03/07/2020
എസ്.എസ്.എൽ.സി വിദ്യാർത്ഥികളുടെ
ഗ്രേസ് മാർക്ക് ചേർക്കുന്നതിൽ അപാകത:
എം.എസ്.എഫ് ഡി.ഡി.ഇയെ ഉപരോധിച്ചു
മലപ്പുറം: കഴിഞ്ഞ ദിവസം പ്രസിദ്ധീകരിച്ച എസ്.എസ്.എൽ.സി പരീക്ഷ ഫലത്തിൽ ജില്ലയിലെ വിദ്യാർത്ഥികളുടെ ഗ്രേസ് മാർക്ക് ചേർക്കുന്നതിൽ വീഴ്ച്ച വരുത്തിയ നടപടിയിൽ പ്രതിഷേധിച്ച് ഡി.ഡി.ഇയെ ഉപരോധിച്ചു. സ്‌കൂളുകളിലെ പാഠ്യേതര പരിപാടികളുടെ ഭാഗമായുള്ള ജെ.ആർ.സി, എസ്.പി.സി, സ്കൗട്ട് & ഗൈഡ്, ഐ.ടി ക്ലബ്ബ് ഉൾപ്പെടെയുള്ളവയിൽ അംഗങ്ങളായ വിദ്യാർത്ഥികൾക്കാണ് 20 മുതൽ 25 മാർക്ക് വരെ ലഭിക്കേണ്ടിയിരുന്നത്. എന്നാൽ ജില്ലയിൽ അർഹരായ 300 ഓളം വിദ്യാർത്ഥികൾക്കാണ് ഗ്രേസ് മാർക്ക് അപ്‌ലോഡ് ചെയ്യാത്തത് മൂലം ഉന്നത വിജയം നഷ്ടമായത്. മലപ്പുറം ജില്ലയുടെ വിജയ ശതമാനത്തേയും സാരമായി ബാധിച്ചിട്ടുണ്ട്. ഗുരുതരമായ കൃത്യവിലോപത്തിൽ പ്രതിഷേധിച്ച് എം.എസ്.എഫ് ജില്ലാ കമ്മിറ്റി നടത്തിയ ഡി.ഡി.ഇ ഉപരോധത്തിന് ജില്ലാ പ്രസിഡന്റ് കബീർ മുതുപറമ്പ്, ജനറൽ സെക്രട്ടറി വി.എ.വഹാബ്, ട്രഷറർ പി.എജവാദ്, സെക്രട്ടറിമാരായ നവാഫ് പൂക്കോട്ടൂർ, ടി.പി.നബീൽ എന്നിവർ നേതൃത്വം നൽകി. മലപ്പുറം പോലീസ് സ്റ്റേഷൻ എസ്.ഐ സംഗീത് പുനത്തിലിന്റെ സാന്നിദ്ധ്യത്തിൽ എം.എസ്.എഫ് നേതാക്കൾ നടത്തിയ ചർച്ചയിൽ മുഴുവൻ വിദ്യാർത്ഥികളുടെയും ഗ്രേസ് മാർക്ക് ഇന്ന് തന്നെ അപ്‌ലോഡ് ചെയ്യുമെന്നും വീഴ്ച്ച വരുത്തിയ ഉദ്യോഗസ്ഥർക്കെതിരെ നടപടി സ്വീകരിക്കുമെന്നും ഗ്രേസ് മാർക്ക് ചേർക്കാനുള്ള വിദ്യാർത്ഥികളെ ഫോണിൽ നേരിട്ട് വിളിക്കാമെന്നും റിസൾട്ട് വരുന്ന മുറക്ക് വിദ്യാർത്ഥികളുടെ ഫോട്ടോ സഹിതം വാർത്തമാധ്യമങ്ങളിലൂടെ പ്രസിദ്ധീകരിക്കാമെന്നും പറഞ്ഞതിന്റെ അടിസ്ഥാനത്തിൽ ഉപരോധം അവസാനിപ്പിക്കുകയായിരുന്നു.
