05/10/2016
عزيزي شاب الجامعة, ممكن تسمع الكلمتين دول وتحطهم حلقة في ودنك.. بلاش ترتبط وانت في الكلية ودا لسبب انك بتعيش احسن أيام حياتك وهي اوائل فترة الشباب.. الارتباط هيخسرك حاجات مهمة جداً:
1- الحرية المطلقة, الارتباط هيقيدك بشخص واحد, بتعامل معين مع الناس, بوقت معين ملزوم بيه كل يوم, بتعامل مع ناس معينة,.....
2- العشوائية في القرارات, الفترة دي في حياتك احلى حاجة فيها العشوائية, يلا بينا نروح كذا؟ يلا.. يلا بينا نسافر؟ يلا, يلا نقعد باليل في كذا, يلا... صدقني اوسخ حاجة بقى لما متعملش كل دا عشان عندك التزام بشخص او بتبقى في نص ما انت بتعمل الحاجة دي وقومت سبت الناس اللي معاهم وبتتكلم في الموبايل.
3- النكد والغم ودا مش محتاج اتكلم عنه, انت سمعت عنه كتير يعني.
4- أحساس الخوف ان الشخص اللي انت معاه يسيبك, الاحساس دا هيبوظلك اي لحظة حلوة انت بتعيشها اساساً.. وهتلاقي نفسك كل يوم والتاني بتقولها انا خايف تسبيني, وهي تقولك لا مش هسيبك, وهتسيبك اشطة يعني.
5- تحمل المسؤولية بدري اوي وهتلاقي نفسك بتقدم تنازلات كتير.
كل دا في سبيل انك تعيش شوية لحظات مراهقة, بحبك ومقدرش استغنى عنك ومن غير اي فوايد هتعود عليك وغالبأً بعد فترة هتزهق من الكلام دا ومش هتشوف الا المشاكل والقرف.
6- احساسك انك مش عايش لنفسك, انت بتحاول تسعد حد دايماً.. صدقني الاحساس الاعظم انك تسعد نفسك (وفكك من كلام الكتب بتاع انا ببقى مبسوط لما اشوفك مبسوطة وجو المحن دا, هتزهق منه بعد فترة)
الجواز والارتباط ليه وقته, متستعجلوش وتبوظ بيه احلى ايام حياتك. عيش لنفسك. عشان غالباً انت هتخسر احلى لحظات حياتك بال 6 مشاكل دي عشان شخص, وفي الاخر بردو مش هتكمل معاه يعني خسرت كل حاجة, في 99% من الحالات يا صديقي.
