16/10/2026
🎓⚖️ O Dereito Penal ante dilemas complexos
A Facultade de Ciencias Xurídicas e do Traballo acolleu esta semana unha conferencia da profesora Katharina Beckemper, catedrática de Dereito Penal da Universidade de Leipzig (Alemaña), no marco das Xornadas de internacionalización da Facultade 2026.
A sesión, titulada «Dilemas dogmáticos do Dereito Penal: o caso do tirano doméstico e a solución do Tribunal Supremo Federal alemán», abordou a resposta penal ante casos de mulleres vítimas de maltrato que causan a morte do seu agresor mentres este está durmido, a partir de supostos analizados pola xurisprudencia alemá.
Trátase dunha cuestión especialmente delicada e complexa, que suscita interrogantes sobre a responsabilidade penal, a proporcionalidade das penas e os límites da resposta xurídica ante situacións de violencia e maltrato.
A presentación da relatora correu a cargo de Javier de Vicente Remesal, catedrático emérito de Dereito Penal da Universidade de Vigo . Na conferencia participaron estudantes de segundo curso do Grao en Dereito e profesoras e profesores da Área de Dereito Penal da Universidade de Vigo.
❤️ A importancia de abordar estes temas na Facultade reside tamén en aprender a analizar a complexidade da realidade desde o rigor xurídico, a reflexión crítica e a sensibilidade humana. A formación en Dereito non consiste unicamente en coñecer as normas, senón tamén en comprender os dilemas que xorden ao aplicalas a situacións extremas, escoitar diferentes perspectivas e examinar as respostas que ofrecen os distintos ordenamentos xurídicos. Crear espazos académicos para esta reflexión é fundamental para formar profesionais capaces de afrontar cuestións difíciles con responsabilidade, sen simplificar realidades que esixen análise e comprensión.
Universität Leipzig
FormaciónXurídica
