27/05/2026
🤝A UNED de Lugo reforza a súa alianza coa Deputación Provincial nun momento histórico para o centro universitario
A UNED de Lugo recibiu hoxe a visita institucional da presidenta da Deputación Provincial de Lugo; Carmela López Moreno nun encontro que serviu para compartir os principais avances e proxectos estratéxicos do centro, así como para reforzar a colaboración entre ambas institucións nun momento especialmente relevante para a universidade pública na provincia.
Desde a dirección da UNED de Lugo trasladouse o agradecemento á Deputación polo seu apoio continuado a un proxecto universitario que segue medrando e consolidándose como unha ferramenta esencial de cohesión territorial, igualdade de oportunidades e acceso á educación superior desde calquera punto da provincia.
Durante a visita púxose en valor o récord histórico de matrícula acadado no curso 2025-2026, no que a UNED de Lugo alcanza os 1.245 estudantes, cun incremento do 12,5 % respecto ao curso anterior. Uns datos que, segundo destacou o centro, “confirman a confianza crecente da cidadanía nun modelo universitario flexible, moderno e conectado coa realidade social e territorial de Lugo”.
A reunión permitiu abordar tamén a incorporación do novo Grao en Intelixencia Artificial, unha das grandes novidades académicas da UNED. Desde o centro subliñouse a importancia de poder ofrecer desde Lugo unha formación universitaria vinculada a un dos sectores máis estratéxicos do presente e do futuro, favorecendo a formación de talento dixital sen necesidade de desprazarse a outras cidades.
Neste contexto, a UNED destacou tamén a súa capacidade para adaptar a oferta académica ás novas necesidades sociais, profesionais e tecnolóxicas, mantendo un modelo universitario accesible, flexible e compatible coa vida laboral e familiar.
Outro dos aspectos centrais da visita foi a presentación do impacto social da actividade da UNED de Lugo. O centro acadou un índice SROI de 13,25 euros por cada euro investido, xerando un retorno social superior aos 13,3 millóns de euros. Para a UNED, estes datos “demostran que o investimento en educación pública universitaria ten un impacto directo no desenvolvemento educativo, social, cultural e territorial da provincia”.
