06/09/2026
اۉزبېک تیلی و ادبیاتی ماسترلیک پروگرامی تشکیل اېتیلگنی مناسبتی بیلن تبریک و منّتدارچیلیک
«جوزجان بیلیم یورتیده اۉزبېک تیلی و ادبیاتی یۉنه‌لیشی بۉییچه ماسترلیک پروگرامی‌نینگ تشکیل اېتیلیب، یکوني تصدیقلنگنینی افغانستان اۉزبېک خلقیگه، اونینگ علمي۔مدني جماعتچیلیگیگه، ضیالیلریگه، استاد و تدقیقاتچیلریگه همده اۉزبېک تیلی و ادبیاتینی قدرله‌یدیگن برچه یورتداشلریمیزگه صمیمي مبارک‌باد اېته‌میز.»
مذکور پروگرام افغانستانده اۉزبېک تیلی و ادبیاتی بۉییچه ماسترلیک باسقیچیده متخصص تیّارلشگه یۉل آچگن مهم علمي۔معرفي تشبثلردن بیریدیر. اۉزبېک تیلی و ادبیاتی افغانستان‌نینگ بای تیل، ادبیات و مدنیت خزینه‌سی‌نینگ مهم ترکیبي قسمی بۉلیب، اونی چوقور اۉرگنیش، علمي اساسده تدقیق اېتیش و کېلگوسی نسللرگه یېتکزیش اوچون یوقاری باسقیچده‌گی اکادمیک تحصیلگه احتیاج موجود اېدی.
ماسترلیک پروگرامی‌نینگ تشکیل اېتیلیشی، اوّلا، اۉزبېک تیلی و ادبیاتی بۉییچه لیساسنی تمامله‌گن یاشلر‌نینگ تحصیلینی اۉز یورتیده دوام اېتتیریش امکانیتینی کېنگه‌یتیره‌دی. شو بیلن بیرگه، تیل‌شناسلیک و ادبیات‌شناسلیک بۉییچه علمي ایزلنیشلر آلیب باریش، ینگی تدقیقاتچیلرنی تیّارلش، علمي صلاحیتنی آشیریش همده اۉزبېک تیلی و ادبیاتی‌نینگ افغانستانده‌گی رواجیگه مناسب حصه قۉشیش اوچون ینگی اکادمیک امکانیتلر یره‌ته‌دی.
مذکور دستور کېلگوسیده اۉزبېک تیلی و ادبیاتی بۉییچه یوقاری ملَکه‌لی علمي کادرلر تیّارلش، بو ساحه‌ده‌گی تدقیقاتلرنی کېنگه‌یتیریش و تحصیل‌نینگ کېینگی باسقیچلرینی رواجلنتیریش اوچون مستحکم زمین بۉلیب خدمت قیلیشی ممکن.
شو مناسبت بیلن جوزجان بیلیم یورتی رهبریتیگه مذکور پروگرامنی تشکیل اېتیش جریانیده‌گی قۉللب۔قوّتلش و همکارلیکلری اوچون چوقور منّتدارچیلیگیمیزنی بیلدیره‌میز.
اینیقسه، جوزجان بیلیم یورتی علمي معاونی، حرمتلی پوهندوی دوکتور عبدالبصیر محمودزاده‌گه علیحده تشکر اظهار اېته‌میز. او کیشی مذکور پروگرامگه باشیدناق علیحده اعتبار قره‌تیب، اونینگ تشکیل اېتیلیشی و تېگیشلی باسقیچلردن موفقیتلی اۉتیشی اوچون کېچه۔یو کوندوز تینیمسیز محنت قیلدیلر. پروگرام موضوعینی دایمي روشده کوزه‌تیب باریب، اونینگ ایجابي یکون تاپیشی یۉلیده کۉرستگن تشبث و عملي کۉمکلری علیحده اعترافگه لایقدیر.
شونینگدېک، جوزجان بیلیم یورتی اجتماعي بیلیملر فاکولته‌سی رهبریتیگه مذکور جریان دوامیده کۉرستگن همکارلیگی و کۉمگیگه منّتدارچیلیک بیلدیره‌میز. فاکولته رهبریتی‌نینگ قۉللب۔قوّتلشی پروگرام بیلن باغلیق اکادمیک و تشکیلي ایشلر‌نینگ ایزچیل عملگه آشیریلیشیگه خدمت قیلدی.
اجتماعي بیلیملر فاکولته‌سی اۉزبېک تیلی و ادبیاتی دیپارتمنتی استاد۔اۉقیتووچیلریگه هم مذکور تشبثنی عملگه آشیریشده‌گی مسؤولیتلی محنتلری اوچون صمیمي تشکر بیلدیره‌میز. اولر‌نینگ هم‌جهتلیگی و علمي یاندشووی پروگرام مضمونینی شکللنتیریشده مهم اهمیت کسب اېتدی.
علیحده تأکیدلش جایز که، حرمتلی پوهنمل نجیب‌الله عصمتي، اۉزبېک تیلی و ادبیاتی دیپارتمنتی علمي خادمی، ماسترلیک پروگرامی‌نینگ پالیسي سندی و تحصیلي نصابینی تیّارلش ایشلریده کتّه مسؤولیت بیلن فعالیت آلیب باردیلر. او کیشی‌نینگ کېچه۔یو کوندوز قیلگن تینیمسیز محنتی، ایزچیل ایزلنیشلری و حجتلرنی تیّارلشده‌گی مسؤولیتلی یاندشووی مذکور پروگرام یره‌تیلیشیده علیحده ا‌ۉرین توته‌‌دی. شو باعث او کیشیگه علیحده منّتدارچیلیگیمیزنی بیلدیره‌میز.
ایتیش لازم که، بو یوتوق بیر‌گینه شخص‌نینگ اېمس، بلکه بیلیم یورتی رهبریتی، علمي معاونی، اجتماعي بیلیملر فاکولته‌سی رهبریتی همده اۉزبېک تیلی و ادبیاتی دیپارتمنتی بوتون استاد۔اۉقیتووچیلری‌نینگ همکارلیکده‌گی سعی۔حرکتلری ثمره‌سیدیر.
اۉزبېک تیلی و ادبیاتی ماسترلیک پروگرامی‌نینگ تشکیل اېتیلیشی افغانستان اۉزبېکلری‌نینگ علمي و مدني حیاتیده ینگی صحیفه آچماقده. اوشبو پروگرام آرقه‌لی اۉزبېک تیلی‌نینگ علمي تدقیقات دایره‌سی کېنگه‌ییب، ادبي میراثیمیزنی چوقور اۉرگنیش و کېله‌جک نسللرگه یېتکزیش اوچون ینه‌ده کېنگ امکانیتلر یره‌تیلیشیگه ایشانه‌میز.
اۉزبېک تیلی و ادبیاتی دیپارتمنتی جماعه‌سی نامیدن اوشبو تاریخي قدم بیلن ینه بیر بار افغانستان اۉزبېک خلقینی و بوتون علمي۔مدني جماعتچیلیگیمیزنی چین قلبدن مبارک‌باد اېته‌میز.
اۉزبېک تیلی و ادبیاتی دیپارتمنتی رهبریتی
