24/12/2025
पाथ्रीकर कॅम्पस, बदनापूर येथे तीन दिवसीय महिला सुरक्षा जनजागृती कार्यक्रमाची सांगता
पाथ्रीकर कॅम्पस, बदनापूर येथे संस्थेचे अध्यक्ष मा. डॉ. देवेशभैया पाथ्रीकर यांच्या संकल्पनेतून तसेच जालना जिल्हा पोलीस अधीक्षक कार्यालयाच्या संयुक्त विद्यमाने आयोजित करण्यात आलेल्या तीन दिवसीय महिला सुरक्षा व स्वसंरक्षण जनजागृती कार्यक्रमाचा समारोप अत्यंत उत्साहपूर्ण वातावरणात पार पडला.
या कार्यक्रमाच्या सांगता समारंभास मा. नितेश बंडगार (न्यायाधीश तथा सचिव, विधी सेवा प्राधिकरण, जालना), संजय सोनवणे (लोकल क्राईम ब्रँच, जालना तसेच महिला स्वसंरक्षण समन्वयक, जालना पोलीस), दत्ता पवार (स्वसंरक्षण प्रशिक्षक – दामिनी पथक) व रुपाली बोर्डे (महिला पोलीस) यांची प्रमुख उपस्थिती लाभली.
कार्यक्रमादरम्यान मा. नितेश बंडगार यांनी विद्यार्थ्यांना न्यायालयीन प्रक्रिया, कायदेशीर हक्क व न्यायालयीन सुविधांबाबत सविस्तर मार्गदर्शन केले. गरज भासल्यास न्यायालयीन उपायांचा प्रभावी वापर करण्याचे आवाहन त्यांनी यावेळी केले.
तसेच संजय सोनवणे यांनी महाराष्ट्र शासन व जालना पोलीस दलाच्या वतीने महिलांच्या सुरक्षेसाठी राबविण्यात येणाऱ्या विविध उपक्रमांची माहिती दिली. यावेळी “सुरक्षा मंत्र – आधुनिक जगात एक पाऊल पुढे” या पुस्तकाचे अनावरण करण्यात आले. तीन दिवसीय शिबिरात सहभागी झालेल्या विद्यार्थिनी व महिला शिक्षकांना जालना पोलीस व महाराष्ट्र शासनाच्या वतीने पुस्तक व प्रमाणपत्रांचे वितरण करण्यात आले. यासोबतच कायदेशीर मदतीसाठी टोल फ्री क्रमांक, ऑनलाईन तक्रार नोंदणीसाठी संकेतस्थळांची माहिती देणारी माहितीपत्रके (प्रॉस्पेक्टस) वितरित करण्यात आली.
या कार्यक्रमाच्या यशस्वी आयोजनासाठी संस्थेच्या व्यवस्थापकीय संचालक विद्या चित्रे मॅडम, आर्टस् सायन्स आणि कॉमर्स कॉलेजचे प्राचार्य डॉ झाकीर पठाण सर, उपप्राचार्य श्रीनिवास मुंगे सर, इन्स्टिट्यूट ऑफ मॅनेजमेंटचे प्राचार्य डॉ अबीद शेख सर, इन्स्टिट्यूट ऑफ इंजिनीयरिंगचे प्राचार्य डॉ पंकज कडू सर, इन्स्टिट्यूट ऑफ नर्सिंगच्या प्राचार्या डॉ दीपाली पवार मॅडम तसेच इन्स्टिट्यूट ऑफ फार्मसीचे प्राचार्य डॉ. सुनिल जायभाये, सर्व शिक्षकवृंद तसेच शिक्षकेतर कर्मचाऱ्यांचे मोलाचे सहकार्य लाभले.
अशा प्रकारे तीन दिवसीय महिला सुरक्षा व स्वसंरक्षण जनजागृती कार्यक्रमाचा अखेरचा दिवस यशस्वीरीत्या पार पडला.
