتون د علمي بهیر د لا ښه والي په اړه خبرې وکړې.

وروسته د علمي شورا منشي د تېرې غونډې د پرېکړو د تطبیق راپور وړاندې کړ او د ترسره شویو علمي فعالیتونو او اړوندو چارو په اړه یې معلومات شریک کړل.

په غونډه کې د اجنډا له مخې پر بېلابېلو موضوعاتو بحث وشو. د شورا غړو د موضوعاتو په اړه خپل نظرونه او وړاندیزونه وړاندې کړل او د بحثونو په پایله کې د اړوندو موضوعاتو په اړه لازمې پرېکړې وشوې.

غونډه په هېواد کې د تلپاتې سولې، ثبات او پرمختګ په دعا سره پای ته ورسېده.
د نشراتو آمریت
امیر علي شیر نوایي پوهنتون

20/09/2026

د امیر علي شیر نوایي پوهنتون د سنبلې میاشتې نوبتي اداري شورا ترسره شوه!

۱۴۰۵/۶/۲۹ هـ.ش

د امیر علي شیر نوایي پوهنتون د سنبلې میاشتې نوبتي اداري شورا د پوهنتون د رئیس، دوکتور عبدالواحد میاخېل، په مشرۍ او د بېلابېلو برخو د مسؤلینو په ګډون ترسره شوه.

غونډه د قرآن کریم د څو مبارکو آیتونو په تلاوت سره پیل شوه. ورپسې د پوهنتون رئیس د اداري چارو د لا ښه تنظیم، همغږۍ او په چارو کې د چټکتیا په اړه لازمې لارښوونې وکړې. نوموړي د کارکوونکو له هڅو او ژمنتیا څخه مننه وکړه او د راتلونکو موخو د لاسته راوړلو لپاره یې د ګډ کار پر ارزښت ټینګار وکړ.

وروسته د مالي او اداري چارو مرستیال د تېرې ناستې د پرېکړو د پلي کېدو څرنګوالی تشریح کړ. همدارنګه، په اجنډا کې پر شاملو موضوعاتو بحث وشو، چې د ځینو موضوعاتو د تأیید ترڅنګ، د یو شمېر نورو موضوعاتو په اړه لازمې پرېکړې وشوې.

یاده شورا د دعائیې په ویلو سره پای ته ورسېده.

د نشراتو آمریت
امیر علي شیر نوایي پوهنتون

17/09/2026

ځوانان د وطن هېلي دي، له نشې ورته پاک ژوند غواړو!

16/09/2026

د «مشورې ارزښت او فضیلت» تر عنوان لاندې سیمینار ترسره شو
د امیرعلي شیرنوایي پوهنتون محصلینو ته د «مشورې ارزښت او فضیلت» تر عنوان لاندې روزنیز سیمینار ترسره شو.
یاد سیمینار د کارموندنې او مشوره ورکوونې دفتر او دعوت او ارشاد امریت په ګډه همکارۍ جوړ شوی و، چې د دعوت او ارشاد امریت مسؤول مولوي بلال احمد ابوي له خوا وړاندې شو.
په دغه سیمینار کې محصلینو ته د مشورې پر ارزښت، فضیلت، د ښو مشورو پر اغېز او په ورځني ژوند کې د مشورې پر اهمیت هر اړخیز معلومات وړاندې شول.

15/09/2026

د امارتي کانکور د واجد شرایطو کاندیدانو د پام وړ!

د امارتي کانکور ازموینې ټولو هغو درنو کاندیدانو ته، چې خصوصي پوهنتونونو ته واجد شرایط ګڼل شوي دي، خبر ورکول کېږي چې کولی شي د خپلې امارتي کانکور ازموینې د پایلې پر بنسټ، په امیر علي شیر نوایي پوهنتون کې په لاندې پوهنځیو کې د لوړو زده‌کړو لپاره شمولیت ترلاسه کړي:

۱ ـ انجینري پوهنځی
۲ ـ اقتصاد پوهنځی
۳ ـ حقوقو پوهنځی

که غواړئ خپلې لوړې زده‌کړې په یوه معیاري، باکیفیته او علمي چاپېریال کې پیل کړئ؛ نو دا فرصت له لاسه مه ورکوئ.

د نوم‌ لیکنې، شمولیت او نورو اړینو معلوماتو لپاره د امیر علي شیر نوایي پوهنتون د محصلانو چارو مدیریت ته مراجعه وکړئ.

د اړیکو شمېرې:
۰۷۹۹ ۷۶ ۷۲ ۳۰
۰۷۷ ۰۰۰ ۱۲ ۴۰

پته: جلال‌اباد ښار، د ننګرهار امنیه قوماندانۍ لوېدیځ لوری، امیر علي شیر نوایي پوهنتون.

درنښت
د نشراتو آمریت

14/09/2026

نشه يي توکي زمونږ دملت پټ قاتلين دي !

10/09/2026

روښان ګروپ په خپلو ټولو تحصیلي بنسټونو کې له پاکستان څخه راستانه شويو افغان محصلینو ته د طبي رشتو په برخه کې د وړیا زده‌کړو ځانګړی فرصت برابر کړی!

د روښان ګروپ د عمومي رئیس محترم رفیع‌الدین شاهد د لارښوونې له مخې، روښان ګروپ د هېوادنۍ مینې، همدردۍ او علمي مسؤلیت له مخې په دې سختو شرایطو کې د خپلو هېوادوالو ترڅنګ درېږي او د افغان ځوانانو د علمي راتلونکي د خوندي کولو لپاره یې ځانګړی وړیا تحصیلي فرصت د‌ لوړو زده کړو وزارت تر چتر لاندې برابر کړی دی.

د پاکستان حکومت له لوري د افغان زده‌کړیالانو پر وړاندې د هغه غیرمسؤلانه چلند له امله، چې په پایله کې یې یو شمېر افغان محصلین او زده‌کړیالان له خپلو تحصیلي مرکزونو او د زده‌کړو له دوام څخه بې‌برخې او په اجباري ډول له پاکستان څخه ایستل کېږي، روښان ګروپ د خپلو هېوادوالو د علمي راتلونکي د ملاتړ په موخه دا ځانګړی پروګرام عملي کوي.

یاد وړیا تحصیلي فرصت په طبي او روغتیايي علومو برخو کې، د لوړو زده کړو وزارت تر چتر لاندې تطبیقېږي.

د دې پروګرام له مخې، هغه افغان زده‌کړیالان چې په پاکستان کې یې د وروستیو رامنځته شویو شرایطو له امله زده‌کړې نیمګړې پاتې شوې یا یې د زده‌کړو د دوام زمینه له ستونزو سره مخ شوې ده، کولی شي د روښان ګروپ په اړوندو طبي او روغتیايي علومو برخو کې خپلې لوړې زده‌کړې په بشپړه توګه وړیا ترسره کړي.

په شرایطو وړ زده‌کړیالان کولای شي د خپلو مخکنیو زده‌کړو له مخې په مناسب تحصیلي ټولګي/سمستر کې جذب او خپلې پاتې زده‌کړې له خپل تحصیلي پړاو سره سمې ترسره کړي.

که تاسې له هغو افغان زده‌کړیالانو څخه یاست، چې په پاکستان کې مو زده‌کړې د وروستیو شرایطو له امله اغېزمنې شوې دي او د لوړو زده‌کړو د دوام په شرایطو برابر یاست؛ نو له دې ځانګړي وړیا تحصیلي فرصت څخه استفاده وکړئ.

دا خبر له خپلو ملګرو، محصلینو او هغو هېوادوالو سره شریک کړئ، چې د خپلو زده‌کړو د دوام لپاره دې فرصت ته اړتیا لري.

۰۷۹۹۷۶۷۲۳۰- ۰۷۷۰۰ ۱۲ ۴۰

پته: جلال‌اباد ښار، د ننګرهار امنیه قوماندانۍ لوېدیځ لوری، امیر علي شیر نوایي پوهنتون.

درنښت
د نشراتو آمریت