Science Land - أرض العلوم-

22/11/2021

22/10/2021

الدرس 3 : خريطة الخطوط متساوية الشدة
هي خريطة نستعملوها في حالات الزلازل باه نخرجو منها معلومات مهمة
1 - كيف نعرفو انها الخريطة منظر علوي يعني للسطح لا يمكننا رؤية البؤرة لكن عندنا حاجة اخرى هي المركز السطحي في المثال الموضح البؤرة في البحرة يظهر لينا بشكل نقطة حمراء بارزة في البحر الأبيض المتوسط اقرب نقطة للبؤرة هي مدينة بومرداس و تحديدا زموري ٱذن فهي المنطقة الأكثر تضررا على السطح اذن هي المركز السطحي هنا الخريطة سمحتلي نحدد🌸المركز السطحي 🌸
2 نلاحظ انو الخريطة مقسمة ب 4 الوان
الوردي دمار كلي
الاحمر تهدم المباني
البرتقالي تشققها
الاصفر هزات ارضية طفيفة
المدن لي في اللون الاحمر كل راح يكون عندخا دمار المدن لي في البرتقالي ... يعني المدن لي في نفس اللون لها نفس الخسائر و نحنا قلنا الخسائر تتحكم فيها الشدة يعني مدام نفسها راي نفس الشدة في المناطق لي في نفس اللون هنا الخريطة سمحت لينا نقسمو التوزع تاع الزلزال لمجالات او مناطقوالمناطقوهاذي كل لونين يفصل بينهما خط على هاذي سميناها خريطة الخطوط لأنها تسمح لنا 🌸بتقسيم الخريطة الى مجالات تفصلها خطوط بين كل خطين تكون نفس الشدة 🌸
3 كي نشوفو من المركز السطحي الى آخر نقطة ملونة بالأصفر الخط الأصفر الأخير هاذي تمثل لينا المناطق التي مسها الزلزال ككل ابتداءا من المركز السطحي الى المناطق المجاورة و هاذا سميناه 🌸مدى او مجال الزلزال 🌸
💎

22/10/2021

لكل فعل ...... رد فعل
الزلزال او الفالق هو فعل ينجم عن تطبيق القوة على الأرض رد فعله يترجم في حاجة اسمها 🌸الهزات الإرتدادية 🌸 افرضوا معايا نهز كرة مطاطية نظربها على الحيط كرد فعل تضرب و ترجع ليا الهزات الإرتدادية بنفس الفكرة كأنها الأرض ترد عن الزلزال الفالق قد ينجم عنه انكسار و تشقق للطبقات السفلى التشقق هذا يخلي الطبقة هشة يعني يحدث الزلزال يتشكلو شقوق او فوالق تصبح الأرض هشة اي قابلة للتحرك و التهشم الحركات هاذي قادرة تنتج لينا كرد فعل على الهزة الاولى و تكون سواء متقاربة او متباعدة بشدات أقل من شدة الهزة الأولى 💎

22/10/2021

نحاولو نستخرجو مع بعضانا خصائص زلزال هونشو
- قبالة الساحل الشرقي لمدينة هونشو باليابان 🌸المكان🌸
-11 مارس 2011🌸التاريخ- الزمان مش مذكور -🌸
- الشدة 🌸9،0 على سلم رشتر🌸
-موجت تسونامي هائلة اودت بحياة نحو 15891 شخص و تأثيره اقوى من القنبلة النووية 🌸ذكر الخسائر البشرية لكن نقدرو نستنتجو من قوة الزلزال و التشبيه تاع القنبلة انو الخسائر المادية كبيرة جدا 🌸
ظلت الهزات نحو 50 هزة بشدات 6 و 3 اخرى 7 هي 🌸الهزات الإرتدادية 🌸
الصور توضح جبل فوجي بالمنطقة و الحالة الطبيعية قبل الزلزال و البقية اضرار الزلزال
ملاحظة : الشق لي في الطريق هو إمتداد للفالق في الحالة هاذي ظهر على السطح 💎

22/10/2021

الدرس 2 :خصائص الزلازل
كل إنسان عندو اسم لقب وزن طول و عمر و تاريخ و مكان ميلاد خصائص تميزو عن غيرو كذلك الزلزال كل واحد يتميز على غيرو بمجموعة خصائص اولها مكان الميلاد تاع الزلزال النقطة الأولى التي يضرب فيها الزلزال تطبق عليها قوى تضغط الطبقات الصخرية في العمق باه يتشكل تشوه فيها تسمى 🌸البؤرة🌸و هي مركز الزلزال في العمق الحاجة الثانية الضغط لي يتطبق بالقوى على البؤرة يسبب لنا شرخ او كسر او ما نسميه 🌸الفالق🌸 و هو كسر او شق في الطبقات الصغرية السفلية يمكن ان يصل الى السطح -و يمكن أن لا يصل يبقى في العمق فقط - هاذاك الشق يسبب انتشار اهتزازات و موجات هي 🌸الموجات الزلزالية 🌸 أقرب نقطة للبؤرة هي نقطة تقع فوقها مباشرة اقرب نقطة لسطح الأرض من البؤرة و نسموها 🌸المركز السطحي🌸 و هو الإمتداد الشاقولي للبؤرة على سطح الأرض او إسقاط للبؤرة على السطح و بحكم أنو أقرب نقطة للبؤرة راح تكون فيه أقوى شدة للزلزال على السطح . المركز السطحي تقدرو تسموه مكان ميلاد الزلزال يعني الزلزال كان في بطن الأرض و خرج منها اول نقطة لامسها هي المركز السطحي النقطة هذيكا تكون معروفة بإسم مدينة سد بلدية قرية صحراء اسم بحر او محيط منطقة او ريف المهم المنطقة هاذيك لي لقينا فيها المركز السطحي عندها اسم هذاك 🌸مكان الزلزال 🌸 بالنسبة للزمان هو الوقت المحدد بالساعة و الدقيقة لي سجلت فيه آلات تسجيل الزلازل أول اهتزاز الوقت بالتحديد لي تشكل فيه منحنى الهزة و بدا الزلزال هو 🌸وقت و تاريخ 🌸الزلزال نكملو بنفس المثال تاع البحيرة هو صح الحجر القيناه في نصف البحيرة اما الموجات انتشرت بشكل موجات او دوائر الى أن وصلت لمناطق بعيدة تتناقص ثم تختفي تماما هاذيك هي 🌸الموجات الزلزالية🌸ابتدائا من البؤرة إلى غاية ابعد نقطة سجل فيها الزلزال يعني مدينة البؤرة و المناطق المجاورة لي وصلها الزلزال تسمى 🌸مدى او مجال الزلزال🌸 هاذا الزلزال بالطبع يسبب اهتزاز و تهتز الطبقة العلوية بلي فوقها كامل يعني مباني تتهدم وسطها ناس تموت تتصاب ناس تتجرح و طرقات تتشقق مطارات محطات مزارع تموت الحيوانات و غيرها اسمهم🌸خسائر 🌸 باه نقسموهم اي حاجة على الإنسان سواء يموت يتجرح يتكسر ... نسموها 🌸خسائر بشرية🌸 اما الباقي كامل 🌸خسائر مادية🌸 كل ما تكون أقرب للمركز السطحي كل ما تزيد كمية الخسائر والعكس تكون اقل كل ما نبعدو تنقص 💎

20/10/2021

اتخيل تكون قاعد في أمان الله حتى تبدا الأرض تتحرك من تحتك تفطن ما تعرف وين تروح ووش دير قادر تقوم بأي تصرف . تجري تخرج تلقى الطرق مكسرة لامبيلانس دور و الحماية المدنية و الدنيا مقلبة 😐تتسائل بينك بين روحك وش جرا مع الوقت تستوعب انو صرات كارثة طبيعية هي الزلزال بقوة شديدة . الزلزال هو كارثة طبيعية ناجمة عن الضغط و القوى المطبقة على الطبقات الأرضية يتجلى في موجات زلزالية و هزات ارتدادية متفاوتة ، سريعة و لحظية .
اول متخرج للشارع راح تشوف ناس مجروحة و ناس ماتت ناس خايفة و مضروبة هاذوك نسموهم خسائر بشرية و نلقو ديار طايحة و حيوانات ميتة مواشي و طيور مدارس تكسرت مؤسسات طرقات سدود مطارات حاجات نشروها ب 💵ولا نخسرو💵 باه نعدلوها نسموها خسائر مادية . اضافة الى حالة معنوية مضطربة راح ينتشر الخوف و الفزع وسط عامة الناس مما يخليهم يجرو في كل مكان و يتصرفوا تصرفات خاطئة مثلا الاقتراب من مولدات الكهرباء، الغاز او الماء لي قادر يسبب صدمة كهربائية للناس او الجري على الأسطح الهشة المشققة لي يسبب تحطمها و ربما زيادة الانقاض و زيادة المدفونين تحت الركام .🤦
يعني تصرف لا عقلاني و غياب الثقافة الزلزالية لي تعلمنا كيفاه نتصرفو قبل أثناء و بعد الزلزال قادر يزيد لينا في عدد و فضاعة الخسائر المادية و البشرية 🤷
نوع البنايات و جودتها و متانتها حرفية اليد العاملة و جودة المواد يسبب في زيادة الخسائر أيضا فمثلا البناء المدعم مقاوم أكثر المواد الجديدة متماسكة اكثر ..
و السؤال المطروح حاليا كيفاه نفرق بين الزلزال و خوه ؟ 🧚

14/10/2021

صفحة خاصة بدروس مادة العلوم و معلومات حول العلوم عامة و الدروس المدرسية خاصة مع تقديم مجموعة ملخصات و وثائق فيديوهات و صور توضح الأمور على التلاميذ و تسهل وصول الفكرة لأذهانهم