26/06/2026
Ամենապատիւ Տ. Նուրհան Արքեպիսկոպոս Մանուկեանի օրհնութեամբ, Յունիս 16-ին Երուսաղէմի Ժառանգաւորաց Վարժարանի եւ ընծայարանի ուսանողները, տեսուչ՝ Գէորգ վրդ. Հայրապետեանի առաջնորդութեամբ, մեկնեցան Իսրայէլէն դէպի Եգիպտոս՝ կրթական, մշակութային եւ հոգեւոր այցելութեան։
Շարմ էլ-Շէյխ հասնելէ ետք, աշակերտները երկու օր հանգստացան Կարմիր Ծովու ափին, ապա ուղղուեցան դէպի Եգիպտոսի մայրաքաղաք Կահիրէ։ Հոն այցելեցին պատմական եկեղեցիներ եւ մշակութային տաճարներ, ծանօթացան անոնց պատմութեան, ինչպէս նաեւ Եգիպտոսի բազմադարեան կրօնական ու մշակութային ժառանգութեան։
Այցելութեան կարեւոր հանգրուաններէն մէկը Եգիպտոսի Մեծ Թանգարանն էր, ուր աշակերտները տեսան փարաւոններու դարաշրջանէն մեզի հասած բացառիկ նմուշներ, արձաններ, արուեստի գործեր եւ պատմական արժէք ներկայացնող բազմաթիւ ցուցանմուշներ։ Այս այցելութիւնը առիթ տուաւ աւելի խորապէս ծանօթանալու հին Եգիպտոսի պատմութեան եւ քաղաքակրթութեան։ Այնուհետեւ խումբը այցելեց Գիզայի աշխարհահռչակ բուրգերը։ Աշակերտները մօտէն ծանօթացան հին եգիպտական հեթանոսական հաւատալիքներուն, չաստուածներու պաշտամունքին եւ անոնց ունեցած ազդեցութեան՝ այդ ժամանակաշրջանի հասարակութեան եւ մշակոյթին վրայ։
Ապա խումբը մեկնեցաւ Ալեքսանդրիա, ուր այցելեց Ալեքսանդրիայի Փարոսի պատմական տեղանքը եւ տեսաւ անոր վրայ կառուցուած Մամլուքեան շրջանի նշանաւոր ամրոցը։ Այցելութեան մաս կազմեցին նաեւ հնագոյն կատակոմբները եւ դամբարանները, որոնց շարքին առանձնայատուկ հետաքրքրութիւն յառաջացուց Տիգրան Փաշայի անունը կրող գերեզմանը։ Ալեքսանդրիոյ մէջ աշակերտները այցելեցին նաեւ Հայկական Եկեղեցի, ուր աղօթք բարձրացուցին հայ ժողովուրդին, Հայաստանի, Երուսաղէմի Հայոց Պատրիարքութեան եւ համայն աշխարհի խաղաղութեան համար։
Կահիրէի Սուրբ Գէորգ Մայր Տաճարին մէջ խումբը մասնակցեցաւ Սուրբ եւ Անմահ Պատարագին, որը մատուցեց Գէորգ Վարդապետ Հայրապետեան՝ Տ. Աշոտ Սրբազանի օրհնութեամբ։ Այս հոգեպարար արարողութիւնը դարձաւ այցելութեան ամէնէն նշանակալից եւ յիշարժան պահերէն մէկը։
Կահիրէի մէջ ընկերակցութեամբ Թեմակալ առաջնորդ՝ Աշոտ սրբազանի եւ Եգիպտոսի թեմի հոգեւոր հայրերու հետ առանձնայատուկ պատիւ եղաւ հանդիպիլ Ղպտի Ուղղափառ Եկեղեցւոյ Պապին եւ Աղեքսանդրիոյ Պատրիարքին։ Հանդիպումը անցաւ ջերմ եւ եղբայրական մթնոլորտի մէջ, ուր շեշտուեցան քրիստոնէական միասնութեան, փոխադարձ յարգանքի եւ Միջին Արեւելքի քրիստոնէական ներկայութեան պահպանման կարեւորութիւնը, Թաւադրոս պատրիարքը ողջոյնի եւ բարի գալուստի խօսք ըսաւ ինչպէս նաեւ պատմեց Ղպտի ուղղափառ եկեղեցւոյ ծառայութեան մասին աշխարհին մէջ, կարեւորեց այս այցելութիւնը, վերջաւորութեան փոխանակուեցան նուերներով։
Հարուստ հոգեւոր, կրթական եւ մշակութային փորձառութիւններէ ետք, խումբը վերադարձաւ Շարմ էլ-Շէյխ, ուր եւս երկու օր հանգստանալէ ետք վերադարձաւ Իսրայէլ՝ իր հետ տանելով անմոռանալի յիշատակներ, նոր գիտելիքներ եւ գեղեցիկ տպաւորութիւններ։
Այս այցելութիւնը եղաւ ոչ միայն հանգստի եւ ճանաչողութեան առիթ, այլեւ պատմութեան, հաւատքի եւ մշակոյթի հետ կենդանի հաղորդակցութեան եզակի փորձառութիւն Երուսաղէմի Ժառանգաւորաց Վարժարանի եւ Ընծայարանի ուսանողներու համար։
