02/03/2023
( ملحقتش )
تخيل لو قاعد بتتفرج علي فيديو لذكرياتك من وانت صغير . . .
وفجأه بعد مالفيديو بيخلص بتلاقي . . 🤔.......................................................
في لحظة صفا مع نفسي قررت اتفرج علي فيديوهات وصور لذكرياتي . .
بعد يوم طويل وشاق . . . وطفيت النور وريحت جسمي علي السرير . . .
اول حاجه اشتغلت قدامي . . اغنية الراديو الجميله ( بالسلامة ياحبيبي بالسلامة . . ) اللي اول مبسمعها بعرف اني اتأخرت عن المدرسة . . .
اصلي بنام متاخر . . مش علشان بذاكر . . لا . . . علشان برنامج اخرتنا لك . . . . اللي بقعد ابكي علشان اشوفهم كل يوم . . . مع ان امي كانت دايما بتشجعني . .
علشان اطلع الاول علي سنة روضه . . . . اللي هي . . . . ( كي جي تو ) . . . بلغة دلوقتي . .
ذي ما كل قرايبي اتكرموا في الطابور .
ولما قررت اذاكر واصحي بدري . . .علشان ابقي شاطر . . ملحقتش . . علشان فجأه لقيت ان في مادة قفلتني في سنه رابعه كانت ممله . . قفلتني من الدنيا هي والمدرس الغتت بتاعها . . بس كنت بعشق مادة الحساب . .
اللي هي . .
( الماث ) . . بلغة دلوقتي . . . بس امي قالتلي ان مفيش اوبشن قدامي غير اني اذاكر كل المواد علشان اطلع عبقري في الحساب . . . بس مسمعتش كلامها . . . . لكن كالعاده . . . في لحظة تأنيب ضمير مني . . . قررت اني اذاكر . . بس ملحقتش . . علشان فجأه لقيت صاحبي اقنعني اننا نفلسع حصة الفلسفه بتاعت المدرس اللي كل همه
ال ( 5 جنيه ) اللي هي . . .
( 200 جنيه تقريبا ) بلغة دلوقتي . . ونروح نعمل شرايط الكوكتيل . . من اخو صاحبنا . . اللي فاتح كشك ورا المدرسه . .
وبعد مبدأت اشبع من الاغاني وأمل منها . . بسبب الهد بتاع الكاست . . اللي كان دايما بيسف الشرايط . . .
لقيت ابويا زعلان مني . . . وقالي انت لو مشوفتش مصلحتك دلوقتي مش هتعرف تبني بيت واسره بكره وبعده . . . اسرة ايه وبيت ايه دانا امبارح كنت باخد منك ياحاج 50 قرش . . تقولي اسره ؟ . . . كان راجل مبالغ اوي
اللي هي . . . . ( مأفور) بلغة دلوقتي . . . بس بصراحه . . معاه حق . . . لان اكتشفت ان كل اصحابي بيذاكروا من ورايا والموضوع بتاع المستقبل ده شكله صح . . . واول مقولت اذاكر . . ملحقتش . . علشان فجأه لقيت نفسي قدام طوابع التنسيق . . ومجموعي مش جايب غير كلية تجارة . . مع اني عمري مكان نفسي ادخل تجاره . . .
انا كان نفسي ادخل فنون جميله . . . لاني بحب الرسم . . وعمري مفكرت ارسم . . بدأت ادرك بعد ماتافجأت بنتايج صحابي . . اللي يعين كانوا ليل نهار بيعيطوا انهم مش مذاكرين . . . . ان البقاء للاقوي . .
وعمر مصحابك هيفيدوك . . . . . . طيب رجعوني اذاكر يوم . . . .
الكلية ايا ان كانت ايه . . . ممكن ابقي من خلالها اللي نفسي فيه . . .وكمان ممكن ارسم . . عادي . . . .
بس ملحقتش . . علشان فجأه لقيت . . . مغريات الحياة الجامعية كانت شديده شويتين . .
والموبيلات ال ( 6600 ) اللي هي ( اي فون اكس مكس تاكس ) بلغة دلوقتي . . كانت حلمي . . ومسكتها في ايدي هي الحاجه اللي هتخليني الواد المخلص . . . ابويا كان بيحاول يقنعني ان كل ده اي كلام . . . بس شكله بيتكلم صح .
اول مقررت . . اني اذاكر علشان اطلع حاجه كويسه . . في الكلية اللي مش عجباني .
ملحقتش . . علشان فجأه لقيت. . نفسي قدام العسكري بتاع الفرز . .
يلا ياحبيبي علشان هتلبس جيش . . . اوممكن لا . . . طيب رجعوني اذاكر . . . مفيش وقت . .
طيب خلاص هاخد كورسات . . واذاكر واحسن تقديري بعد قصة الجيش دي . . .
بس ملحقتش . . علشان فجأه لقيت . . . نفسي مع الصنايعي اللي بيشطب الشقه مستنيني تحت البيت . . .
ياعم صنايعي ايه . هتجوز خلاص ؟ . . . طيب نفسي اعمل حوض سمك في الشقه . .
شقتي بقي واعمل اللي عاوزه . . . بس . . ملحقتش . . علشان فجأه لقيت نفسي . . .
بدفع فلوس الولادة والحضانة . . . . اصل الواد جاتله الصفرا . . . صفرا ايه وواد ايه . . . دانا لسه من دقيقه امي كانت بتربطلي رباط الجزمه . . . .
طيب الحمد لله دفعت الفلوس وطلع بالسلامه . . . . ويلا نعمله سبوع حلو. . ده اول فرحتي اللي انا مش مستوعبها . . بس . . ملحقتش . . علشان فجأه لقيت نفسي . . . بسدد رسوم المدرسه بتاعته . . . .
طيب فعلا والله دلوقتي بالسلامه ياحبيبي . . .
دلقوتي لازم اعوض كل حاجه فاتت علشان اربيه ويطلع الاول علي مدرسته . . . وكل الاستهتار اللي شوفته في حياتي هتلاشاه . . . ومش هطبطب عليه ذي ابويا معمل معايا . . . بس . . . الاستاذ سعد كان مطلع عيني في دفتر الحضور والانصراف . . ويدوب كنت مسحول في الشغل ( وصحيان 7 الصبح ورجوعي 3 العصر وهدة حيلي والارهاق الزهني بتاع الموظفين . . مخلونيش اعمل حاجه . . بس في لحظة قوة عندي وبعد ماتفرجت علي كام فيديو من بتوع التنمية البشرية . . . . . قولت يلا افتش في موهبتي بتاعت زمان . . . بعد مشوفت شغل الاون لاين بيجيب فلوس لناس كتير موهوبه . . وانا يدوب محتاج ارسم لاني موهوب في الرسم . . . .
بس ملحقتش . . علشان فجأه لقيت. نفسي . بتخانق مع الواد . . لما قرر انه يدخل ادبي . . . . يابني طيب انا نفسي اشوفك دكتور . . . .
الحياه بتمشي بسرعة وانا مش بلحق اعمل اي حاجه . . لدرجة ان البواب مره جالي البيت . . .
شاب جميل رايح يتجوز عاوزني اديله اي حاجه زياده . . . بس انا بصراحه مفيش دماغ . .
بس اول منزلت من الاسانسير بتاع العماره . . لقيت ابنه دلوقتي واقفلي تحت عاوز مني اي حاجه لله . .
علشان رايح يتجوز . . . يابني ده ابوك لسه وانا فوق كان عاوز يتجوز . . ايه الفيديو الغريب ده وازاي الحياه بتجري كده ؟ . .
طيب الحق صلاة العشا ده العمر عمال يجري . . .
بس اصحابي الا وبالدين نقعد علي القهوه زي زمان . . . نرجع الشباب بقي ونعيش حياتنا . . .
بس للاسف حفيدي عيد ملاده النهارده ومش هقدر اروح اقعد معاهم . . . . بس برضه قصرت مع كل اللي حوليا . .
حتي مع ربنا ؟ . . طيبب خلاص انا دلوقتي كبرت وحفيدي فرحه كان امبارح . . .
هروح ابسط كل الناس . . . واقعد مع صحابي اللي مشبعتش منهم . . .
ولا اقولك . . . انا هروح اقرا قران واصلي . . . واروح ارسم . . دانا طول عمري نفسي ارسم . . . بس هرسم دلوقتي ؟
طيب ليه لا ؟ هو في حد هيمنعني ؟ ؟ ؟ بس ملحقتش . . علشان فجأه لقيت. . . الفيديو والصور خلصوا . .
لحظات قلبت عليا المواجع . . ولازم دلوقتي اسيب الفيدوهات دي . . واقوم . . . واعمل كل اللي انا عاوزه . . .
واصلح علاقتي مع ربنا . . . واصلح علاقتي مع الناس . . . .
بس مش عارف صباع رجلي منمل مش حاسس بيه . . . ايه ده ؟
طيب احرك ركبتي ؟ برضه مش راضيه تتحرك . . . ؟
ومال معدتي بردت كده والجو برد ؟ ؟
امسكها طيب اشوفها ؟ ايدي مش مسعداني وخانتني . . .
طيب ابص براسي وعيني . . . عيني باصه علي السقف مش راضيه تتحرك . . . .
انت ياعم ياطيب . . . من اول مجيت فرجتني ليه علي كل ده في دقيقه . . . وطفيت الشاشه ؟
ومش راضي حتي تساعدني علشان اقوم اصلح كل اللي هببته ؟
انا عارف اني خلاص ملحقتش . .
حتي سيبني اتشاهد بقلب مليان . . .
بس برضه ملحقتش . . . .
