27/09/2026
विद्यार्थ्यांसाठी मा.कुलगुरू महोदयांचे आवाहन-पत्र.......
प्रिय विद्यार्थी मित्र-मैत्रिणींनो,
आयुष्यातील एका महत्त्वाच्या वळणावर तुम्ही उभे आहात. तुमच्या आई-वडीलांनी तुमच्यासाठी पाहिलेली स्वप्ने तुम्हाला साकार करायची आहेत. जीवनात यशस्वी होऊन आर्थिक व सामाजिकदृष्ट्या स्वतःचे जीवनमान उंचावण्यासाठी आपण मनापासून प्रयत्न, परिश्रम आणि संघर्ष करीत आहात. तुमच्या या संघर्षात तुमचे आईवडील, कुटुंबीय आणि शिक्षक हे नेहमी तुमच्या सोबत आहेत. त्यांच्याशी असलेला तुमचा संवाद तुम्हाला सदोदित प्रेरित करत राहील.
नियमित अभ्यास, सराव केल्यास परीक्षा व करिअर यांची भीती तुमच्या मनात घर करणार नाही. महत्त्वाचे म्हणजे परीक्षेतील यश वा अपयश हा तुमच्या जीवनातील एक लहानसा भाग आहे. त्यावर तुमचे पुढील संपूर्ण आयुष्य अवलंबून नाही हे तुम्ही नीट लक्षात घ्यायला हवे. परीक्षेतील अपयश म्हणजे जीवनातील अपयश नव्हे. शिक्षणाचा उद्देश केवळ परीक्षेत चांगले गुण मिळवण्यापुरता, उत्तीर्ण होण्यापुरता असू नये. आपले व्यक्तिमत्त्व निरोगी व सुदृढ कसे राहील यासाठीही जाणीवपूर्वक प्रयत्न करा. स्वतःचे मानसिक स्वास्थ्य चांगले कसे राहील यावर भर द्यावा. पुस्तकांचे वाचन, संगीत ऐकणे, खेळ खेळणे, विविध छंद जोपासणे, जीवाभावाच्या नातेवाईकांशी व मित्र-मैत्रिणींशी हितगुज, योगासने, ध्यानधारणा, प्राणायाम आणि विशेषतः आपले आई-वडील, भाऊ-बहिणी, शिक्षक, मित्र परिवार यांचेशी सतत संवाद राखणे, कारण बऱ्याच समस्यांची तीव्रता ही बोलल्याने, चर्चा केल्याने, संवाद साधल्याने कमी होण्यास मदत होते किंबहुना प्रश्नही सुटतात.
आपल्या आयुष्याचे ध्येय ठरवा. त्या ध्येयापर्यंत पोहचण्यासाठी परिश्रम घ्या, त्यात सातत्य ठेवा, स्वतःला सक्षम बनविण्यासाठी योग्य ते कौशल्य आत्मसात करा. अमली पदार्थ व सोशल मीडिया यांच्या व्यसनांपासून आणि नैराश्य, नकारात्मकता, एकटेपणा यांच्यापासून दूर राहा. मानसिक व शारीरिक तंदुरुस्तीचा मंत्र जपा.
आपल्या यशस्वी जीवनासाठी मनःपूर्वक शुभेच्छा !
प्रा. विजय ल. माहेश्वरी
कुलगुरू
कवयित्री बहिणाबाई चौधरी उत्तर महाराष्ट्र विद्यापीठ, जळगाव
