14/11/2023
حزن بعد الولادة - اكتئاب حول الولادة- ذهان بعد الولادة
Baby blues - Peripartum depression - postpartum psychosis..........
بعد الولادة أغلب الستات بتحس بشوية حاجات غريبة ومش مفهومة , وغالبا بيكون مصاحب للحاجات دي شعور بالذنب لأن اللي حوالين الست والست نفسها بتقول لنفسها انها المفروض تكون أسعد واحدة في الدنيا لأنها معاها بيبي جميل لكن كل اللي بتكون حاساه انها مرهقة جدا مش بتنام كويس ولا عارفة تاخد بالها من طفلها وبتعيط معظم الوقت , اللي بتمر بيه الستات دة بتمر بيه 80 من كل 100 ست بتخلف , دة بيندرج تحت اسم حزن بعد الولادة -Baby Blue- ، ودي حالة مؤقتة تستمر فترة قصيرة لكن مش بتتداخل مع الأنشطة اليومية ومش بتتطلب عناية طبية.
ودة مصطلح بيستخدم لوصف التغيرات المزاجية البسيطة ومشاعر القلق والحزن والإرهاق اللي بتعاني منها معظم الستات أحيانًا في أول أسبوعين بعد الولادة. فلأن الأطفال يحتاجوا لرعاية على مدار الساعة، فمن الطبيعي أن تشعر الأمهات بالتعب أو الإرهاق في بعض الأحيان.
ايه اللي ممكن يتعمل من الست واللي حواليها؟
انك تعبري عن مشاعرك
ممكن كمان تزوري عيادة طبيب نفسي ومعظم الأمهات بيلاقو أنه من المفيد جدًا الانضمام إلى مجموعة دعم الأمهات الجدد.
النوم، والراحة، وتلقي المساعدة في الاهتمام بالطفل،
والتواصل الجيد مع زوج داعم، هي الأساسيات في فترة التعافي لجميع الأمهات الجدد.
طيب إذا كانت التغيرات المزاجية ومشاعر القلق دي مستمرة لمدة أكتر من أسبوعين ومعاها أعراض تانية زي مزاج سيء بشكل مستمر، دة يبقا اسمه اكتئاب ما بعد الولادة وأوقات كمان بيظهر بعد الشهر السادس من الحمل فبيكون اسمه اكتئاب حول الولادة -Peripartum Depression- وبيظهر في صورة زي ظهور أفكار وسواسية أو أفعال قهرية , الانعزال عن الأهل والأصدقاء, التفكير في الموت أو الانتحار, زيادة الحساسية للضوضاء أو اللمس, تغيرات في الشهية: نقص الشهية أو إفراط في الأكل, مشاكل في النوم غير مرتبطة باحتياجات الطفل, وجود أفكار ملحة ومتكررة عن إيذاء النفس أو إيذاء الطفل ودي حاجة شائعة بمعنى انه واحدة من كل 7 ستات بتصاب بيها بعد الولادة حتى لو مفيش أي تاريخ مرضي لمرض نفسي قبل كدة ..
في حاجة كمان ممكن تيجي بعد الولادة اسمها ذهان بعد الولادة -Postpartum Psychosis-, دة بيكون في شكل الأفكار أو المعتقدات غير العقلانية أو الوهمية،واللي بتشمل معتقدات أو أفكار غير منطقية عن الطفل زي الهلوسة ، كرؤية أشياء أو سماع أصوات غير موجودة أو معتقدات وشكوك غريبة عن الطفل لا يمكن تغييرها من خلال المناقشة ..
ملاحظة التغييرات في فترة حول الولادة وبعد الولادة مهمة جدا ومسئولية مشتركة بين الست واللي حواليها المراعين ليها
فترة الحمل والولادة كلها تغييرات جسيمة سواء عالمستوى الجسدي أو المستوى النفسي
ربنا يعين كل الستات ويساعدهم ويخفف عنهم , ويعين كل ست على مشقة الرحلة دي ..
د/ آثار يحيى الحضري
مدرس م النساء والتوليد بكلية الطب والمستشفيات الجامعية
للحجز والاستفسار
مجمع سيدرا الطبي بجمصه ت / 01060618085
مستشفي العاصمة كير دمياط الجديدة ت / 01555626562
