30/09/2026
ليه طفل عنده 5 أو 7 أو حتى 10 سنين ممكن يحتاج جلسات وظائف تنفيذية؟
السؤال ده مهم جدًا…
لأننا أحيانًا بنبدأ نعالج المشكلة وقت ما تظهر في المدرسة،
لكن الوظائف التنفيذية نفسها بتبدأ تتأسس من سنين بدري جدًا.
الطفل في سنواته الأولى مش محتاج «جلسة وظائف تنفيذية»…
هو محتاج حياة يومية فيها تفاعل وروتين وتكرار.
مواعيد نوم منتظمة.
روتين للأكل.
اللعب مع الأم.
المشاركة في حاجات البيت.
إنه يستنى دوره.
إنه يسمع تعليمات بسيطة وينفذها.
إنه يبدأ حاجة ويكملها.
وإن الأم تساعده خطوة بخطوة، بدل ما تعمل كل حاجة مكانه.
كل الخبرات اليومية دي بتدي مخ الطفل فرص يتدرب فيها على:
🧠 الذاكرة العاملة
يفتكر إيه اللي المفروض يعمله.
🛑 التحكم في الاندفاع
يستنى ومايعملش أول حاجة تيجي في دماغه.
🔄 المرونة
يتعامل لما الروتين يتغير أو الخطة ماتمشيش زي ما كان متوقع.
❤️ تنظيم الانفعالات
يتعلم بالتدريج إزاي يتعامل مع إحباطه وغضبه.
📋 التخطيط والتنظيم
يعرف يبدأ منين وإيه الخطوة اللي بعدها.
⏳ الاستمرار وإنهاء المهمة
مايسيبش كل حاجة في النص.
لكن أحيانًا…
بسبب ظروف الحياة،
مرض الأم،
عمل الأم وضغطها،
مشكلات أسرية،
تغييرات متكررة في البيت،
أو غياب الروتين والتفاعل المنتظم…
الفرص اليومية اللي الطفل كان المفروض يتدرب من خلالها ممكن تقل أو تضطرب.
وده مش معناه إن الأم قصرت.
لكن معناه إن الطفل ممكن يكبر وهو عنده خبرة أقل في بعض المهارات اللي محتاجها عشان يدير نفسه.
وبعد كده…
لما يدخل المدرسة،
المطلوب منه بيزيد.
لازم يقعد ويركز.
يفتكر التعليمات.
ينظم أدواته.
يبدأ الواجب.
يكمل المهمة.
ينتقل من نشاط لنشاط.
يسيطر على اندفاعه.
ويتعامل مع الإحباط.
هنا ممكن المشكلة اللي كانت صغيرة ومستخبية في سن سنتين أو 3 سنين…
تبان بوضوح في سن 5 أو 7 أو 10 سنين.
وساعتها نبدأ نقول:
«الطفل محتاج جلسات وظائف تنفيذية.»
لكن الحقيقة إننا مش بنبدأ بناء الوظائف التنفيذية وقت الجلسات…
إحنا بنرجع نقوي مهارات كان المفروض الطفل يتدرب عليها تدريجيًا من خلال الحياة اليومية.
وعشان كده أنا دايمًا بقول:
الوظائف التنفيذية مش بتبدأ في غرفة الجلسة.
الوظائف التنفيذية بتبدأ في البيت.
تبدأ من الروتين.
من العلاقة.
من اللعب.
من المشاركة.
من انتظار الدور.
من إن الطفل يعمل حاجة بنفسه.
ومن إن الأم تساعده… من غير ما تعمل كل حاجة مكانه.
والجلسات مهمة جدًا لما الطفل يكون محتاج دعم متخصص.
لكن الوقاية والتأسيس بيبدأوا قبل المدرسة بسنين.
لأن قوة الوظائف التنفيذية بتنعكس بعد كده على حاجات كتير جدًا:
السلوك ❤️
التعلم 📚
الاستقلالية 🌱
تنظيم الانفعالات
والقدرة على مواجهة متطلبات الحياة.
د. مريم عبد اللطيف
استشاري تعديل السلوك
