Sabirabad ş.2 saylı Beynəlmiləl Təbiət və Texniki təmayüllü məktəb-lisey

27/05/2026

Hörmətli müəllimlər, əziz şagirdlər, dəyərli valideynlər və bütün Sabirabad ictimaiyyəti!
Sabirabad şəhəri N. Nərimanov adına 2 nömrəli beynəlmiləl təbiət və texniki fənlər təmayüllü məktəb-lisey sizi müqəddəs Qurban bayramı münasibətilə ürəkdən təbrik edir!
Qurban bayramı xalqımızın milli-mənəvi dəyərlərini, humanizm, mərhəmət, paylaşmaq və birlik ənənələrini yaşadan müqəddəs bayramlardan biridir. Bu əziz günlər insanları xeyirxahlığa, həmrəyliyə və bir-birinə dayaq olmağa səsləyir.
Arzu edirik ki, bu mübarək bayram hər bir ailəyə sevinc, ruzi-bərəkət, sağlamlıq və mənəvi rahatlıq gətirsin. Şagirdlərimizə elm və təhsildə yeni nailiyyətlər, yüksək uğurlar, açıq zehin, güclü iradə və parlaq gələcək arzulayırıq. Müəllimlərimizin əməyinin bəhrəli, valideynlərimizin qürur duyacağı uğurların isə davamlı olmasını diləyirik.
Doğma Sabirabadımızda daim əmin-amanlıq, inkişaf və birlik hökm sürsün. Uca Allah kəsilən qurbanları, edilən duaları və bütün xoş niyyətləri qəbul etsin!
Qurban bayramınız mübarək!

26/05/2026

Bugün məktəb-liseydə Riyaziyyat–İnformatika fənn metodbirləşməsinin növbəti iclası keçirilmişdir. İclas zamanı 2025–2026-cı tədris ili üzrə görülmüş işlər, əldə olunan nəticələr və qarşıda duran vəzifələr geniş şəkildə müzakirə olunmuşdur.

İclasda riyaziyyat müəllimləri Nuriyeva Bulqeys (9 “D” sinfi), Novruzova Aytəkin (9 “A”, 9 “E”, 9 “J” sinifləri), Əhədova Elnarə (9 “V” və 9”B”sinifləri) və Qəhrəmanova Gülüstan (9 “C” sinfi) buraxılış imtahanlarının nəticələri barədə çıxış etmiş, şagird nailiyyətlərini təhlil etmişlər. Qeyd olunmuşdur ki, 9 “V” və 9 “J” sinifləri yüksək nəticələr göstərmiş, 9 “A”, 9 “B” və 9 “C” siniflərinin nəticələri isə qənaətbəxş hesab edilmişdir. Müəllimlər nəticələrin daha da yüksəldilməsi istiqamətində görüləcək işlər barədə fikir mübadiləsi aparmışlar.

6-cı siniflərin monitorinq imtahanına hazırlıq səviyyəsi haqqında Məmmədova Aygün, Zeynalova Aynurə məlumat vermiş, il ərzində şagirdlərin inkişafına nail olmaq üçün tətbiq etdikləri yeni dərs metodlarını və tədris üsullarını bölüşmüşlər. Çıxışlarda şagirdlərin məntiqi təfəkkürünün inkişaf etdirilməsi, fərdi yanaşmanın tətbiqi və müasir təlim metodlarının əhəmiyyəti xüsusi vurğulanmışdır.

Abdullayev Mahir cari məsələlərlə bağlı çıxış edərək qarşıda duran əsas vəzifələrdən danışmış, şagirdlərin Riyaziyyat fənninə marağının artırılması yolları, motivasiyaedici fəaliyyətlərin təşkili və nəticəyönümlü tədrisin əhəmiyyəti barədə fikirlərini bölüşmüşdür.

İnformatika müəllimləri Nəsirova Çiçək və Həsənova Səkinə isə rəqəmsal bacarıqların inkişaf etdirilməsinin vacibliyindən bəhs etmiş, artıq ibtidai siniflərdə də bu istiqamətdə aparılan işlərin genişləndirilməsinin əhəmiyyətini qeyd etmişlər. Müəllimlər əlavə məşğələlərin təşkili, praktik yönümlü dərslərin keçirilməsi və şagirdlərin informasiya texnologiyalarına marağının artırılması istiqamətində görülən işlər barədə məlumat vermişlər.

İclas qarşılıqlı fikir mübadiləsi şəraitində keçmiş, tədrisin keyfiyyətinin daha da yüksəldilməsi və şagird nailiyyətlərinin artırılması istiqamətində mühüm təkliflər səsləndirilmişdir.

26/05/2026

Bugün məktəb-liseydə 28 May – Müstəqillik Gününə həsr olunmuş tədbir keçirilmişdir. Tədbir Azərbaycan Xalq Cümhuriyyətinin yaranmasının 108-ci ildönümünə həsr olunmuşdur. Şagirdlər vətənpərvərlik ruhunda şeirlər, mahnılar və kompozisiyalar təqdim etmiş, milli dəyərlərimizi və müstəqilliyimizin əhəmiyyətini nümayiş etdirmişlər.

Tədbir musiqi müəllimi Məmmədzadə Sura müəllim və UBR Sadıqova Zülfiyyənin təşkilatçılığı ilə hazırlanmışdır. 2 “A”, 6 “G”, 7 “Ç” və 6 “A” sinif şagirdlərinin çıxışları iştirakçılar tərəfindən maraqla qarşılanmışdır. Tədbir şagirdlərdə dövlətçilik ənənələrinə, milli-mənəvi dəyərlərə və müstəqillik tariximizə hörmət hissinin formalaşdırılmasına xidmət etmişdir.

26/05/2026

“AzEdu.az” Təhsil Portalı Azərbaycan dili və ədəbiyyatı müəllimi Elvira Allahverdiyevanın tövsiyəsi ilə daha bir istedadlı şagirdimiz haqqında maraqlı yazı dərc edib.
Məktəb-liseyimizin 9-cu sinif şagirdi Zivər Əsədli mütaliəyə olan böyük marağı, yazıçılıq həvəsi və yüksək hədəfləri ilə hər kəsə nümunə olur. O, bu günə qədər yüzlərlə kitab oxuyub, hekayələr yazır və gələcəkdə həkim olmağı qarşısına məqsəd qoyub.

Şagirdimizin uğurları və düşüncələri haqqında hazırlanan müsahibə media tərəfindən də maraqla qarşılanıb. İnanırıq ki, Zivəri qarşıda daha böyük nailiyyətlər gözləyir.

Əzmkarlığın, mütaliənin və məqsədyönlülüyün gözəl nümunəsi olan şagirdimizə gələcək həyatında uğurlar arzulayırıq!
Azərbaycan Respublikası Elm və Təhsil Nazirliyi
Mil - Muğan Regional Təhsil İdarəsi
Məktəbəqədər və Ümumi Təhsil üzrə Dövlət Agentliyi
Sabirabad Rayon Təhsil Şöbəsi

Nərimanov adına 2 nömrəli beynəlmiləl təbiət və texniki fənlər təmayüllü məktəb-liseyinin daha bir istedadlı şagirdindən bəhs edəcəyik.

25/05/2026

Məktəb-liseydə şagirdlərlə maarifləndirici görüş keçirilib.

25 may 2026-cı il tarixdə Sabirabad rayon prokurorluğunun müstəntiqi Murad Alıyev və Sabirabad RPŞ-nin İİB-nin baş əməliyyat müvəkkili, polis baş leytenantı Şamil Əhmədov məktəb-liseyin 7–11-ci sinif şagirdləri ilə görüş keçiriblər.

Tədbiri giriş sözü ilə məktəb-liseyin direktoru Elşad Şərifov açaraq narkotik vasitələrin yaratdığı təhlükələr, yeniyetmələrin sağlam həyat tərzinə yönləndirilməsinin əhəmiyyəti və bu sahədə maarifləndirmə işinin vacibliyi barədə çıxış edib, daha sonra qonaqlara söz verib.

Görüş zamanı şagirdlərə narkotik vasitələrin insan sağlamlığına, cəmiyyətə və gələcək həyata vurduğu ağır zərərlər barədə ətraflı məlumat verilib. Mövzu ilə bağlı videoroliklər nümayiş etdirilib, şagirdlərə maarifləndirici bukletlər paylanılıb və onları maraqlandıran suallar cavablandırılıb.

Tədbirin əsas məqsədi şagirdlərin zərərli vərdişlərdən uzaq tutulması, hüquqi maarifləndirilməsi və sağlam həyat tərzinə təşviq olunması olub.

25/05/2026

25 may 2026-cı il tarixdə məktəbdə Azərbaycan dili və ədəbiyyatı metodbirləşməsinin növbəti iclası keçirilib. İclasda 2025–2026-cı tədris ili ərzində görülmüş işlər geniş şəkildə təhlil olunub, əldə edilmiş nəticələr müzakirə edilib və qarşıdakı tədris ili üçün prioritet vəzifələr müəyyənləşdirilib.

Metodbirləşmə rəhbəri Sura Zeynalova çıxış edərək IX siniflər üzrə keçirilmiş monitorinqin nəticələrini iştirakçıların diqqətinə çatdırıb. Təhlillər zamanı siniflər üzrə göstəricilər müqayisəli şəkildə araşdırılıb, müəllimlərin fəaliyyəti və şagird nailiyyətləri ətrafında fikir mübadiləsi aparılıb. Xüsusilə IX “J” sinfində dərs deyən Alahverdiyeva Elvira və IX “V” sinfində fəaliyyət göstərən Zeynalova Suranın yüksək nəticələri və səmərəli fəaliyyəti metodbirləşmə üzvləri tərəfindən təqdir olunub.

Digər müəllimlərin də fəaliyyəti ayrıca dəyərləndirilib. Bağırova Asimanın IX “A” və IX “C” siniflərində apardığı işlərin, eləcə də ümumi nəticələrin qənaətbəxş olduğu vurğulanıb. İmtahan nəticələrinin təhlili zamanı şagirdlərin oxuyub-anlama bacarıqları, yazılı nitq səviyyəsi, mətn üzərində işləmə vərdişləri və ümumi hazırlıq göstəriciləri müzakirə olunub.
IX “B” sinfində Azərbaycan dili fənni üzrə buraxılış imtahanının nəticələrinin 50% qeyri-qənaətbəxş olduğu qeyd edilib. Sinifdə dərs deyən Zeynalova Suraya zəif nəticə göstərən şagirdlərlə daha intensiv və sistemli iş aparılması tövsiyə olunub.

İclasda məktəbdə keçirilən “Oxu dəqiqələri” layihəsinin müsbət təsiri xüsusi qeyd olunub. Şagirdlərin hazırladıqları bədii kompozisiyalar, səhnəciklər, ədəbi-bədii çıxışlar və təşkil olunan intellektual yarışların onların nitq mədəniyyətinin, bədii təfəkkürünün və mütaliə marağının inkişafında mühüm rol oynadığı bildirilib. Bu istiqamətdə görülən işlər metodbirləşmə tərəfindən yüksək qiymətləndirilib.

Qarşıda duran vəzifələr sırasında növbəti tədris ili üçün fənn olimpiadalarına hazırlığın gücləndirilməsi, VIII siniflərdə tədrisin vəziyyətinin daha sistemli nəzarətdə saxlanılması və istedadlı şagirdlərlə işin genişləndirilməsi məsələləri ön plana çəkilib. Eyni zamanda “Oxu dəqiqələri”nin sayının artırılması, yaş xüsusiyyətlərinə uyğun yeni yanaşmaların tətbiqi və şagirdlərin müasir ədəbiyyata marağının artırılması ilə bağlı təkliflər səsləndirilib.

Müzakirələr zamanı məktəbdə şagirdlərin iştirakı ilə böyük həcmli ədəbi-bədii tədbirin təşkili perspektivi də nəzərdən keçirilib. Tədbirin formatı, iştirakçı heyəti və hazırlanacaq səhnə kompozisiyaları ilə bağlı ilkin konturlar müəyyənləşdirilib.

Cari məsələlər bölməsində çıxış edən Aytən Məcidova və Günel Əhmədova siniflərdəki ümumi vəziyyət, şagird potensialının səmərəli istiqamətləndirilməsi və tədris motivasiyası barədə fikirlərini bölüşüblər. Onlar xüsusilə VII siniflərdə nəticələrin arzuolunan səviyyədə olmadığını qeyd edərək, zəif oxuyan şagirdlərlə daha intensiv iş aparılmasının vacibliyini vurğulayıblar. Bununla əlaqədar olaraq yay tətili müddətində zəif nəticə göstərən şagirdlər üçün xüsusi dəstək proqramının təşkili metodbirləşmənin qərar layihəsinə daxil edilib.

İclasın sonunda qeyd olunub ki, Azərbaycan dili və ədəbiyyatı fənninin tədrisində keyfiyyətin yüksəldilməsi, şagirdlərin mütaliə vərdişlərinin inkişaf etdirilməsi və milli-mənəvi dəyərlərə bağlı gənc nəslin formalaşdırılması istiqamətində fəaliyyət gələcək tədris ilində də ardıcıl şəkildə davam etdiriləcək.

22/05/2026

Məktəb-liseyin 9 “E” sinif şagirdi Hüseynli Munira verdiyi müsahibədə şeir yazmaq hobbisindən danışıb. Linkə keçid edib onun müsahibəsini oxuya bilərsiz. Şagirdimizə uğur arzu edirik.

https://azedu.az/az/news/106667/yuzlerle-seirin-muellifi-14-yasli-munira-500-den-cox-kitab-oxumusam-musahibe

Bu gün sizə Sabirabad rayonunda yaşayan 14 yaşlı Muniradan bəhs edəcəyik.

22/05/2026

🇦🇿 Səməd Vurğunun 120 illik yubileyinə həsr olunmuş möhtəşəm tədbir!

Azərbaycan poeziyasının fəxri, xalq şairi Səməd Vurğunun anadan olmasının 120 illiyi münasibətilə məktəbimizdə ədəbi-bədii gecə keçirildi. ✨

Məktəbimizin ədəbiyyat müəllimləri Sura Zeynalova, Elvira Allahverdiyeva, Günel Əhmədova və Aytən Məcidova tərəfindən böyük sevgi və peşəkarlıqla hazırlanan tədbir, Azərbaycan Respublikasının Dövlət Himninin səsləndirilməsi və Vətənimizin bütövlüyü uğrunda canından keçən şəhidlərimizin əziz xatirəsinin bir dəqiqəlik sükutla yad edilməsi ilə açıq elan olundu. 🕊️

🎭 Tədbirdə 5b, 6ç, 7v, 7c, 8j və 8b sinif şagirdlərinin rəngarəng, bir-birindən maraqlı çıxışları hər kəsin yaddaşına həkk olundu. Görkəmli sənətkarın ölməz "Vaqif" və "Fərhad və Şirin" dramlarından səhnələşdirilmiş parçalar, eləcə də şairin qəlblərə toxunan "Şair, nə tez qocaldın sən", "Cavanlara xitab"və "Yazla qışın deyişməsi"*şeirləri şagirdlərimizin ifasında yenidən canlandı.

🎶 Gecənin bədii hissəsi isə xüsusilə coşğulu keçdi! Ruhumuzu oxşayan "Azərbaycanım"mahnısı və milli iftixarımız olan "Şən Azərbaycan"rəqsi tədbirə xüsusi rəng qataraq tamaşaçılarda zəngin təəssürat buraxdı.

Bu gözəl tədbirin ərsəyə gəlməsində əməyi keçən bütün müəllimlərimizə və istedadlı şagirdlərimizə dərin təşəkkürümüzü bildiririk! 👏🌹

22/05/2026

Məktəb kitabxanamızda 6–8-ci sinif şagirdlərinin iştirakı ilə “Bədii qiraət dəqiqələri” təşkil olundu.

Şagirdlər dünya ədəbiyyatının görkəmli ingilisdilli şairləri — William Shakespeare, Robert Frost, William Blake, Christina Rosetti, William Wordsworth, George Byron, Robert Louis Stevenson, Langston Hughes və Emily Dickinsonun şeirlərini ingilis dilində böyük maraq və ifadəliliklə səsləndirdilər.

Tədbirin əsas məqsədi şagirdlərdə ingilis dilində nitq bacarıqlarını, bədii qiraət mədəniyyətini və dünya ədəbiyyatına marağı inkişaf etdirmək idi.

Tədbirin təşkilinə görə ingilis dili müəllimi Aysel Abdullazadəyə təşəkkür edir, şagirdlərimizə uğurlar arzulayırıq.

22/05/2026

Məktəb-liseyin 1B sinif şagirdləri şəhid məzunumuz Elgiz Abbaslının əziz xatirəsinə həsr olunmuş tədbir keçiriblər.

Kitabxanada təşkil olunan tədbirdə balaca şagirdlər vətənpərvərlik ruhunda şeirlər söyləyib, şəhidimizin həyat yolu və göstərdiyi qəhrəmanlıq haqqında məlumatlar səsləndiriblər.

Şəhidlərimizin xatirəsini yaşatmaq, onları gələcək nəsillərə tanıtmaq hər birimizin mənəvi borcudur. Allah bütün şəhidlərimizə rəhmət eləsin! 🇦🇿

21/05/2026

5B sinfində “Oxu dəqiqələri” layihəsi çərçivəsində may ayının son görüşü keçirildi.

Bu dəfə şagirdlər Fatih Erdoğan müəllifinin “Sehrli çətir” adlı 128 səhifəlik əsərini oxuyaraq müzakirə etdilər. Əsər şagirdlər tərəfindən maraqla qarşılandı, onlar kitabın mövzusu, qəhrəmanları və verdiyi mesajlar barədə fikirlərini bölüşdülər.

Belə layihələr şagirdlərdə mütaliəyə marağın artırılmasına, oxu bacarıqlarının inkişafına və düşüncə dünyalarının zənginləşməsinə böyük töhfə verir.
Layihənin məktəb-liseydə təşkilinə görə Azərbaycan dili və Ədəbiyyat müəllimi Allahverdiyeva Elviraya təşəkkür edirik.