11/03/2026
თინი ავსაჯანიშვილი, ილიაუნის კურსდამთავრებული
"წლების განმავლობაში ილიაუნისთან შეხება სხვადასხვა როლში მქონია: პირველად - როგორც ბავშვის განვითარების ინსტიტუტის თანამშრომელს; მეორედ - როგორც სტუდენტს, როცა მაგისტრატურაზე ჩავაბარე და შემდეგ დოქტორანტურაზე გავაგრძელე სწავლა; და მესამედ - როცა პრაქტიკული კურსის სუპერვიზია და პროფესორის ასისტირება დავიწყე.
ვერასდროს ვპოულობდი საჭირო დროს ან სიტყვებს მადლიერების გამოსახატად იმ ყველაფრისთვის, რაც ამ უნივერსიტეტმა მომცა. და ალბათ, ახლა საუკეთესო მომენტია...
გარდა იმისა, რომ აქ ვისწავლე და შევიყვარე ჩემი პროფესია, ამ უნივერსიტეტმა მასწავლა კიდევ უფრო ღირებული რამ - ის, რასაც ყველგან და ყველასგან ვერ ისწავლი:
- მასწავლა, რომ უნდა შევინარჩუნო სიმშვიდე და მტკიცედ ვაკეთო ის, რისიც მწამს, მაშინაც კი, როცა გარშემო ყველაფერი ინგრევა;
- რომ უნდა მწყუროდეს ცოდნის მიღება და მუდმივად ვცდილობდე, დავიკმაყოფილო ეს სურვილი;
- მასწავლა, რომ უნდა ავიღო პასუხისმგებლობა და ყოველთვის ვეცადო, ვეძებო გზები, საუკეთესოდ ვაკეთო არჩეული საქმე;
- მაჩვენა, როგორ უნდა ვირწმუნო საკუთარი თავის და ყოველთვის ვცდილობდე გავხდე უკეთესი;
- რომ ცოდნა უნდა გამოვიყენო სხვების დასახმარებლად და მათი კეთილდღეობის გასაუმჯობესებლად;
- მასწავლა, როგორ უნდა ვასწავლო სხვებს და რომ ცოდნის გაზიარება მნიშვნელოვანია;
- დამარწმუნა, რომ გამოვთქვა საკუთარი აზრი მაშინაც კი, როცა ის ნაკლებ პოპულარულია;
- მომცა ცოდნა, რომ გავარჩიო სწორი არასწორისგან, მაგრამ არასდროს მიუთითებია, რა უნდა მეწამა;
- რომ უნდა დავიცვა ღირსება მაშინაც კი, როცა ამას სხვა სიკეთეები ეწირება;
- მასწავლა, რომ უნდა ვიყო კეთილსინდისიერი, პატივი ვცე სხვის შრომას და პირნათლად შევასრულო ჩემი მოვალეობები;
- დამანახა, რომ დიდი საქმეების კეთება მცირე რესურსებითაც შეიძლება;
- მასწავლა განსხვავებული აზრის მოსმენა და მრავალფეროვნების პატივისცემა;
ალბათ, უსასრულოდ შემიძლია გაგრძელება...
ახლა, სრულიად გაუგებარი მოტივით, უნივერსიტეტი განადგურების რისკის წინაშეა. და ვერ ვხვდები, როგორ შეიძლება ვინმეს არ შესტკიოდეს გული წლების განმავლობაში ნაშენები რესურსის, ცოდნის, პოტენციალის ნგრევის ყურებისას.
ყველა ილიაუნელს და მის გულშემატკივარს გამძლეობას, სულის სიმტკიცეს და საკუთარი ღირსების ბოლომდე დაცვას გისურვებთ. ის მაინც არ დაგვრჩება ხინჯად, რომ არ ვეცადეთ..."
#ვიცავთილიაუნის #ილიაუნი #განათლებისრეფორმა #მეცნიერება #სტუდენტურიპროტესტი
