23/09/2026
കെ. കെ. മമ്മുണ്ണി മൗലവി അല്ലാഹുവിലേക്ക് യാത്രയായി...
إنا لله وإنا إليه راجعون.
നെറ്റിത്തടത്തിൽ കഠിനാധ്വാനത്തിന്റെ വിയർപ്പുതുള്ളികളുമായി, കർമ്മസാഫല്യത്തിന്റെ പ്രസന്നവദനത്തോടെയാണ് ധന്യമായ അന്ത്യ യാത്ര.
അനാഥ മക്കളുടെ പിതാവ്, അഗതികളുടെയും അശരണരുടെയും അത്താണി, രക്ഷിതാക്കളില്ലാതെപോയ ആയിരങ്ങളുടെ 'വലിയ്യ്' അഥവാഏക രക്ഷാധികാരി, തലമുറകളുടെയും ഗുരുപരമ്പരകളുടെയും ഗുരുനാഥൻ! പ്രശാന്തസുന്ദരമായ മൗനത്താൽ വാക്കുകൾക്കപ്പുറം ഭക്തിയുടെയും അറിവിന്റെയും കനിവിന്റെയും കരുണയുടെയും അമരസ്മാരകങ്ങൾ പടുത്തുയർത്തിയ മഹാമനീഷി. ദക്ഷിണ കേരളം — വിശിഷ്യ, കൊല്ലം ഇസ്ലാമിയ കോളേജ് ഉൾപ്പെടെയുള്ള സ്ഥാപനങ്ങൾ മൗലവിക്ക് ഒരു വികാരമായിരുന്നു. അതിനുമപ്പുറം, ദക്ഷിണ കേരളത്തിലെ 'അൽ ജാമിഅ' എന്നതായിരുന്നു അദ്ദേഹത്തിന്റെ മഹാസ്വപ്നം.
കൊല്ലം ഇസ്ലാമിയ കോളേജ്, നവജീവൻ അഭയകേന്ദ്രം, ഗ്രെയ്‌സ് ഇന്റർനാഷണൽ സ്കൂൾ, അൽ ബയാൻ ഖുർആൻ അക്കാദമി... തുടങ്ങി എല്ലാത്തിലും മൗലവിയുടെ പകലിലെ വിയർപ്പുതുള്ളികളും പാതിരാവിലെ പ്രാർത്ഥനാമന്ത്രങ്ങളുമുണ്ട്.
അസ്ഥികളിലെ മാംസത്തേക്കാൾ പതിന്മടങ്ങ് ഹൃദയത്തിൽ സ്വപ്നങ്ങൾ കൊണ്ടുനടന്ന പ്രചോദകമായ ജീവിതം! ചെറുപുഞ്ചിരി കൊണ്ട് ഹൃദയം കീഴടക്കുന്ന മാസ്മരിക വ്യക്തിത്വം.
"എന്റെ മക്കളേ..." എന്ന, ലുഖ്മാൻ അലൈഹിസ്സലാമിന്റെ "യാ ബുനയ്യ" എന്ന തനിമയാർന്ന വിളി. എട്ടു പതിറ്റാണ്ടിന്റെ ജീവിതം കൊണ്ട് എട്ടു നൂറ്റാണ്ടിന്റെ കർമ്മഗോപുരം തീർത്ത പ്രശാന്തസുന്ദര സാഗരം. പടപ്പുകൾക്കു വേണ്ടി പടച്ചവൻ സൃഷ്ടിച്ച കരുണയുടെ പൂമരം!
കാലത്തിനുമേൽ അത്യപൂർവ്വമായി മാത്രം പടർന്നുപന്തലിക്കുന്ന വിശുദ്ധദർശനത്തിന്റെ ' *ആൾമരം* '.മമ്മുണ്ണി മൗലവി എന്ന കടൽ അടങ്ങി; പക്ഷേ, ഓർമ്മകളിൽ ആ തിരമാലകൾ അടങ്ങില്ല...
അർഹമുർറാഹിമീനായ നാഥാ,
ഞങ്ങളുടെ മൗലവിയെ
നീ സ്വീകരിക്കേണമേ... സ്വർഗ്ഗം നൽകി അനുഗ്രഹിക്കേണമേ...
اللهم ادخله الجنة مع النبيين و الصديقين و الشهداء و الصالحين.
ടി. ഇ. എം. റാഫി വടുതല
കൊല്ലം ഇസ്ലാമിയ കോളേജ്.
