24/06/2025
Wiirtuu Kiristaanniifi Islaamni bakka tokkotti itti awwaalamu akka jiru beektuu?
*************
Gaazexaa Bariisaa
Baatuu: Baatuun magaalaa jaalalaati kan jedhamu qabatamaan kan mul'atu jaalallisaaniis guyyaa lubbuun jiranii hanga du'aatti kan walhidhe tokkummaa jabaa qabaachuuni jedhu kantiibaan magaalsttii.
Kantiibaa Magaalaa Baatuu Obbo Ahmaddiin Ismaa'eel turtii addatti Gaazexaa Bariisaa waliin waajirasaaniitti har'a taasisaniin asoosamni 'Fiqir Iskamaqaabir' jedhamu Baatuu keessatti qabatamaan kan mul'atudha jedhu.
Akka ibsasaaniitti magaalattiin sabaaf sablammii hedduu hammattee kan jiraachistu yoo ta'u, jaalalli waloosaanii jiraa hanga du'aatti kan cimedha jechuun ibsu.
Isa kanaafimmoo agarsiistuun guddaa bakki awwaalaa hordoftoota amantii hundaa tokko ta'uudha jedhu kantiibichi.
Kiristaanni, Islaamniifi waaqeffataanis yoo miidhame waluma cinaatti awwaalamu kunimmoo agarsiistuu jaalala, waldandahuufi tokkummaa ummataa cimaa ta'uu agarsiisu ta'uu kaasaniiru.
Giddugala hawwata tuuristii kan taate Baatuun nageenyi, jaalalliifi obbolummaansaanii jiraa hanga du'aatti waliin ta'e kun akka hinboorofneef alseerummaarratti waliin dhaabatanii qabsaa'uun dinagdeesaanii cimsaa imala badhaadhinaa eegalame milkeessuuf kutannaan hojjetaa jiraachuu eeraniiru.
Asoosamni Amaariffaa 'Fiqir Iskamqaabir (jaalala hanga du'aatti) Haddiis Alamaayyoon barreesse qabatamaan nubiratti mul'ata kan jedhan kantiibichi tokkummaafi jaalalli cimaa jiraachuun hawaas dinagdeefi siyaasaan waloomanii jiraachuu keessatti bu'uura waan ta'eef kan irraa baratamu ta'uu ibsaniiru.
Waasihun Takileetiin
