10/08/2026
Mootii Adarraa
Sirni ykn caasaan hoggansaa tokko dandeettii, ogummaa, fi gahumsa dhugaa irratti osoo hin taane, adarraa, dilaala dantaa dhuunfaa, fi xaxama yerootiin gaafa kofoo aangoo uffateee ijaaramu, inni "Mootii Adarraa" fi caasaa abdii dhabeessa dha; sababiinsaas adarraan yeroodhaaf nama geggeessuu ykn dawoo ta'uu danda'a malee, bu'uura dhaabbataa fi utubaa jabaa dhaloota ceephoo ta'uu tasumaa hin danda'u. Caasaaleen fi hoggantoonni dandeettii fi naamus-qabeessummaa malee, adarraa fi wal-deeggarsa danta-dhabeeyyiitiin iddoo murtee irra taa'an, saba tajaajiluu, misooma fiduu, fi tasgabbii mirkaneessuu mannaa, xaxama ammayyaa, hanna, fi olola dharaatiin jireenya hawaasummaa kuffisuu irratti bobba'u. Aangoon gahumsa malee, adarraa qofaan dooliif dhihaate akka mana cirracha irratti ijaarameeti; bubbee fi garba dhiitamaa gaafa ka'u salphaatti garagaggaluu fi diigamuu irraa kan hafe utubaa dhaabbataa ta'uu hin danda'u.
Sirni adarraan bulu fi mootiin gahumsa dhabeeyyii adarraa irraa tulluu ijaarratu yoomiyyuu dhugaa uummataa fi madaallii seenaa dura dhaabbachuu hin danda'u; sababiinsaas adarraan sun gaaf tokko kashlabbummaan, fashalaatiin, fi gaaffii haqummaa uummataatiin diigamuun isaa dhimma yeroo qofa waan ta'eef. Uummanni dammaqaan fi haqi lafa jiru gaafa ol-ka'u, caasaan adarraan dhaabbate hundi ni bu'uura dhabama, hattoonni fi garlameewwan adarraa kaniin fayyadamaniis salphina seenaa jala galu. Kanaafuu, ijaarsi diinagdee, hoggansaa, fi hawaasummaa kamuu kan inni waaraa fi jabaa ta'uu danda'u, gaafa gahumsa, ogummaa, amanamummaa, fi tajaajila haqummaa uummataa irratti ijaarame qofa waan ta'eef, "Mootiin Adarraa" fi caasaan gahumsa hin qabne sun dhumarratti diigamuun isaa heera uumamaa fi dhugaa seenaa kan waakkatamuu hin dandeenye dha!
