12/07/2026
📌 O Colexio da Avogacía de Santiago tramitou no que vai de ano 2026 un total de 2.330 solicitudes de xustiza gratuíta (4.483 no conxunto do ano 2025).
Os 307 profesionais (176 avogadas e 131 avogados) que forman parte da quenda de oficio do colexio celebran hoxe, 12 de xullo, o Día da Xustiza Gratuíta, unha xornada de conmemoración e reivindicación da importancia do servizo, que garante a igualdade no acceso á xustiza para todos os cidadáns.
👉 “A xustiza gratuíta é un servizo público que está operativo as 24 horas do día durante 365 días o ano, polo que quero destacar en primeiro lugar o gran traballo que fan os avogados e avogadas da quenda de oficio e o persoal do Colexio de Avogacía de Santiago”, sostén Francisco Rabuñal, decano dos letrados compostelanos.
“A día de hoxe, é moi necesaria unha nova Lei de Xustiza Gratuíta e incrementar o financiamento que se destina á quenda de oficio; a xustiza gratuíta supón un esforzo moi importante en medios técnicos e humanos e actualmente este gran esforzo faise con moitas limitacións”, engade Rabuñal.
Dentro da xustiza gratuíta, o colexio conta cunha quenda de violencia de xénero, polo que as vítimas están atendidas tamén os 365 días do ano por avogados e avogadas de garda con especialización nesta materia.
👀 A Avogacía de Santiago atende ademais a unha poboación de máis de 270.000 persoas, xa que desde a institución colexial xestiónase a quenda de oficio dos partidos xudiciais de Santiago de Compostela; Arzúa; Negreira; Ordes, e Padrón.
No caso da violencia de xénero, desde xaneiro de 2026, ao crearse o xulgado comarcal especializado en violencia de xénero de Santiago, o colexio atende tamén as solicitudes de xustiza gratuíta dos partidos xudiciais de Ribeira, Muros e Noia.
