03/02/2026
ისევ გვატყუებს „ჩვენი“ ხელისუფალი
საქართველოში ბოლო პერიოდში ბევრს საუბრობენ თბილისის სახელმწიფო უნივერსიტეტის (TSU) და საქართველოს ტექნიკური უნივერსიტეტის (GTU) გაერთიანებაზე. ოფიციალური განცხადება თითქოს მიზნად ისახავს საერთაშორისო რეიტინგების ამაღლებასა და რეგიონში წამყვან უნივერსიტეტად ქცევას.
გავეცანი მსოფლიო უნივერსიტეტების რამდენიმე ავტორიტეტულ რეიტინგს და მსურს წარმოგიდგინოთ შედეგები ცხრილის სახით. მასში მწვანე ფერით მითითებულია გაერთიანების შემთხვევაში მოსალოდნელი რეიტინგი (რომელიც ხელოვნურმა ინტელექტმა დაანგარიშა).
2025-2026 წლების მონაცემებზე დაყრდნობით შედგენილი ცხრილის მიხედვით, ჩანს, რომ გაერთიანებული უნივერსიტეტი აზერბაიჯანის უმაღლეს სასწავლებლებს მაინც ვერ გადაუსწრებს, თურქეთზე კი საუბარიც ზედმეტია. რეალურად, მხოლოდ სომხეთის უნივერსიტეტებს ვჯობნით და მათთან უპირატესობა გაერთიანების გარეშეც გვაქვს.
სახელმწიფო ამ „პროექტს“, როგორც ყოველთვის, სიცრუით იწყებს, რადგან, როგორც ვხედავთ, რეიტინგების ამაღლება აქ მთავარი მიზანი არ არის. ვფიქრობ, ეს „ქალაქ-ფაკულტეტური“ პროექტის პირველი ეტაპია: საქართველოს ტექნიკურ უნივერსიტეტს შეუერთებენ თბილისის სახელმწიფო უნივერსიტეტს და დააკვირდებიან პროცესების განვითარებას. ამის შემდეგ სხვა უნივერსიტეტებსაც მიადგებიან გასაერთიანებლად, რასაც კადრების „დაცხრილვა“ (შემცირება) მოჰყვება. როგორც თავიდანვე გაცხადდა, სტუდენტების რაოდენობის კლებასთან ერთად შემცირდება დაფინანსებაც, რაც, თავის მხრივ, დღის წესრიგში დააყენებს პროფესორ-მასწავლებელთა დათხოვნის საკითხს. რაც უნივერსიტეტების ავტონომიურობის და მთლიანობის დაირღვევას გამოიწვევს, ეს მათთვის სასურველია ნებისმიერი მანიპულაციის, ფაკულტეტების გადატანა-გადმოტანისა თუ სხვა ცვლილებების განხორციელებას გააადვილებს.
