Swalath Nagar

21/09/2026

ഈയിടെ ഒരു പ്രവാസി സുഹൃത്തുമായി സംസാരിച്ചപ്പോൾ അയാൾ പങ്കുവെച്ചത് വളരെ ആശ്ചര്യത്തോടെയാണ് കേട്ടത്:
"പണ്ടത്തെപ്പോലെ ഇന്നത്തെ പ്രവാസികൾ ഭാവിയിലേക്ക് സമ്പാദ്യം കരുതിവെക്കാറില്ല. കിട്ടുന്നത് അപ്പോൾത്തന്നെ ചെലവഴിക്കുന്നു; സാധിക്കുന്നവരൊക്കെ കുടുംബത്തെ ഒപ്പം കൂട്ടുന്നു."എന്തുകൊണ്ടാണ് ഇത്തരം ഒരു മാറ്റമെന്ന് തിരക്കിയപ്പോഴാണ് കൗതുകകരവും ഒപ്പം ചിന്തനീയവുമായ ഒരു കാര്യം മനസ്സിലായത്. ചെറുപ്പത്തിലേ മരണപ്പെടുന്നവരുടെ എണ്ണം കൂടുന്നു എന്ന തോന്നൽ ഇന്ന് പലരെയും വല്ലാതെ സ്വാധീനിച്ചിരിക്കുന്നു. "ജീവിതം നൈമിഷികമാണ്, മരിക്കുന്നതിന് മുൻപ് പരമാവധി ആസ്വദിക്കണം, പ്രിയപ്പെട്ടവരോടൊപ്പം സമയം ചെലവഴിക്കണം" എന്നൊരു മാനസികാവസ്ഥയിലേക്ക് പുതുതലമുറയിലെ വലിയൊരു വിഭാഗം എത്തിച്ചേർന്നിരിക്കുന്നു.

പ്രിയപ്പെട്ടവരോടൊപ്പം ജീവിക്കാനും അവർക്കായി ചെലവഴിക്കാനും ആഗ്രഹിക്കുന്നത് സ്വാഭാവികമാണ്. എന്നാൽ, ഈ ചിന്ത പലപ്പോഴും അതിരുകടന്ന ആസ്വാദനങ്ങളിലേക്കും ആഘോഷങ്ങളിലേക്കും മനുഷ്യരെ വഴിതിരിച്ചുവിടുന്നു. ജീവിതം വെറും നൈമിഷിക സുഖങ്ങൾ മാത്രമാണെന്ന ചിന്തയിലേക്ക് അവരെ അത് എത്തിക്കുന്നു. ഈ വഴിതെറ്റിയ കാഴ്ചപ്പാടിനെ ആരെങ്കിലും തിരുത്താൻ ശ്രമിച്ചാൽ അവരെ വെറുപ്പോടെ കാണാനും, "എന്റെ ജീവിതം, എന്റെ ഇഷ്ടം" എന്ന ഇടുങ്ങിയ ചിന്താഗതിയിലേക്ക് ഒതുങ്ങാനും ഇത് കാരണമാകുന്നു. ആത്യന്തികമായി, വ്യക്തിപരമായും സാമൂഹികമായും മനുഷ്യനെ ഒറ്റപ്പെടുത്താനും "ഇനിയെന്ത്?" എന്ന ചോദ്യത്തിനു മുന്നിൽ കടുത്ത നിരാശ സമ്മാനിക്കാനുമേ ഇത്തരം ചിന്തകൾ ഉപകരിക്കൂ.

അതുകൊണ്ടുതന്നെ ജീവിതത്തിന് ചില ചിട്ടകളും സ്വയം ഏർപ്പെടുത്തുന്ന നിയന്ത്രണങ്ങളും അത്യന്താപേക്ഷിതമാണ്. ഇത്തരത്തിൽ നമ്മെത്തന്നെ സ്വയം തിരുത്താനും പുനർവിചിന്തനം നടത്താനും ഏറ്റവും ഉചിതമായ ഇടങ്ങളാണ് ധാർമിക സംഘടനകൾ. നാടുമായുള്ള ബന്ധം നിലനിർത്താനും മൂല്യബോധം കാത്തുസൂക്ഷിക്കാനും സംഘടന പ്രവർത്തനങ്ങൾ പ്രവാസികൾക്ക് എന്നും വലിയൊരു താങ്ങാണ്.

അനാവശ്യ ചിന്തകളും ലക്ഷ്യമില്ലാത്ത പണച്ചെലവും മനുഷ്യനെ അധാർമികതയിലേക്ക് നയിക്കുമ്പോൾ, അതിനെ സ്വയം പ്രതിരോധിക്കാൻ നമുക്ക് കഴിയണം. രിസാല സ്റ്റഡി സർക്കിൾ (RSC) 'Be in, Be more' എന്ന പ്രമേയത്തിൽ നടത്തുന്ന അംഗത്വ ക്യാമ്പയിൻ പ്രവാസികളായ യുവാക്കൾക്കും വിദ്യാർത്ഥികൾക്കും മുന്നിൽ തുറന്നിടുന്നത് അത്തരമൊരു വലിയ സാധ്യതയാണ്. ആ ധാർമിക പരിസരത്തു ചേർന്നുനിൽക്കാനും ജീവിതം മൂല്യവത്താക്കാനും നമുക്ക് സാധിക്കട്ടെ. അല്ലാഹു ഏവരെയും സന്മാർഗത്തിൽ ഉറപ്പിച്ചു നിർത്തട്ടെ. ആമീൻ.

Sayyid Ibraheemul Khaleel Al Bukhari

20/09/2026

هيا بنا(٧):السيد إبراهيم الخليل البخاري - صلة الرحم من أهم الشعائر الإسلامية

18/09/2026

ഉമ്മയുടെ മൂന്നായിരുന്നു ഇന്നലെ. ഉമ്മ വിടപറഞ്ഞതിനു ശേഷം വീട്ടിലേക്കും സിയാറത്തിനുമായി ആയിരങ്ങളാണ് എത്തിയത്. നാട്ടിലും വിദേശത്തും ഉമ്മാക്കായി പ്രാർത്ഥനാ മജ്‌ലിസുകളും ജനാസ നമസ്കാരങ്ങളും സംഘടിപ്പിച്ച വിവരം സ്നേഹത്തോടെ പലരും വിളിച്ചറിയിക്കുന്നുണ്ട്. ലോകത്തിന്റെ പല കോണുകളിലുള്ള, ഒരിക്കൽപോലും നേരിൽ കണ്ടിട്ടില്ലാത്ത മനുഷ്യർ ഇങ്ങനെയൊക്കെ ചേർത്തുപിടിക്കുന്നത് കാണുമ്പോൾ ഉമ്മയെ ഓർത്ത് അഭിമാനവും സന്തോഷവും തോന്നുന്നു. ഉമ്മ ഞങ്ങളെ നല്ല രീതിയിൽ വളർത്തിക്കൊണ്ടുവന്നതുകൊണ്ടാണല്ലോ ഈ സ്നേഹവും സൗഭാഗ്യങ്ങളുമെല്ലാം തേടിയെത്തുന്നത്. ഞങ്ങൾ മക്കളിൽ കാണുന്ന ഏതൊരു നന്മയും പ്രിയപ്പെട്ട ഉപ്പയും ഉമ്മയും പകർന്നുതന്നതാണ്.

ഗുരുത്വദോഷം വരാതിരിക്കാൻ ഉമ്മ ഞങ്ങളെ അത്രമേൽ ശ്രദ്ധിച്ചിരുന്നു. "ഗുരുത്വദോഷം എന്നത് കടലോളം വലുതായി വരണമെന്നില്ല, കടുകുമണിയേക്കാൾ ചെറുതുമാകാം" എന്ന് ഉമ്മ എപ്പോഴും ഓർമിപ്പിക്കുമായിരുന്നു. മറ്റൊരാൾ സംസാരിക്കുമ്പോൾ ഇടക്കുകയറി സംസാരിക്കാതിരിക്കുക, ആരോടും അപമര്യാദയായി പെരുമാറാതിരിക്കുക തുടങ്ങിയ ചെറിയ കാര്യങ്ങളിൽ പോലും പിഴവുകൾ വരരുതെന്ന് ഉമ്മയ്ക്ക് നിർബന്ധമുണ്ടായിരുന്നു. പഠനകാലത്ത് ഞങ്ങളുടെ സ്കൂൾ ബാഗുകളും പുസ്തകങ്ങളുമെല്ലാം ദിവസവും പരിശോധിക്കും. വല്ല പുതിയ സാധനങ്ങളും കണ്ടാൽ "ഇതെങ്ങനെ കിട്ടി? ആര് തന്നു? എന്തിന് തന്നു?" എന്നെല്ലാം ചോദിച്ചറിയും. ഉടമസ്ഥന്റെ സമ്മതമില്ലാതെ മറ്റൊരാളുടെ വസ്തുക്കൾ എടുത്താലുണ്ടാകുന്ന ഭവിഷ്യത്തുകളെക്കുറിച്ച് ഉമ്മ എപ്പോഴും ജാഗ്രതപ്പെടുത്തിയിരുന്നു.

എന്നാൽ, ഞങ്ങൾ വളർന്ന് വിവാഹിതരായതിനു ശേഷം ഒരിക്കൽപോലും ഞങ്ങളുടെ കുടുംബജീവിതത്തിൽ അനാവശ്യമായി ഇടപെടാനോ ശാസിക്കാനോ ഉമ്മ നിന്നിട്ടില്ല. സ്വന്തമായി തീരുമാനങ്ങളെടുക്കാനുള്ള പക്വത ഞങ്ങൾക്കുണ്ടെന്ന പൂർണവിശ്വാസം ഉമ്മയ്ക്കുണ്ടായിരുന്നു. അതുകൊണ്ടുതന്നെ മക്കൾക്കോ മരുമക്കൾക്കോ ഉമ്മയെക്കുറിച്ച് ഒരു പരാതിയും പറയാനില്ല; "ഉമ്മാന്റെ വസ്ത്രം പോലും തങ്ങൾക്ക് അലക്കിക്കൊടുക്കാൻ കിട്ടാറില്ല" എന്ന പരിഭവമേ അവർക്കുള്ളൂ. "എനിക്ക് ആരോഗ്യമുള്ള കാലത്തോളം എന്റേതൊന്നും നിങ്ങൾ ചെയ്യേണ്ടതില്ല" എന്ന് ഉമ്മ അത്രമേൽ ചട്ടം കെട്ടിയിരുന്നു.

ഭക്ഷണത്തെ ഒരിക്കലും വിലകുറച്ചുകാണരുതെന്നും ഉമ്മ ഞങ്ങളെ പഠിപ്പിച്ചു. മൂന്നാം ക്ലാസിൽ പഠിക്കുമ്പോഴുള്ള ഒരു സംഭവം ഇന്നും ഓർമയിലുണ്ട്. അന്ന് സ്കൂളിൽ പോകുന്ന നേരം വീട്ടിൽ തയ്യാറാക്കിയിരുന്നത് തോട്ടിൽനിന്ന് കിട്ടിയ മീൻ കൊണ്ടുള്ള കറിയായിരുന്നു. തോട്ടുമീന് സ്വാദ് കുറവായിരിക്കുമെന്ന തോന്നലിൽ ഞാൻ മുഖം തിരിച്ചു പറഞ്ഞു: “എനിക്ക് വേണ്ട...”
ഒട്ടും മടിക്കാതെയായിരുന്നു ഉമ്മയുടെ മറുപടി: "എന്നാൽ ഉമ്മാന്റെ കുട്ടി പൊയ്ക്കോളൂ..."
ഞാൻ സ്കൂളിലേക്ക് പോയി. വൈകുന്നേരം നല്ല വിശപ്പോടെയാണ് തിരിച്ചെത്തിയത്. അടുക്കളയിൽ നല്ല പുഴമീൻകറിയൊക്കെ തയ്യാറാക്കിവെച്ചിട്ടുണ്ട്. കൊതിയോടെ ചോറുണ്ണാനിരുന്ന എനിക്ക് മുന്നിലേക്ക് ഉമ്മ ഉച്ചയ്ക്ക് ബാക്കിവെച്ച അതേ തോട്ടുമീൻ കറി തന്നെ വിളമ്പി. പക്ഷേ, എന്തൊരു രുചിയായിരുന്നു അതിന്! വിശപ്പിന്റെ കാഠിന്യം കൊണ്ടാവാം, ഞാനാ ഭക്ഷണം കൊതിയോടെ കഴിച്ചുതീർത്തു.
കഴിച്ചുകഴിഞ്ഞപ്പോൾ ഉമ്മ എന്നോട് ശാന്തമായി പറഞ്ഞു: “നിങ്ങളൊക്കെ നാളെ പല നാടുകളിലും പോകേണ്ടവരാണ്; പല നാട്ടിലെയും ഭക്ഷണം കഴിക്കേണ്ടിവരും. അതുകൊണ്ട് ജീവിതത്തിൽ എല്ലാം ശീലിച്ചേ മതിയാകൂ.”
ഒരു തോട്ടുമീൻ കറിയിലൂടെ ഉമ്മ നൽകിയ ആ ജീവിതപാഠത്തിന്റെ ആഴം എത്രയെന്ന് ഞാൻ പലപ്പോഴും ആലോചിക്കാറുണ്ട്. ഇതിനകം അറുപതോളം രാജ്യങ്ങളിൽ ഞാൻ സഞ്ചരിച്ചുകഴിഞ്ഞു. പല ദേശങ്ങളിലെ വിഭവങ്ങൾ കഴിച്ചിട്ടുണ്ട്; ചിലപ്പോഴൊക്കെ ഭക്ഷണംപോലും കിട്ടാത്ത സന്ദർഭങ്ങളിലൂടെ കടന്നുപോയിട്ടുണ്ട്. എന്നാൽ, അത്തരം പ്രതിസന്ധികളിലൊന്നും തളരാതെ മുന്നോട്ടുപോകാൻ എന്നെ പ്രാപ്തനാക്കിയത് ഉമ്മ അന്ന് പകർന്നുനൽകിയ പാഠങ്ങളാണ്.

ഇനിയുമേറെയുണ്ട് ഉമ്മയെക്കുറിച്ച് പറയാൻ... സ്വന്തം ഉമ്മയെക്കുറിച്ച് പെട്ടെന്ന് പറഞ്ഞുതീർക്കാൻ ആർക്കാണ് സാധിക്കുക! നാളെ നമ്മുടെ മക്കൾക്ക് ഓർത്തെടുത്ത് അഭിമാനിക്കാനും തലമുറകൾക്ക് മാതൃകയാക്കാനും സാധിക്കുന്ന ഉത്തമമായ ജീവിതം നയിക്കാൻ സർവ്വശക്തൻ നമുക്ക് തൗഫീഖ് നൽകട്ടെ, ആമീൻ.

Sayyid Ibraheemul Khaleel Al Bukhari

17/09/2026

16/09/2026

Heartfelt *CONGRATULATIONS 🎓✨

Dr. C. K. M. Abdul Samad Adany
on successfully defending
his doctoral thesis.

15/09/2026

വിടപറഞ്ഞത് പണ്ഡിതര്‍ക്ക് ജന്മം നല്‍കിയ മാതൃകാമഹതി

| പ്രമുഖ പണ്ഡിതനും സമസ്ത സെക്രട്ടറിയും കേരള മുസ്ലിം ജമാഅത്ത് സംസ്ഥാന ജനറല്‍ സെക്രട്ടറിയും മഅ്ദിന്‍ അക്കാദമി ചെയര്‍മാനുമായ സയ്യിദ് ഇബ്റാഹീമുല്‍ ഖലീല്‍ അല്‍ ബുഖാരി തങ്ങളടക്കം 5 പ്രമുഖ പണ്ഡിതരുടെ മാതാവായ സയ്യിദത്ത് ഫാത്വിമ ഇമ്പിച്ചി ബീവി(93) ഇനി ഓര്‍മകളില്‍. പ്രമുഖ സൂഫി വര്യനായിരുന്നു തൃക്കരിപ്പൂര്‍ സയ്യിദ് ശാഹുല്‍ ഹമീദ് തങ്ങളുടെ മകളും പ്രമുഖ പണ്ഡിതനായിരുന്ന കടലുണ്ടി സയ്യിദ് അഹ്‌മദുല്‍ ബുഖാരിയുടെ പത്നിയുമാണ്. മരണവാര്‍ത്തയറിഞ്ഞ് സമൂഹത്തിന്റെ നാനാതുറകളില്‍നിന്നുള്ള ആയിരങ്ങളാണ് കടലുണ്ടിയിലേക്ക്... Read more at https://www.sirajlive.com/saiyyadath-fatheema-imbichi-beevi-passed-away.html

15/09/2026

പ്രിയപ്പെട്ട ഉമ്മ വിടപറഞ്ഞു. ജീവിതത്തിലെ സകല പ്രതിസന്ധികളിലും പതറാതെ പിടിച്ചുനിൽക്കാൻ തുണയായിരുന്ന വലിയൊരു തണലാണ് ഇല്ലാതായത്. വേവലാതികളും സങ്കടങ്ങളും ചെന്ന് പറയാനും ഹൃദയം തുറന്ന് ദുആ ചെയ്യിപ്പിക്കാനും ഓടിയെത്തിയിരുന്നത് ആ സന്നിധിയിലേക്കായിരുന്നു. ദീർഘയാത്രകൾക്ക് ഇറങ്ങുമ്പോൾ ഉമ്മയുടെ പൊരുത്തം വാങ്ങി, ആ കൈകാലുകളിൽ ചുംബിച്ചല്ലാതെ പടിയിറങ്ങാറില്ല. ജീവിതത്തിലെ ഏറ്റവും വലിയ അനുഗ്രഹമായിരുന്നു അത്. ഇനി വീട്ടിൽ ഉമ്മയില്ല എന്ന യാഥാർഥ്യം വേദനയുണ്ടാക്കുന്നതാണ്.

എങ്കിലും, ഉമ്മ വലിയ ഭാഗ്യവതിയായിരുന്നു. ജീവിതകാലം മുഴുവൻ നാഥന്റെ വിധിയെ പൂർണ്ണമായി ഉൾക്കൊണ്ട, മാതൃകാപരമായ ജീവിതം നയിച്ച ഒരു തികഞ്ഞ മാതൃത്വം. വലിയ പ്രയാസങ്ങളെയും പരീക്ഷണങ്ങളെയും അചഞ്ചലമായ മനക്കരുത്ത് കൊണ്ടാണ് ഉമ്മ നേരിട്ടത്. പന്ത്രണ്ട് പ്രസവിച്ചുട്ടുണ്ട്. ഓരോ ഗർഭകാലത്തും കഠിനമായ ഛർദ്ദിയും ക്ഷീണവും ഉമ്മയെ തളർത്തിയിരുന്നു. വീട്ടുജോലികൾക്ക് ഒരു സഹായി പോലുമില്ലാതിരുന്നിട്ടും ആ പരാധീനതകളൊന്നും ഉമ്മ വകവെച്ചതേയില്ല. ഒരുപാട് മക്കളെ വളർത്തുന്നതിലെ ഭാരം ചൂണ്ടിക്കാട്ടിയവരോട് ഉമ്മ നൽകിയ മറുപടിയിലുണ്ട് അവരുടെ തവക്കുലിന്റെ കരുത്ത്.

"ഭൂമിക്ക് മരം ഭാരമല്ല; മരത്തിന് കായ്കനികളും ഭാരമാവില്ലല്ലോ... അതുപോലെ ഒരുമ്മയ്ക്കും മക്കൾ ഭാരമാവില്ല. എന്റെ റബ്ബ് എനിക്ക് നൽകുന്ന മക്കളെ എത്രയായാലും ഞാൻ ഇരുകൈയും നീട്ടി സ്വീകരിക്കും."

രണ്ട് ആണും നാല് പെണ്ണുമടക്കം ആറുമക്കൾ മരണപ്പെടുന്നത് കാണേണ്ടിവന്നിട്ടുണ്ട് ഉമ്മക്ക്. എന്നിട്ടും ഒരു തുള്ളി കണ്ണീരുപോലും ആ കവിളിലൂടെ ഇറ്റുവീഴുന്നത് ആരും കണ്ടിട്ടില്ല. അത്രത്തോളം ക്ഷമയുണ്ടായിരുന്നു. അതിനാൽ കൂടിയായിരിക്കണം സബൂറിനാണ് സുൽത്വാൻ പട്ടം എന്നത് ഉമ്മയുടെ സ്ഥിരം പ്രയോഗങ്ങളിലൊന്നായി മാറിയത്.

ഒരു റബീഉൽ അവ്വൽ മാസത്തിൽ മൗലിദ് സദസ്സിലേക്ക് വീട്ടിൽ നിന്നിറങ്ങിയതായിരുന്നു പ്രിയപ്പെട്ട ഉപ്പ. പിന്നീട് ഉപ്പയുടെ മയ്യിത്താണ് തിരികെ വീട്ടിലെത്തിയത്. എന്റെ വിവാഹ ഒരുക്കങ്ങൾക്കിടയിലാണ് ഉപ്പ യാത്രയാകുന്നത്. ആ സന്ദർഭത്തിലും കുടുംബത്തെ ചേർത്തുപിടിച്ച് ഉമ്മ കാണിച്ച മനക്കരുത്ത് അത്ഭുതപ്പെടുത്തുന്നതായിരുന്നു. "ഒരാളും കരയരുത്" എന്ന് മക്കളെ ഓർമ്മിപ്പിച്ച ഉമ്മ, അവരെ ഖുർആൻ പാരായണത്തിലേക്കും പ്രാർത്ഥനകളിലേക്കും വഴിതിരിച്ചുവിട്ടു. തുടർന്ന് കുടുംബത്തിന്റെ ചുമതല ഏറ്റെടുക്കാൻ ഞാനും ഇക്കാക്കയും മാത്രമായിരുന്നു ആണുങ്ങളായി ഉണ്ടായിരുന്നത്. സങ്കടങ്ങൾ ഉള്ളിലൊതുക്കി ഉമ്മ അന്ന് പറഞ്ഞു:
"ഉപ്പ നല്ല നിലയ്ക്ക് മടങ്ങി. ഇനി നിങ്ങളാണ് കാര്യങ്ങൾ നോക്കേണ്ടത്; അള്ളാഹു നിങ്ങൾക്ക് ഹൈറും ബറകത്തും തരട്ടെ." ആ ഹൃദയം തൊട്ട പ്രാർത്ഥനയായിരുന്നു പിൽക്കാലത്ത് ഞങ്ങളുടെ സകല വിജയങ്ങൾക്കും നിദാനം.

കുട്ടിക്കാലത്ത് നിരന്തരം രോഗബാധിതനായിരുന്ന എന്നെ അളവറ്റ സ്നേഹവും കരുതലും നൽകി ജീവിതത്തിലേക്ക് തിരിച്ചുകൊണ്ടുവന്നത് ഉമ്മയാണ്. ഒരുപക്ഷേ എന്റെ ശരീരത്തിന് വൈകല്യം സംഭവിച്ചേക്കാം എന്ന് വൈദ്യന്മാർ സംശയിച്ചപ്പോഴും ഉമ്മ പതറിയില്ല. ഒടുവിൽ ഒരു പോറലുമേൽക്കാതെ എന്നെ വാരിയെടുത്തത് ആ അസാധാരണമായ ശുശ്രൂഷയായിരുന്നു.

സ്വന്തമായി അധ്വാനിച്ച് ജീവിക്കണമെന്ന നിർബന്ധബുദ്ധിയുള്ള സ്ത്രീയായിരുന്നു ഉമ്മ. തയ്യൽവേലയിൽ അതീവ നൈപുണ്യം പുലർത്തിയിരുന്ന ഉമ്മ തുന്നിയ കുപ്പായങ്ങളും നെയ്തെടുത്ത തൊപ്പികളും അക്കാലത്ത് വലിയങ്ങാടിയിലെ കടകളിലും നാട്ടിൻപുറങ്ങളിലും ഏറെ ശ്രദ്ധേയമായിരുന്നു. പാചകത്തിൽ പുതുമകൾ പരീക്ഷിക്കാനും വീട്ടിലെത്തുന്ന അതിഥികളെ ഹൃദ്യമായി സൽക്കരിക്കാനും ഉമ്മ വലിയ താല്പര്യം കാണിച്ചു. "കൊണോം കൊശിയുമില്ലെങ്കിലും വീട്ടിലെത്തുന്നവർക്ക് ഉള്ളത് വെച്ചുവിളമ്പണം"എന്നതായിരുന്നു ഉമ്മയുടെ വരികളെങ്കിലും, ഉമ്മയുടെ കൈപ്പുണ്യത്തിന് വല്ലാത്തൊരു സ്വാദായിരുന്നു.

വീട്ടുജോലികളിലും അടുക്കളയിലുമെല്ലാം മക്കളെയും പങ്കാളികളാക്കുന്ന രീതിയായിരുന്നു ഉമ്മയുടേത്. പച്ചക്കറി അരിയുന്നതിലും അരി കഴുകുന്നതിലുമെല്ലാം ഉമ്മ ഞങ്ങളെ ഒപ്പം കൂട്ടി. ഉത്തരവാദിത്തബോധമുള്ള മാതൃകാ കുടുംബജീവിതം നയിക്കാൻ പിൽക്കാലത്ത് ഞങ്ങൾക്ക് വലിയ മുതൽക്കൂട്ടായത് ആ പരിശീലനമാണ്.

മക്കളുടെ ഓരോ ചലനങ്ങളും ഉമ്മയുടെ സൂക്ഷ്മദൃഷ്ടിയിൽ പതിയണമായിരുന്നു. മറ്റുള്ളവരുടെ വസ്തുവകകൾ അവരുടെ പൂർണ്ണസമ്മതമില്ലാതെ ഒരിക്കലും എടുക്കരുതെന്ന വലിയ പാഠം കുട്ടിക്കാലത്തേ ഞങ്ങളുടെ മനസ്സിൽ പതിപ്പിച്ചു. അയൽവാസിയുടെ പറമ്പിൽ നിന്ന് വീണുകിട്ടിയ മാങ്ങയുമായി ഓടിയെത്തിയ ഏഴുവയസ്സുകാരനായ എന്നോട്, "ആരാന്റെ മാങ്ങ ചോദിക്കാതെ തിന്നാൽ പടച്ചോൻ പൊറുക്കൂല, നമ്മുടെ ദുആക്ക് ഉത്തരം കിട്ടൂല മോനേ..." എന്ന് പറഞ്ഞ് അത് തിരികെ ഏൽപ്പിക്കാൻ പഠിപ്പിച്ച ഉമ്മയുടെ പാഠങ്ങളെങ്ങനെ മറക്കാൻ! മദ്രസയിൽ നിന്ന് കിട്ടുന്ന രണ്ട് ഈത്തപ്പഴം പോലും തുല്യമായി പകുത്തു നൽകാൻ പരിശീലിപ്പിച്ചതിലൂടെയാണ് പങ്കുവെക്കലിന്റെയും സഹജീവിസ്നേഹത്തിന്റെയും ബാലപാഠങ്ങൾ ഉമ്മ ഞങ്ങളുടെ ജീവിതത്തിലേക്ക് പകർന്നുതന്നത്.

ഒരു മാതൃകയായി മുന്നിൽ നടന്ന്, നന്മകളിലേക്ക് വഴിനടത്തി, ഞങ്ങൾക്ക് വേണ്ടിയല്ലാതെ മറ്റൊന്നിനും ആഗ്രഹിക്കാതെ ജീവിച്ച പ്രിയപ്പെട്ട ഉമ്മ നാഥന്റെ സന്നിധിയിലേക്ക് മടങ്ങിയിരിക്കുന്നു. അള്ളാഹു ഉമ്മയുടെ പരലോകജീവിതം പ്രകാശപൂർണ്ണമാക്കട്ടെ; സ്വർഗ്ഗത്തിൽ അവർക്ക് ഉന്നതമായ സ്ഥാനം നൽകി അനുഗ്രഹിക്കുമാറാകട്ടെ... ആമീൻ.

Sayyid Ibraheemul Khaleel Al Bukhari

14/09/2026

14/09/2026

وَبَشِّرِ الصَّبِرِينَ الَّذِينَ إِذَا أَصَبَتْهُم مُّصِيبَةٌ قَالُوا
إنا لله وانا المَجِعونَ
മഅ്ദിൻ അക്കാദമി ചെയർമാൻ ബദ്റുസാദാത്ത് സയ്യിദ് ഇബ്റാഹീമുൽ ഖലീൽ അൽ ബുഖാരിയുടെ പ്രിയപ്പെട്ട മാതാവ് സയ്യിദത്ത് ഫാത്വിമ ഇമ്പിച്ചി ബീവി ഹജ്ജുമ്മ എന്ന മഹതി വഫാതായിരിക്കുന്നു.
മഗ്ഫിറത്തിന് വേണ്ടി പ്രാർത്ഥിക്കാനും
മയ്യിത്ത് നിസ്കരിക്കാനും അഭ്യർത്ഥിക്കുന്നു

മയ്യിത്ത് നിസ്കാരം 15.09.2026 (ചൊവ്വ) രാവിലെ 9.00ന് കടലുണ്ടി കോർണിഷ് മുഹ്യുദ്ധീൻ ജുമുഅ മസ്ജിദിൽ
www.madin.edu.in

14/09/2026

മയ്യിത്ത് നിസ്കാരം നാളെ രാവിലെ 9.00 ന് കടലുണ്ടി കോർണിഷ് മുഹ്‌യുദ്ദീൻ മസ്ജിദിൽ.