د. محمد سلطان - Dr. Mohamed Sultan

د. محمد سلطان - Dr. Mohamed Sultan كتابات وروايات د. محمد سلطان

تشمل الرابطة جميع خريجي كليات و معاهد جامعة الإسكندرية.. تعمل الرابطة علي الدعم المستمر للخريج وإتاحه اكبر قدر من الانشطة الخدمية في مختلف

عشان تبقي تقول لا !المقال ده مش دعوة للتمرد.. اكتر ما يكون دعوة للنظام.. ومقصدش اي تمرد او نظام سياسي !احنا كتير اوي بنق...
01/03/2026

عشان تبقي تقول لا !
المقال ده مش دعوة للتمرد.. اكتر ما يكون دعوة للنظام.. ومقصدش اي تمرد او نظام سياسي !
احنا كتير اوي بنقول ايوة وحاضر.. اكتر ما وقتنا او مجهودنا يسمح..
ماشي نطول السهرة.. حاضر حنشتري اكتر من طاقتنا.. مفيش مشكلة لو اجلنا الكلام ده لبكره.. لو جاتلك حتي مكالمة مش في وقتها حترد عليها وتاخد من وقتك عادي.. ايوة وماشي لحاجات ممكن تبقي عارف ان هي حتأذيك علي المدي البعيد بس برده بنعملها.. اكلة دسمة.. تدخين.. تطنيش محاضرة! وبعدين نستغرب هي حياتنا مالها مبقتش واضحه المعالم كده..!
في رمضان بقي بعد المدفع بتبقي كل حاجه قدامك بتقول (ايوة تعالي!) بس كام واحد فينا قال (لا) مش عشان مبقاش خلاص مش قادر.. لا عشان هو اختار يقول لا.. كفاية كده !
الفرق كبير بين واحد معندهوش القدرة يقول لا وواحد تاني عنده القدرة وعنده ثقافة الامتناع.. الصيام مش بيجوع اكتر ما هو بيصنع ارادة.. اليوم كله عمال تقول للأكل لأ.. وكإنك بتتعود علي انك ترفض بعد كده ومتقبلش بكل حاجة.. وخاصة الحاجة اللي مكن تأذيك.. عشان بتخاف.. بتخاف تقول لا لحين تخسر حد بتحبه.. او تقول لا الفرصة تروح منك.. او تقول لا تبقي بتتبطر علي النعمة.. او تقول لا فالناس تزعل منك.. فتقول نعم وخلاص !
الصيام بيقولك.. طالما قدرت تقول لا وانت كنت تقدر تقول نعم قدام الاكل ممكن تعمل ده قدام حاجات تانية كتير.. بيدرب فيك عضلة الإرادة..!
ماهو مش كل ما شيطان الانس ولا الجن يوزك تروح قايله ماشي..! خلال شهر بتدرب بس مش علي الاكل بس.. بتمسك لسانك.. نظراتك.. تفكيرك.. كل حاجة بتقومها.. وبتتعود ازاي ترفض.. ومش كل حاجه سهلة قدامك تبقي انت فريسة ليها.. قرار سريع.. تلحق كلمة ممكن توجع حد.. او عادة عاوز تبطلها.. فكر كده كام مشكلة كنت حتمنعها تحصل لو كنت قولتلها لأ من البداية.. مش تبقي كائن معترض وخلاص.. لأ.. تبقي عارف انت رايح فين.. وكل اللي بيعزم عليك تركب معاه حيوديك مكان تاني.. تقوله ببساطه ... لأ !

د. محمد سلطان
(بين زينة ونور)
المقال 6
3/2026

حتفطر ايه النهاردة؟سؤال ممكن يبان بسيط.. لكن بيتم اعلان حالة الطواريء قبل الفطار في البيت لو مكنتوش عارفين اجابه السؤال ...
27/02/2026

حتفطر ايه النهاردة؟
سؤال ممكن يبان بسيط.. لكن بيتم اعلان حالة الطواريء قبل الفطار في البيت لو مكنتوش عارفين اجابه السؤال ده بالظبط.. ياتري حناكل ايه وحنشرب ايه وحنحلي بإيه ..
طوابير علي الكنافة والقطايف والمخلل واي حد بيبيع اكل قبل الفطار.. وتيجي اللحظة الحاسمة وتتحط الاطباق اشكال والوان وكل حاجه ممكن تتاكل موجودة.. بس للأسف مش بتعرف تاكل اكتر من طاقة معدتك..!
الصيام بيخلينا نتدرب علي Deadline او اخر معاد تلتزم به.. المغرب حيأذن في معاده مهما عملت.. عمره ما جا بدري عشان انت جعان او اتاخر عشان انت قادر تصوم بسهولة.. زي الحياة كده برده مهما استعجلت مش حتحصل الا في وقتها..
الغريب بقي انك في نصف اليوم بتكون عاوز تاكل اي حاجة ممكن تتاكل.. حتي لو اكله مش بتحبها اصلا.. لكن بتحلي ساعة الصيام.. الجوع بيغير اختياراتك.. وبيكشفلك حقيقة مهمة جدا ان رغباتك مش كل الوقت ثابته..وبتتغير بحالتك انت.. والاهم انك بتحس بقيمة الأشياء وسط الصيام.. لقمة الفول اللي مكملتهاش ساعة السحور.. بتحس ان هي نعمة كبيرة اوي وتستحق الشكر.. اقل الاشياء ولو قطعة خبز او حتي تمرة.. ممكن تدفع فيهم اي حاجه بس تاكلهم..!
الموضوع ملهوش علاقه بالاكل وبس فيه حاجات وسط زحمة الدنيا والحياة بننسي قيمتها.. او بالأصح بنتعود علي قيمتها متحسش بيها الا لما تتحرم منها جبرا.. زي ما معدتك بتقولك بعد عشر دقايق من الفطار.. مقدرش اكل اكتر من كده.. فأكيد مش كل اللي نفسك فيه حتقدر تاكله.. وفي الحياة مش كل اللي انت عاوزه حتاخده..
فإتفنن بقي في تجهيز فطارك.. زي ما بتفكر فيه طول اليوم.. وجهز اكلك ع قد طاقتك.. وفكر ازاي تستمع بكل قطمة وانت بتفطر.. قبل ما ترجع وتتحرم تاني.. اشبع من كل حاجه في حياتك.. من اسرتك من بيتك من شريك حياتك من صحابك من اللي حواليك.. حتي لو كتاب اشتريته ونسيت تقراه.. او فيلم ماجل تتفرج عليه.. او خروجة مع صاحب ليك بقالك سنة بتأجل فيها.. قيمة الحاجة اللي عندك بتلمع لما تحط فكرة انها ممكن متكونش موجودة تاني في حياتك.. وساعتها حتعرف هل هي تستاهل تفطر عليها كل يوم ولا لا.. قولي صحيح حتفطر ايه النهاردة؟

د. محمد سلطان
(بين زينة ونور) المقال الخامس
2/2026

صليت التراويح ولا لسه؟صليت التراويح؟طب بتروح تصليها فين؟بتحس ايه لما بتصليها؟ بهدوء وسكينه وممكن شوية تعب..رغم ان هي مش ...
25/02/2026

صليت التراويح ولا لسه؟

صليت التراويح؟
طب بتروح تصليها فين؟
بتحس ايه لما بتصليها؟ بهدوء وسكينه وممكن شوية تعب..
رغم ان هي مش صلاة مفروضة ولكن..
هي صلاة.. يعني اتصال وتواصل بالله سبحانه وتعالي..
الصلاة مش شوية حركات …
ولا ركوع وسجود ونخلص ونمشي..
دي لحظة بترجع فيها تاني…
لربك ولنفسك…
مشكلة عند ناس كتير لما رمضان بييجي…
فيحسوا فجأة إن التراويح بقت أهم صلاة في اليوم..
المساجد تتملي…
والناس تتحمس… ويصلوا ورا شيوخ معينة بأعداد كبيرة..
وده منظر جميل جدا..
بس في وسط الزحمة دي…
مننساش حاجة مهمة ان قيام الليل مش لرمضان بس..
افتكرت مرة كنت بصلي وبين العشاء والتراويح جا واحد طيب بلدياتنا قالي في فزع:
- هو صلي التراويح؟
قولتله لا لسه مخلصين العشاء.. راح قالي: طيب الحمد لله المهم التراويح.. العشا كل يوم بس التراويح مش بتيجي كل سنة !
بغض النظر عن الراجل الطيب ده ..
هي التراويح جميلة وكل حاجة بس مننساش الفرض اولا.. وعلي قد ما تقدر تصلي .. صلي
ربنا سبحانه وتعالى بيقول عن قيام الليل:
وَمِنَ ٱلَّيْلِ فَتَهَجَّدْ بِهِۦ نَافِلَةً لَّكَ عَسَىٰٓ أَن يَبْعَثَكَ رَبُّكَ مَقَامًا مَّحْمُودًا
يعني مش رمضان بس.. وكذلك قال سبحانه وتعالي:
إِنَّ رَبَّكَ يَعْلَمُ أَنَّكَ تَقُومُ أَدْنَىٰ مِن ثُلُثَىِ ٱلَّيْلِ وَنِصْفَهُۥ وَثُلُثَهُۥ وَطَآئِفَةٌ مِّنَ ٱلَّذِينَ مَعَكَ

وقال سبحانه وتعالي عن صفات المؤمنين:
كَانُوا۟ قَلِيلًا مِّنَ ٱلَّيْلِ مَا يَهْجَعُونَ
يعني العلاقة دي مش مرتبطة بشهر واحد.
التراويح فرصة…
والأصل إن يكون لك نصيب من الليل…
حتى لو ركعتين..
حتى لو في بيتك.
حتى لو من غير ما حد يشوفك..
المهم تخلي التراويح تعودك بعد كده علي قيام الليل علي قد ما تقدر..
قولي بقي.. صليت التراويح ولا لسه؟

د.محمد سلطان
(بين زينة ونور) المقال 4
2/2026

حتختم القران رمضان السنة دي كام ختمة ؟كل سنة في رمضان.. نسمع السؤال: ختمت القران كام مرة؟ونبدأ نخط هدف الختمة هو الأساس....
23/02/2026

حتختم القران رمضان السنة دي كام ختمة ؟
كل سنة في رمضان.. نسمع السؤال: ختمت القران كام مرة؟
ونبدأ نخط هدف الختمة هو الأساس.. عشان نختمه مرة واثنين وثلاثة..
طبعا ده لإن رمضان هو شهر القران.. ولكن خليني اسالك سؤال..
هي علاقتنا بالقران فقط في رمضان بالقراءة؟
ولا عشان نتدبر ونفهم اياته؟
انا مع فكرة ان القران الكريم مش موجود عشان يتختم في رمضان ختمة (يعني كل يوم جزء) فيه ناس بعد رمضان بتنسي تقراه باقي السنة وكإنها عملت اللي عليها وخلاص.. وفيه اللي بيحافظ علي قراءة القران (كورد يومي) ودي حاجة جميلة جدا.. وفيه اللي نفسه يحفظ القران كله.. برده حاجه جميلة.. لكن القران ولا هو للحفظ فقط ولا للقراءة السريعة فقط ولا للتبرك او القراءة في المناسبات في افتتاح او عزاء فقط.. القران للتدبر.. ربنا سبحانه وتعالي يقول:
(أَفَلَا يَتَدَبَّرُونَ ٱلْقُرْءَانَ وَلَوْ كَانَ مِنْ عِندِ غَيْرِ ٱللَّهِ لَوَجَدُوا۟ فِيهِ ٱخْتِلَٰفًا كَثِيرًا(
كذلك قال تعالي:
(أَفَلَا يَتَدَبَّرُونَ ٱلْقُرْءَانَ أَمْ عَلَىٰ قُلُوبٍ أَقْفَالُهَآ)
التدبر معناه ان الآيه توقفك.. تهزك.. تخليك تفكر.. تربط الآيات ببعض.. تشوف كلام ربنا وتفهم الحكمة منه.. فيه ناس ممكن تقرا جزء كامل ومفيش حاجه تتحرك جواها لان الهدف من القراءة نفسه عندهم اختلف واصبح الهدف السبق وبس.. فيه كلمات بتعدي عليهم محتاجه التوقف عندها شوية، زي ما فيه اسئلة بتقف معاك وانت بتقرأ فبتحاول تتخليها في دماغك شوية.. ممكن آيه واحده تغير طريقة تفكير وحياة واحد للأبد.. مش بقولك متقراش ولا تختم بس بقولك فهمت ايه؟ طبقت ايه؟ ولو طلعت مش حقول بسورة انت متدبرها حقولك بآيه واحدة ممكن تسيب فيك اثركبير..
الله سبحانه وتعالي بيقول لنبينا الكريم:
(إِنَّا سَنُلْقِى عَلَيْكَ قَوْلًا ثَقِيلًا)
محتاج تأمل وتدبر.. ومتنساش ربنا سحبناه وتعالي بيقول:
(لَوْ أَنزَلْنَا هَٰذَا ٱلْقُرْءَانَ عَلَىٰ جَبَلٍ لَّرَأَيْتَهُۥ خَٰشِعًا مُّتَصَدِّعًا مِّنْ خَشْيَةِ ٱللَّهِ وَتِلْكَ ٱلْأَمْثَٰلُ نَضْرِبُهَا لِلنَّاسِ لَعَلَّهُمْ يَتَفَكَّرُونَ)
اقرأ وتدبر واعمل.. لكن برده مش كلامي معناه انك تهجر القران وتقول انه محتاج تدبر وخلاص.. لا اقرأه.. لكن توقف احيانا عشان تتدبر وتتامل في كلام الله.. اقرا واختم وكل حاجه لكن اقرا الايات بقلبك ومتحطش الهدف انه سباق وحتخلصه.. بل ان هو غاية.. قولي بقي ناوي تختمه كام مرة السنة دي؟

اتسحرت ايه امبارح ؟!متتسرعش في الاجابة انا حاخدك لأبعد من طبق الفول اياه بتاع السحور..مبدئيا انت عارف اننا بنتسحر عشان ا...
21/02/2026

اتسحرت ايه امبارح ؟!
متتسرعش في الاجابة انا حاخدك لأبعد من طبق الفول اياه بتاع السحور..
مبدئيا انت عارف اننا بنتسحر عشان اللي حيجرالنا في الصيام وعشان نستحمل نتايجه.. يعني انت بيبقي عندك استعداد للصيام.. استعداد انك حتجوع.. وده مش لمجرد الصيام وبس..! ده عشان كل حاجة في حياتنا.. لازم نتزود لكل حاجه مكمن تقابلنا.. ولازم نبقي دايما مستعدين اننا حنلاقي الجوع كتير.. مش بس أكل.. جوع نجاح او حب او قرار او حلم او استقرار.. او اي حاجه تانية..
وهنا نرجع لفكرة الحاجة اللي بيتكلموا عنها بتوع الاقتصاد: الحاجة للي دايما متجددة.. ومستمرة ومتنوعة… ماحدش يقدر يقول له (انا تمام كده وخلاص شبعت!)… كل يوم فيه طلب جديد، كل يوم فيه فرصة جديدة…
كل حاجة حوالينا بتجر بسرعة في عصر (التيك اواي والتيك توك!)… عاوزين كل حاجة حالا.. جوعنا: ناكل أي حاجة من الشارع، زهقنا: ننزل ع القهوة او الكافيه.. وبعد كده ونشوف رجلينا حتودينا فين.. هو احساس التوهان فيه لذة جميلة بس لو بقي منهج حياة.. يبقي ضياع حضرتك!
السحور بيعلمنا نستعد.. مش بتكلم عن أكل وشرب بس.. زي منت فاهمني
ممكن متكونش عارف حتفطر إيه… بس أكيد عارف إنك حتصوم دلوقتي… عارف عدد ساعات الصيام وعازم النية.. وده في حد ذاته خطة مصغرة لحياة كبيرة بكل ما فيها.. زي الحكومة لما بتقسم ميزانيتها، أو شركة بتخطط لانتاجها، أو حتى أسرة بتحاول توفر لقمة العيش لاولادها..
ربنا سبحانه وتعالي بيقول: (كُلُوا۟ وَٱشْرَبُوا۟ حَتَّىٰ يَتَبَيَّنَ لَكُمُ ٱلْخَيْطُ ٱلْأَبْيَضُ مِنَ ٱلْخَيْطِ ٱلْأَسْوَدِ مِنَ ٱلْفَجْرِ ثُمَّ أَتِمُّوا۟ ٱلصِّيَامَ إِلَى ٱلَّيْلِ)
وقت للأكل ووقت للإمتناع.. (حتي يتبين) يعني يبقي عندك رؤية وبعد كده القرار.. مفيش صيمام عشوائي.. ولا اكل عشوائي حتي.. يا اللي خايف من المستقبل اللي ممكن يكون مظلم وملهوش معالم.. ياللي خايف من بكره ومش عارف هو شكله عامل ازاي.. استعد بكل حاجة من دلوقتي تمتلكها.. علم.. مال.. صحة.. وقت.. دعم اهلك واسرتك.. كل حاجة ممكن تساعدك تكمل يومك وتعديه.. ده سحورك الحقيقي لجوع الحياة)، ولما حتعمل كده حيبان معاك الأمل الابيض بدأ يبان.. واحده واحده حتوصل اللي انت استعديت عشانه وكنت جاهز ليه.. هيظهر قدامك بإذن الله.. والكبير زمان قدامك بقي عادي.. اسألي نفسك اتسحرت ايه امبارح.. وحتتسحر ايه بكره.. وساعة الفطار حتبقي فرحان بجد..!

د. محمد سلطان
(بين زينة ونور) المقال 2
2/2026

هو احنا ليه بنصوم رمضان؟؟غالبا الاطفال بيسألوا السؤال ده للكبار اللي غالبا بيردو عليهم:- عشان نحس بالفقرا او عشان صحتنا ...
19/02/2026

هو احنا ليه بنصوم رمضان؟؟

غالبا الاطفال بيسألوا السؤال ده للكبار اللي غالبا بيردو عليهم:
- عشان نحس بالفقرا او عشان صحتنا او ده فرض علينا وربنا امرنا بكده..
بص .. متنتظرش انني اقولك اجابة مختلفة.. بس تعالي كده نرجع من الاول مع بعض..
لطبيعة الانسان.. واختلافه عن باقي الكائنات..
مش بتكلم عن العقل.. لا بتكلم عن حاجة تانية وهي الغريزة..
عشان الانسان مختلف عن الحيوانات لم بيجي يحقق غرايزة.. بيحقهها في غلاف من الش**ة.. غير اي كائن حي اخر.. فالحيوان مثلا لو جاع بياكل اللي قدامه ومعندهوش الش**ة.. عشان كده تلاقي الحيوانات مثلا ممكن تعيش وتموت وهي بتاكل نفس الأكل.. ولا اعترضت الطيور مثلا علي لون ريشها ولا القط الاسود فاهم لحد دلوقتي هو ليه مش محبوب من كل الناس .! اما الانسان بقي بيحب ياكل اكلات معينة.. مطبخ ايطالي علي شرقي علي غربي والحلو والشرب وغيره.. ويفضل نسبة ملح معينة وصوصات مختلفة.. وقيس ده علي حاجات كتير غير الأكل.. زي اللبس مثلا او الجنس.. وفيه شهوات صارخه من غير غرايز زي حب التملك أوالسلطة وغيرها.. وساعات الش**ة تغلب الغريزة.. الانسان عارف ان التدخين ممكن يموته وبرده بيدخن.. الاكل الدسم بيعلي الكوليسترول ومشاكل القلب وبرده مصمم.. الحلو بيعلي السكر.. بس مفيش احلي منه بالنسبة له ! احنا ساعات بناكل مش عشان جاعنين لا عشان لذة الأكل ! وده طبعا حيودينا لمفهوم تاني وهو (الرمرمة) بس مش مجاله دلوقتي..
معظم الانحرافات البشرية بتبدأ لما تسيطر عليك ش**ة معينة.. تبدأ كفكرة بعد كده تسيطر علي كل حاجة فيك.. اللي بيسرق وبيقتل او بيختلس او بيزني استسلم للش**ة علي حساب عقله.. وعشان متستسلمش بسهولة لشهواتك.. وده في منتهي الصعوبة.. محتاج تدريب جيد واستمرار مش مجرد حاجة حتعملها مرة واحده وانتهت.. وهي ازاي يبقي عندك كنترول control علي شهوتك وده مش حيتحقق الا لما يحصل بينك وبين نفسك.. وعشان تحس بده فلازم متكونش محروم..
لازم تكون عندك الاختيارات والبدائل وتختار تتحكم في شهواتك..
وساعتها حتطلع بمفهوم واحد انك ممكن تحقق غرايزك من خلال انضباطك في شهواتك.. والغريب انك بتلاقي فيها لذة كنت مفتقدها في ايامك العادية.. ويمكن ده لب الحكاية كلها ! وعشان كده ربنا سبحانه وتعالي قال ﴿يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ لَعَلَّكُمْ تَتَّقُونَ﴾ [البقرة: 183]... والتقوي هي تجنب الوقوع في الخطأ.. تجنب النار.. تجنب معصية الله.. وده حيحصل ازاي؟ غير لما تقدر تتحكم في شهواتك.. بالصيام..
الصيام بيخليك اقوي فعليا.. مش مجرد جسديا لا ومعنويا.. يعني ببساطة لو قدرت تقول للاكل وهو قدامك لأ.. يبقي تقدر تقول لأي حاجه تانية لأ.. الدين مش جاي عشان يعذبك او يقتل فيك الش**ة.. لا . هو عشان انت اللي تعرف تسيطر عليها مش هي اللي تسيطر عليك.. بص علي الموضوع من جوا ودور علي النور اللي فيه مش مجرد زينة بنفرح بيها وتنتهي.. يمكن الصيام مش بس جوع قد ما هو استعادة للسيطرة..

بين (زينة ونور) مقال (1)
د. محمد سلطان 2/2026

18/01/2026

بعض الأسئلة يا اعزائي ليس من السهل اجابتها.. ومن الحماقة طرق أبواب لا تعلم ما ورائها.. عندما تجد أن كل شىء علي ما يرام تشعر ان هناك خلل ما.. الأمور عادة لاتسير هكذا!

31/12/2016

كل سنة وحضراتكم جميعا بخير.. وسنة سعيده علي الجميع ان شاء الله

10/12/2016

كل عام وانتم جميعا بخير
بمناسبة المولد النبوي
وباقتراب راس السنة الميلادية

05/12/2016

صباح الخير والعطاء..

01/12/2016

الشتاء يملأ ارجاء الاسكندرية
كل عام وانتم بخير

Address

Alexandria

Website

Alerts

Be the first to know and let us send you an email when د. محمد سلطان - Dr. Mohamed Sultan posts news and promotions. Your email address will not be used for any other purpose, and you can unsubscribe at any time.

Shortcuts

Share