06/10/2026
📽️ Este mércores temos a primeira proxección de ‘Antes de maio’, un documental interactivo sobre as revoltas estudantís do 68!!
➡️ Antes de maio foi marzo. Nese mes, no curso 67/68 máis de mil estudantes protagonizaron un peche pacífico no edificio central da Universidade de Santiago de Compostela. A primavera do 68 tivo en Galicia un preludio, anticipándose ao famoso Maio francés.
➡️ ‘Antes de maio’ é un documental interactivo no que as persoas usuarias poden poñerse na pel dunha estudante de primeiro de carreira para tomar decisións relevantes na súa implicación co movemento estudantil e a súa participación nas protestas. A proxección interactiva permite ao público, votando “en asemblea” (a través dos seus móviles) tomar decisións pola protagonista, ás veces máis banais e outras máis trascendentais. Deste xeito vaise configurando o desenvolvemento da historia e, aínda que os feitos históricos non mudan, si que cambia como e con quen os vivimos. A narrativa implica a ficcionalización dos feitos, pero sempre cunha rigorosa base histórica. Así, o relato móvese entre o xogo e o documental interactivo, implicando diferentes materiais dixitais e a acción da usuaria a través de múltiples plataformas. Entre os obxectivos deste proxecto están achegar á mocidade un episodio histórico pouco coñecido, preservar e divulgar a nosa memoria histórica, crear pontes entre distintas xeracións, normalizar o uso do galego como lingua vehicular en espazos tecnolóxicos e innovadores ou estimular o pensamento crítico.
📆 7 de outubro, ás 11.00 h, na Facultade de Xeografía e Historia
📆 11 de novembro, ás 11.30 h, na Facultade de Ciencias Políticas e Sociais
📆 15 de decembro, ás 20.15 h, na Casa do Saber do campus de Lugo
