30/04/2026
عارف أصل كلمة تبات ونبات ؟
(بوست طويل شوية)
النبات سهلة بس ايه هو التبات ؟
اصل الكلمة جاى من تحريف للكلمة العربية الفصحى "ثبات". والمقصود بها هنا هو الاستقرار، والهدوء، وأن "يثبت" البيت ولا ينهار أمام عواصف المشاكل الحياتية
بينما نبات: ترمز إلى النمو والزيادة. في الوعي الشعبي القديم، كان النبات هو رمز الحياة والخير والرزق الوفير الذي يخرج من الأرض.
الرمزية التاريخية (الأرض والخصوبة)
ارتبطت هذه المقولة قديماً بالحياة الزراعية، فالسعادة بالنسبة للإنسان كانت تتمثل في أمرين
1. أرض ثابتة (تبات): لا تجرفها السيول ولا تضيع ملكيتها.
2. زرع أخضر (نبات): ينمو ويزدهر ليطعم أهل البيت. وعندما نطبق هذا على الزواج، تصبح الدعوة هي أن يكون البيت مستقراً (كالبيت المبني على أساس ثابت) ومثمراً بـ الذرية الصالحة (كالنبات الذي يطرح ثماراً).
طيب ايه علاقة ده بموضوعنا ؟
في المقال السابق عن فكرة امتداد سن المعاش و بدون الدخول في نقاش طويل هل سببه طول أعمار البشر و لا إن الناس لازم تشتغل اكثر لأن أقساط المعاشات الجديدة لم تعد تكفي
الحقيقة التي لا تقبل الجدل هو إن البشر بقوا يشتغلوا لعمر أطول أكيد و مضطرين
أكبر مشكلة في الحقيقة دي هي أننا كلنا اتعلمنا حاجات كثير في بدايات عمرنا اللي هو من سن ٤ سنين حتى سن ٢١ سنة وكنا فاكرين ان زي ابائنا وأجدادنا و أجدادهم ده كفاية !!
كنا تحت وهم إن المهارات والخبرات اللي خدناها و اتحفرت جوانا حتساعدنا نعيش في تبات ونبات
بس صحينا علي الواقع المر ، إن (تبات) ما بقاش ثابت زي ما افتكرنا !!!
فكرة الثبات اتضربت في مقتل لما معدلات التغيير بقت تفوق ما نستطيع اللحاق به
وهنا بدأ يظهر مفهوم جديد ومهم ، هو اننا محتاجين نتعلم بأستمرار و نتعلم حاجات جديدة بس القضية طلعت اصعب من كده
التعلم بيحتاج ذاكرة و المخ قذراته على التذكر محدودة جداً (فاكر فيلم اللمبي ٨ جيجا؟) أهو مخنا عايز كل شوية تركب له فلاشة زي اللمبي
وطبعاً بما ان لسه ما وصلناش للمرحلة دي علمياً ، فالحل الوحيد المتاح هو اعادة استخدام الذاكرة الموجودة بالفعل !
طيب حلو جداً ، الموضوع بسيط خالص ctrl+alt+del و اتفرمت يامعلم !!
لا حضرتك ماكانش حد غلب ، علم الأعصاب أو ما نسميه Neuroscience بيقول لك اللي انت عايز تعمله ده اسمه مسح أو نبذ التعلم القديم Unlearning وده مش سهل خالص زي كونترول الت ديليت يا معلم في الواقع ده اصعب من انك تتعلم الحاجة على الأبيض او الجديد خالص
علشان نفهم ليه مش سهل معلش لازم نغوص و ندخل شوية في علم الأعصاب.
مبدئياً كده نسأل ، يعني ايه (نتعلم) في المخ ؟ ايه اللي بيحصل فيزيائيا يعني ؟
الحقيقة العملية معقدة شويتين ، التعلم في المخ يعني تربيط اعصاب ببعض ، خلق مسارات عصبية بين كذا عصب و التاني أو بنسميه اتصال عصبي (نيورال كونيكشن) وده معناه ان بييجي عصب بنهاياته الطرفية يشبك في الأطراف العصبية لعصب تاني ويبتدي يتكون بينهم ترابط عصبي ، اول مرة حضرتك بتتعلم اي حاجة زي جدول الضرب او مبدأ بقاء الطاقة مثلاً ، بتتكون التشبيكات العصبية دي ، وكل ما المعلومة تتعرض قدامك او تسمعها تاني ، الأتصال بيبقى اقوى و بيزيد ، مع قوة الأتصال بتبقى اتعلمت خلاص ، مش بس كده ، ده كمان الجسم علشان بخللي الأتصال ده مثالي بيعزل الأتصال ده بمادة اسمها المايلين ، ممكن تتخيلها كده زي شريط اللحام في اسلاك الكهرباء اللي بنعزل به مواضع اتصال الأسلاك
المايلين ده ماده دهنية بتمنع تسريب الكهرباء فعلياً ، و منع التسرب بيحول الوصلة لأنها تكون ذات مقاومة اقل و الناس اللي فاكرة قانون اوم ( يعني وصلاته جامدة في دماغهم) اكيد فاكرين معني القانون و هو ان التيار الكهربائي دايماً بيفضل يمشي أكثر في المقاومة الأقل لأن ده المسار اللي بيحتاج اقل جهد ممكن !!! جسمك عايزك دايماً تستخدم الوصلة دي لأنها بتكلفة طاقة اقل و لما بيزيد النوع ده من الوصلات في نشاط معين بتتكون في مخنا حاجة اسمها العقد القاعدية !!
العقد دي هي المسئولة عن كل ما هو روتيني يعني الحاجات اللي متجذرة و بنعملها تلقائياً بدون تفكير كثير ، الجزء ده من المخ هو اللي مسئول عن كل العمليات المتخزنة كبرامج جاهزة ، كمثال مثلاً السواقة ، وانت بتسوق العربية في البداية بتبقى مركز قوي في الطريق و الفتيس و البنزين و عمال تبص في المرايات وحواليك ، بس بعد مدة ، لما مخك بينقل السواقة من خانة (التعلم) لخانة ( الخبرة) فده معناها ان عملية السواقة كلها بقت في العقد القاعدية و بقت تتم بصورة ميكانيكية تلقائية ، فتلاقي نفسك بتكلم اللي جنبك و بتأكل ساندوتش و بتدي كلاكس و تشتم سواق الميكروباص اللي كسر عليك في نفس ذات اللحظة و انت لسه بتسوق عادي ، فيزيائياً ده معناه ان الأعصاب المسئولة عن عملية السواقة في مخك بقت متغلفة كويس قوي بالمايلين و معزولة تماما وما ما بتهربش كهرباء
المايلين مش بس بيعزل الوصلات ، ده بيمنع تكوين وصلات جديدة جانبية في نفس المنطقة ، يعني كأنه بيمنعك بالعافية تتعلم حاجات جديدة وده تفسير ليه لغة الأم بتفضل في دماغ البشر و المهارات اللغوية هي اخر حاجة ممكن تروح من مريض الزهايمر في المراحل الأخيرة ، المخ بيحمي بالميلانين اهم مهاراتك الأساسية للتواصل
طيب السؤال بقى ايه علاقة ده بفكرة الغاء التعلم القديم و تعلم حاجات جديدة ؟
الفكرة ببساطة هو ان الغاء الخبرات السابقة دي مش مجرد قرار ارادي بتاخده بمزاجك حضرتك
جسمنا مصمم أنه دايماً يحفظ الطاقة و ده سبب وجود العقد القاعدية و المايلين و الليلة دي كلها ، علشان الأعمال الروتينية جداً زي السواقة و الكتابة مثلاً ما تستهلكش طاقة كثير ونوفر طاقتنا للحاجات المهمة (ايوه التفكير بيستهلك طاقة محترمة جداً من جسمنا حضرتك ، فلما حد يقولك انت حتتعب لو فكرت ، قول له ايوه التفكير متعب)
فنتخيل بقى ان مثلاً بدل ما بنكتب بالقلم ، عايزين نتعلم نكتب على الكيبورد !! اوبا كده دي مهارة جديدة يا معلم
في الواقع ده واحد من الأسباب الرئيسية اللي خلت اجدادنا اللي شافوا الكمبيوتر و عاصروه بس وهما في اعمار كبيرة ما يرضوش يتعلموه !! هما متعودين يكتبوا بالقلم (نفس فكرة الدكتور اللي كان عايزنا نستخدم المسطرة الحاسبة بدل الآلة الحاسبة)
كلمة (متعودين) دي خلاص فهمنا معناها ، يعني مخهم بقى متبرمج يعملها كده
المشكلة انك حتى لما بتقرر تتعلم مهارة جديدة ، مخك بيجبرك ترجع للقديم لأنه اقل في الطاقة ، رغم انه مش اسهل ولا احسن و لا اعلى كفاءة ، لكن المخ ما بيفهمش غير لغة الطاقة و عايز يوفر (عارف كلمة اشتري دماغك ؟ ) هو ده بالضبط اللي بيحصل ، مخك بيقاوم التعلم الجديد و يرجعك للقديم مش علشان القديم احسن لكنه اسهل له ، فهنا ده مش مجرد قرار حضرتك بتاخده يالا اتعلم جديد واطبق جديد ، ده انت بتقاوم قوة جبارة لا ارادية اصلاً شغالة جوه مخك بتحاول ترجعك للقديم !!!
عايز مثال قوي ، شايف الكيبورد بتاعة الكمبيوتر ؟ ما عمركش سألت نفسك هي ليه الحروف مرصوصة كده ؟ يعني ايه الحكمة من اني احط التسلسل ده QWERTY ليه الحروف دي جنب بعض في الكيبورد رغم انها بعيدة خالص عن بعض في التسلسل الطبيعي للأبجدية ؟ ليه ما عملنهاش ABCDEF عادي يعني ؟
الحقيقة الكيبورد دي مش بتاعت الكمبيوتر اصلاً ، الكيبورد دي ورثناها حرفياً من كيبورد الألة الكاتبة و دي للي ماشافوهاش من الجيل الجديد كانت الة ميكانيكية تماماً ، عبارة عن مجموعة شواكيش ، كل شاكوش عليه حرف مطبوع من الأبجدية ، ومرتبط بزرار ميكانيكي ، تدوس عليه فيطلع الشاكوش يخبط على شريط متحبر تحتيه ورقة ، فيطبع الحرف ، حتلاقي فيديوهات في يوتيوب بتشرحها
اللي يهمنا هنا ان زمان اول آلات كاتبة اتعملت فعلاً بالتسلسل الطبيعي اللي هو ABCDEF لكن بسبب السرعة الرهيبة اللي الكتبة وصلوا لها في الطباعة لدرجة كان في ناس بتكتب ٦٠ و ٧٠ كلمة في الدقية ، يعني ٥،٦ حروف كل ثانية ، فكانت من السرعة الشواكيش بتخبط في بعض وبتتكسر أو تهنج الماكينة
المهندسين قرروا يعملوا الكيبورد ال QWERTY دي مخصوص علشان يبطئوا الناس !! تخيل !!
من كثر ما وصلاتهم اتحط عليها ميلانين ، بقوا في منتهى السرعة فعملوا لهم كيبورد ابطأ !!
عملوها قبل ما البشر يبقوا متبرمجين عليها كثير فلحقوهم قبل ما لعبة العقد العقائدية تدوسهم
طيب حلو ، جه بقى الكمبيوتر وما بقاش في شواكيش يامعلم و نكتب براحتنا بقى و نرجع للكيبورد العادية و الناس تبقى اسرع حلو ؟
لا مش حلو ، كان وقتها بقى عندنا اجيال من البشر بقالهم ٣٠ و٤٠ سنة متعلمين على QWERTY مخهم بقى متوصل كده !! واتعلموا برضه يكتبوا بسرعة عليها ، فنعمل ايه ؟
بالضبط ، نخليها نفس الكيبورد !! وعايز اقول لك ان البشرية لم تتوقف عن محاولة اختراع كيبورد حديثة و استخدام كل اساليب الأورجاميك ديزاين و افضل تحاليل الهيومان موفيمنت ميكانيك علشان تطلع كيبورد احسن واكثر اعتمادية ومايكروسوفت حاولت تعمل واحدة كانت تحفة حقيقي بس على مين يا بابا كلها فشلت فشل ذريع و لسه بنستخدم ال QWERTY غالباً !! المايلين كسب لدرجة اننا اضطرينا نبطأ الأجهزة !! شفت صعوبة نبذ التعلم وصلت لفين ؟
لما بتحاول تتعلم مهارة جديدة ده معناه بالضبط كأنك عايز تسفلت طريق جديد جوه مخك بس المشكلة ان في طريق قديم و المخ متعود عليه فدايماً حيجرك للقديم !!
او كأنك عملت قناية مياه في الجنينة و بلطتها بالأسمنت علشان المياه تجري بسرعة ، بس فجأة غيرت رأيك و عايز القناية دي تتهد و يطلع فيها نباتات جديدة برضه
هي دي ببساطة صعوبة و مشكلة الغاء العلوم (والعادات) القديمة اللي مش اساسية و بقينا مش محتاجينها و تعلم حاجات جديدة اللي هي اكبر مشاكلنا في مسارنا المهني !!
لو وصلت لغاية هنا وعندك المشكلة دي وعايز تعرف ازاي تعالجها و ازاي تتعلم بسرعة و تتعلم باستمرار ، ممكن تشترك معايا في ورش العمل المخصصة لموضوع التعلم في زمن المهارات الجديدة كل يوم ، ابعت لي خاص وقول في الرسالة تعليم مستمر
نقلا عن الاستاذ Tamer Elbana
