20/10/2026
د From Beginner to Programmer: Building Your Coding Skills تر سرلیک لاندې پنځه اوونیزه عملي روزنیزه برنامه پیل شوه!
د التقوی پوهنتون د کمپیوټر ساینس پوهنځي له لوري، د مسلکي پرمختیا امریت په همکارۍ، د سافټویر انجینرۍ څانګې د لومړي سمستر محصلینو ته د پروګرام جوړونې د بنسټیزو او عملي مهارتونو د پیاوړتیا په موخه، د «From Beginner to Programmer: Building Your Coding Skills» تر سرلیک لاندې پنځه اوونیزه عملي روزنیزه برنامه پیل شوه.
یاده روزنیزه برنامه د قرآن کریم د مبارکو آیتونو په تلاوت سره پیل شوه. ورپسې، د پوهنتون د علمي چارو مرستیال، پوهنيار بختیار حليمي، د برنامې د پرانیستې په مراسمو کې وینا وکړه. نوموړي د محصلینو د علمي او مسلکي ودې په برخه کې د عملي زدهکړو ارزښت مهم وباله او ټینګار یې وکړ چې نظري زدهکړې هغه مهال لا اغېزمنې تمامېږي چې له عملي تمرینونو او تجربو سره مل وي. نوموړي همدارنګه ډاډ څرګند کړ چې التقوی پوهنتون به د محصلینو د علمي اړتیاوو او د معاصرې ټکنالوژۍ د غوښتنو په پام کې نیولو سره، د ورته عملي او مهارتمحوره روزنیزو برنامو د پلي کولو لړۍ ته دوام ورکړي.
ورپسې، د کمپیوټر ساینس پوهنځي رئیس، استاد محمد صابر نیازی، د برنامې د موخو، محتوا او روزنیز بهیر په اړه محصلینو ته معلومات وړاندې کړل. نوموړي د پروګرام جوړونې په برخه کې د کوډ لیکلو، منطقي تفکر، مسئلېحلولو او عملي تمرینونو پر اهمیت خبرې وکړې او محصلین یې وهڅول چې د برنامې له روزنیزو فرصتونو څخه په اعظمي توګه ګټه واخلي.
د دې برنامې له لارې به محصلین وکولای شي چې د پروګرام جوړونې له بنسټیزو مفاهیمو سره بلدتیا پیدا کړي، د کوډ لیکلو لومړني مهارتونه ترلاسه کړي او خپله نظري پوهه د عملي تمرینونو او تجربو له لارې لا پیاوړې کړي.
د نشراتو او ټولیزو اړیکو آمریت
التقوی؛ د یوه ډاډمن راتلونکي پر لور
