თბილისის სასულიერო აკადემიის ფსიქოლოგიის ფაკულტეტის კურსდამთავრებულები

22/05/2026

ნინო საძაგლიშვილი
მეცნიერებისა და სულიერი კულტურის დიალოგის სივრცეში

ნინო საძაგლიშვილი თბილისის სასულიერო აკადემიასა და სემინარიასთან არსებული საღვთისმეტყველო ინსტიტუტის ქრისტიანული ფსიქოლოგიის ფაკულტეტის 2011 წლის წარმატებული კურსდამთავრებული გახლავთ.
ნინოს მრავალმხრივი აკადემიური, სამეცნიერო და კულტურულ - საგანმანათლებლო საქმიანობა ნათლად წარმოაჩენს იმ ინტელექტუალურ და სულიერ პოტენციალს, რომელსაც აღნიშნული საგანმანათლებლო სივრცე აყალიბებს.
ფაკულტეტის დასრულების შემდეგ ნინომ საქმიანობა განაგრძო ეკლესიის ისტორიის, საეკლესიო სამართლისა და ასკეტიკის კათედრაზე, სადაც დეკანოზ მაქსიმე ჭანტურიას ხელმძღვანელობით კიდევ უფრო გაიღრმავა კვლევითი და ადმინისტრაციული გამოცდილება. აღნიშნულმა საქმიანობამ მნიშვნელოვანი როლი შეასრულა მისი პროფესიული და აკადემიური ფორმირების პროცესში.
ნინოს შემდგომი სამეცნიერო გზა საერთაშორისო აკადემიურ სივრცეს დაუკავშირდა.
2013 წელს საბერძნეთის საგარეო საქმეთა სამინისტროს სტიპენდიის ფარგლებში ნინო გაემგზავრა ათენში,სადაც კიდევ ერთი საბაკალავრო საფეხური დაასრულა თეოლოგიის მიმართულებით და როგორც წარჩინებულმა სტუდენტმა, სწავლა განაგრძო ამავე უნივეტსიტეტის მაგისტრატურაზე ბიოეთიკისა და ქრისტიანული ეთიკის მიმართულებით.
2023-2024 წლებში ნინომ თეოლოგიის სამაგისტრო პროგრამის დამატებითი საფეხური გაიარა შვეიცარიაში, ჟენევის სახელმწიფო უნივერსიტეტში.
ნინო გახლავთ ათენის სახელმწიფო უნივერსიტეტის მაგისტრი სისტემური თეოლოგიისა და ეთიკის მიმართულებით, ამჟამად კი დოქტორანტი და საბერძნეთის წმინდა სინოდის სტიპენდიანტი.
ნინოს კვლევითი ინტერესები მოიცავს ეკლესიისა და თანამედროვე საზოგადოების დიალოგს, თეოლოგიურ ანთროპოლოგიას, მენტალური ჯანმრთელობის საკითხებსა და დოგმატიკას.
განსაკუთრებით აღსანიშნავია ნინოს მრავალმხრივი შემოქმედებითი და კულტურული ინტერესები. იგი დაინტერესებულია წერით, მხატვრული ლიტერატურით, ესეისტიკითა და პოეზიით, რაც მის აკადემიურ ხედვას განსაკუთრებულ სიღრმეს ანიჭებს. ასევე მნიშვნელოვანია მისი სიყვარული საგუნდო მუსიკისა და გალობისადმი. 2006 წლიდან ნინო გახლდათ გორის ღირსი გიორგი მთაწმინდელის სახელობის გიმნაზიის ტაძრის მგალობელი და გოგონათა ფოლკლორული ანსამბლის „მახარობლები“ წევრი. მუსიკალური და საგუნდო საქმიანობა მისთვის მხოლოდ ესთეტიკური ინტერესის სფეროს არ წარმოადგენდა, არამედ სულიერი და კულტურული ცხოვრების მნიშვნელოვან ნაწილს უკავშირდებოდა. საგუნდო მუსიკისადმი სიყვარული დღემდე რჩება მისი ინტერესებისა და შემოქმედებითი თვითგამოხატვის ერთ-ერთ მნიშვნელოვან მიმართულებად. ნინოს ჰობებს შორის არის წერა, ხატვა და ჩოგბურთი, რაც მის პიროვნულ მრავალფეროვნებასა და ჰარმონიულ განვითარებას წარმოაჩენს.
ნინოს საქმიანობა ასევე მოიცავს როგორც წერილობით, ისე ზეპირ თარგმანით საქმიანობას. იგი არაერთი თეოლოგიური და ფსიქოლოგიური ნაშრომის მთარგმნელია, ხოლო ზეპირი თარჯიმნობის მიმართულებით აღსანიშნავია ჯვართამაღლების ტაძრის ორგანიზებით გამართულ ტელეხიდებში მონაწილეობა, სადაც იგი თარჯიმნობდა ბერძენ პროფესორებსა და იერარქებს. აღნიშნული გამოცდილება ნათლად უსვამს ხაზს მის პროფესიულ კომპეტენციას, პასუხისმგებლობასა და საერთაშორისო საეკლესიო-აკადემიურ სივრცესთან აქტიურ კავშირს.
ამჟამად ნინო სადოქტორო ნაშრომზე მუშაობს. გვჯერა, რომ მისი აკადემიური შრომისმოყვარეობა, პასუხისმგებლობა და სულიერი სიღრმე მნიშვნელოვან წარმატებას მოუტანს როგორც პიროვნულ, ისე სამეცნიერო საქმიანობაში. გულითადად ვუსურვებთ წარმატებებს სამომავლო სამეცნიერო გზაზე, ვგულშემატკივრობთ და გვეამაყება მისი მიღწევები.☀️💖

26/04/2026

იოანა (მადონა) ლაზარაშვილის სულიერი და პროფესიული განვითარების გზა

გაგაცნობთ იოანას - ადამიანს, რომლის გზა სითბოთი, რწმენითა და პროფესიული ერთგულებით არის გამორჩეული.
იოანას ცხოვრების მნიშვნელოვანი საწყისი ეტაპი უკავშირდება სულიერ ფორმირებას. განსაკუთრებული როლი ამ პროცესში ეკუთვნის ნათლიას, რომელმაც იოანა ტაძარში მიიყვანა და დააკავშირა მეუფე ისაიასთან, რომელიც შემდგომში მისი სულიერი მამა გახდა. სწორედ მეუფე ისაიას ლოცვა-კურთხევით იოანა შეუერთდა მგალობელთა გუნდს, რაც მის სულიერ ცხოვრებაში ერთ-ერთ მნიშვნელოვან საყრდენად იქცა.
2010 წელს, მეუფე ისაიას რეკომენდაციით, იოანა საღვთისმეტყველო ინსტიტუტის ფსიქოლოგიის ფაკულტეტის სტუდენტი გახდა. აღნიშნული პერიოდი გამოირჩევა როგორც ინტენსიური სწავლებისა და შინაგანი ძიების ეტაპი, როდესაც ქრისტიანული მსოფლმხედველობა და სამეცნიერო ცოდნა პარალელურად ვითარდებოდა.
2014 წელს იოანამ წარმატებით დაასრულა სწავლა საღვთისმეტყველო ინსტიტუტში. შემდგომ წლებში მან პროფესიული განვითარების მიზნით მონაწილეობა მიიღო სხვადასხვა ტრენინგსა და სემინარში ფსიქოლოგიის მიმართულებით, რაც მის პრაქტიკულ უნარებს კიდევ უფრო ამაღლებდა.
პროფესიული საქმიანობა დაიწყო 2015 წელს ნიქოზის საბავშვო ბაღში ფსიქოლოგის პოზიციაზე. 2018 წლიდან მისი საქმიანობა გაფართოვდა - იოანა მუშაობდა ქ. გორის ბაღების გაერთიანების სააგენტოში, სადაც სხვადასხვა საბავშვო ბაღს ემსახურებოდა.
აღნიშნული პერიოდი ხასიათდება მრავალმხრივი პრაქტიკული გამოცდილების დაგროვებითა და ბავშვებთან ფსიქოლოგიური მუშაობის გაღრმავებით.
პირადი ცხოვრების მნიშვნელოვანი ეტაპი დადგა 2020 წელს, როდესაც იოანა ლაზარაშვილი დაოჯახდა. იგი არის მეუღლე და ორი შვილის დედა, რაც მის ცხოვრებაში მნიშვნელოვან როლს ასრულებს და დამატებით განამტკიცებს მის ღირებულებით სისტემას.
ამჟამად იოანა საქმიანობს ძეგვის საჯარო სკოლაში, სადაც აგრძელებს პროფესიული გამოცდილების გაზიარებას და აქტიურად არის ჩართული მოსწავლეთა ფსიქოლოგიურ მხარდაჭერაში.
იოანა გამოირჩევა თბილი, მზრუნველი და მადლიერი ბუნებით. მის პიროვნებაში განსაკუთრებულად ჰარმონიულად არის შერწყმული ადამიანებისადმი თანაგრძნობა, შინაგანი სიმშვიდე და პასუხისმგებლობის მაღალი განცდა, რაც მის პროფესიულ და პირად ურთიერთობებს განსაკუთრებულ სიღრმესა და სითბოს ანიჭებს.
გულითადად ვუსურვებთ იოანას, რომ მისი შინაგანი სინათლე, კეთილშობილება და ადამიანებისადმი მსახურების სურვილი მომავალშიც მრავალი ადამიანის ცხოვრების შემწე გახდეს, ხოლო მის გზას თან სდევდეს ღვთის მადლი, სიმშვიდე და კიდევ მრავალი ღირსრული და კეთილი საქმე.☀️💖

23/03/2026

2008 წელს თბილისის სასულიერო აკადემიისა და სემინარიის კურსდამთავრებულთა ცხოვრების ამ მნიშვნელოვან ეტაპს განსაკუთრებულ სულიერ მნიშვნელობას ანიჭებს ის კურთხევა და სულიერი დარიგება, რომელიც პატრიარქისგან მივიღეთ. მისი სიტყვები და მამობრივი სიყვარულით განმსჭვალული დამოკიდებულება, რომელიც თითოეულ ჩვენგანზე გავრცელდა, დარჩა, როგორც სულიერი საზრდო, რომელიც ჩვენს სულიერ განვითარებას განამტკიცებს.
ვფიქრობ, პატრიარქის დალოცვა არ შემოიფარგლება მხოლოდ ჩვენი კურსით. იგი სცდება კონკრეტულ დროსა და სივრცეს და ვრცელდება როგორც მათზე, ვინც ჩვენამდე გაიარა ეს გზა, ვინც ახლა გადის მას და ასევე მათზე, ვინც მომავალში გაივლის ამ სულიერ - საგანმანათლებლო გზას.
ჩვენი პატრიარქის დალოცვა და მამობრივი დარიგება ერთგვარად აერთიანებს თაობებს საერთო სულიერ სივრცეში და ინარჩუნებს უწყვეტობას რწმენისა და ცოდნის გზაზე.
უცვლელად გთავაზობთ სრულიად საქართველოს კათოლიკოს-პატრიარქის სიტყვას კურსდამთავრებულების მიმართ:

„ჩვენთან არს ღმერთი!

არაჩვეულებრივი საღამოა და მე ახლა ვფიქრობდი იმის შესახებ, თუ რა უნდა მეთქვა თქვენთვის.
ძველი რომაელები ამბობდნენ: „Nosce te ipsum“ - შეიცანი შენი თავი. მე მინდა ვთქვა, რომ უკვე ხანდაზმული ვარ და ვერ შევიცანი ჩემი თავი. მე დღემდე ვეძებდი საკუთარ თავს, მუდამ ვეძებდი იმას, თუ რა უნდა გამეკეთებინა - ჩემთვის თუ სამშობლოსთვის - და მივედი იმ დასკვნამდე, რომ ძალიან მცირე საქმე მაქვს გაკეთებული.
მე გისურვებთ, რომ არასოდეს დაკარგოთ კავშირი სასულიერო აკადემიასა და სემინარიასთან. ასევე გისურვებთ, რომ მუდამ გიყვარდეთ სამშობლო და ადამიანი; ყოველთვის აპატიოთ ადამიანს მისი შეცდომები. ნუ განიკითხავთ და ღმერთიც იქნება მოწყალე თქვენდამი.
მე ბევრი რამის თქმა მინდა, მაგრამ სიტყვები არ მყოფნის, რადგან დიდია ის სულიერი სიყვარული, რომელიც ჩვენ შორისაა, და ამას, ალბათ, სიტყვებიც არ სჭირდება. როდესაც ადამიანები მიდიოდნენ სასულიერო პირთან, ხშირად ის არაფერს ეუბნებოდა - დასვამდა სადმე კუთხეში და თვითონ ლოცულობდა; და ის ადამიანი გულსავსე მიდიოდა მისგან. ამიტომ დარწმუნებული ვარ, რომ თქვენც მადლით სავსენი წახვალთ სემინარიიდან და აკადემიიდან. ეს მადლი უნდა შეინარჩუნოთ და გაამრავლოთ. აკეთეთ სიკეთე და სიკეთე დაგიბრუნდებათ თქვენ.

და ბოლოს, მინდა გითხრათ - ძალიან მიყვარხართ და ძალიან მომენატრებით.“

18/03/2026

უსაზღვრო სიყვარულითა და მადლიერებით ვემშვიდობებით ჩვენს პატრიარქს. მადლობას გიხდით, თქვენო უწმინდესობავ, იმ სითბოსთვის, სიყვარულისთვის და მამობრივი მზრუნველობისთვის, რომელსაც ყოველთვის უანგაროდ გვიზიარებდით. მუდამ დარჩებით ჩვენს გულებში და თბილ მოგონებებში. ძალიან გვიყვარდით, მუდამ მოგვაკლდებით და მოგვენატრებით.
გულწრფელ თანაგრძნობას ვუცხადებთ ყველას.

https://www.facebook.com/share/p/1AuuNiunqH/

⛪️ თბილისის სასულიერო აკადემია და სემინარია გამოთქვამს უდიდეს მწუხარებას სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის, უწმინდესი და უნეტარესი ილია II-ის გარდაცვალების გამო. ვუსამძიმრებთ სრულიად საქართველოს.

10/03/2026

ჩვენი წარმატებული კურსდამთავრებულის - ლუდმილა გელაძისგან სასიხარულო ამბავი გვაქვს.📚🌿🌷💝
მოკრძალებით შეგახსენებთ, თბილისის სასულიერო აკადემიისა და სემინარიის ქრისტიანული ფსიქოლოგიის ფაკულტეტის წარმატებით დასრულების შემდეგ, ლუდმილა გელაძემ სწავლა განაგრძო ივანე ჯავახიშვილის სახელობის თბილისის სახელმწიფო უნივერსიტეტის ფილოსოფიის საბაკალავრო საგანმანათლებლო პროგრამაზე.
აღნიშნული პროგრამის წარმატებით დასრულების შედეგად, მას დღეს გადაეცა წარჩინებული კურსდამთავრებულის დიპლომი, რაც მისი მაღალი აკადემიური მოსწრების მნიშვნელოვანი მიღწევების დასტურია.👏🎊💖
ამჟამად ლუდმილა სწავლობს წმინდა ანდრია პირველწოდებულის სახელობის საქართველოს საპატრიარქოს უნივერსიტეტის ლიტერატურათმცოდნეობის სამაგისტრო საგანმანათლებლო პროგრამაზე, სადაც აგრძელებს აკადემიურ და ინტელექტუალურ განვითარებას.
გულითადად ვულოცავთ ლუდმილას ამ მნიშვნელოვან წარმატებას და ვუსურვებთ მომავალში კიდევ მრავალ პროფესიულ მიღწევას და ნაყოფიერ სამეცნიერო საქმიანობას. 📚🌿🌷💝

16/02/2026

მაკა ალავერდაშვილის სულიერი, ინტელექტუალური და შემოქმედებითი ზრდა

მაკა ალავერდაშვილის პროფესიული ბიოგრაფია წარმოადგენს თანმიმდევრულ და ინტეგრირებულ პროცესს, რომელიც ეფუძნება ქრისტიანული ფსიქოლოგიის თეორიულ საფუძვლებს, მუსიკალურ პედაგოგიკას, საბიბლიოთეკო - საგანმანათლებლო და პრაქტიკულ ფსიქოლოგიურ საქმიანობას.
მაკას პროფესიული იდენტობის ფორმირება იწყება 2014 წელს, როდესაც მან დაამთავრა თბილისის სასულიერო აკადემიისა და სემინარიის ქრისტიანული ფსიქოლოგიის ფაკულტეტი. აღნიშნულმა განათლებამ შექმნა ღირებულებებზე დაფუძნებული ხედვა ადამიანის სულიერი, ემოციური და კოგნიტური განვითარების შესახებ, რაც შემდგომში მის მრავალმხრივ საქმიანობაში აისახა.
2016 წლიდან მაკამ დაიწყო მუშაობა საჯარო სკოლაში მუსიკის მასწავლებლად. მუსიკალური პედაგოგიკა მის პრაქტიკაში ფუნქციონირებს, როგორც განვითარების ფსიქოლოგიის მხარდამჭერი ინსტრუმენტი, რადგან მუსიკასთან ურთიერთობა ხელს უწყობს ყურადღების კონცენტრაციას, მეხსიერების გაძლიერებას, ემოციური რეგულაციის უნარების განვითარებას და სოციალური ჩართულობის ზრდას. ამავე წელს მისი პიროვნული ცხოვრების მნიშვნელოვანი ეტაპი - ოჯახის შექმნა - პროფესიულ პასუხისმგებლობასთან პარალელურად მიმდინარეობდა, რაც მის საქმიანობას დამატებით ღირებულებით კონტექსტს აძლევდა.
2017 წლიდან მაკა ალავერდაშვილი მუშაობს სკოლის ბიბლიოთეკარად, სადაც მისი საქმიანობა სცილდება მხოლოდ რესურსების მართვის ფუნქციას და იღებს საგანმანათლებლო - განმავითარებელ ხასიათს. იგი სისტემურად ზრუნავს მოსწავლეებში კითხვის კულტურის ჩამოყალიბებაზე, წიგნიერების მნიშვნელობის გააზრებაზე და დამოუკიდებელი შემეცნების უნარების განვითარებაზე. ბიბლიოთეკა მაკას პრაქტიკაში განიხილება, როგორც არაფორმალური საგანმანათლებლო სივრცე, რომელიც ხელს უწყობს კოგნიტური უნარების და ღირებულებითი ორიენტაციების ფორმირებას.
2018-2020 წლებში დედობის გამოცდილება მაკას პროფესიული ცოდნის პრაქტიკულ გამოცდილებად იქცა. ადრეული ასაკიდანვე მან მიზანმიმართულად დაიწყო შვილების კოგნიტურ, ემოციურ და პიროვნულ განვითარებაზე ზრუნვა, რაც ადასტურებს თეორიული ცოდნის ეფექტიან ტრანსფორმაციას ოჯახურ გარემოში.
მუსიკალური მიმართულება მაკას საქმიანობაში მუდმივად ინარჩუნებს ცენტრალურ ადგილს. იგი აქტიურად იყო სწავლობდა ქართულ ხალხურ სიმღერებს, ტრადიციულ საკრავებს, მონაწილეობდა ფესტივალებსა და კონკურსებში, რაც მის პროფესიულ კომპეტენციას პრაქტიკული გამოცდილებით ამდიდრებდა. საეკლესიო საგალობელთა შესრულებამ, კერძოდ ტაძარში გალობამ, მაკას საქმიანობას სულიერი და ესთეტიკური განზომილება შემატა.
საეკლესიო გალობის სფეროში მაკას ჩამოყალიბება დაკავშირებულია გალობის პედაგოგის - ლია სალაყაიას სახელთან. სწორედ უძვირფასესი მასწავლებლის პროფესიული და სულიერი ხელმძღვანელობით მაკამ საფუძვლიანად შეისწავლა ქართული საგალობლის ხმოვან-სტილისტიკური თავისებურებები, სამხმიანი წყობის პრინციპები, გუნდური შესრულების კულტურა და ლიტურგიკული გალობის ეთიკა.
2022 წლიდან მაკამ დაიწყო ბავშვების ინდივიდუალური მომზადება ქართულ ხალხურ სიმღერასა და ფანდურზე დაკვრაში. აღნიშნული საქმიანობა ემსახურება ეროვნული კულტურული იდენტობის გაძლიერებას, მუსიკალური და სოციალური უნარების განვითარებას.
2024 წელს მაკამ დაარსა ფოლკლორული ანსამბლი „საუნჯე“, რომელიც დაახლოებით 40 ბავშვს აერთიანებს. ანსამბლი მიზნად ისახავს ქართული ტრადიციების, ფოლკლორისა და კულტურული მემკვიდრეობის პოპულარიზაციას. იგი სისტემურად მონაწილეობს სხვადასხვა ფესტივალსა და კულტურულ ღონისძიებაში
ანსამბლის მიერ 2025 წელს მიღებული ლაურეატის წოდება მიუთითებს მაკას პედაგოგიური მუშაობის ეფექტურობაზე და ორგანიზაციულ კომპეტენციაზე.
2025 წლიდან მაკამ დაიწყო პროფესიული საქმიანობა ფსიქოლოგიის მიმართულებით, რაც სხვადასხვა სფეროში მიღებული გამოცდილების ლოგიკურ გაგრძელებად შეიძლება შეფასდეს.
მაკას პროფესიული გზა ხასიათდება ქრონოლოგიური თანმიმდევრულობით, თეორიისა და პრაქტიკის ინტეგრაციით და ღირებულებებზე ორიენტირებული პედაგოგიკით. იგი წარმოადგენს მრავალდარგობრივი საქმიანობის მაგალითს, სადაც განათლება, ხელოვნება და ფსიქოლოგია ერთიანდება ბავშვთა პიროვნული განვითარების ხელშეწყობისათვის და ქმნის ერთიან, მთლიან საგანმანათლებლო მოდელს.
მაკას ყოველდღიური საქმიანობა, სასულიერო სასწავლებლის დასრულების შემდეგ, სისტემატურად უკავშირდება ბავშვების განათლებას, შემოქმედებით აქტივობებსა და კულტურულ განვითარებას. მისი პროფესიული გზა განმსჭვალულია მუდმივი მადლიერებით იმ ადამიანების მიმართ, რომლებიც მხარს უჭერდნენ პროფესიულ განვითარებაში, ხოლო განსაკუთრებით ღვთის მადლიერია, რომლის წყალობასაც იგი ხედავს საკუთარი შესაძლებლობებში.
ვუსურვებთ მაკა ალავერდაშვილს ღვთის წყალობას, მხნეობას და ძლიერებას, შემოქმედებით შთაგონებას, ჯანმრთელობასა და ახალი წარმატებებისკენ სწრაფვას, რათა მისი მრავალფეროვანი საქმიანობა კვლავ მრავალი თაობისთვის გახდეს ფასეული და ხელი შეუწყოს მომავალ თაობებში სულიერი, კულტურული და ინტელექტუალური უნარების განვითარებას.☀️💖

14/02/2026

თამარ გოგოლაძის პროფესიული განვითარება ბავშვთა ფსიქიკური ჯანმრთელობისა და ქცევითი თერაპიის სფეროში

თამარ გოგოლაძის პროფესიული ბიოგრაფია წარმოადგენს თანმიმდევრულ და ლოგიკურად განვითარებულ პროცესს, რომელიც ეფუძნება აკადემიურ განათლებას, პრაქტიკულ გამოცდილებას და უწყვეტ პროფესიულ ზრდას.
თამარის საგანმანათლებლო გზა დაიწყო 2012 წელს თბილისის სასულიერო აკადემია - სემინარიაში, ფსიქოლოგიისა და რელიგიათმცოდნეობის ფაკულტეტზე, სადაც თამარი სწავლობდა 2012-2016 წლებში.
2017-2019 წლებში თამარმა სწავლა განაგრძო საქართველოს ეროვნულ უნივერსიტეტ SEU-ში ფსიქოლოგიის სამაგისტრო პროგრამაზე. სამაგისტრო ნაშრომი „ფიქსირებული განწყობის სპეციფიკური მახასიათებლები კანაფდამოკიდებულებთან“ განიხილავს დამოკიდებულებასთან დაკავშირებულ კოგნიტურ და ქცევით თავისებურებებს.
2020 წელს ნარკომანიის პტევენციის ცენტრში ბავშვთა ფსიქიატრიაში მიღებულმა პრაქტიკულმა გამოცდილებამ გააძლიერა თამარის კლინიკური ხედვა. ამ პერიოდში განსაკუთრებული მნიშვნელობა ჰქონდა მულტიდისციპლინურ გუნდში მუშაობას, ფსიქიკური ჯანმრთელობის პრობლემების ადრეულ გამოვლენასა და პრევენციულ მიდგომებს. კლინიკური პრაქტიკა თეორიულ ცოდნას რეალურ შემთხვევებთან აკავშირებს, რაც ზრდის ინტერვენციების ეფექტიანობას.
2022 წელს ილიას სახელმწიფო უნივერსიტეტის ბავშვთა განვითარების ინსტიტუტში თამარის მიერ გავლილი ტრენინგები მოიცავდა ენისა და სასწავლო უნარების შეფასებას, ასევე ვერბალური ქცევის ანალიზს აუტიზმის სპექტრისა და განვითარების სხვა დარღვევების მქონე ბავშვებში.
აღნიშნულმა მომზადებამ გააძლიერა თამარის შესაძლებლობები სტრუქტურირებული შეფასების გამოყენებაში.
2023-2024 წლებში თამარი სწავლობდა ქცევის აკადემიაში საერთაშორისო ქცევუს ანალიტიკოსის მოსამზადებელ კურსზე.
ქცევის აკადემიაში მიღებული სპეციალიზებული განათლება და 2025 წლის 25 დეკემბერს მიღებული საერთაშორისო ქცევის ანალიტიკოსის (IBA)სერტიფიკატი ადასტურებს თამარის პროფესიულ კომპეტენციას.
ამჟამად თამარ გოგოლაძე მუშაობს ი. ბოკერიას სახელობის ნეიროგანვითარების ცენტრში სუპერვიზორისა და ქცევის თერაპევტის პოზიციაზე. მისი პროფესიული ფუნქციები მოიცავს ინდივიდუალური ქცევითი პროგრამების დაგეგმვას, თერაპევტების სუპერვიზიას, მონაცემებზე დაფუძნებული გადაწყვეტილებების მიღებას და პროგრესის მონიტორინგს.
თამარის პროფესიული იდენტობა ეფუძნება უწყვეტი განათლების პრინციპს. მისი პროფესიული გზა აჩვენებს თეორიული ცოდნის, კვლევითი გამოცდილებისა და პრაქტიკული მუშაობის ინტეგრაციას, რაც ხელს უწყობს ბავშვებისა და მათი ოჯახების ფუნქციური უნარების განვითარებას.
გულითადად ვუსურვებთ თამარს შემართებას, წარმატებებს და სრულყოფას, როგორც პროფესიულ საქმიანობაში, ასევე პირად ცხოვრებაში.☀️💖

09/02/2026

თამარ მირცხულავას პროფესიული კომპეტენცია და აკადემიური მიღწევები

თამარ მირცხულავას პროფესიული და აკადემიური გზა ჩამოყალიბდა თანმიმდევრული საგანმანათლებლო და პრაქტიკული გამოცდილების საფუძველზე. მისი განათლების პირველი ეტაპი დაკავშირებულია თბილისის სასულიერო აკადემია და სემინარიასთან არსებულ საღვთისმეტყველო ინსტიტუტთან, სადაც თავდაპირველად ჩაირიცხა მოსამზადებელ საფეხურზე.
2007 წლიდან თამარი სწავლას განაგრძობს ქრისტიანული ფსიქოლოგიის ფაკულტეტზე, რომელიც 2012 წელს წარმატებით დაასრულა.
თამარი მიიჩნევს, რომ სულიერ მოძღვრებს მნიშვნელოვანი წვლილი მიუძღვით მის მიერ სასულიერო აკადემიაში სწავლის დაწყების გადაწყვეტილებაში, რის გამოც მათ მიმართ განსაკუთრებულ მადლიერებას გამოხატავს.
სასულიერო სასწავლებელში სწავლის წლებში თამარი გამოირჩეოდა მაღალი პასუხისმგებლობით, აკადემიური დისციპლინით და სწავლისადმი სერიოზული დამოკიდებულებით. სწორედ ამ პერიოდში მისი აკადემიური მიღწევები და დისციპლინური ქცევა შეფასდა სასწავლებლის ადმინსტრაციის მიერ,რის შედეგადაც თამარის მშობლებს 2011 წელს მადლობის სიგელი გადაეცა, როგორც წარმატებული სტუდენტის მშობლებს. ამავე პერიოდში თამარის მიღწევების შესახებ დაიბეჭდა სასულიერო აკადემიისა და სემინარიის გაზეთში „კლიტე დავითისი“ კურსდამთავრებულთა რუბრიკაში.
სტუდენტობის პერიოდში თამარმა პარალელურად გააფართოვა პროფესიული ინტერესები პრაქტიკული სწავლების მიმართულებით. მან გაიარა არაერთი ტრენინგი ფსიქოლოგიის სხვადასხვა სფეროში, მათ შორის: ქიმიურ ნივთიერებებზე დამოკიდებულების მქონე პირთა თერაპია „12 ნაბიჯის“ მეთოდიკით, ბავშვთა მიმართ ძალადობის საკითხები, ნეიროპათოლოგიური დაავადებების სოციალური კონტექსტი, ასევე ნეირო-ლინგვისტური პროგრამირების (NLP) საფუძვლები.
უმაღლესი განათლების დასრულების შემდეგ თამარმა პროფესიული განვითარება განაგრძო დიმიტრი უზნაძის სახელობის ფსიქოლოგიის სასწავლო-საკონსულტაციო ცენტრში, სადაც დაეუფლა გამოყენებითი ფსიქოლოგიის მიმართულებას და მიიღო A ხარისხის სერტიფიკატი.
ამავე სივრცეში იგი გაეცნო კრიმინალური ფსიქოლოგიის საფუძვლებს, რაც შემდგომში ლოგიკურად დაუკავშირდა მის ინტერესს სამართლისა და ფსიქოლოგიის გადაკვეთის სფეროსადმი. აღნიშნული ინტერესის გაგრძელებად იქცა სწავლა კავკასიის სამართლის აკადემიაში „იურიდიული ფსიქოლოგიის“ მიმართულებით, სადაც მიღებულმა ცოდნამ მას მისცა შესაძლებლობა მონაწილეობა მიეღო სისხლის სამართლის იმიტირებულ სასამართლო პროცესში.
მიღებული აკადემიური და პრაქტიკული გამოცდილების საფუძველზე თამარი მონაწილეობდა ქ. პარიზში გამართულ გაეროს მოდელირებულ მსოფლიო საერთაშორისო ასამბლეაში დელეგატის სტატუსით, რაც მისი პროფესიული განვითარების საერთაშორისო დონეზე გაფართოების მნიშვნელოვან ეტაპს წარმოადგენდა.
აღნიშნული შესაძლებლობისთვის თამარი მადლიერებას გამოხატავს კავკასიის სამართლის აკადემიის დირექტორის გიორგი მათიაშვილის და პარიზში გამართულ პროექტში მონაწილე თითოეული წევრის მიმართ.
სასულიერო აკადემიაში სწავლის წლებში თამარი აქტიურად მონაწილეობდა სტუდენტურ ცხოვრებაში და განსაკუთრებულ მნიშვნელობას ანიჭებდა სრულიად საქართველოს კათოლიკოს - პატრიარქთან პირად შეხვედრას, რაც სულიერი გამოცდილების მნიშვნელოვან წყაროს წარმოადგენდა.
თამარი აღნიშნავს სასწავლებლის პროფესორ - მასწავლებელთა მაღალ აკადემიურ კომპეტენციასა და პროფესიულ მხარდაჭერას, რაც მნიშვნელოვანი იყო მის პიროვნულ და პროფესიულ ჩამოყალიბებაში.
თამარის სამუშაო გამოცდილება მრავალფეროვანია და არ შემოიფარგლება მხოლოდ აკადემიური სივრცით. პროფესიული საქმიანობა დაიწყო კერძო სექტორში, საიუველირო სფეროში, კონსულტანტისა და შემდგომ მენეჯერის პოზიციებზე. მოგვიანებით თამარი საქმიანობდა ფსიქოლოგის პოზიციაზე სხვადასხვა საბავშვო დაწესებულებაში, მათ შორის მონტესორის საბავშვო აკადემიაში, სადაც მიიწვიეს თბილისის სასულიერო აკადემიის პედაგოგის, ქალბატონი ლელა ტყეშელაშვილის რეკომენდაციით.
შემდგომ ეტაპზე, სასულიერო აკადემიის პედაგოგის, ქალბატონი მაკა ხარშილაძის რეკომენდაციით, თამარი მიწვეული იქნა ევროპის უნივერსიტეტში საგამოძიებო ფსიქოლოგიის ლექტორად, რაც მისი აკადემიური კომპეტენციისა და პროფესიული სანდოობის დადასტურებად შეიძლება ჩაითვალოს.
თამარი მონაწილეობდა საჯარო ლექციებსა და საგანმანათლებლო შეხვედრებში.მიწვეული გახლდათ სტუდენტური პარლამენტის რეგიონალური პოლიტიკისა და თვითმმართველობის კომიტეტში და საქართველოს საერთაშორისო უნივერსიტეტში.
აგრეთვე, არაერთხელ ყოფილა მიწვეული რადიო და სატელევიზიო გადაცემებში, მათ შორის, სამეგრელოს მხარის რადიოში ,, ათინათი" სადაც განიხილავდა აქტუალურ ფსიქოლოგიურ საკითხებს ფართო აუდიტორიისთვის.
თამარ მირცხულავას პროფესიული გზა ხასიათდება უწყვეტი განათლებისკენ სწრაფვით, მრავალდარგობრივი კომპეტენციითა და პროფესიული პასუხისმგებლობით, რაც ქმნის მყარ საფუძველს მისი შემდგომი აკადემიური და პრაქტიკული საქმიანობისთვის.
ვუსურვოთ თამარ მირცხულავას, რომ მისი პროფესიული გზა გაგრძელდეს წარმატებით, ხოლო მისი ცოდნა, გამოცდილება და სულიერი ღირებულებები ასრულებდეს მნიშვნელოვან წვლილს პიროვნულ და საზოგადოებრივ განვითარებაში.
თამარ, გულითადად გისურვებთ შემოქმედებით ზრდას, პროფესიულ პასუხისმგებლობას და წარმატებას ყველა შემდგომ გამოწვევაში.☀️❤️

08/02/2026

ლელა მჭედლიშვილის აკადემიური გზა და პროფესიული გამოცდილება

ლელა მჭედლიშვილმა 2009-2014 წლებში განათლება მიიღო თბილისის სასულიერო აკადემიისა და სემინარიის ქრისტიანული ფსიქოლოგიის ფაკულტეტზე.
სასულიერო სასწავლებელში არსებულმა აკადემიურმა გარემომ მნიშვნელოვანი გავლენა მოახდინა ლელას პროფესიულ და პიროვნულ განვითარებაზე. აღნიშნულმა გარემომ ლელას მისცა ღრმა თეორიული ცოდნა და შეუქმნა საფუძველი ადამიანის ფსიქო-სულიერი განვითარების ინტეგრირებული ხედვის შესასწავლად.
ლელა განსაკუთრებულ მადლიერებას გამოხატავს საქართველოს კათოლიკოს - პატრიარქის მიმართ და აკადემიაში მოღვაწე პროფესორ-მასწავლებლების მიმართ, რომელთა მეცნიერული კომპეტენცია და სულიერი მაგალითი საფუძვლად დაედო მის პროფესიული განვითარებას.
პროფესიული საქმიანობა ლელა მჭედლიშვილმა 2016 წელს დაიწყო თბილისის №168 საჯარო სკოლაში სპეციალური პედაგოგის პოზიციაზე. 2016-2022 წლებში, ლელა მუშაობდა ფსიქოლოგის პოზიციაზე №94 საბავშვო ბაგა - ბაღში. 2019-2022 წლებში ლელა ბავშვთა ადრეული განვითარების სპეციალისტად საქმიანობდა ორგანიზაცია „SOS ბავშვთა სოფელში“. 2025 წლიდან იგი აგრძელებს მუშაობას ადრეული განვითარების სპეციალისტის პოზიციაზე ორგანიზაცია „ანიკაში“. ამჟამად ლელა გადის ინტენსიურ არტ-თერაპიის კურსს, რაც მისი პროფესიული განვითარების მნიშვნელოვან ეტაპს წარმოადგენს.
ლელას საქმისადმი გულმოდგინება და პასუხისმგებლობის მაღალი გრძნობა ქმნის მყარ საფუძველს მისი პროფესიული საქმიანობის თანმიმდევრულობისა და ეფექტიანობისათვის.
თქვენთან ერთად, ლელას გულითადად ვუსურვებ წარმატებულ პროფესიულ განვითარებასა და ნაყოფიერ საქმიანობას. მის მიერ დასახული ახალი, საინტერესო და ღირებულებებზე ორიენტირებული მიზნები ღვთის მადლითა და პირადი ძალისხმევით ღირსეულად განხორციელდეს.☀️💖

06/02/2026

მამა შიო დვალის სულიერებისა და აკადემიური განათლების გზა

მამა შიო დვალი, თბილისის სასულიერო აკადემიისა და სემინარიის ფსიქოლოგიის საბაკალავრო და თეოლოგიის სამაგისტრო პროგრამების კურსდამთავრებული სასულიერო პირია, რომლის პროფესიული და სულიერი ფორმირება ეკლესიური მსახურების, აკადემიური განათლებისა და საზოგადოებრივი პასუხისმგებლობის ერთიანობაში განხორციელდა.
მამა შიო დაიბადა რაჭაში, ამბროლაურის მუნიციპალიტეტში. იგი მოინათლა სოფელ პატარა ონში. რაჭის მხარესთან მას განსაკუთრებული სულიერი და ემოციური კავშირი აქვს, რაც მის ცხოვრებისეულ და სარწმუნოებრივ თვითიდენტობას მნიშვნელოვნად განსაზღვრავს.
სკოლის დამთავრების შემდეგ მამა შიო მუშაობდა სხვადასხვა საწარმოებსა და სამშენებლო კომპანიებში. ამ პერიოდში ჩამოუყალიბდა შრომისადმი პასუხისმგებლობა, პრაქტიკული გამოცდილება და საქმისადმი ერთგულება, რაც შემდგომში მის სულიერ და საზოგადოებრივ საქმიანობაშიც ნათლად აისახა.
სასკოლო არდადეგების პერიოდში მამა შიო ხშირად სტუმრობდა დეიდას ოჯახს მცხეთაში. ამ დროს, დეიდაშვილებთან ერთად, აქტიურად მონაწილეობდა წმინდა ეკატერინეს (ოლღას) სახელობის დედათა მონასტრის სამშენებლო საქმიანობაში. პარალელურად, იგი რეგულარულად ესწრებოდა ღამისთევის მსახურებებს, როგორც წმ.ეკატერინეს მონასტერში, ისე სვეტიცხოვლის საპატრიარქო ტაძარში. სწორედ ამ წლებში მოხდა მისი ღვთის მადლთან პირველი სიღრმისეული შეხება და ღვთის მადლის შინაგანი განცდა, რაც მის სულიერ ცხოვრებაში გარდამტეხ ეტაპად იქცა და საფუძველი ჩაუყარა მის სასულიერო ცხოვრების გზას.
2008 წელს, მოძღვრის ლოცვა-კურთხევით, მამა შიო აქტიურად მონაწილეობდა ფონიჭალაში ყოველთა წმინდანთა სახელობის ტაძრის აღმშენებლობაში. აღნიშნული გამოცდილების შემდეგ მას საბოლოოდ გაუმყარდა სურვილი სასულიერო განათლების მიღებისა და ღვთისმსახურების გზის არჩევის.
2010 წელს მამა შიო ჩაირიცხა თბილისის სასულიერო აკადემიისა და სემინარიის ფსიქოლოგიისა და რელიგიათმცოდნეობის ფაკულტეტზე, რომელიც წარმატებით დაასრულა 2014 წელს. სასწავლებელში სწავლის პერიოდში მამა შიომ გაიცნო თავისი მომავალი მეუღლე და 2013 წელს ჯვარი დაიწერა. ამჟამად მათ ხუთი შვილი ჰყავთ - სამი გოგონა და ორი ვაჟი.
2015 წელს მამა შიო სწავლას აგრძელებს თბილისის სასულიერო აკადემიის მაგისტრატურაში, რომელიც წარმატებით დაასრულა 2019 წელს.
2020 წლის 14 ივნისს, მისი უწმინდესობისა და უნეტარესობის ლოცვა-კურთხევით, ახალციხეში, წმინდა მარინეს სახელობის ტაძარში, მეუფე თეოდორემ (ჭუაძე) იგი აკურთხა დიაკვნად და უწოდა სახელი შიო, ღირსი მამა შიო გარეჯელის ხსენების დღეს.
2020-2022 წლებში იგი დიაკვნად მსახურობდა ზემო ფონიჭალის ყოველთა წმინდანთა სახელობის ტაძარში.
2022 წლის 18 სექტემბერს, მისი უწმინდესობის ლოცვა-კურთხევით, ავჭალის წინასწარმეტყველ ზაქარიასა და მართალი ელისაბედის სახელობის ტაძარში, წალკის ეპისკოპოსმა გრიგოლმა (კაცია) აკურთხა და ხელი დაასხა მღვდლად. ხელდასხმის შემდეგ მამა შიო განაგრძობს მსახურებას ზემო ფონიჭალის ყოველთა წმინდანთა სახელობის ტაძარში.
მამა შიო საკუთარ სულიერ და სამწყსო მსახურებაში ღვთის ნებასა და განგებულებას ხედავს, რაც მისთვის მუდმივი სულიერი ნუგეში და ძალის წყაროა. ამ კონტექსტში მისთვის განსაკუთრებულ მნიშვნელობას იძენს უფლის სიტყვები: რამეთუ უღელი ჩემი ტკბილ არს, და ტჳრთი ჩემი სუბუქ არს“(მათე 11:30).
განათლების, მეცნიერების და ახალგაზრდობის სამინისტროსა და საქართველოს საპატრიარქოს ერთობლივი პროექტის ფარგლებში, რომლის შედეგად სკოლებში შეიქმნა ღირებულებითი განათლების კლუბები, მამა შიო 2024 წელს გადამზადების კურსები გაიარა, ხოლო 2025 წლის მეორე სემესტრიდან აქტიურად ჩაერთო აღნიშნულ საგანმანათლებლო საქმიანობაში. აღსანიშნავია, რომ მას სტუდენტობის პერიოდიდანვე ჰქონდა სურვილი სკოლებში ღვთის სიტყვის სწავლებისა და ახალგაზრდებთან სულიერ - საგანმანათლებლო მუშაობის.
დღეს მამა შიო ღვთის კაცთმოყვარეობის მიმართ ღრმა მადლიერებით აღნიშნავს, რომ ეძლევა შესაძლებლობა მონაწილეობა მიიღოს მომავალი თაობის სულიერ, ღირებულებით და პიროვნულ აღზრდაში.
მამა შიო გამოირჩევა თბილი, მზრუნველი და ყურადღებიანი დამოკიდებულებით, რაც მის სამოძღვრო და საგანმანათლებლო მსახურებას განსაკუთრებულ მნიშვნელობას ანიჭებს.
მამა შიოს,თქვენთან ერთად გულითადად ვუსურვებ პროფესიულ, სულიერ და საგანმანათლებლო სივრცეში ღვთის სათნოდ კეთილმსახურებას, რათა მისმა საქმიანობამ ჭეშმარიტი სულიერი სარგებელი მოუტანოს თითოეულ ადამიანს, მოსწავლესა თუ სამწყსოს, და მისი ცხოვრება ნათელი მაგალითი გახდეს ქრისტიანული სიყვარულისა, ღვთისა და ერის წინაშე წრფელი და გულმოდგინე მსახურებისა.☀️💖

05/02/2026

ლიკა ივანეიშვილის პროფესიული გზა და საგანმანათლებლო საქმიანობა

ლიკა ივანეიშვილმა 2010 წელს წარმატებით დაასრულა თბილისის სასულიერო აკადემიისა და სემინარიის ქრისტიანული ფსიქოლოგიის ფაკულტეტი. სწავლის დასრულების შემდეგ პროფესიული საქმიანობა დაიწყო რელიგიის მასწავლებლად რუსთავის კერძო სკოლა „რუსთაველში“, სადაც 2012 წლამდე მუშაობდა. აღნიშნულ პერიოდში იგი აქტიურად იყო ჩართული სასწავლო პროცესში და ყურადღებას უთმობდა მოსწავლეთა სულიერ-ზნეობრივი ღირებულებების ჩამოყალიბებას.
2012 წელს ლიკას შეეძინა ტყუპები - ილია და მარიამი, რაც მის ცხოვრებაში მნიშვნელოვანი ეტაპი გახდა და კიდევ უფრო გააძლიერა მისი ინტერესი ბავშვებთან და მოზარდებთან მუშაობისადმი.
2015 წლიდან ლიკა საქმიანობს საქართველოს განათლების სისტემაში, საგანმანათლებლო დაწესებულების მანდატურის სამსახურში მანდატურის პოზიციაზე. ამ როლში იგი სხვადასხვა სკოლის სხვადასხვა ასაკის მოსწავლეებს უზიარებს პროფესიულ ცოდნასა და პრაქტიკულ გამოცდილებას, ხმელს უწყობს უსაფრთხო, მხარდამჭერი და ჯანსაღი სასკოლო გარემოს ჩამოყალიბებას და განსაკუთრებულ ყურადღებას უთმობს პრევენციულ მუშაობას, პასუხისმგებლობისა და მოქალაქეობრივი ცნობიერების განვითარებას.
პროფესიული ზრდისა და კვალიფიკაციის ამაღლების მიზნით, ლიკას გავლილი აქვს არაერთი გადამზადებისა და სასერტიფიკატო კურსი.
2015 წელს ლიკამ სწავლება განაგრძო შინაგან საქმეთა სამინისტროს აკადემიაში, საქართველოს განათლებისა და მეცნიერების სამინისტროს სისტემაში შემავალი საგანმანათლებლო დაწესებულების მანდატურის სამსახურის მანდატურთა მომზადების საგანმანათლებლო პროგრამის ფარგლებში.
2016 წელს დიმიტრი უზნაძის სახელობის ფსიქოლოგიის სასწავლო-საკონსულტაციო ცენტრში ლიკა დაეუფლა კურსებს: „ბავშვის აღზრდისა და სწავლების ეფექტიანი სტრატეგიები“ და „ფსიქოდიაგნოსტიკა“, რაც მნიშვნელოვნად დაეხმარა მისი პრაქტიკული საქმიანობის გაღრმავებას.
2022 წელს ლიკამ მონაწილეობა მიიღო გენდერული მეინსტრიმინგისა და გენდერული ნიშნით ძალადობის, მათ შორის ოჯახში ძალადობის საკითხებზე მიმართულ პროგრამაში, რომელიც განხორციელდა გაეროს ქალთა ორგანიზაციის პროექტის - „ქალებისა და გოგონების მიმართ ძალადობის წინააღმდეგ საქართველოში“ - ფარგლებში.
საქართველოს განათლების, მეცნიერებისა და ახალგაზრდობის სამინისტროს საგანმანათლებლო დაწესებულების მანდატურის სამსახურის მიერ ლიკა ივანეიშვილს ორჯერ გადაეცა მადლობის სიგელი სამსახურეობრივი მოვალეობის კეთილსინდისიერად და სანიმუშოდ შესრულებისთვის, მაღალი დისციპლინის, პროფესიული პასუხისმგებლობისა და ერთგული სამსახურისათვის.
ამჟამად ლიკა სწავლობს მოკლევადიან კურსზე კოლეჯ „მოდუსში“, სპეციალური საჭიროების მქონე ბავშვებთან მუშაობის მეთოდების მიმართულებით, რაც მისი პროფესიული ინტერესებისა და საქმიანობის ლოგიკურ გაგრძელებას წარმოადგენს.
ლიკა ივანეიშვილი გამოირჩევა თბილი, მზრუნველი და ყურადღებიანი დამოკიდებულებით, მაღალი დისციპლინით, კეთილსინდისიერებითა და პასუხისმგებლობის გრძნობით. აღნიშნული თვისებები მის პროფესიულ საქმიანობას განსაკუთრებულ სანდოობასა და ღირებულებას ანიჭებს და უზრუნველყოფს მის ეფექტიან მონაწილეობას საგანმანათლებლო და ფსიქოსოციალურ სივრცეში.
ლიკა ივანეიშვილს ვუსურვებთ პროფესიულ საქმიანობაში შემდგომ წინსვლას, უწყვეტ თვითგანვითარებასა და წარმატებას. ლიკას ცოდნა, გამოცდილება და პასუხისმგებლობით გამორჩეული დამოკიდებულება კვლავაც ეფექტიანად ემსახურებოდეს საგანმანათლებლო სივრცის გაძლიერებას, ბავშვებისა და მოზარდების ფსიქოსოციალურ კეთილდღეობასა და უსაფრთხო გარემოს ჩამოყალიბებას. თქვენთან ერთად გულითადად ვუსურვებთ სტაბილურობას, პროფესიულ აღიარებას და ნაყოფიერ საქმიანობას, როგორც საგანმანათლებლო, ისე პირად ცხოვრებაში.☀️❤️