16/05/2026
📌 أخي ، أختي , في حال كنت من الناجحيين في مسابقة الأساتذة لهذه السنة ، وراح تطلع أستاذ جديد لأول مرة ، المنشور هذا فيه بعض النصائح وراح يفيدك :
- 1/ الإنطباع الأول لك مع التلاميذ والدصارة الزايدة ؟ حط في بالك بلي في اول دخول لك للقسم واول تعارف ليك مع التلاميذ ! إما تمد صورة مليحة عليك وين تبان عندك شخصية قوية ، وإما تمدلهم إنطباع انك ضعيف الشخصية , لذلك الأسابيع الاولى في القسم لازمك تلعب على رسم الحدود ديالك ، ألقي الدرس تاعك ونقص الدصارة ، وخلي النقاش في إطار الدرس وفقط .
-2/ حط في بالك بلي التلميذ لي راك تقري فيه ليس بالغبي! وينتبه لأمور في شخصيتك أنت وماتلاحظهاش ، إذا حس بالدعوة شويا مطلوقة راحت حصتك ، وهذا ليفسر أن بعض التلاميذ يمارسوا الفوضى عند أستاذ ، ولما يدخل أستاذ أخر يسكتوا ، لأنهم دارسين شخصية الأساتذة مليح .
3 / التمكن من المادة : حاول تجهز درسك مليح وحاول تتوقع الاسئلة لي دور حول الدرس ،التلميذ يزيد الاحترام تاعوا للأستاذ المتمكن ، ماتروحش بهذيك العقلية تاع راني جديد وتبدا تسايس فيهم ، هذي امورك الشخصية حاول تخليها عندك باه مايحڨروكش بالعين ، انت قريت في الجامعة وخضعت لتكوين اكاديمي وقدمت بحوث ، ماتستناش من التلميذ يوريلك كيفاه تقريه ..
-4/ نقطة أخرى حاول تكون أستاذ عادل بين التلاميذ ، وماديرش الوجه كي يغلط تلميذ على حساب أخر ، وماتبخلش عليهم بالنصح كلما تجي الفرصة باه تمارس دور المربي والمرشد استغلها خلال الدرس .
5/ كذلك كاين زوج ملاحظات يساعدوك :
- فترة بداية الدرس حاول تطرح اسئلة على الدرس الماضي ، لأن هذا يلفت إنتباه التلاميذ أكثر ، ويخليهم يحسوا بنوع من الصدمة وين ينشاغلوا فقط بمحاولة التذكر ومايدرولكش الفوضى لي يعاني منها بزاف اساتذة في بداية الحصة.
كذلك حط في بالك بلي التلميذ يحب النقاط ، حاول انك تستعمل اسلوب التحفيز داخل القسم بالنقاط ( كي يجاوب على سؤال صعب أو يقدم اضافة جيدة ) لأن هذا الامر يزرع فيه الحافز باه يقرى المادة ديالك
منقول