18/06/2026
დღეს გაიმართა „სტუდფესტი 2026“-ის დახურვის ღონისძიება, რომელშიც მონაწილეობა მიიღეს: საქართველოს პრემიერ-მინისტრმა ირაკლი კობახიძემ, თბილისის მერმა კახა კალაძემ და განათლების,მეცნიერებისა და ახალგაზრდობის მინისტრმა გივი მიქანაძემ. ფესტივალის ფარგლებში მიმდინარე მრავალფეროვან აქტივობებში 20 000-ზე მეტი სტუდენტი იყო ჩართული. „სტუდფესტი 2026“-მა წელს განსაკუთრებულად ფართო მასშტაბი და მრავალფეროვანი პროგრამა წარმოადგინა, რომელიც კულტურულ, საგანმანათლებლო და სპორტულ ღონისძიებებს აერთიანებდა.
საქართველოს საავიაციო უნივერსიტეტი აქტიურად იყო ჩართული ფესტივალის ფარგლებში დაგეგმილ ღონისძიებებში და ღირსეულად წარმოაჩინა უნივერსიტეტის სტუდენტური საზოგადოება. უნივერსიტეტის წარმომადგენლებმა წარმატებით იასპარეზეს სპორტულ აქტივობებში და დარტსის ტურნირზე მესამე ადგილი მოიპოვეს.
ფესტივალის ერთ-ერთი ყველაზე დასამახსოვრებელი მოვლენა 1 მაისს, ქალაქ რუსთავში გამართული გახსნის ღონისძიება იყო, სადაც საქართველოს საავიაციო უნივერსიტეტის სამმა თვითმფრინავმა საჩვენებელი გადაფრენა შეასრულა და „სტუდფესტი 2026“ ოფიციალურად გახსნა. აღნიშნულმა სანახაობამ დამსწრე საზოგადოების განსაკუთრებული მოწონება და ინტერესი დაიმსახურა.
დღევანდელი დახურვის ღონისძიებით „სტუდფესტი 2026“ წარმატებით დასრულდა. საქართველოს საავიაციო უნივერსიტეტი მომავალშიც მზად არის, აქტიურად ჩაერთოს სტუდენტურ, საგანმანათლებლო, კულტურულ და სპორტულ ინიციატივებში და ღირსეულად მიიღოს მონაწილეობა მომდევნო სტუდფესტებში.
