کرنیزاقتصاد او توسعي پوهنځی

کرنیزاقتصاد او توسعي پوهنځی تحقیق, ترويج او توليد

05/06/2026

د ۱۴۰۴–۱۴۰۵ تحصیلي کال د دوهم سمستر د وروستیو ازموینو د پیل خبرتیا!!!

د کرنیز اقتصاد او توسعې پوهنځي ټولو قدرمنو محصلانو ته په درنښت خبر ورکول کېږي، چې د ۱۴۰۴–۱۴۰۵ تحصیلي کال د دوهم سمستر وروستۍ ازموینې د ۱۴۰۵ هـ.ل کال د جوزا میاشتې په ۱۷مه نېټه پیلېږي.

له ټولو محصلانو څخه غوښتنه کېږي چې د ازموینو د اعلان شوي مهالویش مطابق په ټاکلي وخت د ازموینو په غونډو کې حاضر شي او د ازموینو ټول نافذ اصول، لوایح او مقررات په جدي توګه مراعت کړي.

هېله ده چې د ازموینو لپاره له وړاندې بشپړ چمتووالی ونیسئ او د علمي بریاوو د ترلاسه کولو لپاره خپلې هڅې لا پیاوړې کړئ.

په درنښت
د کرنیز اقتصاد او توسعې پوهنځي اداره

ستاسو د لا زیاتو بریاوو او روښانه راتلونکي په هیله!

*د تجارت پلان مضمون اړوند د زلمي صحت بريالي صنعتي شرکت څخه د اګريبزنس محصلينو عملي ليدني راپور.*د افغانستان د کرنيزو علو...
22/05/2026

*د تجارت پلان مضمون اړوند د زلمي صحت بريالي صنعتي شرکت څخه د اګريبزنس محصلينو عملي ليدني راپور.*

د افغانستان د کرنيزو علومو او ټکنالوژۍ ملي پوهنتون د کرنيز اقتصاد او توسعې پوهنځي د اګريبزنس څانګي څلورم ټولګي محصلين د اګريبزنس څانګي د استاد عزیزالرحمن رګښتي تر لارښووني او ملتیا لاندي د تجارت پلان مضمون د عملي زده کړو په موخه د زلمي صحت بريالي صنعتي شرکت ته پر نيټه ۳۰ / ۲ / ۱۴۰۵ بوتلل سول. د ياد علمي او عملي سفر موخه دا وه چي محصلين د تجارت پلان، صنعتي مديريت، توليدي پروسو، بازارموندني، مالي تنظيم او د يوه بريالي تجارت د عملي تجربو سره له نږدې بلد سي.

د ياد پروګرام په پيل کي د شرکت مسؤل محترم حاجي صاحب بريالي د محصلينو هرکلی وکړ او د شرکت د تاسيس، موخو، فعاليتونو، راتلونکو پلانونو او د تجارت د پرمختګ اړوند يې مفصل معلومات وړاندې کړل. وروسته محصلينو د تجارت پلان مضمون اړوند بېلابېلي پوښتني مطرح کړې چي پکي د کاروبار د شروع کولو مراحل، د سرمايې تنظيم، د بازار د انتخاب طريقې، د توليد د کيفيت ساتنه، د مشتريانو جلب، د خطرونو مديريت او د راتلونکي توسعې پلانونه شامل وه. محترم حاجي صاحب بريالي د ټولو پوښتنو هر اړخيز او قناعت بخش جوابونه ورکړل.

وروسته محصلينو د فابريکې د بېلابېلو برخو څخه عملي ليدنه وکړه. د ليدني پر مهال هغوی د توليداتو د جوړېدو عملي مراحل، د ماشينونو استعمال، د موادو د تنظيم طريقه، د کارکوونکو دندو، بسته بندۍ، ذخيره کولو او بازار ته د توليداتو د انتقال پروسه له نږدې مشاهده کړه. همدارنګه د شرکت مسؤل د صنعت په برخه کي د نوښت، زيار، دوامدار کار او د ځان بسيا کېدو پر ارزښت تفصيلي معلومات ورکړل.

محترم حاجي صاحب بريالي محصلين وهڅول چي د زده کړو تر بشپړېدو وروسته يوازي د وظيفې په تمه پاته نه سي، بلکې د خپلو علمي او عملي مهارتونو څخه په استفادې سره خپل شخصي تجارتونه او کاروبارونه پيل کړي، تر څو د ځان ترڅنګ نورو خلکو ته هم د کار زمينه برابره کړي او د هېواد په اقتصادي پرمختګ کي مثبت رول ولوبوي.

د اګريبزنس څانګي محصلينو د دې علمي سفر څخه خوښي څرګنده کړه او دا يې د خپلو عملي زده کړو لپاره يو ډېر مهم او ګټور پروګرام وباله. هغوی وويل چي دغه ډول عملي ليدني د نظري زده کړو ترڅنګ د کاروبار د واقعي چاپېريال په درک کولو کي خورا زيات اهميت لري.

په پای کي د کرنيز اقتصاد او توسعې پوهنځي د اګريبزنس څانګي استاد پوهنمل عزیزالرحمن رګښتی له خوا د زلمي صحت بريالي صنعتي شرکت له مسؤل محترم حاجي صاحب بريالي څخه د هغوی د همکارۍ، مېلمه پالني او ارزښتناکو معلوماتو له امله ځانګړې مننه وکړه.

کرنيز اقتصاد او توسعې پوهنځي
نيټه : ۱ / ۳ / ۱۴۰۵

د کندهار ولايت د صنعتکارانو د ظرفيت لوړوني لپاره دوه ورځنی ورکشاپ تر سره سو.د افغانستان د کرنیزو علومو او ټکنالوژۍ ملي پ...
14/05/2026

د کندهار ولايت د صنعتکارانو د ظرفيت لوړوني لپاره دوه ورځنی ورکشاپ تر سره سو.

د افغانستان د کرنیزو علومو او ټکنالوژۍ ملي پوهنتون د کرنیز اقتصاد او توسعې پوهنځۍ اړوند د اګریبزنس څانګي استادانو له لوري د کندهار ولایت د صنعتکارانو لپاره د ظرفیت لوړوني دوه ورځنی (۲۰ او ۲۱ نيټه د ثور ۱۴۰۵ ) ورکشاپ د پوهنتون او د کندهار د صنايعو او معدن خوني تر ګډو همکاريو لاندي په بریالۍ توګه ترسره سو. د ورکشاپ موخه د صنعتکارانو د علمي، تخنیکي او مسلکي ظرفیتونو لوړول، د بازارموندني او کاروباري مدیریت په برخه کي د پوهي پیاوړتیا، او د پوهنتون او صنعتي سکتور ترمنځ د همږغۍ رامنځته کول وو.

دغه ورکشاپ چي د اګريبزنس څانګي د استادانو، پوهندوی سورګل اعظيمي او پوهنمل عبدالرازق ريحان له لوري تنظيم سوی و او د همکارو استادانو په توګه پوهنيار حاجي احمدالله بريالي، پوهنمل سردار محمد هاشمي ، پوهنيار محمد يونس وزيري او پوهنمل عزيزالرحمن بابي هم پکښې فعاله ونډه لرله، د پرانیستې مراسم یې د قرآنکریم د مبارکو آیتونو په تلاوت سره پيل سوه، او وروسته د کندهار د صنايعو او معدن خوني محترم رئیس سید سرور اغا اماني خپله وینا وړاندي کړه. نوموړي په خپلو خبرو کي د پوهنتونونو او صنعتي سکتور ترمنځ د همکاريو ارزښت ته اشاره وکړه او ويې ويل چي په اوسني عصر کي د علمي بنسټونو او صنعت ترمنځ نژدې اړیکي کولای سي د هيواد د اقتصادي ودي، کورنيو توليداتو د پراختيا او د بازارونو د پياوړتيا لپاره مهم رول ولوبوي. هغه زياته کړه چي صنعتکاران د هيواد د اقتصادي نظام اساسي برخه جوړوي او د هغوی ظرفیت لوړونه د ملي اقتصاد د پرمختګ لپاره يو مهم ضرورت دی.

ورپسې د انسټو پوهنتون محترم رئیس مولوي شبیر احمد عباس د یاد ورکشاپ په ارزښت خبري وکړې او د پوهنتون او صنعت ترمنځ یې د دوامدارو همکاریو پر پراختیا ټینګار وکړ. نوموړي وويل چي علمي اداري بايد يوازي د نظري زده کړو تر بريده محدودي نه وي، بلکي اړينه ده چي د ټولني له بېلابېلو سکتورونو سره عملي اړیکي ولري، څو د هيواد د اقتصادي او صنعتي پرمختګ لپاره اغېزمن ګامونه پورته سي. هغه دغه ډول ورکشاپونه د صنعتکارانو لپاره مهم فرصت وباله او د ورته پروګرامونو د دوام غوښتنه يې وکړه.

په دې ورکشاپ کي د اګریبزنس څانګي استادانو د بازارموندني نوې ستراتیژۍ، د کاروبار مدیریت، د تولیداتو معياري کول، د مشتريانو د جلب لاري چاري، د صادراتو فرصتونه او د کوچنيو او منځنيو کاروبارونو د پرمختګ اړوند معلومات وړاندي کړه. ګډونوالو د استادانو له لوري وړاندي سوي موضوعات ارزښتناک وبلل او څرګنده یې کړه چي دا ډول علمي او مسلکي پروګرامونه د صنعتکارانو د پوهي او تجربې د زیاتوالي ترڅنګ د هغوی د کاروبارونو په پرمختګ کي مهم رول لري. په پای کي، دغه دوه ورځنی ورکشاپ د پوښتنو، نظرونو او ګډو بحثونو وروسته د پوهنتون او د کندهار د صنايعو او معدن خوني ترمنځ د لا زياتو همکاریو، همږغۍ او علمي اړيکو د پیاوړتیا لپاره اغېزناک ګام وبلل سو.
۱۴۰۵/۰۲/۲۴
د کرنيز اقتصاد او توسعې پوهنځي

د د افغانستان د کرنیزو علومو او ټکنالوژۍ ملي پوهنتون (اناسټو) د کرنیز اقتصاد او توسعې پوهنځۍ، د کرنیزي توسعې څانګې د درې...
28/04/2026

د د افغانستان د کرنیزو علومو او ټکنالوژۍ ملي پوهنتون (اناسټو) د کرنیز اقتصاد او توسعې پوهنځۍ، د کرنیزي توسعې څانګې د درېیم ټولګي محصلینو د پوهنمل عزیزالرحمن رګښتی تر لارښوونې لاندې د کندهار پوهنتون د رسنیو د عملیاتي مرکز او د ژورنالیزم پوهنځي څخه یو علمي او روزنیز لیدنه ترسره کړه.

د دې علمي سفر موخه دا وه چې محصلین د رسنیو له ارزښت، د رسنیز کار له عملي اړخونو او د مطبعې له تخنیکي وسایلو سره له نږدې بلد شي. په پیل کې محصلینو ته د رسنیو د اهمیت، د رسنیو د عملیاتي مرکز د جوړېدو اړتیا او د هغې د ټولنیز رول په اړه تفصیلي معلومات وړاندې شول. د ژورناليزم پوهنځي قدرمنو استادانو دا ورته څرګنده کړه چې رسنۍ د ټولنې د پوهاوي لوړولو، د عامه ذهنیت د جوړولو، د مثبتو ارزښتونو د خپرولو او د علمي او ټولنیزو فعالیتونو د انعکاس لپاره مهمه وسیله ده. همدارنګه د عدالت، اخلاص، وړتیا، حساب ورکونې او د نوې ټکنالوژۍ د مؤثرې کارونې په اړه هم وضاحت ورکړل شو.

وروسته محصلینو د رسنیو د عملیاتي مرکز او د مطبعې د تخنیکي امریت څخه لیدنه وکړه، چیرې چې د چاپي وسایلو عملي کار ور وښودل شو. په دې وسایلو کې پرنټر ماشین، سریښ ماشین، لېزر جیټ ماشین، کارټ پرنټر، فریس ماشین، کټر ماشین، کارټ کټر، استپلر، سلیک ماشین او د برېښنا د کنټرول اړین تجهیزات شامل وو. محصلینو په عملي ډول مشاهده کړه چې د چاپي رسنیو تولید څنګه ترسره کېږي او هره وسیله څه ډول کارول کېږي.

سربېره پر دې، محصلینو ته د راډیو د فعالیتونو په اړه هم معلومات وړاندې شول. هغوی ته وښودل شول چې راډیو څنګه د خلکو د خبرتیا، روزنې او عامه پوهاوي په برخه کې مهم رول لري او ولې لا هم د ټولنې لپاره یوه اغېزمنه رسنیزه وسیله بلل کېږي.

په پای کې څرګنده شوه چې په کندهار پوهنتون کې دوه ډوله رسنیز فعالیتونه موجود دي: یو د غږ ژوندۍ او تکراري خپرونې، او بل د چاپي رسنیو فعالیتونه. محصلینو د دغو دواړو برخو عملي چارې له نږدې وکتلې او د رسنیو له واقعي چاپېریال سره بلد شول.

دغه علمي او روزنیز پروګرام د محصلینو لپاره یوه مهمه تجربه وه، چې د رسنیو د کار، اهمیت او تخنیکي اړخونو په اړه یې د هغوی پوهه لا پیاوړې کړه.

۱۴۰۵/۰۲/۰۷

د کرنيز اقتصاد او توسعې پوهنځي

په اناسټو پوهنتون کي محصلینو د غنمو د ورایټیو ، کرنیزو تخنیکونو علمي مشاهدو او د بزګرانو سره په عملي ډول مصاحبي تر سره ک...
22/04/2026

په اناسټو پوهنتون کي محصلینو د غنمو د ورایټیو ، کرنیزو تخنیکونو علمي مشاهدو او د بزګرانو سره په عملي ډول مصاحبي تر سره کړي.
د افغانستان د کرنیزو علومو او ټکنالوژۍ ملي پوهنتون د کرنیز اقتصاد او توسعې پوهنځۍ، د کرنیزي توسعې او اګربزنس څانګو د درېیمو ټولګیو محصلین، د حیواني علومو او نباتي علومو پوهنځیو د لومړيو عمومي ټولګیو محصلین، چي جمله شمېر یې ۹۷ تنه و، د استاد پوهنمل اسدالله "سعادت" په مشرۍ، د ارغستان ولسوالۍ د "رود پُل" په سیمه کي، د استاد پوهنیار احمد الله بریالي په کرنیز فارم کي، د غنمو د مختلفو واريټيو، د کښتونو او د کروندګرو د کرنیزو کړنو او فعالیتونو مشاهده تر سره کړه.
په دې مشاهده کي محصلینو د غنمو د هري ورايټۍ خاصي ځانګړتیاوي، لکه حاصل، مقاومت، د ودي مرحله او نور يې په ښه او مؤثر ډول وکتل او ښې نتیجې یې تر لاسه کړې. همدارنګه محصلینو د کروندګرو کرنیز تخنیکونه لکه د آبیارۍ ډول، د تخم پاشلو طریقې، په یوه جریب کي د تخم د پاشلو اندازه، د یوه جریب څخه د غنمو د تولید یا حاصل اندازه، د دوا پاشۍ په وخت کي د دوا پاشۍ وسایل، د حاصلاتو د راټولولو د طریقو اړوند مخامخ په مستقیم ډول د کروند ګرو څخه د پوښتنو له لاري معلومات په ښه ډول ترلاسه کړه.
د یادوني وړ ده چي په دې ساحوي او عملي تدريس کي، استاد پوهنمل اسدالله "سعادت" د لومړۍ ټولګۍ د محصلینو سره او پوهنمل عزیزالرحمن "رګښتی"، نوماند پوهنیار محمد یونس "وزیري" او نوماند پوهنیار محمد یونس "نظرزی" د کرنیزي توسعې او اګربزنس د دریم ټولګیو د محصلینو سره یو ځای په یاد فعالیت کي فعال ګډون درلود. د دې عملي او مشاهدوي تدريس څخه هدف د محصلینو د کرنیزو کړنو او تخنیکونو اړوند د علمي پوهي او تجربو زیاتوالی، د هغوی ټولنیز مهارتونه لوړول، کرنيز ترويج او د عملي برخي د اهدافو لاسته راوړل و.
د دې مشاهدې د امکاناتو د برابرولو لپاره، د کرنيز اقتصاد او توسعې پوهنځۍ مسؤلینو او استادانو د پوهنتون د رهبرۍ څخه د زړه له کومي مننه وکړه او د دې ډول علمي زده کړو د پیاوړتیا، کرنیزو تجربو پراختیا او د محصلینو سره په هر اړخيز ډول کار کول یې ارزښتناک وبلل او ټینګار یې وکړ، چې په راتلونکي کي هم باید د دې ډول عملي کارونو، مشاهدو، تجربو او د محصلینو د هر اړخیزه مهارتونو د پياوړي کولو لپاره زمينه برابره سي.
۱۴۰۵/۰۱/۲۵
د کرنيز اقتصاد او توسعې پوهنځي

Big thanks to Younas Khanfor all your support! Congrats for being top fans on a streak 🔥!
22/03/2026

Big thanks to Younas Khan

for all your support! Congrats for being top fans on a streak 🔥!

د ګرانو محصلینو لپاره د روژه مات او پيشلمي وختونه.ستاسو د دعاګانو په هيله.پوهنمل عزیزالرحمن رګښتی
17/02/2026

د ګرانو محصلینو لپاره د روژه مات او پيشلمي وختونه.

ستاسو د دعاګانو په هيله.
پوهنمل عزیزالرحمن رګښتی

محترمو استادانو، ګرانو محصلينو او قدرمنو کارمندانو! 🌙السلام عليکم ورحمة الله وبرکاتهد سپېڅلې روژې د مبارکې میاشتې د را ر...
17/02/2026

محترمو استادانو، ګرانو محصلينو او قدرمنو کارمندانو! 🌙
السلام عليکم ورحمة الله وبرکاته
د سپېڅلې روژې د مبارکې میاشتې د را رسېدو په مناسبت، تاسو ټولو ته له زړه څخه مبارکي وایم. دا میاشت د صبر، تقوا، یووالي او خدمت میاشت ده. هیله لرم چې الله تعالی دې زموږ روژې، عبادتونه او نېک اعمال قبول کړي او زموږ زړونه دې له اخلاص او ورورولۍ څخه ډک کړي.
روژه موږ ته یوازې د لوږې او تندې زغم نه را زده کوي، بلکې د مسؤلیت، نظم، صداقت او متقابل درناوي درس هم راکوي. زموږ پوهنځی د علم، اخلاقو او ګډ کار کور دی؛ راځئ چې په دې مبارکه میاشت کې لا ډېر یو بل ته لاس ورکړو، همکارۍ پیاوړې کړو او د علم او خدمت په ډګر کې نوې لاسته راوړنې ولرو.
الله تعالی دې زموږ ټول استادان په علم کې برکتمن، محصلين په زده کړو کې بریالي، او کارمندان په خدمت کې ثابت قدمه ولري. زموږ ادارې ته دې پرمختګ، همغږي او لا زیات عزت ور په برخه کړي.
روژه مو مبارک شه،
والسلام
پوهنځي رئیس
پوهنمل عزیزالرحمن رګښتی 🌙🤲

د کرنيز اقتصاد او توسعې پوهنځۍد (۱۴۰۴–۱۴۰۵) تحصيلي کالد دوهم سمستر د پيل خبرتياد کرنيز اقتصاد او توسعې پوهنځي رياست د پو...
03/02/2026

د کرنيز اقتصاد او توسعې پوهنځۍ
د (۱۴۰۴–۱۴۰۵) تحصيلي کال
د دوهم سمستر د پيل خبرتيا
د کرنيز اقتصاد او توسعې پوهنځي رياست د پوهنځي ټولو محترمو محصلينو ته خبر ورکوي، چې د روان تحصيلي کال دوهم سمستر به
د چهارشنبې په ورځ، د ۱۴۰۴ لمريز کال د دلوې مياشتې په (۱۵مه) نېټه پيلېږي.
له ټولو محترمو محصلينو څخه هيله کېږي، چې خپلو درسي ټولګيو ته پر خپل وخت حاضر شي. د نه حاضريدلو په صورت کې به ناسوب ګڼل کېږي او هر ډول مسؤليت به د محصل پر غاړه وي.
په درنښت
د کرنيز اقتصاد او توسعې پوهنځۍ رياست

Address

11
Kandahar
AINOMENA

Website

Alerts

Be the first to know and let us send you an email when کرنیزاقتصاد او توسعي پوهنځی posts news and promotions. Your email address will not be used for any other purpose, and you can unsubscribe at any time.

Shortcuts

Share

Category