29/08/2024
اللغة الفرنسية وأهم مجالاتها....
أنت كطالب ترجمة فرنسي او قسم فرنسي تقدر تشتغل أي باللغة؟
تقدر تشتغل في شركات ترجمة، في الأرشاد السياحي، الكول سنتر، مترجم في المحكمة، في السفارات ممكن تشتغل مترجم او ملحق ثقافي في السفارة او في الأمم المُتحدة ودي بتكون بمرتبات مجزية جدا...
طيب بالنسبة لمجال التدريس ؟
أي حد منكم يقدر يشتغل كمدرس ويدي دروس حتى بعد قرار الوزير لأني المادة لم يتم ألغاؤها ولكن أصبحت لا تُضاف على المجموع ودا طبعا معناه أني اللغة دي زي ما هي ولازم الطلبة تنجح فيها ودي لغة محدش هيعرف يذاكرها وينجح فيها من كام أسبوع أو شهر بل بالعكس هتكون زي الأول علشان بكل بساطة محدش هيهتم بكل المواد في الثانوية العامة ويهمل مادة زي دي ممكن مينجحش فيها تخليه دور تاني حتى لو مجموعه ٩٥ في المية هيكون مضطر أنه يكون مرحلة تالتة بسبب مادة!
اللغة الفرنسية بيتم تدريسها لطلبة الازهر الشعبة الأدبية وكمان طلبة اللغات والمدارس الأنترناشونال والمدارس الفرنسية زي (saint marc, collège de sainte famille "Jésuite", notre dame des apotres etc, )
مرتبات المدارس دي بتكون من ٦ ل ١٠ في بداية التعيين وطبعا غير الدروس فيها وبالنسبة للناس اللي مش حابة التدريس تقدر تشتغل في الكول سنتر بمرتبات من ١٨ ل ٢٧ الف ودي الأوفرز المتاحة في الوقت الحالة.
طيب لو واحد حابب يشتغل من البيت؟
يقدر يشتغل فري لانس وهيكون حر نفسه ويقدر كمان يدي دروس بجانب دا.
اللي حابب أوصلة أني اللغة هي هي مش بتتغير ولا بتتهز بأي قرار.. الخلاصة بتعرف تتكلم كويس هتعرف تشتغل في مكان محترم مش بتعرف طور من ذاتك وهنساعدك في دا ومفيش أي دكتور هيبخل عليك بأي معلومة. تعلمك للغات بيخليك مختلف عن كل أقرانك ومميز عنهم في حاجات كتير.